Genesis 11

₁Al die mense op die aarde het dieselfde taal gepraat en dieselfde woorde gebruik. ₂Die mense het van die ooste getrek en by 'n vallei in die land Babel gekom. Hulle het daar gaan woon. ₃Hulle het vir mekaar gesê: “Kom ons maak bakstene.”

Hulle het toe die stene gebruik om huise te bou. Hulle het stene gebruik, nie klippe nie, en hulle het teer gebruik, nie klei nie.

₄Hulle sê toe: “Kom ons bou vir ons 'n stad en 'n baie hoë toring. Die punt van die toring moet aan die hemel raak. Dan sal al die mense weet van ons. Kom ons doen dit, dan sal ons nie oral op die aarde moet gaan woon nie.”

₅Die Here het afgekom om te kom kyk na die stad en die toring wat die mense bou. ₆Die Here sê toe: “Kyk, hierdie mense is nou een volk en hulle praat almal dieselfde taal. En hulle het nou net begin. Hierna sal hulle alles regkry wat hulle wil doen. ₇Kom Ons gaan af daarnatoe en maak hulle taal deurmekaar, sodat hulle mekaar nie kan verstaan nie.”

₈Die Here het die mense oral op die aarde laat woon, van die stad af en verder. Hulle het opgehou om die stad te bou. ₉Daarom het hulle die stad Babel genoem, want daar het die Here die mense se taal deurmekaar gemaak en van daardie plek het Hy die mense laat gaan om oral op die aarde te woon.

₁₀Hier is die lys van Sem se nageslag. Sem was 100 jaar oud toe hy pa geword het van Arpaksad. Dit was twee jaar ná die watervloed.

₁₁Nadat Arpaksad gebore is, het Sem nog 500 jaar gelewe. Hy het ook ander seuns en dogters gehad.

₁₂Toe Arpaksad 35 jaar oud was, het hy pa geword van Selag. ₁₃Daarna het Arpaksad nog 403 jaar gelewe. Hy het ook ander seuns en dogters gehad.

₁₄Toe Selag 30 jaar oud was, het hy pa geword van Heber. ₁₅Daarna het Selag nog 403 jaar gelewe. Hy het ook ander seuns en dogters gehad.

₁₆Toe Heber 34 jaar oud was, het hy pa geword van Peleg. ₁₇Daarna het Heber nog 430 jaar gelewe. Hy het ook ander seuns en dogters gehad.

₁₈Toe Peleg 30 jaar oud was, het hy pa geword van Reü. ₁₉Daarna het Peleg nog 209 jaar gelewe. Hy het ook ander seuns en dogters gehad.

₂₀Toe Reü 32 jaar oud was, het hy pa geword van Serug. ₂₁Daarna het Reü nog 207 jaar gelewe. Hy het ook ander seuns en dogters gehad.

₂₂Toe Serug 30 jaar oud was, het hy pa geword van Nahor. ₂₃Daarna het Serug nog 200 jaar gelewe. Hy het ook ander seuns en dogters gehad.

₂₄Toe Nahor 29 jaar oud was, het hy pa geword van Tera. ₂₅Daarna het Nahor nog 119 jaar gelewe. Hy het ook ander seuns en dogters gehad.

₂₆Toe Tera 70 jaar oud was, was hy die pa van Abram, Nahor en Haran.

₂₇Hier is die verhaal van Tera.

Tera was die pa van Abram, Nahor en Haran. Haran was die pa van Lot.

₂₈Haran het gesterf in die land waar hy gebore is, in Ur in die land van die Galdeërs. Sy pa Tera het toe nog gelewe.

₂₉Abram en Nahor het altwee getrou. Abram se vrou was Sarai, en Nahor se vrou was Milka. Milka was Haran se dogter. Haran se ander dogter was Jiska. ₃₀Sarai het nie 'n kind gehad nie, sy kon nie kinders kry nie.

₃₁Tera het uit Ur in Galdeër-land weggegaan na die land Kanaän. Hy het sy seun Abram, sy kleinseun Lot en sy skoondogter Sarai saamgeneem met hom. Lot was Haran se seun, en Sarai was Abram se vrou. Hulle het tot by Haran getrek en daar gaan woon.

₃₂Tera het gesterf in Haran. Hy was toe 205 jaar oud.