To The Word – Day 42

₁Bara ba Rubene le bara ba Gade e ne e le barui ba mehlape e meholo ya dikgomo; ba lemoha hore naha ya Jarese le naha ya Gileade ke naha ya makgulo a matle a dikgomo. ₂Bara ba Gade le bara ba Rubene ba fihla ho Moshe le ho moprista Eleasare, le ho baholo ba setjhaba, ba re: ₃“Dinaha tsa Atarote, le Dibone, le Jarese, le Nimera, le Heshebone, le Elale, le Sebama, le Nebo, le Beone; ₄tseo Morena a di hapileng ha setjhaba sa Iseraele se ntse se tswela pele, ke naha ya makgulo a dikgomo, mme rona, bahlanka ba hao, re na le dikgomo.” ₅Yaba ba re: “Haeba o re hauhetse, re nee naha ena e be lefa la rona, o se ke wa re re tshele Jorodane.”

₆Yaba Moshe o re ho bara ba Gade le ho bara ba Rubene: “Bana babo lona ba ile ntweng; lona le kgotsofalla ho dula moo? ₇Le nyahamisetsang dipelo tsa bana ba Iseraele, hore ba se ke ba ya naheng eo Morena a ba neileng yona? ₈Bo-ntata lona ba ne ba etse jwalo ha ke ba roma ke le Kadeshe-Barenea, ho ya bona naha. ₉Ba ne ba nyolohe ho ya fihla Kgohlong ya Eshekole, mme ha ba bona naha eo, ba nyahamisa dipelo tsa bana ba Iseraele hore ba kene naheng eo Morena a ba neileng yona. ₁₀Ka letsatsi leo kgalefo ya Morena ya tlokoma, mme a hlapanya, a re: ₁₁‘Ruri, banna bohle bao ke ba nyolotseng Egepeta, ho tloha ka ba dilemo tse mashome a mabedi ho ya hodimo, ba ke ke ba bona naha eo ke neng ke e hlapanyetse Aborahama, le Isaka, le Jakobo, hobane ha ba a ntatela ka botshepehi. ₁₂Ha ho le ya mong, haese Kalebe, mora wa Jefune, wa morabe wa Bakenase, le Joshua, mora wa Nune, hobane bona ba latetse Morena ka botshepehi.’

₁₃“Jwale kgalefo ya Morena ya tlokomela Iseraele, mme a ba lelerisa lehwatateng ka dilemo tse mashome a mane, ho fihlela ho fediswa moloko wohle o neng o etse bokgopo moo Morena a ntseng a bona. ₁₄Bonang, le tshwana le bo-ntata lona, le bana ba baetsadibe, le ntse le eketsa kgalefo e tshabehang ya Morena hore e tlokele Iseraele. ₁₅Ha le mo furalla, o tla boela a le lahla mona lehwatateng, mme le tla tlisetsa setjhaba sena sohle timelo.”

₁₆Yaba ba a atamela, ba re: “Re lakatsa ho hahela mehlape ya rona masaka mona, le ho hahela bana ba rona metse, ₁₇empa rona re tla hlomela, re etelle bana ba Iseraele pele, ho fihlela re ba fihlisa sebakeng sa bona, mme bana ba rona ba tla phela metseng ya diqhobosheane ka lebaka la baahi ba naha ena. ₁₈Re ke ke ra kgutlela malapeng a rona ho fihlela bana ba Iseraele bohle ba fumana lefa la bona. ₁₉Rona re ke ke ra arolelana lefa le bona mose ho Jorodane, le ho ya pele, hobane lefa la rona re le fumane ka kwano, ka botjhabelo ho Jorodane.”

₂₀Moshe a re ho bona: “Haeba le ka etsa jwalokaha le bolela, la hlomella ntwa moo Morena a ntseng a bona, ₂₁mme mohlabani e mong le e mong wa lona a tshela Jorodane, moo Morena a ntseng a mmona, ho fihlela a lelekile dira tsa hae kapele ho yena, ₂₂naha eo e ineetse ho Morena, ebe kamorao ho moo le a kgutla, le tla hloka molato ho Morena, le ho Iseraele. Morena o tla le nea naha ena e be lefa la lona.

