To The Word – Day 22

₁Morena a bua ho Moshe, a re: “Tloha sebakeng sena, wena le setjhaba seo o se nyolotseng naheng ya Egepeta, o se ise naheng eo ke ileng ka hlapanyetsa Aborahama, le Isaka, le Jakobo, ka re: ‘Ke tla e nea ditloholo tsa hao.’ ₂Ke tla romela lengeloi ho o etella pele, mme ke tla leleka Bakanana, le Baamore, le Bahete, le Baperise, le Bahife, le Bajebuse. ₃Ke naha e phallang lebese le mahe a dinotshi, empa nna ha ke na ho nyoloha le lona, hobane le setjhaba se manganga, esere ka tshoha ke le timetsa tseleng.”

₄Yare ha setjhaba se utlwa mantswe ana a bohloko, sa lla, mme ha se ke ha eba ya rwalang mekgabiso ya hae. ₅Yaba Morena o re ho Moshe: “Bolella bana ba Iseraele, o re: ‘Le setjhaba se manganga; ha nka ka ba hara lona motsotswana o le mong feela, nka le timetsa. Jwale rolang mekgabiso ya lona, ke tle ke tsebe hore na ke etsa eng ho lona.’ ” ₆Ka baka leo, bana ba Iseraele ha ba a ka ba hlola ba rwala mekgabiso ya bona, ho qala ha ba le thabeng ya Horebe.

₇Moshe o ne a ye a nke Tente, ebe o e hloma kathoko ho diahelo, hojana le tsona, mme a e bitse Tente ya Morena. Jwale bohle ba neng ba batla ho tseba thato ya Morena, ba ne ba ye ba ye Tenteng eo, e leng Tente ya Morena, e neng e le kathoko ho diahelo. ₈Ha Moshe a eya Tenteng eo, setjhaba sohle se ne se ye se raohe, motho ka mong a eme monyakong wa tente ya hae, a tadime Moshe ho fihlela a kena ka Tenteng. ₉Kamehla ha Moshe a kena ka Tenteng, leru le lopaletseng le ne le ye le theohe, le eme monyakong wa Tente eo; ebe Morena o bua le Moshe. ₁₀Batho bohle ba ne ba ye ba bone leru le lopaletseng le eme monyakong wa Tente, mme bohle ba ne ba ye ba raohe, ba kgumame, motho ka mong monyakong wa tente ya hae. ₁₁Morena o ne a ye a bue le Moshe, difahleho di tadimane, jwalokaha motho a bua le motswalle wa hae. Moshe o ne a ye a kgutlele diahelong, empa lehlahana la hae Joshua, mora wa Nune, wa mohlankana, yena o ne a sa ke be a tswe ka Tenteng.

₁₂Yaba Moshe o re ho Morena: “Bona, o itse ho nna: ‘Nyolla setjhaba sena,’ empa ha o eso mpolelle hore na o tla nthoma le mang, le hoja wena o itse: ‘Ke tseba lebitso la hao, mme ke bile ke o hauhetse.’ ₁₃Haeba o nkgauhetse, jwale ke a o rapela: ako mpontshe ditsela tsa hao, ke a o rapela, ke tle ke o tsebe; o tle o fele o nkgauhele. Ako hopole hore batho bana ke setjhaba sa hao.”

₁₄Morena a re: “Nna, ka sebele sa ka, ke tla tsamaya le wena, ke yo o phomotsa.”

₁₅Moshe a re ho yena: “Haeba wena ka sebele o sa tsamaye le nna, o se ke wa re tlosa mona. ₁₆Hona jwale ho tla tsejwa kang hore o nkgauhetse, nna le setjhaba see sa hao? Na hase ka ho tsamaya le rona, e le hore nna le setjhaba see re tle re kgethehe hara ditjhaba tsohle tsa lefatshe?”

₁₇Morena a re ho Moshe: “Ntho ena eo o e buileng, le yona ke tla e etsa, hobane ke o hauhetse, mme ke tseba lebitso la hao.”

₁₈Moshe a re: “Ako mpontshe tlotla ya hao, ke a o rapela!”

₁₉Morena a re: “Ke tla o bontsha botle ba ka bo hadimang, ke be ke phatlalatse lebitso la Morena kapele ho wena. Ke tla hauhela eo ke ratang ho mo hauhela, ke utlwele bohloko eo ke ratang ho mo utlwela bohloko.” ₂₀Morena a boela a re: “Ha o ka ke wa tseba ho bona sefahleho sa ka, hobane motho a ke ke a mpona, yaba o a phela.”

