To The Word – Day 93

₁Lehlomela le tla hloma,

le hlome kutung ya Jese,

kala le tswang mothapong wa hae

le behe ditholwana.

₂Moya wa Morena o tla ba ho yena,

Moya wa bohlale

le Moya wa kutlwisiso,

Moya wa boeletsi

le Moya o matla,

Moya wa tsebo

le Moya wa ho tshaba Morena;

₃yena o tla thabela

ho tshaba Morena.

Ha a ka ke a ahlola

ho ya ka tshobotsi,

kapa a etsa qeto

ho ya ka tsa bo-fuufu;

₄empa mafutsana

o tla a ahlolela ka toka,

ba ikokobeditseng ba naha ena

a ba sebeletse ka toka,

polelo tsa hae

e be thupa e otlang naha ena,

kahlolo tsa hae

di timetse ba kgopo.

₅Ho loka e tla ba leqhama la hae,

nnete e be senyepa thekeng la hae.

₆Phiri e tla phela le konyana,

lengau lona le bothe,

le bothe le potsanyane,

namane le tawana le sethojana

di hole mmoho,

ngwana wa lesea a di etelle pele.

₇Kgomo e tla fula le bere,

manamane a tsona a bothe mmoho,

tau e fule jwang jwaloka pholo.

₈Lesea le tla ipapalla

pela mokoti wa masumo,

ngwana a kenye letsoho

mokoting wa qowane.

₉Di ke ke tsa senya

kapa tsa ntsha kotsi,

hohle Thabeng ya ka e halalelang,

hobane fatshe le tla be le tletse

tsebo ya Morena,

jwalokaha lewatle le tletse metsi.

₁₂O tla emisetsa ditjhaba mokgele,

a phuthe Baiseraele

ba lelekilweng naheng ya bona;

a bokelle setjhaba sa Juda

se qhalantsweng,

a se bokelle hohle

qoleng tse nne tsa lefatshe.

₁₃Mona wa ba Efraime o tla fela,

dira tsa ba morabe wa Juda

di timetswe,

ba Efraime

ba ke ke ba honohela ba Juda,

le ba Juda

ba ke ke ba tshwenya ba Efraime.

₁₄Ka bophirimela

ba tla ubella Filesitiya,

ba kopanele tjhaba tsa botjhabela

ba di senyetse,

ba hape Baedomo le Bamoabe,

Baamone bona ba buswe ke bona.

₁₅Morena o tla pshesa kou

ya watle la Egepeta,

tsoho la hae le fokise moya

o tjhesang hodima Noka,

Noka eo a e arole

melatswana e supileng,

batho ba e tshele

ba ntse ba rwetse meqathatso.

₁₆Masalla a tjhaba sa hae

a tswang Asiria,

a tla tsamaya mmileng

o phatlaletseng,

jwaloka mohla Baiseraele

ba tswang Egepeta.

“Oho, Morena, ke tla o boka,

le hoja o ne o nkgalefetse;

kgalefo ya hao e kgaoditse,

wena o fela o ntshedisitse.

₂Modimo ke mopholosi wa ka,

ke tla mo tshepa,

mme ke se ke ka tshaba;

Morena ke matla a ka,

ke pina ya ka,

Morena o fetohile

mopholosi wa ka.”

₃Le tla ikgella metsi le thabile,

le a kge didibeng tsa pholoho.

₄Mohla tsatsi leo, le tla re:

“Lebohang Morena, le mo rapele,

phatlalatsang mesebetsi ya hae

hara ditjhaba,

le bolele hore bitso la hae le leholo.

₅Binelang Morena,

hobane o entse tse tlotlehang,

tsena le di tsebise lefatshe lohle.

₆Howeletsang haholo,

le didietse ka thabo,

le bine lona baahi ba Sione.

Ya Halalelang wa Iseraele

o moholo hara lona.”