₂₃“Empa ha le sa etse jwalo, e tla ba le sitetswe Morena, mme le ke ke la phema kotlo ya sebe sa lona. ₂₄Hahelang bana ba lona metse, le hahe le masaka a dinku tsa lona, mme le etse seo le se tshepisitseng.”

₂₅Yaba bara ba Gade le bara ba Rubene ba re ho Moshe: “Bahlanka ba hao ba tla etsa jwalokaha monga rona a re laela. ₂₆Bana ba rona, le basadi ba rona, le mehlape ya rona, le makgomo wohle a rona, tsena di tla sala Gileade. ₂₇Empa bahlanka ba hao ba tla tshelela mose, mohlabani e mong le e mong o tla hlomella ntwa moo Morena a ntseng a bona jwalokaha monga rona a boletse.”

₂₈Malebana le taba ya bona jwale Moshe a laela moprista Eleasare, le Joshua, mora wa Nune, le dihlooho tsa malapa a merabe ya bana ba Iseraele, ₂₉a re ho bona: “Haeba bara ba Gade le bara ba Rubene, ba ka tshela Jorodane le lona, ho ya lwana moo Morena a ntseng a ba bona, mme ka bahlabani bohle ba bona ba hlometseng, yaba le hapa naha, le tle le ba nee naha ya Gileade, e be lefa la bona. ₃₀Empa haeba ba sa tshele le lona ba hlometse, ba tla abelwa lefa le lona naheng ya Kanana.”

₃₁Yaba bara ba Gade le bara ba Rubene ba a araba, ba re: “Re tla etsa jwalokaha Morena a laetse bahlanka ba hae. ₃₂Re tla tshela re hlometse, moo Morena a ntseng a bona, re ye naheng ya Kanana, mme lefa la rona le tla ba ka kwano ho Jorodane.”

₃₃Jwale Moshe a nea bara ba Gade le bara ba Rubene, le karolo e nngwe ya morabe wa Manase, mora wa Josefa, naha ya Sihone, kgosi ya Baamore; le naha ya Oge, kgosi ya Bashane; a ba nea naha le metse e potapotileng naha eo.

₃₄Bara ba Gade ba haha metse ya Dibone, le Atarote, le Arowere; ₃₅le Atarote-Shofane, le Jasere, le Jogeboha; ₃₆le Bete-Nimera, le Bete-Harame, e le metse ya diqhobosheane, le ya masaka a dinku. ₃₇Bara ba Rubene bona ba haha metse ya Heshebone, le Elale, le Kiriataime; ₃₈le Nebo, le Baale-Meone, le Sibema, mme ba fetola mabitso a metse eo a pele.

₃₉Bara ba Makiri, mora wa Manase, ba futuhela Gileade, ba e hapa, mme ba leleka Baamore ba neng ba ahile moo. ₄₀Moshe a nea Makiri, mora wa Manase, Gileade, mme a aha ho yona. ₄₁Jaire, mora wa Manase, a futuhela metsana e moo, a e hapa, mme a e rea lebitso la Metse ya Jaire. ₄₂Noba a futuhela Kenate le metsana e e potapotileng, mme a e hapa, a e reella ka yena, a re ke Noba.

₁Ana ke maeto a bana ba Iseraele, ha ba ne ba falla naheng ya Egepeta ka mabotho a bona, ba le tsamaisong ya Moshe le Arone. ₂Ka taelo ya Morena, Moshe a ngola mabitso a dibaka tseo ba neng ba ntse ba tloha ho tsona, ka ho latelana. Ana ke maeto ho ya ka dibaka tseo ba neng ba tloha ho tsona.

₃Ka letsatsi la leshome le metso e mehlano la kgwedi ya pele, ba tloha Ramesese, ka letsatsi le hlahlamang la Paseka. Bana ba Iseraele ba tloha ka ditlatse tsa thabo, pontsheng ya Baegepeta bohle. ₄Baegepeta ba ne ba ntse ba epela matsibolo a bona, ao Morena a neng a a bolaile. Morena a ba a otla le medimo ya bona.

