To The Word – Day 72

₂Ako nkake ka molomo wa hao,

hoba rato la hao

le monate ho feta veine.

₃Menkwane ya ditlolo tsa hao

e nkga hamonate,

bitso la hao le ka setlolo

ha se qhatsitswe,

hase feela barwetsana ba o dumang!

₄Nkuke ke ye le wena,

re mathe mmoho,

kgosi e nkise kamoreng ya yona.

Re tla didietsa, re o nyakallele,

re rorise rato la hao ho feta veine.

Ba nepile hakaakang

ha ba o duma hakaale!

₅Leha ke le motshwana,

nna ke botlenyana,

lona baradi ba Jerusalema;

ke motshwana sa tente tsa Kedare,

ke ka masira a tente ya Solomone.

₆Se mmakalleng

hobane ke le motshwana;

ke motshwana tjena

hobane tsatsi le ntjhesitse.

Kgaitsedi tsa ka

di ne di ntlhoile,

tsa ntaela

ho ya tshosa masimong a morara,

nako ya ho itlhokomela

yaba ke a e hloka.

₇Ako mpolelle,

wena moratuwa wa ka,

moo kgulo la mohlape wa hao

le leng teng,

moo o bothisang mohlape

wa hao teng,

ha le le hloohong tsa mengala,

esere ka fumanwa

ke ntse ke lelera,

ke o batla hara mehlape

ya thaka tsa hao.

₈Haeba o sa tsebe,

wena Seilatsatsi hara basadi,

latela mohlala wa mohlape,

potsanyane tsa hao o di fudise,

o di fudise pela ditente tsa badisa.

₉Wena moratuwa,

o ka pitse ya sethole,

e hulang kariki ya Faro ya ntwa.

₁₀Marama a hao a a rateha

ka masale a lepeletseng,

molala wa hao

o tshwanelwa ke faha tsa mabenyane.

₁₁Re tla o etsetsa masale a kgauta,

re a kgabise

ka naletsana tsa silefera.

₁₂Ha kgosi e ne e dutse dijong,

menkwane ya ka ya nkga hamonate.

₁₃Ho nna moratuwa

o ka mokotlana o tshetseng mmira,

o bang fubeng sa ka

ka nako tsohle.

₁₄Ho nna moratuwa

o tshwana le thunthung tsa mmasa,

tse tswang masimong a morara,

masimo a Ene-Gedi.

₁₅O motle hakaakang,

wena moratuwa wa ka!

O motle hakaakang!

Mahlo a hao

a mapudutswana sa maeba!

₁₆O motle hakaakang,

wena moratuwa!

E, ruri o motle, o a rateha!

Moalo wa rona

o ka jwang bo botalana!

₁₇Dibalaka tsa ntlo ya rona

ke tsa kedare,

maballo a yona

ke a difate tsa modutu.

₁Nna ke palesa ya Sharone,

mohaladitwe o melang dikgohlong.

₂Ha moratuwa a le hara barwetsana

o ka mohaladitwe hara meutlwa.

₃Ha moratuwa a le hara bahlankana,

o ka fate sa apole

hara fate tsa meru.

Ke thabela ho phomola

moriting wa hae;

tholwana hae e a hlabosa

ha ke e latswa.

₄O nkisitse tlung ya boithabiso,

tlung ya dino,

a ntshireletsa ka mokhele

wa lerato la hae.

₅Mmatlafatseng

ka mangangajane a morara,

le nkgathlolose

ka ho mpha diapole,

hoba rato ke lena

le mphokodisitse.

₆Ke samme tsoho la hae

le letshehadi,

ka tsoho la hae le letona

o nkopile.

₇Lona baradi ba Jerusalema

ke a le laya,

ke le laya ka ditshepe

le ka dikgama tsa naha:

Le se tsose moratuwa wa ka

kapa la mo sisinya,

ho fihlela yena

a ka rata ho tsoha.

