Psalms 149

₁Julle moet die Here prys!

Julle moet vir die Here 'n nuwe lied sing,

julle moet Hom prys

waar die mense bymekaar is wat in Hom glo.

₂Die mense van Israel moet wys dat hulle bly is

omdat die Here hulle gemaak het.

Die mense van Sion moet juig

omdat die Here hulle Koning is.

₃Hulle moet dans en sy Naam prys,

hulle moet vir Hom musiek maak

met die tamboeryn en die lier.

₄Want die Here is lief vir sy volk,

Hy laat die mense wen

wat hulleself nie kan help nie,

Hy sit 'n kransie op hulle kop.

₅Die mense wat in die Here glo,

moet juig omdat hulle gewen het,

hulle moet sing,

ook wanneer hulle op hulle beddens lê.

₆Hulle moet aanhou om God te prys,

maar hulle moet skerp swaarde in hulle hande hê

₇sodat hulle die volke kan straf,

sodat hulle met die volke kan doen

wat die volke met húlle gedoen het.

₈Hulle moet die konings vasmaak met kettings,

hulle moet die belangrike mense van die volke

vasmaak met yster-boeie.

₉Hulle moet met die konings doen

wat die Regter besluit het en geskryf het.

Die volke sal die mense respekteer

wat in die Here glo.

Julle moet die Here prys!