To The Word – Day 4

₁Modimo a hopola Nowe, le diphoofolo tsohle tse hlaha, le makgomo wohle a neng a ena le yena ka arekeng. Jwale Modimo a fokisa moya hodima lefatshe, mme metsi a bohlela. ₂Mehlodi ya bodiba bo boholo, le maru a kgaotsa ho tsholla metsi, pula e tswang lehodimong ya emisa. ₃Butlebutle metsi a nna a monyela fatshe, mme qetellong ya matsatsi a lekgolo le mashome a mahlano, metsi a ne a se a fokotsehile. ₄Ka kgwedi ya bosupa, ka letsatsi la leshome le metso e supileng la kgwedi, areka ya dula hodima dithaba tsa Ararate. ₅Metsi a nna a tswela pele ho fokotseha ho fihlela ka kgwedi ya leshome; mme ka letsatsi la pele la kgwedi ya leshome ditlhoro tsa dithaba tsa hlaha.

₆Hoba ho fete matsatsi a mashome a mane, Nowe a bula fesetere eo a neng a e entse arekeng. ₇A ntsha lekgwaba; lona la tswa, la nna la solla, ho fihlela metsi a epsha lefatsheng. ₈Jwale a ntsha leeba, ho bona hore na metsi a fokotsehile lefatsheng. ₉Empa leeba la se ke la fumana moo le ka beang leoto teng, mme la kgutlela ho yena ka arekeng, hobane metsi a ne a sa tletse hohle lefatsheng. A nanabetsa letsoho la hae, a tshwara leeba, a le kgutlisetsa ho yena ka arekeng. ₁₀A ema matsatsi a mang a supileng, a nto ntsha leeba hape ka arekeng. ₁₁Mantsiboya la kgutlela ho yena, molomong wa lona le nkile lehlaku la mohlwaare, le neng le qeta ho rojwa. Jwale Nowe a tseba hore metsi a fokotsehile lefatsheng. ₁₂A boela a ema matsatsi a supileng hape, a nto boela a ntsha leeba, empa la se ke la hlola le kgutlela ho yena hape.

₁₃Ka selemo sa makgolo a tsheletseng a motso o mong, ka kgwedi ya pele, ka letsatsi la pele la kgwedi, metsi a ne a se a monyetse fatshe. Nowe a bula areka kahodimo, mme a bona hore jwale ho qomme. ₁₄Ka kgwedi ya bobedi, ka letsatsi la mashome a mabedi a metso e supileng, lefatshe le ne le se le omme ngo!

₁₅Yaba Modimo o re ho Nowe: ₁₆“Wena le mosadi wa hao, le bara ba hao, le dingwetsi tsa hao, tswa ka arekeng. ₁₇Tswa le dibopuwa tsohle tse phelang: dinonyana, le diphoofolo, le tsohle tse hahabang hodima lefatshe, di tle di tswale haholo, di ate, di ngatafale lefatsheng.”

₁₈Jwale Nowe a tswa a ena le mosadi wa hae, le bara ba hae, le dingwetsi tsa hae. ₁₉Diphoofolo tsohle, le makgomo wohle, le dinonyana tsohle, le tsohle tse hahabang hodima lefatshe, tsa tswa ka arekeng ka mefuta ya tsona.

₂₀Jwale Nowe a hahela Morena aletare, mme a kgetha diphoofolong tsohle tse sa ileheng, le dinonyaneng tsohle tse sa ileheng, mme ka tsona a etsa sehlabelo sa setjheso aletareng. ₂₁Ha Morena a utlwa monko o monate, a re ka pelong ya hae: “Ha ke sa tla hlola ke rohaka lefatshe ka baka la motho, hobane mehopolo ya pelo ya motho haesale e le mebe ho tloha botjheng ba hae. Ha ke sa tla boela ke otla dintho tsohle tse phelang, jwalokaha ke entse.

₁Modimo a hlohonolofatsa Nowe le bara ba hae, a re ho bona: “Atang, le ngatafale, le tlale lefatshe. ₂Diphoofolo tsohle tsa lefatshe, le dinonyana tsohle tse fofang, di tla le tshaba. Dihahabi tsohle tsa lefatshe, le ditlhapi tsohle tsa lewatle, di bewa matsohong a lona. ₃Tsohle tse tsamayang, tse phelang, e tla ba dijo tsa lona, jwalokaha ke le neile meroho e metala. Tsena tsohle ke le nea tsona.

