Genesis 8

₁God het gedink aan Noag en die diere wat saam met hom in die ark was. God het 'n wind oor die aarde laat waai. Die water het minder geword en begin sak. ₂Die fonteine het toegegaan, en dit het opgehou reën.

₃Die water het minder en minder geword en weggesak. Na 150 dae het die water baie vlakker geword. ₄Op die sewentiende dag van die sewende maand het die ark op die Ararat-berge gaan lê. ₅Die water het nog minder en minder geword, en op die eerste dag van die tiende maand kon die mense in die ark die boonste punte van die berge sien.

₆Ná nog 40 dae het Noag die venster oopgemaak van die ark wat hy gebou het. ₇Hy het 'n kraai laat uitvlieg. Maar die kraai het aangehou vlieg totdat die water opgedroog het. ₈Toe het Noag 'n duif laat uitvlieg om uit te vind of die water weggevloei het van die grond af. ₉Die duif het nie 'n plek gekry waar hy kon gaan sit nie, en hy het teruggekom na die ark, na Noag toe. Die water was nog oor die aarde. Toe die duif terugkom, het Noag sy hand uitgesteek en hy het die duif gevang. Hy het die duif weer in die ark ingebring. ₁₀Noag het nog sewe dae gewag. Hy het die duif toe weer laat uitvlieg. ₁₁Daardie aand het die duif na hom toe teruggekom, en daar was 'n vars olyfblaar in sy bek. Noag het toe geweet die water het baie minder geword. ₁₂Hy het nog sewe dae gewag. Toe het hy weer die duif laat uitgaan, maar die duif het nie na hom toe teruggekom nie.

₁₃Toe Noag 601 jaar oud was, op die eerste dag van die eerste maand, was die water weg. Noag het die ark oopgemaak en gesien die grond het begin droog word. ₁₄Op die sewe-en-twintigste dag van die tweede maand was die aarde droog.

₁₅Toe sê God vir Noag: ₁₆“Jy en jou vrou en jou seuns en jou skoondogters moet nou uit die ark uitgaan. ₁₇Al die diere en die voëls wat by jou in die ark is, moet saam met jou uitgaan. Hulle moet meer word sodat daar weer baie diere oral op die aarde kan wees.”

₁₈Noag en sy seuns, sy vrou en sy skoondogters het toe almal uit die ark gegaan. ₁₉Al die verskillende soorte diere en voëls het ook uit die ark gegaan.

₂₀Noag het 'n altaar gebou om vir die Here 'n offer te bring.

Hy neem toe een van elke soort rein dier en een van elke soort rein voël, en hy offer brand-offers op die altaar vir die Here. ₂₁Die offers het lekker geruik vir die Here, en Hy het gesê: “Ek sal nooit weer die aarde vervloek omdat Ek die mense wil straf nie. Die mense is so, hulle dink net slegte dinge vandat hulle gebore is. Maar Ek sal nie weer al die mense en diere doodmaak soos Ek nou in die watervloed gedoen het nie.