₂₁Morena a nto re: “Bona, ho na le sebaka pela ka mona. Wena o tla ema hodima lefika. ₂₂Etlare ha tlotla ya ka e feta, ke tla o kenya lepatsong la lefika, ke o kwahele ka seatla sa ka, ho fihlela ke ba ke feta. ₂₃Jwale ke tla tlosa seatla sa ka, mme o tla bona sekotlo sa ka, empa sefahleho sa ka sona se ke ke sa bonwa.”

₁Morena a re ho Moshe: “Ipetlele matlapa a mabedi a Molao a tshwanang le a pele. Hodima matlapa ao ke tla ngola mantswe a neng a ngotswe hodima matlapa a pele, ao o a pshatlileng. ₂Itokisetse hore hosasane, e sa le hoseng, o nyolohele thabeng ya Sinai, o itlhahise kapele ho nna kahodima tlhoro ya thaba. ₃Ho se be motho ya tla nyoloha le wena; ho se be motho ya ka bonwang kae kapa kae thabeng eo. Mehlape ya dinku le ya dikgomo e se ke ya fula thabeng eo.”

₄Moshe a betla matlapa a mabedi a tshwanang le a pele, a tsoha ka madungwadungwana, a nyolohela thabeng ya Sinai, jwalokaha Morena a ne a mo laetse, a nkile matlapa a mabedi.

₅Morena a theoha a le kahara leru, a ema le Moshe hona moo, mme Moshe a bitsa lebitso la Morena. ₆Yaba Morena o feta kapele ho yena, mme a howa, a re: “Ke nna Morena! Ke nna Morena! Modimo ya nang le kutlwelobohloko, ya mosa, ya diehang ho halefa, ya nang le mohau o moholo le botshepehi; ₇ya hauhelang ba diketekete ka ho ba tshwarela bokgopo ba bona, le ditlolo tsa bona, le dibe tsa bona, empa ya ke keng a tlohela ho otla ba molato; ya otlang bana, le ditloholo, ka baka la bokgopo ba bo-ntata bona, ho isa molokong wa boraro le wa bone.”

₈Moshe a inamela fatshe ka potlako, a kgumamela Morena. ₉Yaba o re: “Haeba jwale o nkgauhetse, ke rapela hore Morena a ke a tsamaye le rona, le hoja re le setjhaba se manganga. Ako re tshwarele bokgopo ba rona le dibe tsa rona, mme o re etse ba hao.”

₁₀Morena a re: “Bona, ke etsa selekane. Mahlong a setjhaba sohle sa heno, ke tla etsa dimakatso tse esong ho etswe lefatsheng lohle, le hara ditjhaba tsohle. Setjhaba sohle seo o phelang hara sona se tla bona mosebetsi wa Morena, hobane seo ke leng lekgatheng la ho se etsa ka wena se a tshabeha. ₁₁Ela hloko seo ke o laelang sona kajeno. Ke tla o tebella Baamore, le Bakanana, le Bahete, le Baperise, le Bahife, le Bajebuse. ₁₂Hlokomela, o se ke wa etsa selekane la baahi ba naha eo o yang ho yona, esere selekane seo ya eba leraba hara lona. ₁₃O heletse dialetare tsa bona, o thue difika tsa bona tseo ba di kgumamelang, o senye ditshwantsho tsa bona tsa Ashera.

₁₄“O se ke wa kgumamela modimo osele, hobane Morena, eo lebitso la hae e leng Sebouledi, ke Modimo ya boulelang. ₁₅O se ke wa etsa selekane le baahi ba naha eo, esere ha ba rapela medimo ya bona ya bohata, mme ba e etsetsa mahlabelo, ba o mema, yaba o ja tse hlabetsweng medimo ya bona. ₁₆O se ke wa nyadisa bara ba hao baradi ba bona, esere ba ba kgelosa, mme ba hloka botshepehi ho nna, ba rapela medimo ya bohata ya baahi ba moo.

₁₇“O se ke wa iketsetsa medimo e bopilweng.

₁₈“O boloke mokete wa bohobe bo sa lomoswang. Ka matsatsi a supileng o tla ja bohobe bo sa lomoswang, jwalokaha ke o laetse, ka nako e beilweng, ka kgwedi ya Mmesa, hobane o tswile Egepeta ka kgwedi eo ya Mmesa.

