To The Word – Day 97

Re na le motse o matla,

ka marako le metero ya wona

Modimo o a re pholosa.

₂Bulang menyako ya motse,

tjhaba se lokileng se kene,

tjhaba se tshepahalang se kene.

₃O boloka kgotso

ya ba maikutlo a tsitsitseng,

hobane bona ba fela ba o tshepile.

₄Itshepele Morena kamehla yohle,

hobane Morena Modimo,

ke Fika la mehla yohle.

₅Ba tulong tse phahameng

o a ba theola,

motse o phahameng a o kokobetse,

a o heletse o wele fatshe,

a o theolele tlase, leroleng.

₆O tla hatakelwa ka maoto,

o hatakelwe ke maoto a mafutsana,

o hatakelwe ke mehato ya bahloki.

₇Tsela ya ya lokileng

ha e na makukuno,

wena Ya Lokileng

o batalatsa tsela ya hae.

₈Oho, Morena, re o emetse,

re tsamaya tseleng

ya dikahlolo tsa hao;

lebitso la hao le botumo ba hao

ke tsona tseo re di labalabelang.

₉Moya wa ka o o tsetselela bosiu,

pelo ya ka le yona

e o hlolohetswe haholo.

Ha kahlolo tsa hao

di phethwa lefatsheng,

baahi ba lefatshe

ba tla ithuta ho loka.

₁₀Leha ba kgopo ba ka hauhelwa,

ha ba ke be ba ithute ho loka;

leha ba ka phela naheng ya toka,

ba tswela pele

ho nna ba etsa bokgopo,

botlotlehi ba Morena

ba se ke ba bo bone.

₁₁Tsoho la hao

le phahamisitswe, Morena,

empa batho bana bona

ha ba le bone;

ako ba bontshe

ha o tjhesehela tjhaba sa hao,

ba bone, mme dihlong di ba aparele,

mollo o tjhesang dira tsa hao

o ba timetse.

₁₂Morena, o re theela kgotso,

hoba mesebetsi yohle ya rona

e phethilwe ke wena.

₁₃Oho, Morena Modimo wa rona,

babusi ba bang ba kile ba re busa,

empa ke bitso la hao feela

leo re le tlotlang.

₁₄Ba shwele,

ba ke ke ba hlola ba phela,

ba mabitleng,

ba ke ke ba hlola ba tsoha;

o ba otlile, wa ba wa ba timetsa,

wa etsa hore

ba se hlole ba hopoleha.

₁₅Oho, Morena,

o se atisitse setjhaba,

o se atisitse, o a tlotleha ke hona;

wa namisa meedi ya naha.

₁₆Morena, ba tlile ho wena

ba tsielehile,

ha o ba kgalema yaba ba a o rapela.

₁₇Jwalokaha moimana

ya kgatheng la ho beleha

a ye a meneke,

a lliswe ke mahlaba a hae,

le rona re bile jwalo

mahlong a hao Morena.

₁₈Re ne re le baimana,

re meneka ke mahlaba,

empa ha re pepa

ra beleha moya feela.

Fatshe la rona

ha re a le tlisetsa pholoho,

ba tla aha ho lona

le bona ha ba a tswalwa.

₁₉Bafu ba lona

ba tla boela ba phele,

ditopo tsa bona

di tla boela di tsoha.

Lona ba phelang leroleng,

tsohang le bine;

kahobane phoka ya hao

e tshwana le phoka ya hoseng,

fatshe le tla boela

le tsosa bafu ba lona.

₂₀Ikeleng tjhaba sa ka,

le kene kamoreng tsa lona,

ha le se le kene,

le ikwalle kahara tsona,

le ipate ho se hokae,

kgalefo e be e fele.

₂₁Bonang, Morena o tswa

ka leahong la hae,

ho ahlolela baahi ba lefatshe

dibe tsa bona.

Fatshe le tla hlahisa madi

a tsholletsweng hodima lona,

ba bolaetsweng ho lona

le ke ke la hlola le sa ba pata.

₁Ka tsatsi leo,

Morena o tla bolaya kganyapa,

a e bolaye ka sabole e bohale,

e kgolo, e sefea,

kganyapa, noha e tjhalametsang,

kganyapa, noha e bothang e ikgarile,

ke yena ya tla bolaya

sebata sa lewatleng.

₂Ka tsatsi leo, ho tla thwe:

“Binelang rapa sa morara

se behang haholo.

₃Ke nna Morena,

mohlokomedi wa sona,

ke se nwesetsa ka dinako tsohle,

ke se lebela motsheare le bosiu,

hore ho se be le ya mong

ya ka se senyang.

