To The Word – Day 40

₁Ha Bileame a bona hore ho thabisa Morena ho hlohonolofatsa Iseraele, ha a ka a hlola a ya batla tsa boloi jwaloka pele, empa a tadima lehwatateng. ₂Ha a phahamisa mahlo, a bona Baiseraele ba hlomile ho ya ka meloko ya bona. Moya wa Modimo wa mo fihlela, ₃mme a porofeta, a re:

₁₀Balake a halefela Bileame haholo, mme a opa diatla tsa hae, a re ho Bileame: “Ke o bitseditse hore o tlo rohaka dira tsa ka, empa bona, o bile o di hlohonolofaditse ka makgetlo a mararo! ₁₁Jwale he, balehela haeno. Ke ne ke hopotse hore ke tla o hlompha haholo, empa ke mona Morena o o timme hlompho eo.”

₁₂Bileame a re ho Balake: “Na ha ke a ka ka bolella maqosa ao o neng o a romile, ka re: ₁₃‘Leha Balake a ka mpha ntlo ya hae e tletse silefera le kgauta, nke ke ka tlola taelo ya Morena ka ho etsa ho lokileng kapa ho hobe, ke tla bua feela seo Morena a reng ke se bue’?”

₁₄“Jwale bona, ke ya setjhabeng sa heso. A nke ke o hlokomedise seo setjhaba sa heso se tla se etsa setjhaba sa hao ka matsatsi a tlang.” ₁₅Bileame a porofeta, a re:

₂₀Bileame a tadima Baamaleke, mme a porofeta, a re:

₂₁A tadima Bakene, mme a porofeta, a re:

₂₃Bileame a porofeta hape, a re:

₂₅Bileame a ema, a tsamaya, a kgutlela ha habo. Balake le yena a ikela ka tsela ya hae.

₁Ha Baiseraele ba le Shitime, setjhaba sa qala ho etsa bootswa le baradi ba setjhaba sa Moabe. ₂Baradi bana ba memela Baiseraele mahlabelong ao ba neng ba nyehella medimo eo ya bona ka wona. Setjhaba sa eja, sa kgumama kapele ho medimo eo ya bona. ₃Baiseraele ba kgumamela Baale-Peore, mme kgalefo ya Modimo ya ba tlokomela.

₄Morena a re ho Moshe: “Nka baetapele bohle ba setjhaba, o ba fanyehe kapele ho Morena, motsheare, tsatsi le itse nte! Kgalefo ya Morena e tlokomang e tle e faposwe Baiseraele.”

₅Moshe a re ho baahlodi ba Iseraele: “E mong le e mong wa lona a bolaye banna ba habo, ba ileng ba sebeletsa Baale-Peore.”

₆Bonang, monna e mong wa bana ba Iseraele a tlisa mosadi wa Momidiane ho bana babo, moo Moshe a ntseng a bona, le moo setjhaba sohle sa bana ba Iseraele se ntseng se bona, se ntse se lla se le monyakong wa Tente ya Morena. ₇Ha Finiase, mora wa Eleasare, setloholo sa moprista Arone, a bona hona, a ema, a tloha hara phutheho eo. A nka lerumo ka letsoho la hae, ₈a sala monna eo wa Moiseraele morao ho ya ka tenteng ya hae, a ba phehletsa ka lerumo bobedi ba bona, monna eo wa Moiseraele le mosadi eo. Sewa se neng se wetse bana ba Iseraele hodimo sa fela, ₉empa se ne se se se bolaile batho ba dikete tse mashome a mabedi a metso e mene.

₁₀Morena a bua ho Moshe, a re: ₁₁“Finiase, mora wa Eleasare, setloholo sa moprista Arone, o fapositse kgalefo ya ka ho bana ba Iseraele, hobane ke yena feela hara bona ya mpoulelang jwalokaha ke boulela. Ke ka baka lena ha ke ne ke halefile ke sa kang ka timetsa bana ba Iseraele. ₁₂Kahoo ba bolelle, o re: ‘Ke etsa selekane sa ka sa kgotso le yena. ₁₃Ho yena, le ho ditloholo tsa hae, selekane sena e tla ba sa boprista kamehla yohle, hobane o ile a boulella Modimo wa hae, a etsetsa bana ba Iseraele tefelo ya sebe.’ ”

₁₄Lebitso la monna wa Moiseraele, ya ileng a bolawa mmoho le mosadi wa Momidiane, e ne e le Simeri, mora wa Salo, kgosana ya ntlo ya morabe wa Simeone. ₁₅Lebitso la mosadi wa Momidiane, ya ileng a bolawa, e ne e le Kosebi, moradi wa Sure, kgosana ya ntlo e nngwe ya Moabe wa Bamidiane.