₄“Feela le se ke la ja nama e ntseng e ena le bophelo, e leng madi. ₅Madi a lona, e leng bophelo ba lona, ke tla a batla. Ke tla a batla dibataneng tsohle, le matsohong a motho. Ke tla batla bophelo ba motho matsohong a ngwanabo.

₇“Jwale lona atang, le ngatafale; anafalang le tlale lefatshe.”

₈Yaba Modimo o bua ho Nowe, a ena le bara ba hae, o re: ₉“Bonang, nna, ke etsa selekane sa ka le lona, le ditloholo tsa lona. ₁₀Ke se etsa le dibopuwa tsohle tse phelang, tse nang le lona: Dinonyana, makgomo, le diphoofolo tse hlaha, le tsohle tse tswileng ka arekeng. ₁₁Ke etsa selekane sa ka le lona: Ha ho ka ke ha hlola ho timetswa batho ka morallo wa metsi. Hape ha ho ka ke ha hlola ho eba le morallo wa metsi o tla timetsa lefatshe.”

₁₂Modimo a re: “Ke sena sesupo sa selekane seo ke se etsang le lona le tsohle tse phelang le lona, le meloko e tlang: ₁₃Ke tla hloma mookodi wa ka marung, mme e tla ba sesupo sa selekane sa ka le lefatshe. ₁₄Ha ke tlisa maru hodima lefatshe, mme mookodi o bonahala marung, ₁₅ke tla hopola selekane seo ke se entseng le lona, le dibopuwa tsohle tse phelang, mme metsi a ke ke a hlola a etsa morallo o tla timetsa batho bohle. ₁₆Mookodi o tla ba marung, mme ha ke o tadima, ke tla hopola selekane se sa feleng, se pakeng tsa Modimo le dibopuwa tsohle tse phelang, tse teng lefatsheng.”

₁₇Modimo a re ho Nowe: “Sena ke sesupo sa selekane seo ke se entseng pakeng tsa ka le batho bohle ba teng lefatsheng.”

₁₈Bara ba Nowe, ba ileng ba tswa ka arekeng, e ne e le Sema le Kama le Jafeta. Kama ke ntata Kanana. ₁₉Ba bararo bana e ne e le bara ba Nowe, mme batho bohle ba lefatsheng ba tswetswe ke bona.

₂₀Nowe e ne e le molemi; ya eba yena wa ho qala ho lema morara. ₂₁A nwa veine, a tahwa, a robala ka tenteng a sa tena. ₂₂Kama, ntata Kanana, ha a bona bofeela ba ntatae, a ya bolella bana babo ba babedi ba le kantle. ₂₃Sema le Jafeta ba nka kobo, ba e akgela mahetleng a bona, ba tsamaya kasanthao, ba fihla ba kwahela bofeela ba ntata bona. Kaha ba ne ba furaletse, ha ba a ka ba bona bofeela ba ntata bona. ₂₄Nowe, ha a se a hlaphohetswe, a tseba seo mora wa hae e monyenyane a ileng a se etsa ho yena.

₂₅Yaba o re:

₂₆Hape a re:

₂₈Kamora morallo wa metsi, Nowe a phela dilemo tse makgolo a mararo le mashome a mahlano. ₂₉Dilemo tsa Nowe kaofela e ne e le makgolo a robong le mashome a mahlano; a nto shwa.

₁Ena ke meloko ya bara ba Nowe, e leng Sema le Kama le Jafeta. Kamora morallo wa metsi ba ne ba tswale bara.

₂Bana ke bara ba Jafeta: Gomere, le Magogo, le Madai, le Jafane, le Tubale, le Mesheke, le Tirase. ₃Bana ke bara ba Gomere: Ashekenase, le Rifate, le Togarema. ₄Bana ke bara ba Jafane: Elisha, le Tarashishe, le Kitime, le Dodanime. ₅Ke bona ba ileng ba abelwa dinaha tsa dihlekehleke, ka ho ya ka maleme a bona, le ka ho ya ka malapa abo bona, le ka ho ya ka merabe ya bona.