₂Phahamisang mokgele

hodima thaba e phollatsi,

ba howeletseng,

le ba hwehle ka letsoho,

e le hore ba kene

kgorong tsa mahosana.

₃Mokgetho wa bahlabani ba ka

ke se ke o laetse,

bahale ba ka ke ba bitsitse,

ho phethahatsa kgalefo ya ka,

bona ba thabelang ho hlola ha ka.

₄Ho utlwahala modumo wa letshwele

hara dithaba,

modumo o kang

wa sekgakgathahadi sa batho!

Ho utlwahala modumo wa mebuso,

lereberebe la mebuso

ya ditjhaba di phuthehile!

Morena wa mabotho

o kgobokanya mabotho a ntwa!

₅A tswa naheng e hole,

pheletsong tsa lehodimo,

Morena o tla ka dihlomo

tsa kgalefo ya hae,

hore fatshe lohle a tle a le timetse.

₆Bokollang,

tsatsi la Morena le se le le haufi!

Le tla e le la timetso,

le etswa ho Ya Matla wohle!

₇Ka baka leo, matsoho wohle

a tla tepella,

batho bohle ba fellwe ke tshepo.

₈Ba tla kenelwa ke tshabo,

mahlaba le bohloko di tla ba menya;

ba tla meneka

sa mosadi a kena tlung,

motho a shebane le wa habo

ka ho makala,

fahleho tsa bona di fubele,

di fubele sa malakabe.

₉Bonang, tsatsi la Morena

ke lena le a tla!

Le tla ka sehloho le ka kgalefo,

ka bohale bo tlokomang,

le tla ho fetola lefatshe

e be nanaola;

ka tsatsi leo

baetsadibe o tla ba timetsa.

₁₀Naledi tsa lehodimo

le Makolobe a tsona,

kganya ya tsona

e ke ke ya bonahala,

tsatsi le tla fifala ha le tjhaba,

kganya ya kgwedi le yona e be siyo.

₁₁Lefatshe ke tla le otla,

ke le otlele bokgopo ba lona,

ba kgopo le bona ke ba otle,

ke ba otlele dibe tsa bona,

boikakaso ba ba itjang

ke bo fedise,

boikgohomoso ba bompodi

ke bo kokobetse.

₁₂Ke tla etsa hore motho a hlokehe,

sa kgauta e hlwekisitswe,

a hlokehe sa kgauta ya Ofire.

₁₃Ke tla etsa hore

mahodimo a thothomele,

fatshe le be le suthe

madulong a lona,

tsena di tla bakwa

ke kgalefo ya Morena wa mabotho,

mohla tsatsi la bohale

bo tlokomang ba hae.

₁₄Jwaloka kgama e balehang setsomi,

jwaloka dinku tse hlokang modisa,

motho ka mong

o tla kgutlela tjhabeng sa habo,

motho ka mong

a balehele naheng ya habo.

₁₅Bohle ba tla thopuwa

ba tla phehletswa ka lerumo,

bohle ba tla tshwarwa

ba bolawe ka sabole.

₁₆Bana ba bona ba tla thuakwa

ba ntse ba ba bona,

matlo a bona a lobelwe,

basadi ba bona ba betwe.

₁₇Ke tla hlohleletsa Bamede

ba ba tsohele matla,

Bamede ba sa tsotelleng

bohlokwa ba silefera,

bona bao kgauta

e ke keng ya ba hohela.

₁₈Diqha di tla roboka batjha,

ba fetohe ditsekana,

baimana bona ba ba hlokele mohau,

leha e le hona

ho utlwela bana bohloko.

₁₉Wena Babilona, tlotla ya mebuso,

mokgabo oo Bakalatiya

ba leng motlotlo ka wona,

Modimo o tla o timetsa

sa Sodoma le Gomora!

₂₀O ke ke wa hlola o eba le baahi,

o tla ba hloka ka meloko le meloko,

ha ho Moarabia

ya tla hloma tente ya hae moo,

le badisa ba ke ke ba etsa

metebo ya bona moo.