₁₆Morena a bua ho Moshe, a re: ₁₇“Futuhela Bamidiane, o ba timetse, ₁₈ka baka la bolotsana boo ba ileng ba le etsetsa bona, ba le thetsa ka taba ya Peore; le ka baka la taba ya Kosebi, moradi wa kgosana ya Midiane, kgaitsedi ya bona e ileng ya bolawa ka baka la Peore, mohla letsatsi la sewa.”

₁Kamora sewa sena, Morena a bua ho Moshe, le ho Eleasare, mora wa moprista Arone, a re: ₂“Balang setjhaba sohle sa bana ba Iseraele, ka malapa abo bona, ho tloha ka ba nang le dilemo tse mashome a mabedi ho ya hodimo, bohle bao e ka bang bahlabani ba Iseraele.”

₃Bo-Moshe le moprista Eleasare ba bua le setjhaba se le diphuleng tsa Moabe, pela Jorodane, mabapa le Jeriko, ba re: ₄“Balang setjhaba sohle, ho tloha ka ba dilemo tse mashome a mabedi ho ya hodimo, jwalokaha Morena a laetse Moshe.”

Bana ke bana ba Iseraele ba neng ba etswa naheng ya Egepeta:

₅Rubene, letsibolo la Jakobo. Bara ba Rubene ke Hanoke, ya tswetseng morabe wa Hanoke; le Palo, ya tswetseng morabe wa Palo; ₆le Heserone, ya tswetseng morabe wa Heserone; le Karimi, ya tswetseng morabe wa Karimi. ₇Ana ke malapa a morabe wa Rubene, mme ba ileng ba balwa ya eba dikete tse mashome a mane le metso e meraro, le makgolo a supileng le mashome a mararo.

₈Mora wa Palo e ne e le Eliabe. ₉Bara ba Eliabe e ne e le Nemuele, le Datane, le Abirame. Datane le Abirame ke bona ba neng ba kgethilwe ke setjhaba, mme ke bona ba kileng ba lwantsha Moshe le Arone, ba ena le ba sehlopha sa Kora, ha bao ba ne ba fetohela Morena. ₁₀Lefatshe le ile la ahlama, mme la ba kwenya mmoho le Kora, ha sehlopha seo se eshwa. Ke mohla mollo o timetsang batho ba makgolo a mabedi le mashome a mahlano. Hona ya eba sesupa ho setjhaba. ₁₁Empa bara ba Kora bona ha ba a ka ba eshwa.

₁₂Bara ba Simeone, ho ya ka malapa abo bona, ke Nemuele, ya tswetseng morabe wa Nemuele; le Jamine, ya tswetseng morabe wa Jamine; le Jakine, ya tswetseng morabe wa Jakine; ₁₃le Sera, ya tswetseng morabe wa Sera; le Shaule, ya tswetseng morabe wa Shaule. ₁₄Ana ke malapa a morabe wa Simeone. Palo ya bona e ne e le dikete tse mashome a mabedi le metso e mmedi le makgolo a mabedi.

₁₅Bara ba Gade, ho ya ka malapa abo bona, ke Sefone, ya tswetseng morabe wa Sefone; le Hagi, ya tswetseng morabe wa Hagi; le Shuni, ya tswetseng morabe wa Shuni; ₁₆le Oseni ya tswetseng morabe wa Oseni; le Eri, ya tswetseng morabe wa Eri; ₁₇le Arode, ya tswetseng morabe wa Arode; le Arele, ya tswetseng morabe wa Arele. ₁₈Ana ke malapa a morabe wa bara ba Gade, mme ho ya ka ba badilweng e ne e le dikete tse mashome a mane le makgolo a mahlano.

₁₉Bara ba Juda ke Ere le Onane. Ere le Onane ba ile ba shwela naheng ya Kanana. ₂₀Bara ba Juda, ho ya ka malapa abo bona, ke Shela, ya tswetseng morabe wa Shela; le Perese, ya tswetseng morabe wa Perese; le Sera, ya tswetseng morabe wa Sera. ₂₁Bara ba Perese e ne e le Heserone, ya tswetseng morabe wa Heserone; le Hamule, ya tswetseng morabe wa Hamule. ₂₂Ana ke malapa a morabe wa Juda, mme ho ya ka ba badilweng e ne e le dikete tse mahome a supileng le metso e tsheletseng le makgolo a mahlano.