₆Bana ke bara ba Kama: Kushe, le Miseraime, le Pute, le Kanana. ₇Bana ke bara ba Kushe: Seba, le Hafila, le Sabeta, le Rama, le Sabeteka, mme bara ba Rama ke Sheba le Dedane. ₈Kushe a tswala Nimerode; Nimerode ya eba senatla se seholo lefatsheng. ₉Mahlong a Modimo e ne e le setsomi se matla, mme ke ka baka lena ho yeng ho thwe: “Jwaloka Nimerode, setsomi se matla mahlong a Modimo.” ₁₀Puso ya hae e qalehile Babele, le Ereke, le Akade, le Kalene, naheng ya Shinare. ₁₁A tloha naheng eo, a ya Asure; a haha Ninife le Rehobote-Ire, le Kalaha, ₁₂le Resene, pakeng tsa Ninife le Kalaha, e leng wona motse o moholo.

₁₃Miseraime a tswala Balode, le Baaname, le Balebahe, le Banafetuhe, ₁₄le Bapatarusi, le Bakasalohe, ba tswetseng Bafilesita, le Bakafatore.

₁₅Kanana a itsibola ka Sidone, ya tla ba Hete, ₁₆le Bajebuse, le Baamore, le Bagirigashe, ₁₇le Bahife, le Baareki, le Basine, ₁₈le Baarefade, le Basemare, le Bahamate. Kamora mona malapa a Bakanana a namela hohle. ₁₉Moedi wa Bakanana o ne o tloha Sidone, ho ya fihla Gerare, le ho ya fihla Gasa, le ho ya Sodoma, le Gomora, le Adema, le Seboime, ho ya fihla Lasha.

₂₀Bana ke bara ba Kama, ka ho ya ka malapa abo bona, le ka ho ya ka maleme a bona, le ka ho ya ka dinaha tsa bona, le ka ho ya ka merabe ya bona.

₂₁Sema, ntata bana bohle ba Ebere, moholwane wa Jafeta, le yena a tswallwa bana. ₂₂Bara ba Sema ke Elame, le Asure, e Arepakeshade, le Lode, le Arame. ₂₃Bara ba Arame ke Use, le Hule, le Getere, le Masha. ₂₄Arepakeshade a tswala Shela, mme Shela a tswala Ebere. ₂₅Ebere a tswala bara ba babedi. Lebitso la e mong e ne e le Pelege, hobane baahi ba lefatshe ba ne ba arohane mehleng ya hae; moena hae e ne e le Jokotane. ₂₆Jokotane a tswala Alamodade, le Shelefe, le Hasere-Mafete, le Jerahe, ₂₇le Hadorame, le Usale, le Dikela, ₂₈le Obale, le Abimaele, le Sheba, ₂₉le Ofire, le Hafila, le Jobabe. Bana bohle ke bara ba Jokotane. ₃₀Ba ne ba ahile Mesha, ho ya fihla Sefare, dithabeng tse ka botjhabela.

₃₁Bana ke bara ba Sema, ka ho ya ka malapa abo bona, le ka ho ya ka maleme a bona, le ka ho ya ka dinaha tsa bona, le ka ho ya ka merabe ya bona.

₃₂Ana ke wona malapa a bara ba Nowe, ho ya ka meloko ya bona, le ka merabe ya bona. Ditjhaba tse tswang ho bona di ile tsa arohana lefatsheng kamora morallo wa metsi.

₁Lefatshe lohle le ne le bua puo e le nngwe, le sebedisa mantswe a le mang. ₂Jwale yare ha batho ba ntse ba hloma ba hlomola, ba leba botjhabela, ba fumana thota naheng ya Shinare, mme ba aha teng.

₃Yaba ba buisana, ba re: “Tloong, re etseng setene, re se bese, se butswe hantle.” Bakeng sa majwe ba sebedisa setene, bakeng sa seretse ba sebedisa boka. ₄Ba re: “Tloong, re ikgaheleng motse, le tora eo tlhoro ya yona e tla fihla lehodimong; mabitso a rona a tle a tume, esere ra tshoha re qhalaqhalana le lefatshe lohle.”

₅Jwale Morena a theohela fatshe ho tla bona motse le tora eo batho ba e hahang. ₆Yaba Morena o re: “Bonang, kaofela ha bona ke setjhaba se le seng, ba bua puo e le nngwe. Hona ke qaleho feela ya mosebetsi wa bona, mme ha ho letho le tla ba thibela morerong oo ba hopotseng ho o etsa. ₇A re theoheleng fatshe he, re ferekanye puo ya bona, ba se ke ba utlwana ha ba bua.”

₈Jwale Morena a ba qhalanyetsa hohle lefatsheng, ho tloha moo ba neng ba le teng, mme ba tlohela ho haha motse oo. ₉Ke ka baka leo lebitso la wona ho ileng ha thwe ke Babele, hobane ke moo Morena a ileng a ferekanyetsa puo ya lefatshe lohle teng, mme ho tloha moo Morena a ba qhalanyetsa lefatsheng lohle.