₄Ho halefa ha ke a halefa.

Ha ho ne ho eme hlabahlabane,

ho eme le meutlwa kapele ho nna,

ke ne ke tla e futuhela ke e lwantshe,

ke e hatakele kaofela ha yona,

ke e tjhese.

₅Ho seng jwalo, a ba ke ba tle ho nna,

nna ke be setshabelo sa bona,

ba tle ho nna ke etse kgotso le bona.

E, ba tle ho nna

ke etse kgotso le bona.”

₆Ka matsatsi a tlang

Jakobo o tla hloma,

Iseraele a thunye, a etse dipalesa,

fatshe lohle le tlale tholwana tsa hae.

₇Na Morena o ile a otla Iseraele

jwalokaha a ile a otla

ba ileng ba mo otla?

Na o bolailwe

jwaloka ba ileng ba mmolaya?

₈O mo otlile

ka ho mo lelekela naheng esele,

wa mo fefola ka moya o matla,

jwaloka mohla

moya wa botjhabela o fokang.

₉Molato wa Jakobo

o tla hlakolwa tjena,

ena e be tsela

ya ho fedisa sebe sa hae:

Ha a fedisa

dialetare tsohle tsa majwe,

a di sila, a di etsa thuethue

sa phofo ya mokwetla,

medimo ya bohata,

le tshwantsho tsa Ashera,

di se di le siyo.

₁₀Motse o haheleditsweng

o fetohile dithako,

ke motse o siilweng,

o furaletsweng sa lehwatata,

ke moo manamane a fulang teng,

a be a bothe, a itjelle makala.

₁₁Makala a motse oo

ha a omme a ye a rojwe,

basadi ba a rwalle,

ba bese mollo ka wona.

Tjhaba sena ke sa batho

ba hlokang kutlwisiso,

kahoo Mmopi wa sona

a ke ke a se utlwela bohloko,

Mmopi wa sona

a ke ke be a se hauhela.

₁Ho madimabe

mofaphlooho wa botlotlehi,

oo matahwa a Efraime

a kgabang ka wona!

Ho madimabe thunthung e ponang,

eo e leng tlotla ya botle ba hae,

e metseng qetheng

ya kgohlo e manoni,

eo matahwa a ikgantshang ka yona!

₂Bonang, Morena o na le ya matla,

ya sefutho,

ya kang fefo sa lehodiotswana

se senyang,

ya kang pula ya ditlwebelele

ya morallo:

Ke yena ya tla o akgela fatshe

ka sefutho.

₃Mofapahlooho wa botlotlehi

wa matahwa a Efraime,

o tla hatakelwa ka maoto.

₄Thunthung e ponang,

e leng tlotla ya botle ba hae,

e metseng qetheng

ya kgohlo e manoni,

e tla ka feiye

e butswang pele ho lehlabula,

e kgolwang ke ya e bonang,

ebe o a e ja.

₅Ka tsatsi leo, Morena wa mabotho

e tla ba mofapahlooho wa tlotla,

e be moqhaka o kgabane

ho masalla a tjhaba sa hae.

₆E tla ba moya wa toka

ho ba okametseng kahlolo,

le wa bonatla

ho ba phumelang sera

kgorong ya motse.

₇Batho bana le bona

ba thekesediswa ke veine,

jwala bo bohale

bo etsa hore ba kgothometsehe;

baprista le baporofeta

ba thekesediswa ke jwala,

kelello di tsherehantswe

ke ho itlopa veine,

jwala bo bohale

bo etsa hore ba kgothometsehe;

ba bona dipono

ba ntse ba thekesela,

dinyewe ba di ahlola

ba ntse ba ratseela ke jwala.

₈Tafole tsohle

di tletse mahlatsa le ditshila,

ha ho na sebaka le se seng

se hlwekileng.

₉“Ke bo-mang

bao moporofeta a tla ba ruta?

Molaetsa wa hae

o tla o hlalosetsa bo-mang?

O loketse masea a sa tswa kgweswa,

bana ba sa tswa tloswa letsweleng!

₁₀Thuto ya hae ke:

Molao hodima molao,

molao hodima molao,

taelo hodima taelo,

taelo hodima taelo;

hanyenyane mona,

hanyenyane mane.”

₁₁Kahoo Morena o tla bua

le tjhaba sa hae,

a bue le sona

ka maleme a batho basele,

a bue le sona

ka maleme a baditjhaba.