₁₉“Matsibolo wohle ke a ka; le diphoofolo tsa hao tsohle tse tona, tseo e leng matsibolo a dikgomo kapa a dinku. ₂₀O tla lopolla letsibolo la tonki ka konyana; ha o sa le lopolle, o le sothe molala. Bara ba hao bohle ba matsibolo o tla ba lopolla.

“Batho ba se ke ba hlaha kapele ho nna ba itsolokile.

₂₁“O ka sebetsa ka matsatsi a tsheletseng, empa ka letsatsi la bosupa o phomole; o phomole ha ho lengwa le ha ho kotulwa.

₂₂“O etse le mokete wa dibeke, wa dilopotsiya tsa ha ho helwa koro; le mokete wa tsohle tse bokeletsweng ha ngwaha o roba.

₂₃“Hararo ka selemo, bohle ba lona ba batona ba tla hlaha kapele ho Morena Morena Modimo wa Iseraele. ₂₄Ke tla falatsa ditjhaba tse tseleng ya lona, ke atise naha ya lona, mme ha ho ya tla honohela naha ya lona, ha le ilo hlaha kapele ho Morena Modimo wa lona, hararo ka selemo.

₂₅“O se ke wa nnyehella ka madi a sehlabelo sa ka le bohobe bo lomositsweng, mme sehlabelo sa mokete wa Paseka se se ke sa sielwa la hosasane.

₂₆“Dilopotsiya tse ntlentle tsa masimo a hao o di ise tlung ya Morena, Modimo wa hao.

“O se ke wa pheha potsanyane ka lebese la mma yona.”

₂₇Morena a re ho Moshe: “Ingolle mantswe ana, hobane ke ka mantswe ana ke etsang selekane sa ka le wena, le Iseraele.”

₂₈Moshe a hlola moo le Morena ka matsatsi a mashome a mane, le ka masiu a mashome a mane, a sa je, a sa nwe. Morena a ngola mantswe a selekane matlapeng, e leng melao e leshome.

₂₉Moshe a theoha thabeng ya Sinai, matsohong a nkile matlapa a mabedi a ngotsweng Molao. Ha a theoha thabeng, o ne a sa tsebe hore sefahleho sa hae se a kganya, ka baka la ho buisana le Modimo. ₃₀Yare ha Arone la bana bohle ba Iseraele ba tadima Moshe, mme ba bona hore sefahleho sa hae se a kganya, ba tshaba ho atamela ho yena. ₃₁Yaba Moshe o a ba bitsa; Arone le baokamedi bohle ba setjhaba ba kgutlela ho yena, mme Moshe a bua le bona. ₃₂Hamorao bana bohle ba Iseraele ba atamela, mme a ba bolella tsohle tseo Morena a di buileng ho yena, ha a le thabeng ya Sinai.

₃₃Ha Moshe a qetile ho bua le bona, a ikgurumetsa sefahleho ka lesira. ₃₄Empa ha Moshe a kena ho ya bua le Morena, o ne a ye a tlose lesira ho fihlela a be a etswa. Ha a se tswile, o ne a ye a bolelle bana ba Iseraele seo a se laetsweng. ₃₅Bana ba Iseraele ba ne ba ye ba bone hore sefahleho sa Moshe se a kganya; ebe Moshe o boela a ikgurumetsa sefahleho ka lesira, ho fihlela a kena hape ho ya bua le Morena.

₁Yaba Moshe o bokella setjhaba sohle sa bana ba Iseraele, o re ho sona: “Tsena ke tseo Morena a laetseng hore le di etse: ₂‘Le ka sebetsa ka matsatsi a tsheletseng, empa letsatsi la bosupa le tla halalela ho lona; ke Sabatha, letsatsi la phomolo ya Morena; mang kapa mang ya tla sebetsa ka letsatsi leo o tla bolawa. ₃Malapeng wohle a lona le se ke la besa mollo ka letsatsi lena la Sabatha.’ ”