₅Bana ba Iseraele ba tloha Ramesese, ba ya hloma Sukote. ₆Ha ba tloha Sukote, ba ya hloma Ethame, e leng meeding ya lehwatata. ₇Ha ba tloha Ethame, ba kgutlela Pi-Hahirote, ka botjhabela ho Baale-Sefone, ba ya hloma pela Migedole. ₈Ha ba tloha Pi-Hahirote, ba tshela lewatle, ba ya fihla lehwatateng; ba tsamaya leeto la matsatsi a mararo lehwatateng la Ethame, ba ya hloma Mara. ₉Ha ba tloha Mara, ba ya fihla Elime, moo ho neng ho ena le didiba tse leshome le metso e mmedi, le difate tsa dipalema tse mashome a supileng, mme ba hloma teng. ₁₀Ha ba tloha Elime, ba ya hloma pela Lewatle la Lehlaka. ₁₁Ha ba tloha Lewatleng la Lehlaka, ba ya hloma lehwatateng la Sine. ₁₂Ha ba tloha lehwatateng la Sine, ba ya hloma Dofeka.

₁₃Ha ba tloha Dofeka, ba ya hloma Aloshe. ₁₄Ha ba tloha Aloshe, ba ya hloma Refidime, moo ho neng ho se metsi ao setjhaba se neng se ka a nwa. ₁₅Ha ba tloha Refidime, ba ya hloma lehwatateng la Sinai. ₁₆Ha ba tloha lehwatateng la Sinai, ba ya hloma Mabitleng a Meharo. ₁₇Ha ba tloha Mabitleng a Meharo, ba ya hloma Haserote. ₁₈Ha ba tloha Haserote, ba ya hloma Ritema. ₁₉Ha ba tloha Ritema, ba ya hloma Rimone-Perese. ₂₀Ha ba tloha Rimone-Perese, ba ya hloma Lebena. ₂₁Ha ba tloha Lebena, ba ya hloma Risa. ₂₂Ha ba tloha Risa, ba ya hloma Kehelata. ₂₃Ha ba tloha Kehelata, ba ya hloma thabeng ya Shefere. ₂₄Ha ba tloha thabeng ya Shefere, ba ya hloma Harada. ₂₅Ha ba tloha Harada, ba ya hloma Makelote. ₂₆Ha ba tloha Makelote, ba ya hloma Tahate. ₂₇Ha ba tloha Tahate, ba ya hloma Tara. ₂₈Ha ba tloha Tara, ba ya hloma Miteka. ₂₉Ha ba tloha Miteka, ba ya hloma Hashemona. ₃₀Ha ba tloha Hashemona, ba ya hloma Moserote. ₃₁Ha ba tloha Moserote, ba ya hloma Bene-Jaakane. ₃₂Ha ba tloha Bene-Jaakane, ba ya hloma Hore-Gidegade. ₃₃Ha ba tloha Hore-Gidegade, ba ya hloma Jotebata. ₃₄Ha ba tloha Jotebata, ba ya hloma Aborona. ₃₅Ha ba tloha Aborona, ba ya hloma Esione-Gebere. ₃₆Ha ba tloha Esione-Gebere, ba ya hloma lehwatateng la Sine, ke ho re Kadeshe. ₃₇Ha ba tloha Sine, ba ya hloma thabeng ya Hore, meeding ya naha ya Edomo.

₃₈Ka letsatsi la pele la kgwedi ya bohlano, hoba bana ba Iseraele ba tswe naheng ya Egepeta, moprista Arone a nyolohela thabeng ya Hore ka taelo ya Morena, mme a shwella moo. ₃₉Arone o ne a ena le dilemo tse lekgolo le mashome a mabedi a metso e meraro ha a shwella thabeng ya Hore.

₄₀Yaba Mokanana, kgosi ya Arada, ya ahileng Negebe, naheng ya Kanana, o utlwela hore bana ba Iseraele ba a tla.

₄₁Ha ba tloha thabeng ya Hore, ba ya hloma Salemona. ₄₂Ha ba tloha Salemona, ba ya hloma Punone. ₄₃Ha ba tloha Punone, ba ya hloma Obote. ₄₄Ha ba tloha Obote, ba ya hloma masuping a dithaba tsa Abarime, e naheng ya Moabe. ₄₅Ha ba tloha Ijime, ba ya hloma Dibone-Gade. ₄₆Ha ba tloha Dibone-Gade, ba ya hloma Alemona-Debeletaima. ₄₇Ha ba tloha Alemona-Debeletaima, ba ya hloma thabeng ya Abarime, pela Nebo. ₄₈Ha ba tloha thabeng ya Abarime, ba ya hloma phuleng ya Moabe, pela Jorodane, mabapa le Jeriko. ₄₉Ba ya hloma pela Jorodane, ho tloha Beke-Jeshimote, ho ya fihla Abele-Shitime, diphuleng tsa Moabe.