₁₀Lena ke leloko la Sema.

Sema ha a ena le dilemo tse lekgolo, a tswala Arepakeshade hoba ho fete dilemo tse pedi morallo wa metsi o bile teng. ₁₁Hoba Arepakeshade a tswalwe, Sema o ile a phela dilemo tse makgolo a mahlano, mme a tswala bara ba bang le baradi.

₁₂Arepakeshade a phela dilemo tse mashome a mararo a metso e mehlano, yaba o tswala Shela. ₁₃Hoba Shela a tswalwe, Arepakeshade o ile a phela dilemo tse makgolo a mane a metso e meraro, mme a tswala bara ba bang le baradi.

₁₄Shela a phela dilemo tse mashome a mararo, yaba o tswala Ebere. ₁₅Hoba Ebere a tswalwe, Shela o ile a phela dilemo tse makgolo a mane le metso e meraro, mme a tswala bara ba bang le baradi.

₁₆Ebere a phela dilemo tse mashome a mararo a metso e mene, yaba o tswala Pelege. ₁₇Hoba Pelege a tswalwe, Ebere o ile a phela dilemo tse makgolo a mane le mashome a mararo, mme a tswala bara ba bang le baradi.

₁₈Pelege a phela dilemo tse mashome a mararo, yaba o tswala Reu. ₁₉Hoba Reu a tswalwe, Pelege o ile a phela dilemo tse makgolo a mabedi le metso e robong, mme a tswala bara ba bang le baradi.

₂₀Reu a phela dilemo tse mashome a mararo a metso e mmedi, yaba o tswala Seruge. ₂₁Hoba Seruge a tswalwe, Reu o ile a phela dilemo tse makgolo a mabedi le metso e supileng, mme a tswala bara ba bang le baradi.

₂₂Seruge a phela dilemo tse mashome a mararo, yaba o tswala Nakore. ₂₃Hoba Nakore a tswalwe, Seruge o ile a phela dilemo tse makgolo a mabedi, mme a tswala bara ba bang le baradi.

₂₄Nakore a phela dilemo tse mashome a mabedi a metso e robong, yaba o tswala Tera. ₂₅Hoba Tera a tswalwe, Nakore o ile a phela dilemo tse lekgolo le leshome le metso e robong, mme a tswala bara ba bang le baradi.

₂₆Tera a phela dilemo tse mashome a supileng, yaba o tswala Aborame le Nakore le Harane.

₂₇Lena ke leloko la Tera.

Tera o ile a tswala Aborame, le Nakore, le Harane; Harane a tswala Lota. ₂₈Harane a shwa ntatae Tera a sa phela, a shwela naheng eo a tswaletsweng ho yona, e leng Ure ya Bakalatiya. ₂₉Bo-Aborame le Nakore ba nyala basadi. Lebitso la mosadi wa Aborame e ne e le Sarai, mme lebitso la mosadi wa Nakore e le Mileka, moradi wa Harane, eo e leng ntata Mileka le ntata Iseka. ₃₀Sarai e ne e le nyopa, a se na ngwana.

₃₁Yaba Tera o nka mora wa hae Aborame, le Lota, setloholo sa hae, mora wa Harane, le ngwetsi ya hae Sarai, mosadi wa mora hae Aborame; a tloha le bona naheng ya Ure ya Bakalatiya, a fallela naheng ya Kanana. Ha ba fihla Harane, ba aha teng.

₃₂Ditshiu tseo Tera a di phetseng e bile dilemo tse makgolo a mabedi le metso e mehlano. Tera o ile a shwela Harane.

₁Kamorao ho tsena Jesu a tshela letsha la Galelea, ke ho re la Tiberiase. ₂Letshwelehadi la mo latela, hobane le bone mehlolo eo a e entseng ho ba kulang. ₃Jesu a nyolohela thabeng, mme a dula moo le barutuwa ba hae. ₄Paseka, mokete wa Bajuda, e ne e le haufi.

₅Jwale ha Jesu a phahamisa mahlo, mme a bona hore letshwelehadi le tla ho yena, a re ho Filipi: “Re ka reka bohobe kae, hore batho baa ba je?” ₆A bua hona ka ho mo nonya maikutlo, hobane o ne a tseba seo a tla se etsa.