₁₂O kile a bua le sona, a re:

“Ke tla le fa phomolo ya sebele,

ba kgathetseng ba tlo phomola;

ke tla fela ke le kgatholle.”

Leha ho le jwalo,

ha ba a ka ba mamela.

₁₃Ka baka leo ntswe la Morena

e tla ba lena ho bona:

Molao hodima molao,

molao hodima molao,

taelo hodima taelo,

taelo hodima taelo;

hanyenyane mona,

hanyenyane mane,

etlere ha ba tsamaya

ba we ka sanketse,

ba robehe, ba tshwaswe,

ba thopuwe.

₁₄Mamelang lona basomi

ba busang tjhaba se Jerusalema,

lentswe la Morena ke lena:

₁₅Lona le itse:

“Re entse selekane le lefu,

ra etsa tumellano le Nqalo ya Bafu.

Ha koduwa e tshabehang

e wela lefatshe,

rona e tla re feta mohwalotso,

hoba leshano ke tshabelo sa rona,

bohata ke bona tshireletso ya rona.”

₁₆Kahoo Morena o bua tjena:

“Ke bea lejwe la motheo Sione,

lejwe le lekilweng,

la bohlokwa, la mantlha;

ke lejwe la nnete, la motheo:

‘Ya dumelang hona

o tla ba le mamello.’

₁₇Toka e tla ba kgwele e lekanyang,

ho loka e be kgwele e otlollang;

sefako se tla hohola

tshabelo sa mashano,

metsi a kwahele

baka tsa ho ipata.”

₁₈Selekane sa lona le lefu

se tla fediswa,

tumellano ya lona le Nqalo ya Bafu

e fediswe.

Mohla koduwa e tshabehang

e welang lefatshe,

e tla le wela hodimo,

e le hatakele.

₁₉Kamehla ha e feta

e tla le hohola,

e le hohole hoseng,

motsheare le bosiu;

ha le utlwisisa molaetsa

ebe le a tshoha.

₂₀Moalo o mokgutshwanyane

hoo o ke keng wa nama,

kobo e nyenyane

hoo o ke keng wa ikatela.

₂₁Morena o tla hlaha

sa mohla thabeng ya Perasime,

kgalefo ya hae e tlokome,

sa mohla Kgohlong ya Gibeone,

a phethe mosebetsi wa hae

o hlollang haholo,

a phethe ketso tsa hae

tse tsotehang haholo.

₂₂Ka baka leo,

se iketseng basomi,

esere mahlaahlela

a imela matsoho a lona,

hobane ke utlwile

ha ho phatlalatswa timetso,

e phatlalatswa ke Morena,

Modimo wa mabotho,

a re lefatshe lohle le tla timetswa.

₂₃Theang tsebe

le utlwe lentswe la ka,

mamelang le utlwe polelo tsa ka.

₂₄Na ya lemelang ho jala

a ka lema motjha-o-tjhele?

A dulela ho lema

le ho phophotha makwete?

₂₅Ha a thuile makwete

o jala kolojannere le sepaile,

ebe koro yona o e jala ka mela,

harese le mabele

a di jale temeng ya tsona.

₂₆Tsena o di rutilwe

ke Modimo wa hae,

a mo kwetlisetsa tsona hantle.

₂₇Ha ho polwa kolojannere

ha ho sebediswe selei,

mabidi a kariki ha a pole sepaile;

molamu o sebediswa

ha ho polwa kolojannere,

sepaile sona se polwe ka lere.

₂₈Na koro e hailwa hore e thumisehe?

Tjhe, ha e ke e hailwa kamehla;

leha e hatiswa ka mabidi a kariki,

dipere ha di ke be di e thumise.

₂₉Tsena tsohle

di tswa ho Morena wa mabotho,

keletso tsa hae ke tse makatsang,

bohlale ba hae ke bo tebileng.

₂₃“Bonang, morwetsana o tla emola,

a tswale mora,

mme mora eo o tla rewa

lebitso la Emmanuele,”

₆“ ‘Ha e le wena, Betlelehema,

e naheng ya Juda,

ha o hlile ha o monyenyane haholo,

ha o monyenyane

hara batsamaisi ba Juda,

hobane ho wena ho tla tswa

motsamaisi ya tla alosa Iseraele,

setjhaba sa ka.’ ”

₁₈“Mohoo o utlwahetse Rama:

seboko le sello sa mmokotsane;

Ragele o llela bana ba hae,

mme o hana ho tshediseha,

hobane ha ba sa le yo.”

“Lentswe la ya howang feelleng

le re:

‘Lokisang mmila wa Morena,

le otlolle ditsela tsa hae!’ ”