₅₀Yaba Morena o bua ho Moshe a le diphuleng tsa Moabe, pele noka ya Jorodane, mabapa le Jeriko, o re: ₅₁“Bua le bana ba Iseraele, o re ho bona: ‘Ha le tshela Jorodane, le kena naheng ya Kanana, ₅₂le tla leleka baahi ba naha eo kapele ho lona, le dihe difika tsa bona, le senye ditshwantsho tsa bona tse bopilweng, le fedise le dibaka tsohle tsa bona tsa borapedi. ₅₃Naha eo e tla ba ya lona, mme le tla aha ho yona, hobane ke le neile yona hore e be ya lona. ₅₄Naha eo e tla ba lefa la lona, mme le tla e arola ka lotho, ho ya ka malapa abo lona. Ba bangata o ba abele karolo e kgolo, ba mmalwana o ba abele karolo e nyenyane. Kamoo lotho le tla kgethela motho kateng, lefa le ajwe jwalo. Naha eo e tla ba ya lona ho ya ka merabe ya bo-ntata lona.

₅₅“ ‘Empa haeba le sa leleke baahi ba naha eo kapele ho lona, ho tla etsahala hore bao le ba tlohetseng ba be jwaloka metsu ka mahlong a lona, le meutlwa dikgopong tsa lona, ba le tshwenye naheng eo le ahileng ho yona. ₅₆Lona ke tla le etsa seo ke neng ke hopotse ho ba etsa sona.’ ”

₁Morena a bua ho Moshe, a re:

₂“Laela bana ba Iseraele, mme o re ho bona: ‘Ha le fihla naheng ya Kanana, ena ke yona naha eo e tla ba lefa la lona, yona naha ya Kanana ho ya ka meedi ya yona.

₃“ ‘Ka borwa moedi wa lona o tla tloha lehwatateng la Sine, o ikgohle ka moedi wa Edomo. O tla tloha ka botjhabela moo Lewatle la Letswai le fellang teng. ₄Jwale o tla thinyetsa ka borwa ho moepa wa Lekgalo la Akarabime, o fete Sine, o yo fella ka borwa ho Kadeshe-Barenea; o lebe Hasara-Adare, mme o yo feta Asamone. ₅Ho tloha Asamone moedi o tla thinyetsa molatswaneng wa Egepeta, o yo kgaotsa ka Lewatle.

₆“ ‘Ka bophirimela moedi wa lona e tla ba Lewatle le Leholo, le lebopo la lona. Ona e tla ba wona moedi wa lona ka bophirimela.

₇“ ‘Ka leboya moedi wa lona e tla ba ona: le tla o seha ho tloha Lewatleng le Leholo, ho ya fihla Thabeng ya Hore; ₈ho tloha Thabeng ya Hore le tla o seha ho ya fihla lekgalong la Hamate, mme o yo fella Sedade. ₉Ho tloha moo moedi o tla fetela Siferone, o yo fella Hasere-Enane. Ona e tla ba wona moedi wa lona ka leboya.

₁₀“ ‘Ka botjhabela le tla seha moedi wa lona ho tloha Hasere-Enane ho ya fihla Shefame. ₁₁Moedi o tla theosa ho tloha Shefame ho ya fihla Ribela, ka botjhabela ho Aine; ebe o theosa o ikgohlile ka lebopo le ka botjhabela la letsha la Kinerete. ₁₂Moedi o tla sika ka Jorodane, o be o yo fella Lewatleng la Letswai.

“ ‘Ena e tla ba yona naha ya lona le meedi e e potapotileng.’ ”

₁₃Moshe a laela bana ba Iseraele, a re: “Ena ke yona naha eo le tla e arolelana ka lotho, hore e be lefa la lona; eo Morena a laetseng hore e newe merabe e robong, le karolo e nngwe ya morabe wa Manase. ₁₄Morabe wa bana ba Rubene ho ya ka matlo a bo-ntata bona, le morabe wa bana ba Gade ho ya ka matlo a bo-ntata bona, le karolo e nngwe ya morabe wa Manase, bona ba se ba neilwe lefa la bona. ₁₅Merabe ena e mmedi, le karolo ya morabe wa Manase, yona e se e neilwe lefa la yona ka kwano ho Jorodane, malebana le Jeriko, ka botjhabela.”