₇Filipi a mo araba, a re: “Bohobe ba didenare tse makgolo a mabedi bo ke ke ba lekana hore e mong le e mong a fumane sengwathwana.”

₈E mong wa barutuwa ba hae, Andrease, ngwanabo Simone Petrose, a re ho yena: ₉“Moshanyana o teng mona, ya nang le dinkgwa tse hlano tsa harese le ditlhapi tse pedi, empa hoo e ka ba eng ho batho ba bangata hakaale?”

₁₀Jesu a re: “Dudisang batho fatshe.” Jwang bo ne bo le bongata sebakeng seo. Banna ba dula fatshe, palo ya bona e ka ba kete tse hlano. ₁₁Yaba Jesu o nka dinkgwa tseo, mme hoba a lebohe Modimo, a di abela ba dutseng fatshe, le ditlhapi jwalo, kamoo ba lakatsang kateng.

₁₂Ha ba se ba kgotshe, a re ho barutuwa ba hae: “Bokellang makumane a setseng, hore ho se ke ha senyeha letho.” ₁₃Ba a bokella, mme ba tlatsa diroto tse leshome le metso e mmedi ka makumane a setseng, a dinkgwa tse hlano tsa harese, tseo ba di jeleng.

₁₄Jwale ha batho ba bona mohlolo oo a o entseng, ba re: “Kannete enwa ke yena moporofeta ya lokelang ho tla lefatsheng.” ₁₅Empa Jesu ha a lemoha hore ba se ba tla tla ho mo nka, ba mo qobelle ho ba kgosi, a boela a ya thabeng a nnotshi.

₁₆Mantsiboya, barutuwa ba hae ba theohela letsheng, ₁₇mme ba kena ka sekepeng, ba tshelela Kaperenauma, mose ho letsha. Ho ne ho se ho le lefifi, empa Jesu a eso fihle ho bona; ₁₈letsha le ne le tsudubutlana kaha ho ne ho foka moya o matla. ₁₉Ha ba se ba sokile sebaka se ka bang dikilomethara tse nne kapa tse hlano, ba bona Jesu a tsamaya hodima letsha, a atamela sekepe, mme ba tshoha. ₂₀Empa a re ho bona: “Ke nna; se tshabeng!” ₂₁Ba mo kenya sekepeng ka thabo, mme hanghang sekepe sa fihla lebopong leo ba yang ho lona.

₂₂Ka la hosasane letshwele le emeng mose ho letsha la lemoha hore ha ho sekepe moo, haese se le seng, le hore Jesu ha a a ka a kena le barutuwa ba hae ka sekepeng seo, empa barutuwa ba hae ba tlohile ba nnotshi. ₂₃Ha fihla dikepe tse ding tse tswang Tiberiase, haufi le sebaka seo ba neng ba jelle bohobe ho sona, hoba Morena a etse thapelo ya teboho. ₂₄Jwale ha letshwele le bona hore Jesu le barutuwa ba hae ha ba yo moo, la kena ka dikepeng tseo, la ya Kaperenauma, le ntse le batla Jesu.

₂₅Ha batho bao ba mo fumana mose ho letsha, ba re ho yena: “Rabbi, o tlile neng moo?”

₂₆Jesu a ba araba, a re: “Kannetenete, ke a le bolella, le mpatla e seng hobane le bone mehlolo, empa e le hobane le jele bohobe, mme la kgora. ₂₇Le se ke la sebeletsa dijo tse senyehang, empa le sebeletse dijo tse hlolang ho isa bophelong bo sa feleng, tseo Mora Motho a tla le nea tsona, hobane Modimo Ntate o mo neile matla.”

₂₈Ba re ho yena: “Re ka etsa eng hore re tle re sebetse mesebetsi ya Modimo?”

₂₉Jesu a araba, a re ho bona: “Mosebetsi wa Modimo ke hore le dumele ho eo a mo romileng.”

₃₀Jwale ba re ho yena: “O etsa mohlolo ofe, hore re bone, mme re dumele ho wena? O sebetsa eng? ₃₁Bo-ntata rona ba jele manna feelleng, jwalokaha ho ngotswe, ho thwe: ‘O ba fepile ka bohobe bo tswang lehodimong.’ ”

₃₂Jesu a re ho bona: “Kannetenete, ke a le bolella, hase Moshe ya le neileng bohobe bo tswang lehodimong, empa ke Ntate ya le neang bohobe ba nnete bo tswang lehodimong, ₃₃hobane bohobe ba Modimo ke ya theohang lehodimong, ya fang lefatshe bophelo.”