₂₁Batana tsa lehwatata

di tla botha moo,

diphooko le tsona di hahele teng,

ebe moo dimpshe di phelang teng,

dithotsela di tlolake teng,

di tlolake di nyakaletse.

₂₂Mafiritshwane a tla ngaya

ka qhobosheaneng tsa hao,

phokojwe di ngaye

ka matlung a hao a bokgosi.

Nako ya timelo ya Babilona

e atametse,

matsatsi a yona a ke ke a lelefatswa.

₁Morena o tla hauhela Jakobo,

a boele a ikgethele Baiseraele,

a ba ahise naheng ya bona;

baditjhaba ba tla aha le bona,

ba kgomarele ntlo ya Jakobo.

₂Tjhaba di tla felehetsa Baiseraele,

di ba felehetse

ho ya naheng ya bona;

Baiseraele ba tla okamela ditjhaba,

ba di etse bahlanka

naheng ya Morena,

ba di etse makgabunyane

naheng ya Morena.

Ba tla thopa bathopi ba bona,

ba buse bahatelli ba bona.

“Bonang kamoo mohatelli

a weleng kateng!

Bonang kamoo kgalefo ya hae

e fedileng kateng!

₅Morena o robile

molamu wa ya kgopo,

lere la puso la babusi o le robile,

₆lona le otlileng ditjhaba

ka kgalefo, le sa kgaotse,

la di kokobetsa

ka kgalefo le ka mabifi a sa feleng.

₇“Fatshe lohle le phomotse,

le na le kgotso,

bohle ba tsanyaola dipina ka thabo.

₈fate tsa modutu

le kedare tsa Lebanone,

di thabetse ho wa ha hao,

di re: ‘Ha e le mona

o se o kokobeditswe,

ha ho ya sa tla nyoloha,

a nyolohele thabeng ho re rema.’

₉“Nqalo ya Bafu e etsa mokutu

ho o kgahlanyetsa,

e tsosa bafu ho o dumedisa,

bohle bao

e neng e le babusi lefatsheng;

bohle bao

e neng e le dikgosi tsa ditjhaba,

e ba emisa diteroneng tsa bona.

₁₀Bohle ba tla bua, ba re ho wena:

‘Athe le wena

o ntso hloka matla jwaloka rona,

kajeno o so tshwana le rona!’

₁₁Botlotlehi ba hao

bo theohetse lebitleng,

bo theohetse mmoho le melodi

ya katara tsa hao;

tshenyane e fetohile moalo wa hao,

diboko di fetohile kobo ya hao.

₁₂“O theohile hakaakang lehodimong,

wena Mphatlalatsane,

naledi ya meso!

O dihetswe lefatsheng,

wena ya kileng

a kokobetsa ditjhaba!”

₁₃O ile wa bua ka pelo, wa re:

“Ke tla nyolohela lehodimong,

ke phahamise terone ya ka,

ke e phahamisetse kahodimo

ho dinaledi tsa Modimo,

ke bee terone ya ka thabeng

eo ho phuthehelwang ho yona,

ke e bee tlhorong e phahameng

ya thaba e ka leboya.

₁₄Ke tla hlwella kahodimo ho maru,

ke itekanye

le Ya Phahametseng tsohle.”

₁₅Empa wena

o dihetswe tlase lebitleng,

o dihetswe tlase

botebong ba mohohlo.

₁₆“Ba o bonang ba tla o makalla,

ba o tadimisise hantle, ba re:

‘Na eo ke yena monna

ya ileng a sisinya lefatshe,

ya neng a etsa

hore mebuso e thothomele;

₁₇yena monna ya ileng

a fetola lefatshe nahathothe,

yena ya ileng

a timetsa metse ya lona,

yena ya sa kang

a dumella bathopuwa,

ho kgutlela ha habo bona?’