₁₆Morena a bua ho Moshe, a re: ₁₇“Ana ke mabitso a banna ba tla le arolela naha, hore e be lefa la lona: moprista Eleasare le Joshua, mora wa Nune. ₁₈Morabeng o mong le o mong o tla nka kgosana e le nngwe ho arola naha, hore e be lefa. ₁₉Ana ke mabitso a banna bao:

“Morabeng wa Juda e be Kalebe, mora wa Jefune; ₂₀morabeng wa bana ba Simeone e be Shemuele, mora wa Amihude; ₂₁morabeng wa Benjamine e be Eledade, mora wa Kiselone; ₂₂morabeng wa bana ba Dane e be kgosana Buki, mora wa Jogele. ₂₃Ho bana ba Josefa: morabeng wa bana ba Manase e be kgosana Haniele, mora wa Efode. ₂₄Morabeng wa bana ba Efraime e be kgosana Kemuele, mora wa Shifetane; ₂₅morabeng wa bana ba Sebulone e be kgosana Elesafane, mora wa Paranake; ₂₆morabeng wa bana ba Isakare e be kgosana Paletiele, mora wa Asane; ₂₇morabeng wa bana ba Ashere e be kgosana Ahihude, mora wa Shelomi; ₂₈morabeng wa bana ba Nafthali e be kgosana Pedahele, mora wa Amihude.”

₂₉Bana ke bona banna bao Morena a ileng a ba laela hore ba arolele bana ba Iseraele lefa, naheng ya Kanana.

₁Morena a bua ho Moshe, ha Moshe a ne a le diphuleng tsa Moabe, pela Jorodane, mabapa le Jeriko, a re:

₂“Laela bana ba Iseraele hore lefeng la bona ba abele Balevi metse eo ba tla phela ho yona; le makgulo a potapotileng metse eo o a abele Balevi.

₃“Metse ena ba tla aha ho yona, mme makgulo a e potapotileng e tla ba a dikgomo tsa bona, le a maruo wohle a bona, le a diphoofolo tsohle tsa bona.

₄“Bonamo ba makgulo a potapotileng metse, ao o tla a abela Balevi, e be dimethara tse makgolo a mane le mashome a mahlano ho tloha marakong a motse, ho o potapota.

₅“Kathoko ho motse bolelele ba moedi e be dimethara tse makgolo a robong ka lehlakoreng le ka botjhabela, le dimethara tse makgolo a robong ka lehlakoreng le ka borwa, le dimethara tse makgolo a robong ka lehlakoreng le ka bophirimela, le dimethara tse makgolo a robong ka lehlakoreng le ka leboya, motse o be hare. Ana e tla ba wona makgulo a metse ena.

₆“Metse eo le tla e abela Balevi e tla ba metse e tsheletseng, eo ho tla tshabelwa ho yona, eo le e abelang ba bolaileng batho, hore ba balehele ho yona, mme kantle ho ena o tla ba abela metse e meng e mashome a mane a metso e mmedi. ₇Metse yohle eo o tla e abela Balevi e be mashome a mane a metso e robedi kaofela ha yona; o ba nee yona le makgulo a yona. ₈Ha e le metse ya lefa la bana ba Iseraele, eo o tla e abela Balevi, o tla nka e mengata ho ba leng bangata, o nke e mmalwana ho ba leng mmalwana. Morabe o mong le o mong o tla nea Balevi metse ya wona ho lekana lefa leo o le fumaneng.”

₉Morena a bua ho Moshe, a re: ₁₀“Bua ho bana ba Iseraele, o re ho bona: ‘Ha le tshela Jorodane le fihla naheng ya Kanana, ₁₁le tla ikgethela metse eo le tla tshabela ho yona; moo motho ya bolaileng motho e mong e se ka morero a tla tshabela teng. ₁₂Metse ena e tla ba setshabelo sa lona ho mophetetsi, e le hore mmolai a tle a se ke a bolawa a eso hlahiswe kapele ho setjhaba hore a ahlolwe. ₁₃Metse ena e tsheletseng, eo le tla e aba, e tla ba metse eo le tla tshabela ho yona. ₁₄Le tla fana ka metse e meraro ka kwano ho Jorodane, ebe le fana ka metse e meraro naheng ya Kanana, mme e tla ba metse eo le tla tshabela ho yona. ₁₅Metseng ena e tsheletseng ke moo ho tla tshabela bana ba Iseraele, le ba jakileng hara bona, le baditjhaba; ke hore e mong le e mong ya bolayang motho e se ka morero o tla tshabela teng.’ ”