₃₄Ba re ho yena: “Morena, re fe bohobe bona kamehla.”

₃₅Jesu a re ho bona: “Ke nna bohobe ba bophelo; ya tlang ho nna ha a ka ke a lapa le ka mohla, mme ya dumelang ho nna ha a ka ke a nyorwa le ka mohla. ₃₆Empa ke le boleletse hore leha le mpone, ha le dumele. ₃₇Bohle bao Ntate a nneang bona ba tla tla ho nna, mme ya tlang ho nna ha nka ke ka mo lahlela kantle, ₃₈hobane ke theohile lehodimong, e seng ho tla etsa thato ya ka, empa ho tla etsa thato ya ya nthomileng. ₃₉Thato ya ya nthomileng ke hore ho bohle bao a nneileng bona, ho se ke ha lahleha le ya mong wa bona, empa ke ba tsose ka letsatsi la ho qetela. ₄₀Thato ya Ntate ke hore e mong le e mong ya bonang Mora, a dumela ho yena, a be le bophelo bo sa feleng, mme ke tla mo tsosa ka letsatsi la ho qetela.”

₄₁Jwale Bajuda ba dumaduma ka yena, kahobane a itse: “Ke nna bohobe bo theohileng lehodimong,” ₄₂mme ba re: “Na Jesu eo hase mora Josefa, eo re tsebang ntatae le mmae? Jwale o bolela jwang, ha a re: ‘Ke theohile lehodimong’?”

₄₃Jesu a ba araba, a re: “Se dumadumeng. ₄₄Ha ho ya ka tlang ho nna, haese ha Ntate ya nthomileng a ka mo hohela, mme nna ke tla mo tsosa ka letsatsi la ho qetela. ₄₅Ho ngotswe ho Baporofeta, ho thwe: ‘Bohle ba tla rutwa ke Modimo.’ E mong le e mong ya utlwileng le ho ithuta ho Ntate o tla ho nna. ₄₆E seng hore motho o teng ya boneng Ntate, haese ya tswang ho Modimo; yena o bone Ntate. ₄₇Kannetenete, ke a le bolella, ya dumelang o na le bophelo bo sa feleng. ₄₈Ke nna bohobe ba bophelo. ₄₉Bo-ntata lona ba ile ba eja manna feelleng, empa ba eshwa. ₅₀Bona ke bohobe bo theohang lehodimong, hore motho a bo je, mme a se ke a shwa. ₅₁Ke nna bohobe bo phelang, bo theohileng lehodimong; ha motho a ka ja bohobe bona o tla phela ka ho sa feleng, mme bohobe boo ke tla fana ka bona ka baka la bophelo ba lefatshe, ke nama ya ka.”

₅₂Bajuda ba qabana, ba re: “Eo a ka re nea nama ya hae jwang, ra e ja?”

₅₃Jesu a re ho bona: “Kannetenete, ke a le bolella, ha le sa je nama ya Mora Motho, le sa nwe madi a hae, ha le na bophelo ka ho lona. ₅₄Ya jang nama ya ka, a enwa madi a ka, o na le bophelo bo sa feleng, mme ke tla mo tsosa ka letsatsi la ho qetela. ₅₅Nama ya ka ke sejo sa nnete, le madi a ka ke seno sa nnete. ₅₆Ya jang nama ya ka, a enwa madi a ka, o dula ka ho nna, le nna ka ho yena. ₅₇Jwalokaha Ntate ya phelang a nthomile, mme ke phela ka Ntate, le ya ntjang o tla phela ka nna. ₅₈Bona ke bohobe bo theohileng lehodimong, e seng bo jwaloka boo bo-ntata rona ba bo jeleng, mme ba eshwa; ya jang bohobe bona o tla phela ka ho sa feleng.” ₅₉A bolela ditaba tsena a ntse a ruta ka tlung ya thapelo, Kaperenauma.

₆₀Yare ha ba bangata ba barutuwa ba hae ba utlwa, ba re: “Polelo ena e thata; ke mang ya ka e mamellang?”