₄Moshe a bua le setjhaba sohle sa bana ba Iseraele, a re: “Sena ke seo Morena a se laetseng, a re: ₅‘Ntshetsang Morena dimpho tsa lona; e mong le e mong a ntshetse Morena ka pelo e tshweu; kgauta, le silefera, le lethose; ₆masela a maputswa, le a perese, le a mafubedu, le a lene, le ka boya ba dipodi; ₇le matlalo a dipheleu a mmasa, le matlalo a diqibi, le dithupa tsa sefate sa mositsane; ₈le ole e bonesang, le dinoko tsa ole e tlotsang, le tsa mokubetso o monko o monate; ₉le majwe a bohlokwa a kareneleane, le mahakwe a rokellwang setipeng, le mokgabisong wa sefuba.’ ”

₁₀“ ‘Bohle ba bohlale hara lona ba ke ba tle, ba tlo etsa tsohle tseo Morena a di laetseng: ₁₁e leng Leaho, tente ya lona, le marulelo a lona, le dihokelo tsa lona, le dithupa tsa lona, le maballo a lona, le ditshiya tsa lona, le didulwana tsa tsona; ₁₂le areka, le mefeng ya yona, le sekwahelo sa tefelo ya sebe, le lesira le sireletsang areka; ₁₃le tafole, le mefeng ya yona, le dijana tsohle tsa yona, le bohobe bo halalelang; ₁₄le sedulwana sa lebone le bonesang, le tsohle tsa sona, le mabone a sona, le ole e bonesang; ₁₅le aletare ya mokubetso, le mefeng ya yona, le ole e tlotsang, le mokubetso o monko o monate, le lesira la monyako, le monyakong wa Leaho; ₁₆le aletare ya setjheso, le mokgabiso wa yona wa lethose o kang letlowa, le mefeng ya yona, le tsohle tsa yona, le sekotlolo sa ho itlhatswetsa, le sedulwana sa sona; ₁₇le masela a seotlwana, le ditshiya tsa sona, le didulwana tsa tsona, le lesira la monyako wa seotlwana; ₁₈le dimapo tsa Tente, le dimapo tsa seotlwana, le mehala ya tsona; ₁₉le diaparo tse lohilweng tsa ho sebeletsa ka Sehalalelong, le diaparo tse halalelang tsa moprista Arone, le diaparo tsa bara ba hae, ha ba sebeletsa e le baprista.’ ”

₂₀Setjhaba sohle sa bana ba Iseraele sa tloha kapele ho Moshe. ₂₁Batho ba boela ba tla; bohle bao pelo tsa bona di ratang, le bohle ba pelo di tshweu, ba tlisetsa Morena dimpho bakeng sa ho etsa Tente ya Morena, le bakeng sa tshebeletso e tla etsetswa ka ho yona, le bakeng sa ho etsa diaparo tse halalelang. ₂₂Ha kena le basadi, bohle bao pelo tsa bona di ratang; ba tlisa dipetja, le masale a rwalwang dinkong, le mefitshane, le dipele, le tsohle tse entsweng ka kgauta; bohle ba nang le hona ba tlisetsa Morena dimpho tsa kgauta. ₂₃Bohle ba neng ba ena le masela a maputswa, le a perese, le a mafubedu, le a entsweng ka lene, a loehileng; le boya ba dipodi, le matlalo a dipheleu a mmasa, le matlalo a diqibi, ba a tlisa. ₂₄Bohle ba fanang ka silefera, le ka lethose, ba tlisetsa Morena dimpho tseo. Le bohle ba neng ba ena le dithupa tsa sefate sa mositsane tse ka sebediswang, ba di tlisa. ₂₅Basadi bohle ba bohlale ba ohla ka matsoho a bona; ba tlisa dikgwele tse ohlilweng tse putswa, le tse perese, le tse kgubedu, le tsa lene.

₂₆Basadi bohle ba ratang, ba bohlale, ba ohla boya ba dipodi. ₂₇Baokamedi ba tlisa majwe a bohlokwa a kareneleane, le mahakwe a rokellwang setipeng, le a mokgabiso wa sefuba; ₂₈le dinoko, le ole e bonesang, le ole e tlotsang, le mokubetso o monko o monate. ₂₉Banna bohle le basadi bohle ba bana ba Iseraele, ba pelo di tshweu, ba tlisa dintho tsa mosebetsi oo Morena a neng a laetse Moshe hore o etswe, ba tlisetsa Morena dimpho tsa boithaopo.