₁₆“ ‘Empa haeba motho a batile motho e mong ka ntho e entsweng ka tshepe, eba motho eo o a shwa, eo ya mmatileng ke mmolai, mme mmolai enwa o tshwanetse ho bolawa. ₁₇Ha a mmatile ka lejwe leo a le betsitseng, eba motho eo o a shwa, eo ya mmolaileng ke mmolai, mme mmolai enwa o tshwanetse ho bolawa. ₁₈kapa haeba a mmatile ka molamu oo a o tshwereng, eba motho eo o a shwa, eo ya mmolaileng ke mmolai, mme mmolai enwa o tshwanetse ho bolawa. ₁₉Mophetetsi wa madi a tsholotsweng o tla bolaya mmolai eo ka boyena. Ha a kopana le yena a mmolaye.

₂₀“ ‘Haeba a kgorohela motho ka baka la lehloyo feela, kapa a mmetsa ka ho hong, a mo laletse, eba eo o a shwa; ₂₁kapa haeba a ka mo otla ka setebele ka baka la bora, mme eba eo o a shwa, eo ya mmolaileng ruri o tla bolawa, hobane ke mmolai. Mophetetsi wa madi a tsholotsweng o tla bolaya mmolai eo ha a kopana le yena.

₂₂“ ‘Empa haeba a kgorohela motho e se ka morero, kapa a mmetsa ka ho hong; ₂₃kapa ere a sa mmonne a mmetsa ka lejwe le ka mmolayang, ebe eo o a shwa, feela e se sera sa hae, a bile a se na morero wa ho mo ntsha kotsi, ₂₄phutheho e tla ahlola pakeng tsa mmolai le mophetetsi wa madi, ho ya ka melao ena. ₂₅Phutheho e tla lokolla mmolai matsohong a mophetetsi wa madi a tsholotsweng, e mmusetse motseng oo ho tshabelwang ho wona, moo a neng a balehetse teng. Mmolai eo o tla dula motseng oo ho fihlela Moprista e Moholo, ya neng a tlotsitswe ka ole e halalelang, a eshwa.

₂₆“ ‘Empa haeba neng kapa neng mmolai a ka tswela kantle ho moedi wa motse oo a balehetseng ho wona, ₂₇eba mophetetsi wa madi a tsholotsweng o mo fumana kantle ho moedi wa motse oo a tshabetseng ho wona, mme mophetetsi eo wa madi a tsholotsweng o a mmolaya, ha a na ho ba le molato wa ho tsholla madi, ₂₈hobane mmolai o ne a tshwanetse ho dula motseng oo a tshabetseng ho wona ho fihlela Moprista e Moholo a eshwa. Kamora lefu la Moprista e Moholo ke hona mmolai a ka kgutlelang naheng ya habo.

₂₉“ ‘Tsena e tla ba molao wa kahlolo ho lona, le melokong ya lona, hohle moo le phelang teng.’ ”

₃₀“ ‘Ha e mong a ka bolaya motho, mmolai eo o tla bolawa ho ya ka bopaki ba dipaki, empa bopaki ba paki e le nngwe bo ke ke ba etsa hore motho a ahlolelwe lefu.’ ”

₃₁“ ‘Le se ke la amohela moputso o lopollang mmolai ya molato wa ho bolaya, hobane ruri o tshwanetse ho bolawa.

₃₂“ ‘Le se ke la amohela moputso o lopollang motho ya balehetseng motseng oo ho tshabelwang ho wona, hore a kgutlele naheng ya habo, pele Moprista e Moholo a eshwa.

