Job 33

₁Maar, Job, jy moet nou

luister na my,

jy moet alles hoor wat ek sê.

₂Kyk goed,

ek maak my mond oop,

die tong in my mond praat.

₃Ek sal baie eerlik wees,

ek sal duidelik sê wat ek weet.

₄God die Almagtige het my gemaak,

Hy het vir my lewe gegee,

Hy het asem gegee wat my laat lewe.

₅Job, jy moet my antwoord as jy kan,

jy moet gereedmaak om te praat.

₆Kyk, wanneer ons saam

voor God staan,

dan is ek dieselfde soos jy,

Hy het my ook van klei gemaak.

₇Daarom, jy moenie bang wees vir my nie,

ek sal dit nie vir jou baie moeilik maak nie.

₈Ek het goed gehoor wat jy sê,

ek kan jou woorde nou nog onthou.

₉Jy het gesê: ‘Ek is onskuldig,

ek het niks verkeerd gedoen nie,

my hande is skoon,

ek het nie sonde gedoen nie.

₁₀Maar God is téén my,

Hy maak of ek sy vyand is.

₁₁Hy sit my voete in 'n blok,

Hy sien alles raak wat ek doen.’

₁₂Maar Job, ek sê vir jou:

Jy is verkeerd wanneer jy dit sê.

God is groot,

'n mens kan nie met Hom stry nie.

₁₃Hoekom beskuldig jy vir God?

Hoekom sê jy dat Hy nie

wil antwoord nie?

₁₄Want God praat weer en weer,

maar mense luister nie.

₁₅God praat in die nag,

wanneer mense vas slaap,

Hy wys vir hulle dinge

wanneer hulle droom.

₁₆Hy sê duidelik vir hulle wat Hy wil hê,

Hy waarsku hulle, en hulle word bang.

₁₇Hy wil hê hulle moet ophou

om verkeerd te doen,

hulle moet ophou om hoogmoedig

te wees.

₁₈God wil keer

sodat 'n mens nie sterf nie,

Hy wil die mens red van die graf.

₁₉Hy straf 'n mens,

Hy laat hom siek word,

die pyn hou nooit op nie.

₂₀Kos maak daardie mens naar,

ook die lekkerste kos.

₂₁Hy word so maer dat hy

net vel en bene is.

₂₂Hy is naby die dood,

hy is amper in die graf.

₂₃Maar daar kom miskien 'n engel by hom,

een van die baie engele wat daar is.

Die engel wil vir hom bid

en vir hom sê wat hy moet doen.

₂₄Die engel is jammer vir hom

en die engel bid en sê:

‘Moenie dat hy sterf nie,

ek sal hom loskoop.’

₂₅Dan sal daardie mens weer jonk word,

sy liggaam sal nuwe krag kry.

₂₆Hy sal tot God bid,

en God sal doen wat hy vra.

Hy sal vir God dien en bly wees,

God sal hom beloon

omdat hy gedoen het wat reg is.

₂₇Dan sal hy vir mense sê:

‘Ek het sonde gedoen,

ek het nie gedoen wat reg is nie,

en God het my nie gestraf nie.

₂₈Hy het my gered,

ek het nie gesterf nie,

ek geniet nog die lewe.’

₂₉Luister na my:

God doen dit alles met 'n mens,

Hy doen dit weer en weer.

₃₀God hou 'n mens weg van die graf,

Hy laat die mens die lewe geniet.

₃₁Job, jy moet luister na my,

jy moet hoor wat ek sê,

jy moet stilbly sodat ek kan praat.

₃₂Of, as jy iets wil sê,

dan moet jy dit vir my sê.

Jy moet praat, ek wil graag hoor

dat jy onskuldig is.

₃₃As jy niks het om te sê nie,

dan moet jy luister na my.

Jy moet stilbly, sodat ek

vir jou wysheid kan leer.”