₃₀Yaba Moshe o re ho bana ba Iseraele: “Bonang, Morena o bitsitse Besalele ka lebitso; ke mora wa Uri, mora wa Hure, wa leloko la Juda. ₃₁O mo file Moya wa Modimo, le bohlale, le kelello, le tsebo ya mesebetsi yohle: ₃₂ho rala ditshwantsho tsa mesebetsi e etswang, le ho sebetsa ka kgauta, le ka silefera, le ka lethose; ₃₃le ho betla majwe a tla kenngwa mekgabisong, le ho betla dithupa, le ho etsa mesebetsi yohle, ho latela setshwantsho se radilweng. ₃₄Yena le Oholeabe, mora wa Ahimasake, wa leloko la Dane, ba neilwe bohlale ba ho ruta. ₃₅Morena o ba neile dipelo tse bohlale, ba tle ba etse mesebetsi yohle ya bolala, le mesebetsi yohle e etswang ke ditsebi, le ya dihomi tsa masela a maputswa, le a perese, le a mafubedu, le a lene; le mesebetsi ya dilohi. Bana ke ditsebi tsa mesebetsi ena yohle, le diradi tsa ditshwantsho tsa mesebetsi.

₁“Jwale Besalele, le Oholeabe, le batho bohle ba pelo di bohlale, bao Morena a ba neileng bohlale le kutlwisiso ya ho tseba ho etsa mesebetsi yohle ya Sehalalelo, ba tla sebetsa, ba etse mesebetsi eo, ho latela tsohle tseo Morena a di laetseng.”

₂Yaba Moshe o bitsa Besalele le Oholeabe, le batho bohle ba pelo di bohlale, bao Morena a ba neileng bohlale dipelong tsa bona, ba ratang, hore ba tle mosebetsing, ba sebetse. ₃Ba amohela dimpho tsohle ho Moshe, tseo bana ba Iseraele ba di tliseditseng mosebetsi wa hore ho hahwe Sehalalelo ka tsona. Ba nna ba tlisa dimpho tsa boithaopo ho yena hoseng ho hong le ho hong. ₄Banna bohle ba bohlale, ba etsang mosebetsi wohle wa Sehalalelo, ba tlohela mosebetsi oo ba neng ba o etsa, ba tla. ₅Ba bua le Moshe, ba re: “Setjhaba se tlisa dintho tse ngata ho feta tse hlokwang bakeng sa ho etsa mosebetsi oo Morena a laetseng hore o etswe.”

₆Jwale Moshe a laela hore ho hlajwe mokgosi diahelong, ho thwe: “Banna le basadi ba se ke ba hlola ba tlisa dimpho tsa mosebetsi wa Sehalalelo.” Yaba setjhaba se kgaotsa ho tlisa dimpho. ₇Tse ntshitsweng di ne di lekane ho etsa mosebetsi wa Sehalalelo, di be di sale.

₈Banna bohle ba bohlale hara basebetsi ba etsa Leaho ka masira a leshome, a lesela la lene, a loehileng, le a maputswa, le a perese, le a mafubedu, mme sehomi sa setsebi sa homa ditshwantsho tsa dikerubime ho wona. ₉Bolelele ba lesira ka leng e ne e le dimethara tse leshome le metso e mmedi, bophara ba lesira ka leng e le dimethara tse pedi, mme masira wohle a ne a lekana. ₁₀Ba rokahanya masira a mahlano mmoho; le a mang a mahlano hape ba a rokahanya mmoho. ₁₁Ba etsa dikgoketsane ka lesela le leputswa ntlheng ya lesira la pele, moo masira a kopanang teng, mme ba etsa jwalo le ntlheng ya lesira la bobedi, moo masira a kopanang teng. ₁₂Ba etsa dikgoketsane tse mashome a mahlano lesireng la pele; ba etsa hape dikgoketsane tse ding tse mashome a mahlano ntlheng ya lesira la bobedi, moo masira a kopanang teng. Dikgoketsane di ne di tobane. ₁₃Ba etsa dihokelo tsa kgauta tse mashome a mahlano, mme masira a hokahanngwa ka bobedi ka dihokelo, Leaho ya eba ntho e le nngwe.

