Job 13

“Ja, ek het self gesien wat gebeur,

ek het dit gehoor en ek het dit verstaan.

₂Ek weet ook die dinge wat julle weet,

ek is so slim soos julle.

₃Maar ek wil praat met die Almagtige,

ek wil hê dat God moet hoor wat ek

vir Hom wil sê.

₄Want júlle hou aan om leuens te vertel,

nie een van julle kan dit beter laat gaan met my nie.

₅Dit sal beter wees as julle stilbly,

dan sal 'n mens kan dink dat julle

wysheid het.

₆Julle moet asseblief luister na wat ek sê,

julle moet probeer verstaan wat ek wil sê.

₇Julle mag nie verkeerde dinge sê

en dan sê dat julle praat om vir God

te help nie.

Julle mag nie leuens vertel

en dink dat julle dit vir Hom doen nie.

₈Julle kan nie sê dat God reg is

en dat ek nie reg is nie,

julle kan nie vír Hom wees en téén my wees nie.

₉Dit sal sleg gaan met julle as Hy

wil hoor wat julle sê,

julle kan Hom nie bedrieg

soos julle mense bedrieg nie.

₁₀Hy sal julle straf, dit is seker,

Hy sal julle straf

as julle dink dat julle vir Hom wil help

en niemand sal dit weet nie.

₁₁Julle sal baie bang word as Hy begin praat,

julle sal skrik vir die Almagtige God.

₁₂Julle sê dat julle dinge onthou,

maar dit beteken niks,

die dinge wat julle sê, is soos as en klei.

₁₃Julle moet nou stilbly sodat ek kan praat,

dan kan met my gebeur wat met my moet gebeur.

₁₄Ek weet ek speel met die dood.

₁₅Ja, God sal my laat sterf,

ek kan niks hoop nie,

maar ek wil vir Hom duidelik sê

wat ek voel.

₁₆Miskien sal dit my help,

want 'n mens wat nie vir God wil dien nie,

sal nie voor Hom kan kom nie.

₁₇Julle moet goed luister na wat ek praat,

julle moet probeer verstaan wat ek sê.

₁₈Ja, ek het gereedgemaak om voor die Regter te staan,

ek weet dat Hy sal sê ek is onskuldig.

₁₉As daar iemand is wat my kan beskuldig,

dan sal ek stilbly, ek sal weet my lewe is verby.”

₂₀“O God, U moet twee dinge nie aan my doen nie,

dan sal ek nie probeer om weg te kruip vir U nie.

₂₁U moenie my nog straf nie

en U moenie vir my bangmaak vir U nie.

₂₂Dan kan U my roep, en ek sal antwoord.

Of ek sal eerste praat, dan kan U my antwoord.

₂₃Sê vir my, hoe baie is my sondes?

Sê vir my wat het ek verkeerd gedoen.

₂₄Hoekom kyk U weg,

hoekom dink U dat ek u vyand is?

₂₅Ek is soos 'n blaar

wat afgewaai het van 'n boom,

ek is soos droë kaf.

Hoekom wil U my bangmaak

en hoekom wil U my volg en jaag?

₂₆Hoekom laat U my so baie swaar kry,

hoekom onthou U nog die sondes

wat ek gedoen het toe ek jonk was?

₂₇Dit is soos wanneer U my voete

in 'n blok sit,

dit is soos wanneer U kyk na elke tree

wat ek gee.

₂₈Ek is 'n mens wat sal sterf

en sal verdwyn

soos 'n ding wat vrot word,

soos klere wanneer die motte dit vreet.