2 Kronieke 26

₁Al die mense van Juda het vir Ussia geneem en hulle het hom koning gemaak ná sy pa Amasia. Ussia was toe 16 jaar oud. ₂Dit is hý wat die stad Elot weer gebou het en wat die stad teruggevat het vir Juda. Ussia het dit gedoen nadat die koning van Edom gesterf het. ₃Ussia was 16 jaar oud toe hy koning geword het, en hy was 52 jaar lank koning in Jerusalem. Sy ma was Jekolja, sy was van Jerusalem. ₄Ussia het dinge gedoen waarvan die Here hou, hy het gedoen soos sy pa Amasia. ₅Ussia het probeer om God te dien terwyl Sagaria gelewe het. Sagaria het vir Ussia geleer om te verstaan wat God vir hom wys, en terwyl Ussia die Here gedien het, het God dit goed laat gaan met hom. ₆Ussia het oorlog gaan maak teen die Filistyne. Hy het die mure van die stede Gat, Jabne en Asdod afgebreek en hy het ander stede gebou by Asdod en in die land van die Filistyne. ₇God het hom gehelp teen die Filistyne en teen die Arabiere wat in Gur-Baäl gewoon het en teen die Meüniete. ₈Die Ammoniete het belasting betaal aan Ussia, en al die mense tot by die grens van Egipte het geweet van hom, want sy leër het baie sterk geword. ₉Ussia het sterk torings gebou in Jerusalem by die poort op die hoek en by die poort in die vallei, en by die plek waar die muur draai. ₁₀Hy het ook in die woestyn torings gebou en hy het baie watergate uitgekap, want hy het baie diere gehad, in die Laeveld en op die Hoëveld. Hy het daarvan gehou om te boer, hy het mense gehad wat in sy grond en sy wingerde gewerk het in die berge en in die valleie.

₁₁Ussia het 'n leër gehad van manne wat goed oorlog kon maak, die soldate was in groepe. Die sekretaris Jeüel en die voorman Maäseja het die manne getel en in groepe ingedeel. Gananja was hulle leier, Gananja was een van die amptenare van die koning, hy het gekyk dat hulle alles reg doen. ₁₂Die familiehoofde van die soldate was almal saam 2 600. ₁₃Hulle was die offisiere van 'n leër van 307 500 manne wat goed oorlog kon maak. Hierdie manne kon die koning help teen die vyand. ₁₄Ussia het wapens gegee vir al die manne in die leër. Hy het vir hulle skilde, spiese, helms, harnasse, pyl en boë, en klippe vir die slingervelle gegee. ₁₅Ussia het in Jerusalem groot wapens gehad wat sy slim mense uitgevind en gemaak het. Die groot wapens het op die torings en die hoeke van die stad gestaan en hulle kon pyle en groot klippe skiet.

Die Here het vir Ussia wonderlik gehelp, en Ussia se leër het sterk geword. Al die mense het geweet van hom. ₁₆Maar toe hy so sterk en belangrik word, het hy hoogmoedig geword, en daarom het dit later sleg gegaan met hom. Hy het ontrou geword aan sy God die Here. Hy het in die tempel ingegaan om wierook te brand op die wierook-altaar. ₁₇Die priester Asarja het hom gevolg, en saam met Asarja was daar 80 belangrike priesters van die Here. ₁₈Hulle het by koning Ussia kom staan en vir hom gesê: “Ussia, jy mag nie wierook brand vir die Here nie, net die priesters van die nageslag van Aäron is gewy om wierook te brand. Jy moet uitgaan uit die tempel, want jy het 'n verkeerde ding gedoen. God die Here sal sê jy mag dit nie doen nie.”

₁₉Ussia was kwaad. Hy het die wierook-pan in sy hand gehad om die wierook te brand. En terwyl hy kwaad geword het vir die priesters, het hy melaats geword op sy voorkop. Dit het daar by die priesters in die tempel gebeur, by die wierook-altaar. ₂₀Die hoëpriester Asarja en al die priesters het na Ussia gekyk, en hulle het gesien dat Ussia melaats is op sy voorkop. Hulle het hom vinnig uit die tempel geneem, en hy was self haastig om uit te gaan. Die Here het hom gestraf. ₂₁Koning Ussia was melaats tot die dag toe hy gesterf het. Hy het apart in 'n huis gewoon, hy kon nie naby die tempel kom nie omdat hy melaats was. Sy seun Jotam was die hoof van die paleis en hy het regeer oor die mense in die land.

₂₂Die profeet Jesaja seun van Amos het die ander dinge wat voorheen en later met Ussia gebeur het, opgeskryf in 'n boek. ₂₃Ussia het gesterf, en hulle het hom begrawe by sy voorvaders. Hulle het hom begrawe in die grond by die begraafplaas van die konings, maar nie in die graf van die konings se familie nie, want hulle het gesê Ussia was melaats. Sy seun Jotam het koning geword ná hom.