₁₄Ka boya ba dipodi ba etsa masela a kwahelang Leaho; ba etsa masela a leshome le motso o mong. ₁₅Bolelele ba lesela ka leng e ne e le dimethara tse leshome le metso e meraro, bophara ba lesela ka leng e le dimethara tse pedi, mme masela ao a leshome le motso o mong a ne a lekana. ₁₆Ba rokahanya masela a mahlano mmoho, le a mang a tsheletseng ba a rokahanya mmoho. ₁₇Ba etsa dikgoketsane tse mashome a mahlano ntlheng ya lesela la pele, moo masela a kopanang teng; le dikgoketsane tse mashome a mahlano ntlheng ya lesela la bobedi, moo masela a kopanang teng. ₁₈Ba etsa dihokelo tse mashome a mahlano tsa lethose, ho kopanya masela ana hore e be ntho e le nngwe. ₁₉Ba etsetsa Tente ena marulelo ka matlalo a dipheleu a mmasa; ba e etsetsa marulelo a mang a kahodimo ho ao ka matlalo a diqibi.

₂₀Yaba ba etsetsa Leaho ditshiya tsa dithupa tse hlongwang, tsa sefate sa mositsane. ₂₁Bolelele ba thupa ka nngwe e ne e le dimethara tse nne, mme bophara ba thupa ka nngwe e ne e le disenthimethara tse mashome a tsheletseng a metso e tsheletseng. ₂₂Ba etsa dimapo tse pedi, tse bapileng, thupeng e nngwe le e nngwe, mme ba etsa jwalo ka dithupa tsohle tsa Leaho. ₂₃Ba etsetsa Leaho ditshiya tse mashome a mabedi ka lehlakoreng le ka borwa. ₂₄Ba etsetsa ditshiya tseo tse mashome a mabedi ditshehetso tsa silefera tse nang le mekotjana, tse mashome a mane. Ho ne ho ena le ditshehetso tse pedi katlasa tshiya e nngwe le e nngwe, moo dimapo tse pedi tsa yona di kenang teng. ₂₅Ka lehlakoreng la bobedi la Leaho, e leng le ka leboya, ba etsa ditshiya tse mashome a mabedi. ₂₆Ba etsa le ditshehetso tsa tsona tsa silefera, tse mashome a mane, moo dimapo tse pedi tsa tshiya ka nngwe di kenang teng.

₂₇Lehlakoreng le kamorao la Leaho, e leng le ka bophirimela, ba etsa ditshiya tse tsheletseng. ₂₈Ba etsa ditshiya tse pedi dihukung tsa lehlakore le kamorao la Leaho. ₂₉Tsa kopanngwa ho tloha fatshe, ho ya fihla hodimo, moo ho nang le mofitshane wa pele. Ditshiya tsena tse pedi tse dihukung, tsa etswa jwalo. ₃₀Ho ne ho ena le ditshiya tse robedi, le ditshehetso tsa silefera tse leshome le metso e tsheletseng; tse pedi di le katlasa tshiya e nngwe le e nngwe.

₃₁Ba etsa maballo ka dithupa tsa sefate sa mositsane. Maballo a mahlano a ba kahodima ditshiya tse ka lehlakoreng le leng la Leaho; ₃₂le a mang a mahlano a ba kahodima ditshiya tse ka lehlakoreng le leng la Leaho, mme a mang a mahlano hape a ba kahodima ditshiya tse ka lehlakoreng le kamorao la Leaho, ka nqeng ya bophirimela. ₃₃Ba etsa leballo le bohareng ba Leaho, le tlohang ntlheng e nngwe ya lona, ho isa ho e nngwe. ₃₄Ditshiya tsena ba di maneha kgauta, ba di etsetsa mefitshane ya kgauta, eo ho kgweswang maballo ho yona, mme maballo ao le wona ba a maneha kgauta.

₃₅Ba etsa lesira ka lesela le leputswa, le le perese, le le lefubedu, le la lene, le loehileng; le entsweng ke setsebi, le homilweng ditshwantsho tsa dikerubime. ₃₆Ba le etsetsa ditshiya tse nne ka dithupa tsa sefate sa mositsane, tse manehilweng kgauta. Di ne di ena le dihokelo tsa kgauta. Ba di etsetsa ditshehetso tse nne tsa silefera.

₃₇Ba etsa le lesira la monyako wa Tente ka lesela le leputswa, le le perese, le le lefubedu, le la lene, le loehileng; la etswa ke sehomi. ₃₈Ba etsa le ditshiya tsa lona tse hlano, le dihokelo tsa tsona. Ba maneha kgauta hodima dihlooho tsa tsona, le hodima dithupa tse di kopanyang. Ditshehetso tsa tsona tse hlano ya eba tsa lethose.