₃₃“ ‘Kahoo le se ke la silafatsa naha eo le phelang ho yona, hobane madi a tshollwang a silafatsa naha. Naha e ke ke ya etsetswa tefelo ya madi a tsholletsweng ho yona, haese feela ka madi a ya tsholotseng madi ao. ₃₄Le se ke la silafatsa naha eo le ahileng ho yona, eo le nna ke ahileng ho yona, hobane nna, Morena, ke phela hara bana ba Iseraele.’ ”

₁Baholo ba malapa a bana ba Gileade, mora wa Makiri, mora wa Manase, ba malapa a bara ba Josefa, ba atamela, ba bua ba le kapele ho Moshe, le kapele ho mahosana ao e leng baholo ba malapa a bana ba Iseraele, ₂ba re: “Morena o o laetse ho abela bana ba Iseraele naha ena ka lotho, e le lefa la bona. Morena a ba a o laela hore lefa la ngwanabo rona Selofehade, o le abele baradi ba hae. ₃Haeba baradi bana ba ka nyalwa ke ba bang ba merabe e meng ya bana ba Iseraele, lefa la bona le tla ntshwa lefeng la bo-ntata rona, le yo eketsa lefa la morabe oo ba nyetsweng ho wona; kahoo le tla ntshwa lefeng leo re le abetsweng ka lotho. ₄Ha bana ba Iseraele ba etsa mokete wa dilemo tse mashome a mahlano, lefa la bona le tla kenngwa lefeng la morabe oo ba nyetsweng ho wona; kahoo lefa la bona le tla ntshwa lefeng la morabe wa bo-ntata rona.”

₅Moshe a laela bana ba Iseraele ho ya ka taelo ya Morena, a re: “Morabe wa bara ba Josefa o buile ka nepo. ₆Sena ke seo Morena a se laetseng malebana le baradi ba Selofehade, a re: ‘Ba ka inyallwa ke bao ba ba ratang, empa leha ho le jwalo ba nyalwe malapeng a morabe wa ntata bona. ₇Lefa la bana ba Iseraele le ke ke la tloha morabeng o mong la ya ho o mong, hobane e mong le e mong wa bana ba Iseraele o tla kgomarela lefa la morabe wa bo-ntatae. ₈Moradi e mong le e mong, eo e leng mojalefa morabeng ofe kapa ofe wa bana ba Iseraele, o tla nyalwa ke e mong wa lelapa la morabe wa ntatae, e le hore e mong le e mong wa bana ba Iseraele a nne a je lefa la bo-ntatae. ₉Kahoo lefa la bana ba Iseraele le ke ke la tloha morabeng o mong la ya ho o mong, empa morabe o mong le o mong wa bana ba Iseraele o tla kgomarela lefa la bo-ntata wona.’ ”

₁₀Baradi ba Selofehade ba etsa kamoo Morena a laetseng Moshe kateng. ₁₁Bo-Mahela, le Tiresa, le Hogela, le Mileka, le Nowa, ba ile ba nyalwa ke bara ba bana ba bo-ntata bona. ₁₂Baradi ba Selofehade ba ile ba nyalwa malapeng a bara ba Manase, mora wa Josefa, mme lefa la bona ya nna ya eba lefa la morabe wa lelapa la ntata bona.

₁₃Ena ke melao le ditaelo tseo Modimo a neng a di laele bana ba Iseraele ka Moshe, ha ba le diphuleng tsa Moabe, pela Jorodane, mabapa le Jeriko.

₁Latelang mohlala wa ka, jwalokaha le nna ke latela wa Kreste.

₂Ke a le rorisa hobane kamehla le a nkgopola, mme le boloka tsohle kamoo ke di fetiseditseng ho lona kateng.

₃Empa ke rata hore le utlwisise hore Kreste ke hlooho ya monna e mong le e mong, monna ke hlooho ya mosadi, athe Modimo ke hlooho ya Kreste. ₄Monna e mong le e mong ha a rapela kapa a porofeta a rwetse ho hong hloohong, o tlontlolla Kreste. ₅Mosadi e mong le e mong ha a rapela kapa a porofeta, a sa rwala letho hloohong, o tlontlolla monna wa hae; ha ho phapano mahareng a hae le mosadi ya kutileng lekorana. ₆Ha mosadi a sa rwala letho, ho molemo hore a kute. Haeba e le ntho e tlontlollang hore mosadi a kute kapa a beole moriri, eka kgona a rwale ho hong hloohong. ₇Ha ho hlokahale hore monna a rwale letho hloohong, hobane ke setshwantsho sa Modimo, mme o bontsha tlotla ya hae. Empa mosadi yena o bontsha tlotla ya monna wa hae. ₈Etswe mosadi o tswile ho monna, athe monna ha a ya tswa ho mosadi. ₉Ebile mosadi o bopilwe ka baka la monna, athe monna ha ya bopjwa ka baka la mosadi. ₁₀Ka baka la mangeloi, mosadi o tshwanetse ho rwala ho hong hloohong, e leng pontsho ya hore o tlasa taolo ya monna wa hae.