₂₃Bara ba Isakare, ho ya ka malapa abo bona, ke Tola, ya tswetseng morabe wa Tola; le Pua, ya tswetseng morabe wa Pua; ₂₄le Jashube, ya tswetseng morabe wa Jashube; le Shimerone, ya tswetseng morabe wa Shimerone. ₂₅Ana ke malapa a morabe wa Isakare, mme ho ya ka ba badilweng e ne e le dikete tse mashome a tsheletseng le metso e mene le makgolo a mararo.

₂₆Bara ba Sebulone, ho ya ka malapa abo bona, ke Serede, ya tswetseng morabe wa Serede; le Elone, ya tswetseng morabe wa Elone; le Jahaleele, ya tswetseng morabe wa Jahaleele. ₂₇Ana ke malapa a morabe wa Sebulone, mme ho ya ka ba badilweng e ne e le dikete tse mashome a tsheletseng le makgolo a mahlano.

₂₈Bara ba Josefa, ho ya ka malapa abo bona, ke Manase le Efraime. ₂₉Bara ba Manase ke Makiri, ya tswetseng morabe wa Makiri. Makiri ke yena ya tswetseng Gileade; ha Gileade e le yena ya tswetseng morabe wa Gileade. ₃₀Bana ke bara ba Gileade: Iesere, ya tswetseng morabe wa Iesere; le Heleke, ya tswetseng morabe wa Heleke; ₃₁le Asarele, ya tswetseng morabe wa Asarele; le Shekeme, ya tswetseng morabe wa Shekeme; ₃₂le Shemida, ya tswetseng morabe wa Shemida; le Hefere, ya tswetseng morabe wa Hefere. ₃₃Selofehade, mora wa Hefere, o ne a se na bara, empa a ena le baradi. Mabitso a baradi ba Selofehade e ne e le Mahela, le Nowa, le Hogela, le Mileka, le Tiresa. ₃₄Ana ke malapa a Manase, mme ho ya ka ba badilweng e ne e le dikete tse mashome a mahlano le metso e mmedi le makgolo a supileng.

₃₅Bana ke bara ba Efraime, ho ya ka malapa abo bona: ke Shutela, ya tswetseng morabe wa Shutela; le Bekere, ya tswetseng morabe wa Bekere; le Tahane, ya tswetseng morabe wa Tahane. ₃₆Mora wa Shutela ke Erane, ya tswetseng morabe wa Erane. ₃₇Ana ke malapa a bara ba Efraime, mme ho ya ka ba badilweng e ne e le dikete tse mashome a mararo le metso e mmedi le makgolo a mahlano. Bana ke bara ba Josefa, ho ya ka malapa abo bona.

₃₈Bara ba Benjamine, ho ya ka malapa abo bona, ke Bela, ya tswetseng morabe wa Bela, le Ashebele, ya tswetseng morabe wa Ashebele, le Ahirame, ya tswetseng morabe wa Ahirame, ₃₉le Shefufane, ya tswetseng morabe wa Shefufane, le Hufame, ya tswetseng morabe wa Hufame. ₄₀Bara ba Bela e ne e le Arada le Naamane; Arada a tswala morabe wa Arada; Naamane a tswala morabe wa Naamane.

₄₁Bana ke bona bara ba Benjamine, ho ya ka malapa abo bona, mme ho ya ka ba badilweng e ne e le dikete tse mashome a mane le metso e mehlano le makgolo a tsheletseng.

₄₂Bara ba Dane, ho ya ka malapa abo bona, ke Shuhame, ya tswetseng morabe wa Shuhame. Bana ke bara ba Dane, ho ya ka malapa abo bona, ₄₃mme ho ya ka ba badilweng ba malapa a morabe wa Shuhame e ne e le dikete tse mashome a tsheletseng le metso e mene le makgolo a mane.