₈Ke utlwa lentswe la moratuwa,

lentswe ke leo!

Ke eo a etla

a tlola hodima dithaba,

a ntsa laqoma hodima maralla.

₉Moratuwa o tshwana le tshepe

kapa namane ya kgama;

mmoneng ke eo

a eme kamora lerako,

a shebile ka fesetere,

a hlwedisa le ka diphera.

₁₀Jwale moratuwa o bua le nna, o re:

“Ema, wena moratuwa wa ka,

wena botlenyana wa ka,

itlele re tsamaye.

₁₁Bona, mariha a sa fetile,

pula le tsona di kgaoditse.

₁₂Palesa di fupuhile hara mohlaba,

nako ya ho bina e se fihlile,

kunkuru ya maebana-kgorwana,

e utlwahala naheng ya heso.

₁₃Sefate sa feiye

se beha tholwana tsa sona,

morara o a thunya,

ho nkga hamonate.

Ema, wena moratuwa wa ka,

wena botlenyana wa ka,

itlele re tsamaye.”

₁₄Wena leebana la ka

le ipatileng mafarung,

le ipatileng methating,

tsullung tsa dithaba,

ako mpontshe fahleho sa hao,

ntswe la hao le lona ke le utlwe,

ntswe la hao ho nna le a hohela,

hoba fahleho sa hao

ho nna se a rateha.

₁₅Re tshwasetseng diphokojwe

le diphokojwana,

tsona tse senyang

masimo a rona a morara,

hoba jwale morara wa rona

o thuntse.

₁₆Moratuwa ke wa ka,

le nna ke wa hae,

o fudisa mohlape wa hae,

o o fudisa mehaladitweng.

₁₇Tsatsi le eso tjhabe,

meriti e eso honyele,

kgutla, wena moratuwa,

o tlole jwaloka tshepe,

kapa namane ya kgama

hara dithaba tse matsaranka.

₁Bosiu ha ke robetse

phateng tsa ka,

ke ile ka batla

ya ratwang ke pelo ya ka;

ka mmatla, ka se ke ka mo fumana.

₂Jwale ka tsoha

ka ya le motse wohle,

terateng tsa wona

le mabaleng a wona,

ke batla ya ratwang ke pelo ya ka;

ka mmatla, ka se ke ka mo fumana.

₃Ka teana le balebedi

ba ntse ba potoloha le motse,

ka re ho bona:

“Na le kile la bona

moratuwa wa ka?”

₄Yare ke sa tswa ba feta,

moratuwa wa ka ka mo fumana;

ka mo mamarela,

ka se ke ka mo tlohela

ho fihlela ke kena le yena

ka lapeng heso,

ke mo isa ka kamoreng ya mme,

montswadi wa ka.

₅Lona baradi ba Jerusalema,

ke a le laya,

ke le laya ka ditshepe

le ka dikgama tsa naha:

Le se tsose moratuwa wa ka

kapa la mo sisinya

ho fihlela yena a ka rata ho tsoha!

₆Elwa ya hlahang lehwatateng

ke mang,

ya kang mosi o lopaletseng,

ya noneditsweng

ka mmira le mokubetso,

tse tswakilweng

ka dinoko tsohle tsa kgwebo?

₇Ke Solomone, o nkile malao a hae,

o potapotilwe ke bahale

ba mashome a tsheletseng,

mokgetho wa dikwankwetla

tsa naha ya Iseraele.

₈Kaofela ha bona

ba hlometse ka disabole,

kaofela ha bona

ntwa ba e tlwaetse,

disabole di leketla qholong tsa bona,

ba laletse

ha mokgosi wa bosiu o hlajwa.

₉Kgosi Solomone

o iketseditse malao,

a a etsa ka lehong la Lebanone;

₁₀ditshiya tsa wona

a di etsa ka silefera,

mokokotlo wa wona

ya eba wa kgauta,

kallane ya eba ya lesela,

lesela le perese,

bokahare ba wona bo lohilwe

ke baradi ba Jerusalema

bo lohilwe ke bona ka lerato.