₁Besalele a etsa areka ka dithupa tsa sefate sa mositsane; bolelele ba yona e ne e le disenthimethara tse lekgolo le leshome, bophara ba yona e le disenthimethara tse mashome a tsheletseng a metso e tsheletseng, mme bophahamo ba yona e le disenthimethara tse mashome a tsheletseng a metso e tsheletseng. ₂Yaba o e maneha kgauta e hlwekileng kantle le kahare, mme a e etsetsa moqhaka wa kgauta o e potolohang. ₃A e etsetsa mehele e mene ya kgauta maotong a yona a mane: mehele e mmedi ka lehlakoreng la pele, le e meng e mmedi ka lehlakoreng la bobedi. ₄Ka dithupa tsa sefate sa mositsane a etsa mefeng e jarang, mme a e maneha kgauta. ₅Yaba o kgwesa mefeng eo meheleng e mahlakoreng a areka, ho tle ho jarwe areka ka yona.

₆Jwale a etsa sekwahelo sa tefelo ya sebe ka kgauta e hlwekileng; bolelele ba sona e ne e le disenthimethara tse lekgolo le leshome, bophara ba sona e le disenthimethara tse mashome a tsheletseng a metso a tsheletseng. ₇A etsa dikerubime tse pedi tsa kgauta; a di etsa ka kgauta e thutsweng, dintlheng tse pedi tsa sekwahelo sa tefelo ya sebe. ₈Kerubime ya pele e ne e le ka ntlheng ena ya sekwahelo, kerubime ya bobedi e le ka ntlheng yane ya sona. Dintlheng tse pedi tsa sekwahelo sa tefelo ya sebe a etsa dikerubime. ₉Dikerubime di ne di otlolletse mapheo e tsona hodimo, di kgurumeditse sekwahelo sa tefelo ya sebe ka mapheo a tsona, difahleho tsa tsona di tadimane; difahleho tsa dikerubime di tadimile malebana le sekwahelo sa tefelo ya sebe.

₁₀A etsa tafole ka dithupa tsa sefate sa mositsane. Bolelele ba yona e ne e le disenthimethara tse mashome a robong, bophara ba yona e le disenthimethara tse mashome a mane a metso e mehlano, bophahamo ba yona e le disenthimethara tse mashome a tsheletseng a metso a supileng. ₁₁Yaba o e maneha kgauta e hlwekileng, mme a e etsetsa moqhaka wa kgauta o e potolohang. ₁₂A e etsetsa modimako o bophara ba seatla ho e potoloha, le moqhaka wa kgauta o potapotang modimako oo wa yona. ₁₃A e etsetsa mehele e mene ya kgauta, a hokela mehele eo dihukung tse nne tsa maoto a yona a mane. ₁₄Haufi le modimako ho ne ho ena le mehele eo ho yona ho kgweswang mefeng e jarang tafole. ₁₅Ka dithupa tsa sefate sa mositsane a etsa mefeng e jarang tafole, a e maneha kgauta. ₁₆Ka kgauta e hlwekileng a etsa dijana tse tla bewa hodima tafole: mafiso, le mafiswana, le dinwelo, le mepotjwana e sebediswang ha ho nyehelwa.

₁₇A etsa sedulwana sa lebone ka kgauta e hlwekileng. Sedulwana seo sa lebone a se etsa ka kgauta e thutsweng. Madulo a sona, le lenono la sona, le dikgakeletso tsa sona, le dipalesa tsa sona, le dithunthung tsa sona, tsa thulellwa ho sona. ₁₈Lenono la sedulwana le ne le ena le makala a tsheletseng: a mararo a le ka lehlakoreng la pele, a mang a mararo a le ka lehlakoreng la bobedi. ₁₉Lekaleng le leng ho ne ho ena le dikgakeletso tse tharo, tse kang tsa sefate sa perekisi se nang le dipalesa le dithunthung. Lekaleng le leng hape ho ne ho ena le dikgakeletso tse tharo, tse kang tsa sefate sa perekisi, se nang le dipalesa le dithunthung. Ha etswa jwalo makaleng a tsheletseng a tlohang lenonong la sedulwana. ₂₀Sedulwaneng ho ne ho ena le dikgakeletso tse nne, tse kang tsa sefate sa perekisi, se nang le dipalesa le dithunthung. ₂₁Ho ne ho ena le palesa tlasa manono a mabedi a sona, le palesa e nngwe hape tlasa manono a mabedi a sona; le palesa e nngwe hapehape tlasa manono a mabedi a sona. Ha etswa jwalo makaleng a tsheletseng a tlohang lenonong la sedulwana. ₂₂Dipalesa tsa sona, le manono a sona, di ne di thulelletswe le sedulwana, e le ntho e le nngwe, e entsweng ka kgauta e hlwekileng, e thutsweng.