₄₄Bara ba Ashere, ho ya ka malapa abo bona, ke Jimena, ya tswetseng morabe wa Jimena, le Jishefi, ya tswetseng morabe wa Jishefi, le Beria, ya tswetseng morabe wa Beria. ₄₅Bara ba Beria ke Hebere, ya tswetseng morabe wa Hebere, le Malekiele, ya tswetseng morabe wa Malekiele. ₄₆Lebitso la moradi wa Ashere e ne e le Sera. ₄₇Ana ke malapa a bara ba Ashere, mme ho ya ka ba badilweng e ne e le dikete tse mashome a mahlano le metso e meraro le makgolo a mane.

₄₈Bara ba Nafthali, ho ya ka malapa abo bona, ke Jaheseele, ya tswetseng morabe wa Jaheseele, le Guni, ya tswetseng morabe wa Guni, ₄₉le Jesere, ya tswetseng morabe wa Jesere, le Shileme, ya tswetseng morabe wa Shileme.

₅₀Ana ke malapa a Nafthali; ho ya ka malapa abo bona, mme ho ya ka ba badilweng e ne e le dikete tse mashome a mane le metso e mehlano le makgolo a mane.

₅₁Palo ya bana ba Iseraele ba badilweng e ne e le dikete tse makgolo a tsheletseng le motso o le mong le makgolo a supileng le mashome a mararo.

₅₂Morena a bua ho Moshe, a re: ₅₃“Naha ena ba tla e arolelwa e le lefa la bona, ho ya ka palo ya bona. ₅₄Morabe o nang le batho ba bangata o o abele karolo e kgolo, mme o nang le batho ba mmalwana o o abele karolo e nyenyane ya naha. Morabe o mong le o mong o abelwe lefa ho ya ka palo ya ba badilweng. ₅₅Feela ba arolelwe naha ena ka lotho. Ba tla arolelwa naha ena ho ya ka mabitso a merabe ya bo-ntata bona. ₅₆Lefa la morabe ka mong, le arolwe ka lotho, o mong le o mong o abelwe ho ya ka bongata kapa bonyenyane ba palo ya wona.”

₅₇Bana ke Balevi ba ileng ba balwa ho ya ka malapa abo bona: Gereshone ya tswetseng morabe wa Gereshone; le Kohate, ya tswetseng morabe wa Kohate; le Merari, ya tswetseng morabe wa Merari.

₅₈Ana ke malapa a Levi: Lelapa la Lebeni, le lelapa la Heborone, le lelapa la Mahadi, le lelapa la Mushi, le lelapa la Kora.

Kohate a tswala Amorame. ₅₉Lebitso la mosadi wa Amorame e ne e le Jokobeta, moradi wa Levi, eo mmae a ileng a mo tswalla Levi ha a le Egepeta. A tswalla Amorame Arone le Moshe, le kgaitsedi ya bona Meriama. ₆₀Arone yena a tswala Nadabe, le Abihu, le Eleasare, le Itamare. ₆₁Bo-Nadabe le Abihu ba eshwa ha ba ne ba nyehella Morena ka mollo o sa halaleleng.

₆₂Banna bohle ba ileng ba balwa e ne e le dikete tse mashome a mabedi le metso e meraro, ho tloha ka ba nang le kgwedi ho ya hodimo. Balevi ba ne ba sa balellwa le bana ba Iseraele, hobane ba ne ba sa abelwa lefa hara bana ba Iseraele.

₆₃Bana ke bona ba ileng ba balwa ke Moshe le moprista Eleasare e leng yena ya neng a bale bana ba Iseraele ha ba le diphuleng tsa Moabe, pela Jorodane, mabapa le Jeriko. ₆₄Hara bona ho ne ho se le ya mong wa ba neng ba balwe ke Moshe le Arone ha ba bala bana ba Iseraele lehwatateng la Sinai. ₆₅Morena o ne a ile a bolela hore ba tla shwela lehwatateng, mme ho se ke ha sala le ya mong, haese Kalebe, mora wa Jefune, le Joshua, mora wa Nune.

₁Jwale ha atamela baradi ba Selofehade, mora wa Hefere, mora wa Gileade, mora wa Makiri, mora wa Manase, ba morabe wa Manase, mora wa Josefa. Ana ke mabitso a baradi bao: Mahela, le Nowa, le Hogela, le Mileka, le Tiresa. ₂Ba ema kapele ho Moshe, le kapele ho moprista Eleasare, le kapele ho mahosana, le kapele ho setjhaba sohle, monyakong wa Tente ya Morena, mme ba re: ₃“Ntata rona o ile a shwella lehwatateng. O ne a se sehlopheng sa ba neng ba ikopantse, ba lwantsha Morena, e leng ba sehlopha sa Kora. Empa o ile a shwa ka baka la sebe sa hae. O ne a se na bara. ₄Ke hobaneng lebitso la ntata rona le ntshwang hara ba lelapa? Na ke hobane a se na mora? Re neeng lefa jwaloka bana babo ntata rona.”

