Job 34

₂“Julle is die wyse mense,

maar julle moet luister na my,

julle weet alles,

maar julle moet hoor wat ek sê.

₃Ore moet hoor wat woorde beteken,

tonge moet proe hoe kos smaak.

₄Kom ons besluit wat reg is,

ons moet weet wat die beste is.

₅Want Job het gesê:

‘Ek is onskuldig,

maar God het nie reg gedoen

aan my nie.

₆Ek is reg,

ek kan nie daaroor lieg nie,

ek het nie verkeerd gedoen nie,

maar ek sterf van my seerplekke.’

₇Watter soort mens is Job?

Hoekom hou hy aan om vir God te spot?

₈Hy is vriende met mense

wat slegte dinge doen,

hy doen dieselfde dinge

wat mense doen wat verkeerd lewe.

₉Want hy het gesê dit help nie

om te doen wat God wil hê nie.

₁₀Julle slim mense,

julle moet luister na my.

God doen nie verkeerd nie,

die Almagtige doen niks

wat sleg is nie.

₁₁Nee, God gee vir elke mens

wat hy moet kry.

God kyk hoe elke mens gelewe het,

en dan gee God vir hom

wat hy daarvoor moet kry.

₁₂En ook, God doen nie verkeerd nie,

Hy oordeel altyd reg, dit is seker.

₁₃God regeer oor die aarde,

niemand het gesê Hy moet dit doen nie.

Die hele wêreld behoort aan Hom,

niemand het dit vir Hom gegee nie.

₁₄As Hy besluit om die lewe

van 'n mens terug te neem,

die asem wat Hy gegee het,

₁₅dan sal alles wat lewe, saam sterf,

al die mense sal weer stof word.

₁₆Job, as jy verstaan wat ek vir jou sê,

dan moet jy luister.

₁₇Dink jy regtig dat God kan regeer

as Hy nie daarvan hou om reg te doen nie?

Dink jy dat God verkeerd gedoen het,

God wat sterk en regverdig is?

₁₈God sê vir konings en belangrike mense

dat hulle sleg is en verkeerd doen.

₁₉Hy sê nie altyd dat net die leiers reg is nie,

Hy doen nie méér vir ryk mense

as vir arm mense nie,

want Hy het hulle almal gemaak.

₂₀Elke mens sterf wanneer God so besluit.

Mense skrik groot in die middel van die nag,

hulle sterf, hulle is miskien belangrike mense,

maar hulle sterf maklik.

₂₁God sien alles wat 'n mens doen,

Hy sien elke tree wat 'n mens gee.

₂₂Mense wat slegte dinge doen,

kan probeer om weg te kruip

in donker plekke,

maar God kan ook dáár vir hulle sien.

₂₃Ja, God kyk net een maal na 'n mens

wanneer die mens moet kom

sodat God hom kan oordeel.

₂₄God weet klaar,

Hy sal nie eers kyk en luister

wanneer Hy belangrike mense verneder

en ander mense in hulle plek

kies en aanstel nie.

₂₅Nee, Hy weet alles wat hulle doen,

en Hy verander alles in een nag,

Hy breek hulle.

₂₆Hy straf hulle op die plek

waar Hy die mense straf wat

verkeerd doen

en waar almal dit sien.

₂₇Hy doen dit omdat hulle opgehou het

om Hom te dien,

en omdat hulle nie wou

doen wat Hy wil hê nie.

₂₈Dit is hoekom die arm mense geskree het

en gevra het dat God hulle moet help.

God het gehoor hoe skree die mense

wat hulleself nie kan help nie.

_29-30As Hy stilbly en nie help nie,

dan kan niemand sê dat Hy verkeerd

doen nie.

As Hy wegkyk, dan kan niemand

vra dat Hy moet help nie.

Hy laat mense regeer wat Hom nie dien nie,

hulle vang volke en mense in hulle vangnette.

₃₁Job, het jy bely dat jy

sonde gedoen het?

Het jy belowe om dit nie weer te doen nie?

₃₂Het jy gevra dat God jou sondes

vir jou moet wys?

Jy het verkeerde dinge gedoen,

maar jy het nie geweet dat dit sonde is nie.

Wanneer jy verkeerd gedoen het,

het jy dan gesê dat jy dit nie weer sal doen nie?

₃₃Jy wil nie aanvaar dat God reg doen nie,

moet Hy nou vir jou daaroor straf?

Dit moet jý besluit, nie ek nie.

Jy moet sê wat jy weet.

₃₄'n Verstandige en wyse mens

wat my hoor, sal sê:

₃₅‘Job weet nie wat hy praat nie,

hy sê niks wat verstandig is nie.’

₃₆Job praat soos 'n slegte mens praat,

ons moet alles hoor en ons moet besluit

of hy reg of verkeerd is,

₃₇want hy het sonde gedoen

en hy is ook opstandig teen God.

Hy hou aan om met ons te stry,

hy praat en praat teen God.”