₁₁Tswang ka matlung,

lona baradi ba Sione,

tswang le bone kgosi Solomone

o rwetse moqhaka,

moqhaka a o rwesitswe ke mmae

mohla lenyalo,

mohla thabo e kgaphatsehang

pelong ya Solomone.

₁O motle hakaakang,

wena moratuwa wa ka!

O motle hakaakang!

Mahlo a hao a kwahetsweng

ke lesira a ka maeba,

moriri wa hao

o ka mohlape wa dipodi

ha di lepella Thabeng ya Gileade.

₂Meno a hao a ka mohlape wa dinku

di qeta ho kutwa,

di nyoloha

moo di tswa hlatsuwa teng;

thojana ka seng se tswetse mafahla,

ha ho le se seng sa tsona

se sa tswalang.

₃Melomo ya hao

e ka kgwele e kgubedu,

ho bua ha hao

le hona ho a kgahleha;

marama a hao,

a kwahetsweng ke lesira,

a tshwana le kgekge tsa kgarenate,

kgarenate e petsotswe.

₄Molala wa hao

o tshwana le tora ya Davida,

e hahilweng

ka bokgabane bo boholo;

ho yona ho leketla dithebe

di le sekete,

kaofela ha tsona

e le dithebe tsa bahlabani.

₅Matswele a hao

a ka potsanyane tse pedi,

mafahlanyana a tshepe

a fulang mehaladitweng.

₆Tsatsi le eso tjhabe,

meriti e eso honyele,

ke tla nyolohela thabeng

e metseng tlama tsa mmira,

ke nyolohele leralleng

le metseng tlama tsa mokubetso.

₇Moratuwa,

botle ba hao bo phethehile,

botle ba hao bo hloka sekodi.

₈Tloha le nna Lebanone,

monyaduwa wa ka,

tloha le nna Lebanone!

Theoha tlhorong ya Amana,

o theohe tlhorong ya Senire

le ya Heremone,

o tlohe dilaong tsa ditau,

thabeng tseo mangau

a phelang ho tsona.

₉O hapile pelo ya ka,

wena kgaitsedi,

o hapile pelo ya ka,

monyaduwa wa ka;

wa e hapa ka ho nthe hedi!

ka la moleka,

ka mofollelo o le mong

wa faha sa molala wa hao.

₁₀Rato la hao le monate hakaakang,

kgaitsedi, monyaduwa wa ka!

Rato la hao

le monate ho feta veine,

menkwane ya hao

e feta le ya dinoko!

₁₁Mahe a dinotshi

a rotha molomong wa hao,

monyaduwa wa ka,

tlasa leme la hao

ho tswa lebese, le mahe a dinotshi,

menkwane ya aparo tsa hao

e ka ya Lebanone.

₁₂O rapa se sireleditsweng,

kgaitsedi, monyaduwa wa ka;

o diba se haheleditsweng,

sa bitielwa.

₁₃Dikgarenate ke dimela

tsa tshimo ya hao,

tholwana tsa tsona,

ka monate, di a babatswa!

Mmasa le dinareta

le tsona di a fumanwa.

₁₄Ho metse nareta le saforone

le lehlaka le sinamone,

le fate tsa mokubetso

ka mefuta ya tsona.

Mmira le lekgala

le tsona di mela moo,

le tlamana tsohle

tse monko o monate.

₁₅O mohlodi o nwesetsang serapa,

o diba sa metsi a kollang,

a phallang

a etswa kwana Lebanone.

₁₆Tsoha wena moya wa leboya,

ako tle le wena moya wa borwa!

Puputlelang ka serapeng sa ka,

menkwane ya sona

e phatlallele hohle,

moratuwa a ke a tle

ka rapeng sa hae,

a je tholwana tse monate

ka ho fetisa!