₅Moshe a bea taba ya bona kapele ho Morena. ₆Morena a bua ho Moshe, a re: ₇“Baradi ba Selofehade ba nepile. Ba nee lefa jwaloka bana babo ntata bona; etsa hore lefa la ntata bona e be la bona.

₈“O bue ho bana ba Iseraele, o re: ‘Ha monna a eshwa a se na mora, lefa la hae o tla le abela moradi wa hae. ₉Haeba monna eo a se na moradi, lefa la hae o le abele bana babo. ₁₀Haeba a se na bana babo, lefa la hae o le abele bana babo ntatae. ₁₁Haeba ntatae a se na bana babo, lefa la hae o le abele mong ka yena, ya haufi le yena ka tswalano, hore a le je. Ona e tla ba molao wa toka ho bana ba Iseraele, jwalokaha Morena a laetse Moshe.’ ”

₁₂Morena a re ho Moshe: “Hlwella thabeng ena ya Abarime, mme o tadime naha eo ke e neileng bana ba Iseraele. ₁₃Kamora hoba o e bone, le wena o tla orosetswa setjhabeng sa heno, jwaloka moholwane wa hao Arone, ₁₄hobane ha setjhaba se ne se belaela ka nna, bobedi ba lona le ile la mphetohela ha le le lehwatateng la Sine, la hana ho bonahatsa ho halalela ha ka ka metsi, moo setjhaba se ntseng se bona.” Metsi ana ke metsi a Meriba e Kadeshe, lehwatateng la Sine.

₁₅Moshe a bua ho Morena, a re: ₁₆“Morena Modimo wa meya yohle, le wa batho bohle, a ke a kgethele setjhaba sena monna, ₁₇ya tla se etella pele, ya tla tswa le sona, ya tla kgutla le sona, e le hore setjhaba sa Morena se se ke sa ba jwaloka dinku tse hlokang modisa.”

₁₈Morena a re ho Moshe: “Nka Joshua, mora wa Nune, monna ya nang le Moya wa ka, o mmee matsoho, ₁₉o mo ise kapele ho moprista Eleasare, le kapele ho setjhaba sohle, o mo nee ditaelo moo se ntseng se bona. ₂₀O mo abele a mang a matla a hao, e le hore setjhaba sohle sa bana ba Iseraele se tle se mo mamele. ₂₁O tla ema kapele ho moprista Eleasare, yena a mmotsetse diqeto tsa Morena, ka ho sebedisa lejwe la Urime. Ka taelo ya Joshua bana bohle ba Iseraele ba tla tswa, mme ba tla kgutla ba ena le yena, le setjhaba sohle.”

₂₂Moshe a etsa jwalokaha Morena a mo laetse. A tlisa Joshua kapele ho moprista Eleasare, le kapele ho setjhaba sohle, ₂₃a mmea matsoho, a mo laya, jwalokaha Morena a boleletse Moshe.

₁Jwale ke kena ditabeng tseo le ileng la nngolla ka tsona. Ke re: Ho molemo hore monna a se ke a ama mosadi. ₂Empa ka baka la ho tshaba bohlola, monna ka mong a be le mosadi eo e leng wa hae, le mosadi ka mong a be le monna eo e leng wa hae. ₃Monna a phethe tshwanelo ya hae ho mosadi wa hae, mme le mosadi a etse jwalo ho monna wa hae. ₄Mosadi ha a na matla hodima mmele wa hae; ya nang le matla hodima wona ke monna wa hae. Ka mokgwa o jwalo, le monna ha a na matla hodima mmele wa hae; ya nang le matla hodima wona ke mosadi wa hae. ₅Le se ke la timana, haese ka tumellano, ka nakwana, e le hore le iphe nako ya ho rapela. Kamora moo le boele le kopane, esere Satane a le leka ka baka la ho hloka boitshwaro ha lona. ₆Ke bua tjena ka ho le hauhela e seng ka ho le laela. ₇Ke ne nka rata ha batho bohle ba eba jwaloka nna, empa motho e mong le e mong o na le neo ya hae e tswang ho Modimo, e mong ka mokgwa ona, e mong ka mokgwa wane.