₁₈Kgosi tsa ditjhaba tsohle

di phomotse,

di phomotse ka hlompho

ka mabitleng a tsona;

₁₉empa wena o lahletswe kantle

ho lebitla la hao,

wa lahlelwa kantle

sa lekala le nyatseha,

topo tsa babolauwa

di entse setha hodima hao,

bona ba ileng

ba bolawa ka sabole,

bona ba ileng

ba theolelwa mohohlong o majwe,

ba theolelwa jwaloka setopo

se hataketswe ka maoto.

₂₀O ke ke be wa epelwa

jwaloka kgosi, tsa tjhaba tse ding,

hobane o sentse naha ya hao,

wa bolaya tjhaba sa heno.

Tloholo tsa ba kgopo

ha di sa tla hopolwa.

₂₁Lokisang sebaka

sa ho bolaela bara ba hae,

ka baka la dibe tsa bo-ntata bona,

esere ba tsoha,

naha ena ba e ja lefa,

ba haha metse ya tlala lefatshe.”

₂₂“Ke tla ema ke ba futuhele,”

ho rialo Morena wa mabotho;

“ke tla timetsa bitso la Babilona

le masalla a yona,

ke timetse bana ba yona

le ditloholo tsa yona,”

ho rialo Morena.

₂₃“Babilona e tla ba hae,

habo dinoko,

e fetohe naha ya mekgwabo;

ke tla e fedisa

ka lefielo la timetso,”

ho rialo Morena wa mabotho.

₂₄Morena wa mabotho o hlapantse,

a re: “Jwalokaha ke hopotse,

ho tla ba jwalo;

jwalokaha ke rerile,

ho tla phethahala.

₂₅Ke tla phetshela Baasiria

naheng ya ka,

dithabeng tsa ka ke ba hatakele;

joko ya bona ke tla e tlosa

hodima tjhaba sa ka,

mojaro wa bona ke o tlose

mahetleng a sona,

₂₆Morero ona

ke o etseditsweng lefatshe lohle,

lena ke letsoho

le phahamiseditsweng

ditjhaba tsohle.”

₂₇Morena wa mabotho o sa rerile;

ebe ke mang ya ka thibelang?

Letsoho la hae le se le phahame;

ke mang ya ka le kgutlisang?

₂₉Se nyakalleng

lona Bafiletsita bohle,

la re molamu o neng o le otla

o robehile,

hoba lelokong la noha eo

ho tla tswalwa qowane,

yona e tswale kganyapa

e fofang ka setsokotsane.

₃₀Ba futsanehile baholo

ba tla kgora,

bahloki ba tla dula ba pholohile,

ditloholo tsa hao tsona

di shwe ke tlala,

masalla a hao le wona e a bolaye.

₃₁Bokolla wena monyako!

Meketsa wena motse!

Lona bohle ba Filesitiya

thothomelang!

Mosi o kang leru

o foqoha o etswa leboya,

hara mabotho a hae

ha ho ya tla salla.

₃₂Ho tla thweng

ha ho arajwa maqosa a naha eo?

“Morena o tsitsisitse Sione,

bahlophehi ba tjhaba sa hae

ba tla tshabela teng.”

Ka bosiu bo le bong

Are e Moabe e timeditswe!

Ka bosiu bo le bong

Kire e Moabe e timeditswe!

₂Batho ba Dibone

ba nyolohetse tempeleng ya bona,

ba nyolohetse ho ya llela

dibakeng tsa bona tsa borapedi;

baahi ba Moabe

ba llela Nebo le Medeba,

ba ikutile lekorana,

ba ipeotse le ditedu.

₃Ba tsamaya terateng tsa motse,

ba apere tse mahwashe,

bohle ba lla

ba le hodima marulelo,

le mabaleng a motse,

ba itabanya fatshe ba ntse ba lla.

₄Ba Heshebone le ba Elale

ba a howeletsa,

mantswe a bona a utlwahala hohle

ho ya fihla Jahase;

kahoo le bahlabani ba Moabe

ba a howeletsa,

bahlabani bohle ba a thothomela.