₁Ke tlile rapeng sa ka,

wena kgaitsedi,

monyaduwa wa ka,

ke ikgeletse mmira,

mmoho le dinoko tsa ka;

ke jele mahe a dinotshi,

mmoho le kgekge ya wona,

ke nwele veine ya ka

le lona lebese la ka.

Jang, le nwe, lona metswalle,

le nwe haholo, lona baratuwa!

₂Leha ke ne ke robetse,

pelo ya ka e ne hlobaela,

ka utlwa moratuwa

a kokota monyako, a re:

“Mpulele kgaitsedi, moratuwa wa ka,

leebana la ka, pabala ya ka;

hlooho ya ka e metsi

ke ho lalwa ke phoka,

moriri wa ka o mongobo

ke leswe la bosiu.”

₃“Aparo sa ka ke se ke se hlobotse,

na nka boela ka se apara?

Maoto a ka le wona

ke se ke a hlatswitse,

na nka boela ka a silafatsa?”

₄Ha moratuwa a tshwara lemati,

a le tshwara ho bula,

pelo ya ka e a thanya

ha ke mo hopola.

₅Ka tsoha

ho bulela moratuwa monyako,

mmira o rotha matsohong a ka,

menwana le yona e rotha mmira,

ha ke tshwara mohele wa lemati

ke bula.

₆Moratuwa wa ka

ka mmulela monyako,

athe moratuwa o sa fetile, a ile.

Ha a bua ka kgathala matla,

ka mmatla, ka se ke ka mo fumana,

ka mmitsa, empa a se ka nkaraba.

₇Balebedi ha ba pota le motse

ba mphumana,

ba nteteka, ba ntlatsa matoma;

balebedi bao ba hodima marako,

ba ntlhotholotsa seaparo sa ka!

₈Lona baradi ba Jerusalema

ke a le laya:

Ha le fumana moratuwa

le tla reng ho yena?

Mmolelleng hore rato lena

le a nkudisa.

₉Moratuwa wa hao

o feta ba bang ka eng,

wena Seilatsatsi

hara basadi ba bang?

Moratuwa wa hao

o feta ba bang ka eng,

hoo o ka re layang

ka mokgwa o tjee?

₁₀Moratuwa o leredi,

madi a thopohetse letlalong,

ke yena pabala

hara ba kete di shome;

₁₁hlooho ya hae

e ka kgauta e hlwekisitswe,

moriri o ririetse,

o motsho sa mokgwabane.

₁₂Mahlo a hae a mapudutswana,

sa maebana-kgorwana a dinokana,

a dutse pela metsi

e ka a hlatswitswe ka lebese.

₁₃Marama a hae

a ka rapa se metse dinoko,

rapa sa ditlama

di le monko o monate;

melomo ya hae

e ka mehaladitwe,

mehaladitwe

e rothang lero la mmira.

₁₄Matsoho a hae

a ka meholoko ya kgauta,

meholoko e kgabisitsweng

ka lejwe la Tarashishe;

mmele wa hae

o benya sa manaka a tlou,

manaka a tlou

a kgabisitswe ka disafire.

₁₅Tlhafu tsa hae

di tshwana le tshiya tsa mahakwe,

tse hodima tshehetso tsa kgauta

e hlwekisitswe;

bopeho sa hae

se kgahleha sa naha ya Lebanone,

se kgethehile

jwaloka kedare tsa Lebanone.

₁₆Polelo tsa hae

tsona ke tse mathe-malodi,

athe ha e le yena ke tjaka,

o a rateha.

Enwa ke yena moratuwa wa ka,

enwa ke yena motswalle wa ka,

lona baradi ba Jerusalema.

₁Moratuwa wa hao o ile kae,

wena Seilatsatsi

hara basadi ba bang?

Moratuwa wa hao o nkile efe tsela,

re tle re tsebe ho o batlisa yena?