₆₁Empa Jesu, ka ho tseba hore barutuwa ba hae ba dumaduma ka taba ena, a re ho bona: “Na hoo ho a le kgopisa? ₆₂Jwale ho tla ba jwang ha le bona Mora Motho a nyolohela moo a neng a le teng pele? ₆₃Moya ke wona o phedisang, nama ha e thuse letho; dipolelo tseo ke di buileng ho lona ke moya, mme ke bophelo. ₆₄Empa ba bang ba teng ho lona ba sa dumeleng.” Jesu o ne a tsebile ho tloha qalong hore na ba sa dumeleng ke bo-mang, le hore na ya tla mo eka ke mang. ₆₅A re: “Ka baka leo, ke le boleletse hore ha ho ya ka tlang ho nna ha a sa ho newa ke Ntate.”

₆₆Ho tloha nakong eo ba bangata ba barutuwa ba hae ba ikgula, mme ba se ke ba hlola ba tsamaya le yena.

₆₇Yaba Jesu o re ho ba leshome le metso e mmedi: “Na le lona le rata ho ikela na?”

₆₈Simone Petrose a mo araba, a re: “Morena, re tla ya ho mang? O na le mantswe a bophelo bo sa feleng; ₆₉rona re dumetse, mme re tsebile hore o Ya Halalelang wa Modimo.”

₇₀Jesu a ba araba, a re: “Na lona ba leshome le metso e mmedi ha ke a le kgetha na? Athe e mong ho lona ke Diabolosi!” ₇₁O ne a bolela Judase, mora Simone Isekariota, hobane o ne a se a tla mo eka, leha e ne e le e mong wa ba leshome le metso e mmedi.

₁Kamorao ho tsena Jesu a tsamaya Galelea; o ne a sa rate ho tsamaya Judea, hobane Bajuda ba ne ba batla ho mmolaya. ₂Mokete wa Bajuda wa Maphephe o ne o le haufi. ₃Yaba bana babo ba re ho yena: “Tloha mona, o ye Judea, hore le barutuwa ba hao ba bone mesebetsi eo o e etsang, ₄hobane ha ho ya etsang letho sephiring, ha a batla ho ba pepeneneng. Ha o etsa tsena, iponahatse ho lefatshe.” ₅Esitana le bana babo ba ne ba sa dumele ho yena.

₆Jesu a re ho bona: “Nako ya ka ha e eso fihle, athe nako ya lona ke yona kamehla. ₇Lefatshe le ke ke la le hloya, empa nna le ntlhoile, kahobane nna ke paka hore mesebetsi ya lona e mebe. ₈Lona, eyang moketeng; nna ha ke ye moketeng ona, hobane nako ya ka ha e eso fihle.” ₉Hoba a ba bolelle tsena, a sala Galelea.

₁₀Empa ha bana babo ba se ba ile moketeng, le yena a ya ka lenyele, e seng ka ho totobala, empa sephiring. ₁₁Jwale Bajuda ba mmatla moketeng, ba re: “O kae?”

₁₂Ho ne ho ena le ho dumaduma ho hongata ka yena letshweleng; ba bang ba ne ba re: “O lokile.”

Ba bang ba re: “Tjhe, o kgelosa letshwele.” ₁₃Leha ho le jwalo ho ne ho se ya buang ka yena pepeneneng ka baka la ho tshaba Bajuda.

₁₄Ha e se e le mahareng a mokete, Jesu a ya ka Tempeleng, a ruta. ₁₅Bajuda ba makala, ba re: “O tseba tsa thuto jwang, a sa ithuta?”

₁₆Jesu a ba araba, a re: “Thuto ya ka hase ya ka, empa ke ya ya nthomileng; ₁₇ha motho a rata ho etsa thato ya ya nthomileng, o tla tseba hore na thuto eo e tswa ho Modimo, kapa ke bua ka bonna. ₁₈Ya ipolelang o ipatlela tlotla, athe ya batlang tlotla ya ya mo romileng, yena ke wa nnete, mme ho se loke ha ho yo ho yena. ₁₉Na Moshe ha a a ka a le nea Molao? Empa ha ho le ya mong ya phethang Molao oo. Ke ka baka lang ha le batla ho mpolaya?”

₂₀Letshwele la araba, la re: “O na le modemona; ke mang ya batlang ho o bolaya?”

₂₁Jesu a ba araba, a re: “Ke entse ketso e le nngwe, mme le maketse bohle. ₂₂Moshe o le neile lebollo, e seng hore le tswa ho Moshe, empa le tswa ho baholoholo, mme le bolotsa motho ka Sabatha. ₂₃Ha motho a bolotswa ka Sabatha hore Molao wa Moshe o se ke wa fediswa, keng ha le nkgalefela kahobane ke fodisitse motho kahohlehohle ka Sabatha? ₂₄Se ahloleng ho ya ka tshobotsi, empa ahlolang ka kahlolo e lokileng.”