₅Pelo ya ka e llela ba Moabe,

baphaphathehi ba bona

ba balehetse Soware,

ba baleha

ho ya fihla Egelate-Sheleshiya,

ba nyoloha ka tsela e yang Lohite,

ba nyolohela Lohite

ba ntse ba lla,

ba llela timelo ya bona

ba le tseleng e yang Horanaime.

₆Metsi a Nimerime a pshele,

jwang bo omeletse,

dimela di fedile,

ha ho letho le letalana.

₇Maruo ao

ba a sebeditseng ka thata,

ba a bokella,

ba a kakatetse

ho ya tshela

Molatswana wa Meduwane.

₈Mokgosi wa bona o hoballa,

ho ya fihla meeding ya Moabe,

seboko sa bona se fihla Egelaime,

sello sa bona

se fihle le Beere-Elime.

₉Metsi a Dimone

a tlerefetse ke madi,

ke hona ke sa tla tlisa koduwa,

ke e tlisetse Dimone:

Baphaphathehi ba Moabe

ba tla bolawa ke tau,

ba tla sala teng

le bona e tla ba bolaya.

Ke tla o tumisa,

wena Modimo wa ka

o leng Kgosi ya ka,

ke boke lebitso la hao

kamehla le mehla.

₂Ke tla o boka

ka letsatsi le leng le le leng,

ke rorise lebitso la hao

kamehla le mehla.

₃Morena o moholo,

o lokelwa ke thoriso e kgolo,

boholo ba hae ha bo fihlelwe.

₄Moloko ho isa molokong o mong

o tlotlisa mesebetsi ya hao,

o bonahatsa ketso

tsa bonatla ba hao.

₅Batho ba tla bolela

kganya ya tlotla ya hao,

nna ke nahane dimakatso tsa hao.

₆Ba tla bolela

matla a ketso tsa hao tse tshabehang,

nna ke phete tsa boholo ba hao.

₇Ba tla etsa kgopotso

ya molemo wa hao o moholo,

ba etsetse ho loka ha hao ditlatse.

₈Morena o mosa,

o na le kutlwelobohloko,

o dieha ho halefa,

o tletse mohau.

₉Morena o molemo ho bohle,

lerato la hae

le aparela mesebetsi yohle ya hae.

₁₀Morena, mesebetsi yohle ya hao

e a o leboha,

le batshepuwa ba hao ba a o boka;

₁₁ba bolela tlotla ya mmuso wa hao,

ba bua ka diketso tsa bonatla ba hao.

₁₂Ba tsebisa batho bohle

diketso tsa bonatla ba hao,

le tlotla e kganyang

ya mmuso wa hao.

₁₃Mmuso wa hao

ke mmuso wa kamehla yohle,

le puso ya hao

ke ya meloko yohle.

Morena o tshepahala

dipolelong tsohle tsa hae,

o mohau mesebetsing yohle ya hae.

₁₄Morena o tshehetsa bohle ba wang,

o phahamisa bohle

ba kgokgopaneng.

₁₅Mahlo a bohle a lebeletse wena,

hore o ba fepe ka nako e lokelang.

₁₆Ha o fuparolla seatla,

o kgorisa tsohle tse phelang

ka tseo di di lakatsang.

₁₇Morena o lokile

ho tsohle tseo a di etsang,

mesebetsing yohle ya hae

o mohau.

₁₈Morena o haufi

le bohle ba mo rapelang,

ba mo rapelang kannete.

₁₉O phetha ditakatso

tsa ba mo tshabang,

o utlwa sello sa bona,

mme o a ba pholosa.

₂₀Morena o baballa bohle

ba mo ratang,

empa bohle ba kgopo o a ba timetsa.

₂₁Molomo wa ka

o ke o rorise Morena;

batho bohle ba boke

lebitso la hae le halalelang,

ba le boke kamehla le mehla.