₂Moratuwa o theohetse

ka rapeng sa hae,

ka ratswaneng se metseng dinoko,

ho ithabisa ka serapeng

le ho kga mehaladitwe.

₃Moratuwa ke wa ka,

le nna ke wa hae,

o fudisa mohlape wa hae,

o o fudisa mehaladitweng.

₄O motle, moratuwa,

o tshwana le Tiresa,

o rateha jwaloka Jerusalema,

o boheha sa mabotho

a tshwere mekgele.

₅Tlohela ho ntjheba, o shebe hosele,

mahlo a hao a mpakela pherekano.

Moriri wa hao

o ka mohlape wa dipodi

ha di lepella Thabeng ya Gileade.

₆Meno a hao a ka mohlape wa dinku

di nyoloha

moo di tswa hlatsuwa teng;

thojana ka seng se tswetse mafahla,

ha ho le se seng sa tsona

se sa tswalang.

₇Marama a hao

a kwahetsweng ke lesira,

a tshwana le kgekge ya kgarenate,

kgarenate e petsotswe.

₈Mafumahadi

a ka ba mashome a tshelela,

basadi ba mafielo

ya eba mashome a le robedi,

barwetsana

ya eba boiyane, ntlhokapalo;

₉empa leebana la ka,

pabala ya ka, ke lona feela,

ke moradi wa mmae

ya tswetsweng a le inotshi,

thatohatsi ya mosadi

ya ileng a mmeleha.

Barwetsana ha ba mmona

ba re o hlohonolo,

mafumahadi le basadi ba mafielo

ba a mo rorisa.

₁₀Ke mang eo ya hlahang eka mafube,

ya leredi jwaloka kgwedi,

ya kganyang seka letsatsi,

ya bohehang sa mabotho

a tshwere mekgele?

₁₁Ka theohela ka serapeng

sa fate tsa ditholwana,

ho hlahloba

tse melang botjha kahara kgohlo,

ho bona hore na morara o so fupile,

na dikgarenate tsona di se di thuntse.

₁₂Yare ke eso ka ke ela hloko,

ka ikutlwa eka ke moholo

ho feta kgosana,

kgosana e busang boiyane

ba setjhaba sa yona.

₁₃Kgutla! Kgutla!

Mosetsana wa Moshulame!

Kgutla! Kgutla!

Re tsebe ho o tadima!

Le tadimelang

mosetsana wa Moshulame,

sa ha le tadima mabotho

a teanya ditheko?

₁Maoto a hao

a tshwanelwa ke meqathatso,

a tshwanelwa ke yona hakaakang,

wena kgosatsana, moradi wa kgosi!

Thopola tsa hao di ka mabenyane,

mabenyane a entsweng

ke setsebi sa mekgabiso.

₂Mokgubu wa hao o ka mopotjwana,

o sa ke be o hloke veine

e tswakilweng ka dinoko.

Theka la hao

le tshwana le setha sa mabele,

se potapotilweng

ke mehaladitwe kahohle.

₃Matswele a hao

a ka potsanyane tse pedi,

potsanyane tsa mafahlanyana,

potsanyane tsa tshepe.

₄Molala wa hao

o ka tora ya manaka a tlou,

mahlo a hao

a ka matshana a Heshebone,

a pela monyako wa motse,

motse oo o moholo.

Nko ya hao

e ka tora ya Lebanone,

tora e lebileng

ka nqeng ya Damaseka.

₅Hlooho ya hao

e phahame sa Thaba ya Karamele,

moriri wa hao

o benya sa lesela le perese,

lenyetse la hao

le hapile pelo ya kgosi.

₆O motle hakaakang, wena moratuwa!

Rato la hao le kgahlisa ka tsohle!

₇Seemo sa hao

se ka fate sa palema,

matswele a hao

a ka masihla a morara.

₈Yaba ke re:

“Ke tla hlwella

hodima fate sena sa palema,

ebe ke kgola tholwana tsa sona.”