₈Ho masoha le basadi ba bahlolohadi, ke re: Ho molemo ha ba ka itulela jwaloka nna. ₉Empa haeba ba sitwa ho itshwara, ba mpe ba nyale, hobane ho molemo ho nyala ho ena le ho tjheswa ke takatso.

₁₀Ha e le ba seng ba nyalane, ke ba nea taelo ena. Ha e tswe ho nna, empa e tswa ho Morena. Ke re: Mosadi a se ke a hlala monna wa hae. ₁₁Haeba a etsa jwalo a dule a sa nyalwe, kapa a kgutlele ho monna wa hae. Monna le yena a se ke a hlala mosadi wa hae.

₁₂Ha e le ho ba bang, nna, e seng Morena, ke re: Ha modumedi a ena le mosadi eo e seng modumedi, a se ke a mo hlala, haeba mosadi a kgotsofalla ho nna a phela le yena. ₁₃Le mosadi ha a ena le monna eo e seng modumedi, mme a kgotsofalla ho nna a phela le yena, a se ke a hlala monna eo. ₁₄Monna eo e seng modumedi o halaletswa ka mosadi wa hae, le mosadi eo e seng modumedi o halaletswa ka monna wa hae. Hoja ha ho jwalo bana ba bona ba ka be ba sa hlweka, athe jwale ba a halalela.

₁₅Haeba eo e seng modumedi a rata ho hlala mohatsa hae wa modumedi, a mo hlale. Modumedi wa monna kapa wa mosadi ha a ya tlangwa ke letho tabeng tse jwalo. Modimo o le bitseditse hore le phedisane ka kgotso. ₁₆Wena mosadi, o ka tseba jwang haeba o tla pholosa monna wa hao na? Le wena monna, o ka tseba jwang haeba o tla pholosa mosadi wa hao na?

₁₇E mong le e mong a phele ho ya kamoo Morena a mo abetseng kateng, kamoo a neng a le kateng ha Modimo a mmitsa. Sena ke seo ke se laelang dikereke tsohle. ₁₈Ha motho a bitswa a se a bolotse, a se ke a iketsa leqai; ha a bitswa e le leqai, a se ke a bolla. ₁₉Ho bolla kapa ho se bolle hase letho, empa hoo e leng taba ke ho boloka melao ya Modimo. ₂₀E mong le e mong a nne a be kamoo a neng a le kateng mohla a neng a bitswa. ₂₁Ha o bitsitswe o le lekgoba, o se ke wa itshwenya. Empa leha o ka lokoloha bokgobeng, thabela tokoloho eo. ₂₂Etswe ya bitsitsweng ke Morena e le lekgoba, ho Morena o lokolohile. Ka mokgwa o jwalo, ya bitsitsweng ke Kreste a lokolohile, ke lekgoba la Kreste. ₂₃Le rekilwe ka theko e boima, ka hona se iketseng makgoba a batho. ₂₄Bana beso, e mong le e mong a nne a phele pela Modimo ho ya kamoo a neng a le kateng mohla a bitswang.

₂₅Tabeng ya barwetsana, ha ke na taelo ya Morena, ke mpa ke fana ka keletso, ke le ya tshepahalang ka mohau wa Morena. ₂₆Ka baka la ditsietsi tsa matsatsi ana, ke lekanya hore ho ka ba molemo ha motho a itulela a le jwalo. ₂₇Ha o tlamahantswe le mosadi ka lenyalo, o se ke wa itokolla. Ha o sa tlamahanngwa le mosadi ka lenyalo, o se ke wa ipatlela mosadi. ₂₈Haeba o nyala, ha o etse sebe; le morwetsana ha a nyalwa, ha a etse sebe. Empa ba nyalanang ba tla ba le matshwenyeho bophelong bona, mme lona ke a le qenehela.

₂₉Bana beso, seo ke se bolelang ke sena: Nako e se e kgutsufetse. Ho tloha jwale, ba nyetseng e ke ha ba a nyala; ₃₀ba llang e ke ha ba lle; ba thabileng e ke ha ba a thaba; ba rekang e ke ha ba na letho; ₃₁ba phelang ka tsa lefatshe lena e ke ha ba di phelele, hobane mekgwa ya lefatshe lena e a feta.