₁₁Athe mahlong a Morena, monna ke wa bohlokwa ho mosadi, le mosadi ke wa bohlokwa ho monna, ₁₂hobane jwalokaha mosadi a tswile ho monna, le yena monna o tswalwa ke mosadi, mme tsohle di tswa ho Modimo. ₁₃Ikahloleleng e le lona. Na ho a lokela hore mosadi a rapele Modimo a sa rwala letho hloohong? ₁₄Ka tlhaho ho a tlontlolla hore monna a hodise moriri wa hae. ₁₅Empa ha mosadi a hodisa moriri wa hae e ba tlotla ho yena, hobane o neilwe moriri o molelele, hore e tle e be lesira ho yena. ₁₆Haeba e mong a rata ho phea kgang ka hona, rona, esita le dikereke tsa Modimo, ha re na moetlo o jwalo wa ho rapela.

₁₇Jwale, ka tseo ke tla di bolela, ha ke le rorise, hobane diphutheho tsa lona ha di na thuso. ₁₈Taba ya pele, ke utlwa hore dikarohano di teng hara lona, diphuthehong tsa lona tsa kereke, mme ke batla ke dumela jwalo. ₁₉E, eka kgona dikarohano di be teng hara lona, e le hore bao e leng ba nnete ba tle ba bonahale. ₂₀Ka baka leo, ha le phutheha mmoho, ha le phuthehele ho ja Selallo sa Morena, ₂₁hobane ha le le dijong, e mong le e mong o potlakela ho itjella tsa hae, e mong a lape, e mong a tahwe. ₂₂Na ha le na mahalona moo le ka itjellang, kapa la inwella teng? Kapa le nyedisa kereke ya Modimo, mme le hlabisa ba se nang letho dihlong? Le re ke reng ho lona? Ke le rorise? Tjhe, tabeng ena nke ke ka le rorisa.

₂₃Nna ke amohetse ho Morena seo ke le neileng sona, e leng hore, ka bosiu boo Morena Jesu a ileng a ekwa ka bona, o ile a nka bohobe, ₂₄a leboha, a bo ngwatha, a re: “Hona ke mmele wa ka, o fanwang ka baka la lona. Etsang hona ho nkgopola.” ₂₅Ka mokgwa o jwalo, ha ho se ho laletswe, a nka senwelo, a re: “Senwelo sena ke selekane se setjha se tiiswang ka madi a ka. Kamehla ha le enwa, le etse jwalo ho nkgopola.” ₂₆Kamehla ha le eja bohobe bona, mme le nwela senwelong sena, le phatlalatsa lefu la Morena ho fihlela a kgutla.

₂₇Ka baka leo, mang kapa mang ya jang bohobe ba Morena, kapa ya nwelang senwelong sa Morena ka mokgwa o sa lokelang, o tla be a sitelwa mmele le madi a Morena. ₂₈Kahoo, motho ka mong a ke a itekole pele, e be hona a jang bohobe boo, mme a nwelang senwelong seo. ₂₉Ya jang le ya nwang a sa kgetholle hore ke mmele wa Morena, o ipitsetsa kahlolo. ₃₀Ke ka baka leo ho nang le ba bangata hara lona, ba kulang le ba fokolang, mme ba bangata ba se ba shwele. ₃₁Hoja re ye re itlhahlobe pele, Modimo o ne a ke ke a re ahlola. ₃₂Empa re a tsuwa, mme re otlwa ke Morena, e le hore re tle re se ke ra ahlolwa mmoho le lefatshe.

₃₃Ha ho le jwalo, bana beso, ha le phuthehela ho ja, fanang sebaka. ₃₄Haeba e mong a lapile, a no ja ha hae, e le hore ho phutheha ha lona ho se ke ha le tlisetsa kahlolo. Ha e le ka tse ding, ke tla di lokisa mohla ke fihlang.