Matswele a hao

a tla ka masihla a morara,

moya wa hao

o ke monkwane wa diapole,

₉molomo wa hao

o ke veine e monate.

A veine e lelemelle ho moratuwa,

e theohele molomong

le menong a hae.

₁₀Nna ke wa moratuwa wa ka,

takatso tsa hae di tobile nna feela.

₁₁Tloo, moratuwa, re ikele hara naha,

re yo ipaqamela hara dipalesa.

₁₂A re tsohelle rapeng tsa morara,

re yo bona

hore na morara o so fupile,

na thunthung tsa wona

di se di hlahile,

na dikgarenate

di se di thuntse na.

Lerato ke tla o abela lona re le moo.

₁₃Apole tsa moratiso

di nkga hamonate,

tholwana tsa mefuta yohle

di pela monyako wa rona;

tholwana tse ntjha

le tholwana tsa kgale

ke o boloketse tsona,

wena moratuwa.

₁Eka o ka be o le kgaitsedi ho nna,

mme a o hodisitse

ka letswele la hae!

E ne etlare ha ke o fumana

o le kantle,

ebe ke a o aka,

ho se be ya ka nnyatsang.

₂Ke ne ke tla tsamaya le wena

ke o ise lapeng heso,

moo mme a ileng a nkgodisetsa teng;

ke o nwese veine

e nang le metswako,

ke o nwese lero

la dikgarenate tsa ka.

₃Ke samme tsoho la hae le letshehadi,

ka tsoho la hae le letona o nkopile.

₄Lona baradi ba Jerusalema

ke a le laya:

Le se tsose moratuwa wa ka,

kapa la mo sisinya,

ho fihlela yena a ka rata ho tsoha.

₅Ke mang eo ya tswang lehwatateng,

a itshetlehile ka moratuwa wa hae?

Tlasa sefate sa apole

ke ile ka o tsosa,

hona moo mmao

a o emoletseng teng,

hona moo mmao

a o belehetseng teng.

₆Mpee fubeng sa hao

jwaloka setempe,

jwaloka lesekana

nthwale tsohong la hao,

hoba matla a lerato

a tshwana le a lefu,

sehloho sa lefufa

se tshwana le sa lebitla.

Lerato le tuka sa kganare

e tlola ditlhase,

jwaloka tetema e laima malakabe!

₇Matlopotlopo a metsi

a ke ke be a le tima,

esita le dikgohola

di ke ke tsa le hohola;

leha motho a ka fana

ka ruo lohle la hae,

ka lona a leka ho reka lerato,

a ke ke a fumana letho,

haese ho nyediswa!

₈Re na le letlamorwana la kgaitsedi,

matswele a yona

e sa le diolamolora.

Re tla etsa jwang

ka kgaitsedi ya rona,

ha mohlankana a rata

ho e hloma lesiba?

₉Haeba kgaitsedi e le lerako,

re tla e hlomela tora ya silefera;

haeba kgaitsedi e le monyako,

re tla e kwala ka mamati a dikedare.

₁₀Nna ke lerako,

matswele a ka a ka ditora,

mahlong a moratuwa

nna ke mmusapelo.

₁₁Solomone

o na ena le serapa,

rapa sa morara Baale-Hamone,

rapa sena sa hae

a se hirisetsa balemi;

hore balemi ba tle ba kotule

tholwana tsa tshimo eo,

molemi ka mong a lefa

shekele tsa silefera di le sekete.

₁₂Nna tshimo ya ka ya morara ke ena,

wena, Solomone,

nka shekele di le sekete,

seabo sa balemi

ke makgolo a le mabedi.

₁₃Wena ya phelang ka dirapeng,

metswalle e mametse ho utlwa o bua;

ako bue,

le nna ke utlwe ntswe la hao.

₁₄Potlakela ho nna, wena moratuwa,

o etsise tshepe

kapa namane ya kgama,

hodima thaba

tse maririela a dinoko.