2 Samuel 22

“Here, U is my Rots,

my veilige plek in die berge,

U maak my vry.

₃God wat my Rots is,

ek voel veilig by U,

U is vir my soos 'n skild,

U is sterk en U red my,

U is vir my 'n veilige plek,

ek kan na U toe vlug,

U is my Redder,

U red my van mense

wat my aanval,

₄Here, ek wil U prys,

want U het my gered

van my vyande.

₅Die branders van die dood

wou my vashou,

waterstrome het oor my gespoel

en wou my doodmaak.

₆Toue van die doderyk

het my vasgebind,

vangstrikke van die dood

het my gevang en vasgehou.

₇“Wanneer dit sleg gaan,

dan skree ek: Here!

Ek roep na my God,

Hy hoor my stem in sy paleis,

Hy hoor wanneer ek roep

en vra dat Hy my moet help.

₈Die aarde het geskud

en gebewe,

die fondamente van die hemel

het gebewe en geskud,

want die Here was kwaad.

₉Rook het uit sy neus gekom,

vuur het uit sy mond gebrand,

kole vuur het uit Hom gekom.

₁₀Hy het die hemel oopgeskuif

en Hy het afgekom,

daar was donker wolke

onder sy voete,

₁₁Hy het op 'n gerub geklim

en Hy het gevlieg,

Hy het verskyn op die vlerke

van die wind.

₁₂Dit was donker rondom Hom,

donker water en dik wolke

het Hom toegemaak.

₁₃Dit het geblink voor Hom,

kole vuur het geskyn.

₁₄Die Here het die donderweer

laat raas in die lug,

die Hoogste God

het hard gepraat.

₁₅Die weerligstrale was sy pyle,

Hy het sy vyande

na alle kante toe gejaag

en Hy het hulle laat vlug.

₁₆“Wanneer die Here

met sy vyande raas,

wanneer die asem uit sy neus

'n stormwind word,

dan word die see leeg,

en die fondamente

van die wêreld lê oop.

₁₇“Die Here steek sy hand

uit die hemel

en Hy gryp my,

Hy tel my op uit die baie water.

₁₈Hy red my van my

sterk vyande,

van die mense wat my haat,

want hulle is te sterk vir my.

₁₉Hulle val my aan

wanneer ek swaarkry,

maar die Here hou my regop.

₂₀“Hy bring my na 'n plek

waar ek vry is,

Hy red my,

want Hy is lief vir my.

₂₁Ek is onskuldig,

en die Here gee vir my

wat ek moet kry,

ek het niks verkeerd gedoen nie,

en die Here beloon my.

₂₂Ja, ek het gedoen

wat die Here wil hê.

Wanneer my God my oordeel,

dan is ek nie skuldig nie.

₂₃Ek het onthou wat Hy

gesê het ek moet doen,

ek het gedoen wat Hy

beveel het.

₂₄Ek het alles gedoen wat Hy

gesê het,

ek het aangehou om reg te doen.

₂₅Ek is onskuldig.

Die Here het gesien dat ek

niks verkeerd doen nie,

en Hy het my beloon.

₂₆U doen wat U belowe het

vir die mense wat doen

wat húlle belowe.

U is altyd goed vir die mense

wat net goed doen.

₂₇Wanneer mense rein is

en by U mag wees,

dan is U by hulle.

Wanneer mense vals is,

dan is U te slim vir hulle.

₂₈U red mense wat hulleself

nie kan beskerm nie,

en U verneder mense wat dink

hulle is belangrik.

₂₉Ja, Here, U gee vir my lig,

U maak lig wanneer dit donker

is om my.

₃₀Ja, wanneer U by my is,

dan kan ek 'n klomp

mense aanval,

wanneer U, my God, by my is,

dan kan ek oor

'n hoë muur spring.

₃₁“Wat God doen, is alles reg,

wat die Here sê, is altyd waar.

Hy is soos 'n skild vir almal

wat na Hom toe vlug.

₃₂Die Here is die enigste God,

net ons God is 'n Rots.

₃₃Hy is die God wat sterk is,

ek is veilig by Hom,

Hy maak my lewe veilig.

₃₄Hy laat my so vas staan

soos 'n ribbok,

Hy laat my veilig staan

op hoë plekke.

₃₅Hy leer vir my om oorlog

te maak,

Hy maak my arms sterk

sodat ek die snaar

van 'n brons-boog

styf kan trek.

₃₆Die skild wat U vir my gee,

red my lewe,

U help my,

en dit gaan goed met my.

₃₇U laat my vinnig hardloop,

my voete gly nie.

₃₈Ek volg en jaag my vyande,

ek kom tot by hulle,

ek draai nie om

voordat hulle almal

dood is nie.

₃₉Ek maak hulle dood,

ek slaan hulle,

hulle staan nie weer op nie,

hulle lê voor my voete.

₄₀U maak my sterk om oorlog

te maak,

U laat my vyande

op hulle knieë staan

voor my.

₄₁U laat hulle vlug, weg van my,

en ek kan die mense

wat my haat,

vir altyd stilmaak.

₄₂Hulle skree en vra dat iemand

hulle moet help,

maar niemand red hulle nie,

hulle roep na die Here,

maar Hy antwoord hulle nie.

₄₃Ek slaan hulle fyn soos stof,

ek trap op hulle soos ek trap

op die modder in die paaie,

ek trap hulle plat.

₄₄“U red my van my eie mense

wat opstandig is teen my.

U maak my die hoof van volke

en U beskerm my.

Mense wat ek nie geken het nie,

doen nou wat ek sê.

₄₅“Mense uit ander lande

kruip voor my.

Wanneer hulle hoor van my,

dan luister hulle dadelik.

₄₆Hulle skrik en hulle kom

uit hulle stede, die stede

wat sterk mure het.

₄₇“Die Here lewe,

ek wil my Rots prys.

Ek sê die God wat my Rots is

en wat my red,

is belangriker as alles.

₄₈Hy is die God wat my help

om mense te straf

oor die dinge wat hulle

aan my gedoen het,

Hy laat my regeer oor volke.

₄₉Hy red my van my vyande,

Hy laat my staan hoog bo

die mense wat teen my is,

Hy red my wanneer wrede

mense my wil seermaak.

₅₀“Daarom, Here, ek sal U prys

sodat die volke dit kan hoor,

ek sal sing oor u Naam.

₅₁“Die Here laat die koning

wat aan Hom behoort,

altyd wen teen sy vyande,

Hy doen wat Hy vir sy

gesalfde belowe het,

vir Dawid en sy nageslag,

vir altyd.”