Psalms 138

Here, ek wil vir U dankie sê

met my hele hart,

ek wil vir U sing

sodat al die gode dit kan hoor.

₂Ek wil buig na u gewyde tempel

en ek wil u Naam prys

omdat U doen wat U belowe het

en omdat U dieselfde bly.

₃Die dag toe ek geroep het

en gevra het dat U my moet help,

toe het U my geantwoord,

U het my sterk gemaak.

₄Al die konings van die aarde

sal vir U dankie sê,

want hulle het gehoor wat U gesê het.

₅Hulle sal sing oor die dinge

wat die Here gedoen het,

want die Here is 'n groot Koning.

₆Die Here is hoog in die hemel

maar Hy sien wie die nederige mense is

en Hy weet ook baie goed

wie die hoogmoedige mense is.

₇Wanneer dit sleg gaan met my,

dan laat U my aanhou lewe.

U steek u hand uit en U keer my vyande

wat kwaad is vir my,

U red my met u eie hand.

₈Die Here doen alles vir my.

Here, U doen altyd wat U belowe het.

U het die mense met u eie hande gemaak,

U moenie vir hulle alleen los nie.