₃₂Ha ke lakatse ha le ka tshwenyeha. Ya sa nyalang o hlokomela tsa Morena, hore na a ka kgahlisa Morena jwang. ₃₃Empa ya nyetseng o hlokomela tsa lefatshe, hore na a ka kgahlisa mosadi wa hae jwang, ₃₄mme kahoo o pelo di pedi. Mosadi ya sa nyalwang, kapa morwetsana, o hlokomela tsa Morena, hore a tle a halalele mmeleng le moyeng. Empa mosadi ya nyetsweng o hlokomela tsa lefatshe, hore na a ka kgahlisa monna wa hae jwang. ₃₅Ke le bolella tsena ho le thusa, e seng ho le kgina, empa e le hore le batle ho lokelang, le ikakgele mosebetsing wa Modimo ka setotswana.

₃₆Ha motho a lekanya hore e ka ba ntho e dihlong, ha moradi wa hae e le lefetwa, mme a hopola hore eka kgona taba eo e lokiswe, a etse kamoo a ratang kateng. Ha a etse sebe ha a ka mo nyadisa. ₃₇Empa haeba motho a sa tlangwe ke letho e le ka boikgethelo ba hae, a tiile morerong wa hae, mme haeba a se a qetile ka pelong ya hae hore moradi wa hae e nne e be morwetsana, o tla be a etsa hantle. ₃₈Kahoo ya nyadisang moradi wa hae o etsa hantle, empa ya sa mo nyadiseng o etsa hantle ka ho fetisisa.

₃₉Mosadi ya nyetsweng o tlamahantswe le monna wa hae, ha monna a sa phela. Ha monna a se a shwele, mosadi o lokolohile, a ka nyalana le eo a mo ratang, empa e be lenyalo la Sekreste. ₄₀Feela, ho ya ka nna, a ka ba lehlohonolo haholo ha a ka itulela a sa nyalwa. Ke a kgolwa hore le nna ke na le Moya wa Modimo.

₁Jwale ke kena tabeng ya tse hlabetsweng medimo ya bohata. Ke nnete hore rona re na le tsebo tabeng ena. Tsebo eo e ye e bake boikgohomoso, empa lerato le a hodisa. ₂Haeba motho a lekanya hore o na le tsebo, ha a eso ka a tseba ho ya kamoo a tshwanetseng ho tseba kateng. ₃Empa haeba ho ena le ya ratang Modimo, yena o tsejwa ke yena.

₄Ha ho le jwalo, tabeng ya ho ja tse hlabetsweng medimo ya bohata, re a tseba hore modimo wa bohata hase ntho e teng ho hang, le hore Modimo o mong feela. ₅Leha bahedene ba bitsa tse ding tse lehodimong kapa lefatsheng medimo, jwalokaha ba ena le medimo e mengata le marena a mangata, ₆rona re na le Modimo a le mong e leng Ntate. Ke yena eo dintho tsohle di tswang ho yena, eo re mo phelelang. Hape re na le Morena a le mong, e leng Jesu Kreste. Ke yena eo dintho tsohle di entsweng ka yena, eo re phelang ka yena.

₇Empa hase bohle ba nang le tsebo ena. Ba bang, ka baka la ho tlwaela medimo ya bohata, le kajeno-ya-bokajeno ba ntse ba eja tse hlabetsweng medimo ena, ka ho dumela hore ke dijo tsa mahlabelo. Ka ho tshaba ha matswalo a bona, ba ikutlwa ba silafetse; ₈athe dijo hase ntho e ka re atametsang ho Modimo. Ha re sa di je, re ke ke ra lahlehelwa ke letho; leha re ka di ja, re ke ke ra fumana letho.

₉Leha ho le jwalo, le hlokomele esere bolokolohi ba lona ba dihela ba tumelo e fokolang sebeng. ₁₀Ha ya tumelo e fokolang a bona wena, ya nang le tsebo, o le dijong ka tempeleng ya modimo wa bohata, na hoo ho ke ke ha mo kgothaletsa ho ja tse hlabetsweng medimo ya bohata na? ₁₁Ka tsela ena ngwaneno ya fokolang eo Kreste a mo shwetseng, o tla timela ka baka la tsebo eo ya hao. ₁₂Ka ho sitelwa bana babo lona jwalo, le bolaya matswalo a ba fokolang, le sitelwa Kreste. ₁₃Ka baka leo, haeba dijo di dihela ngwaneso sebeng, nke ke ka ja nama le ka mohla, hore ke se ke ka dihela ngwaneso sebeng.