₂₅Ba bang ba Jerusalema ba re: “Na hase yena eo ba batlang ho mmolaya? ₂₆Empa bonang, o bua pepenene, mme ha ba re letho ho yena. Na ekaba babusi ba tsebile kannete hore ke yena Kreste? ₂₇Empa re tseba moo motho enwa a tswang teng; ha Kreste a etla, ha ho ya tla tseba moo a tswang teng.”

₂₈Jwale Jesu a phahamisa lentswe, a ruta ka Tempeleng, a re: “Le a ntseba, le tseba le moo ke tswang teng; ha ke a tla ka bonna, empa ya nthomileng ke wa nnete, eo le sa mo tsebeng. ₂₉Nna ke a mo tseba, hobane ke tswa ho yena, mme ke yena ya nthomileng.”

₃₀Jwale ba batla ho mo tshwara, empa ha ho ya ileng a mo isa letsoho, hobane nako ya hae e ne e eso fihle. ₃₁Empa ba bangata letshweleng ba ile ba dumela ho yena, ba re: “Ha Kreste a etla, na o tla etsa mehlolo e mengata ho feta e entsweng ke eo?”

₃₂Bafarisi ba utlwa letshwele le dumaduma tse jwalo ka Jesu, mme baprista ba baholo le Bafarisi ba roma bahlanka ho mo tshwara. ₃₃Yaba Jesu o re: “Ke sa tla ba le lona nakwana, ebe ke ya ho ya nthomileng. ₃₄Le tla mpatla, mme ha le na ho mphumana; le moo ke leng teng, le ke ke la tla.”

₃₅Bajuda ba botsana, ba re: “O se a tla ya kae hore re se ke ra mo fumana? E seng o se a tla ya ho ba qhalaneng hara Bagerike le ho ruta Bagerike? ₃₆Ke polelo nngwe eo a e boletseng, ha a re: ‘Le tla mpatla, mme ha le na ho mphumana; le moo ke leng teng, le ke ke la tla.’ ”

₃₇Ka letsatsi la ho qetela, e leng le leholo la mokete, Jesu a ema, a howa, a re: “Ha motho a nyorilwe, a tle ho nna, a nwe. ₃₈Ya dumelang ho nna, jwalokaha Mangolo a boletse, dinoka tsa metsi a kollang di tla phalla di etswa ka ho yena.” ₃₉A bolela hona a lekanya Moya oo ba dumetseng ho yena ba neng ba se ba tla o amohela; kaha Moya o ne o eso be teng, hobane Jesu a ne a eso tlotliswe.

₄₀Jwale ha ba bang letshweleng ba utlwa dipolelo tsena, ba re: “Kannete ke yena Moporofeta!”

₄₁Ba bang ba re: “Ke yena Kreste!”

Empa ba bang ba re: “Na Kreste a ka tswa Galelea? ₄₂Na Mangolo ha a bolele hore Kreste o tla tswa lelokong la Davida, motsaneng wa Betlelehema, moo Davida a neng a ahile teng?” ₄₃Yaba letshwele le fapana ka maikutlo ka baka la hae; ₄₄ba bang ho bona ba ne ba lakatsa ho mo tshwara, empa ha ho ya ileng a mo isa letsoho.

₄₅Jwale bahlanka ba ya ho baprista ba baholo le ho Bafarisi, mme bao ba re ho bona: “Ke ka baka lang le sa mo tlisang?”

₄₆Bahlanka ba araba, ba re: “Ha ho motho ya kileng a bua jwaloka motho enwa.”

₄₇Bafarisi ba ba botsa, ba re: “Na le lona le kgelositswe? ₄₈Na o teng ho babusi kapa ho Bafarisi ya dumetseng ho yena? ₄₉Empa mahoohoo ana a sa tsebeng Molao a rohakehile.”

₅₀Nikodema, e mong wa bona, ya neng a tle ho yena pele ho moo, a re ho bona: ₅₁“Na Molao wa rona o ahlola motho a eso ikarabelle, le ho tseba seo a se entseng?”

₅₂Ba mo araba, ba re: “Na le wena o tswa Galelea? Fuputsa, mme o tla bona hore ha ho moporofeta ya tswang Galelea.”

₅₃Jwale e mong le e mong a ya tlung ya hae.