Psalms 27

Die Here laat my lewe, Hy help my,

daarom is ek vir niemand bang nie.

Die Here beskerm my lewe,

daarom skrik ek vir niemand nie.

₂Wanneer slegte mense kom om my aan te val,

wanneer my vyande my wil doodmaak,

dan is dit my vyande wat gly en val.

₃Wanneer soldate my van al die kante aanval,

dan sal ek nie bang word nie.

Wanneer vyande oorlog begin maak teen my,

dan sal ek nog glo dat die Here my sal help.

₄Een ding het ek vir die Here gevra

en dit wil ek altyd hê:

Ek wil my hele lewe lank in sy tempel wees

om te sien dat Hy goed is vir my

en om vir Hom te mag vra wat Hy wil hê ek moet doen.

₅Want Hy sal my beskerm wanneer daar gevaar kom,

Hy sal my veilig in sy tempel laat bly

soos wanneer 'n mens hoog op 'n rots staan.

₆Daarom, ek sal wen teen my vyande rondom my,

en ek sal juig en offers bring in sy tempel,

ek sal sing en musiek maak vir die Here.

₇Here, U moet luister wanneer ek tot U bid,

U moet genadig wees en U moet my antwoord.

₈Ek onthou dat U gesê het ons moet U kom dien,

en ek het gekom om U te dien.

₉U moenie keer wanneer ek U wil dien nie,

U moenie vir my wegstuur nie.

U het my altyd gehelp,

moenie my nou los nie,

moenie weggaan van my nie,

want U is die God wat my red.

₁₀My pa en my ma sal my miskien los,

maar die Here sal my by Hom hou.

₁₁Here, leer vir my hoe U wil hê ek moet lewe,

lei my op 'n veilige pad, want ek het baie vyande.

₁₂My vyande vertel leuens oor my,

hulle wil hê ek moet sterf.

U moenie dat hulle met my doen

wat hulle so graag met my wil doen nie.

₁₃Hulle wil dit doen,

maar ek glo dat ek in hierdie lewe

nog sal sien dat die Here goed is.

₁₄Jy moet glo dat die Here jou sal help,

jy moet sterk wees, jy moet dapper wees,

jy moet glo dat die Here jou sal help.