₂₃A etsa mabone a sona a supileng, le matlao a sona, le dithotobolo tsa sona, ka kgauta e hlwekileng. ₂₄Sedulwana sena, le tsohle tsa sona, a di etsa ka kgauta e hlwekileng, eo boima ba yona e leng dikilo tse mashome a mararo a metso e mehlano.

₂₅A etsa aletare ya mokubetso ka dithupa tsa sefate sa mositsane. Bolelele ba yona e ne e le disenthimethara tse mashome a mane a metso e mehlano, bophara ba yona e le disenthimethara tse mashome a mane a metso e mehlano, e ne e ena le mahlakore a mane a lekanang; bophahamo ba yona e le disenthimethara tse mashome a robong. Manaka a yona a ne a entswe ka thupa e le nngwe le aletare. ₂₆A e maneha kgauta e hlwekileng kahodimo, le ka mahlakoreng ho e potoloha, le manakeng a yona. A e etsetsa moqhaka wa kgauta o e potolohang. ₂₇A e etsetsa mefitshane e mmedi ya kgauta tlasa moqhaka wa yona, hodima dihuku tsa yona tse pedi, le hodima mahlakore a yona a mabedi. E tla ba moo ho kgweswang mefeng, hore aletare e tle e jarwe ka yona. ₂₈A etsa mefeng eo ka dithupa tsa sefate sa mositsane, mme a e maneha kgauta.

₂₉A etsa ole e tlotsang, e halalelang, le mokubetso o monko o monate, jwalokaha ho etsa setsebi se tswakang ditlolo.

₁A etsa aletare ya setjheso ka dithupa tsa sefate sa mositsane. Bolelele ba yona e ne e le dimethara tse pedi le disenthimethara tse mashome a mabedi, bophara ba yona e le dimethara tse pedi le disenthimethara tse mashome a mabedi, e ne e ena le mahlakore a mane a lekanang; bophahamo ba yona e le methara e le nngwe le disenthimethara tse mashome a mararo. ₂A etsa manaka a yona hodima dihuku tse nne tsa yona; manaka ao a ne a entswe ka thupa e le nngwe le aletare, mme a a maneha lethose. ₃A etsa dintho tsohle tse sebediswang aletareng: dithothobolo, le dikgarashwana, le dinwelo, le difereko tse hlabang nama, le dipane; tsena tsohle tsa yona a di etsa ka lethose. ₄A etsetsa aletare mokgabiso o kang letlowa le entsweng ka lethose; a bea mokgabiso oo katlase ho aletare, o tloha tlase o ilo fihla bohareng ba aletare. ₅A etsa mefitshane e mene dintlheng tse nne tsa mokgabiso ona wa lethose, e le e kgwesang mefeng. ₆A etsa mefeng ka dithupa tsa sefate sa mositsane, a e maneha lethose. ₇Mefeng eo a e kgwesa mefitshaneng, mahlakoreng a aletare, hore aletare e tle e jarwe ka yona. A e etsa ka dithupa tse fatilweng sekoti hare.

₈Yaba o etsa sekotlolo sa ho itlhatswetsa, le sedulwana sa sona; a di etsa ka lethose; a di etsa ka diipone tsa basadi ba neng ba sebetsa monyakong wa Tente ya selekane.

₉A etsa seotlwana ka lehlakoreng le ka nqeng ya borwa. Masela a lepeletseng a seotlwana a ne a entswe ka lene, a loehile, bolelele ba wona e le dimethara tse mashome a mane a metso e mene. ₁₀Ditshiya tse ka lehlakoreng lena tse mashome a mabedi, le ditshehetso tsa tsona tse mashome a mabedi, di ne di entswe ka lethose. Dihokelo tsa ditshiya, le mefapo ya tsona, e ne e le tse entsweng ka silefera. ₁₁Ka lehlakoreng le ka leboya ho ne ho lepeletse masela a bolelele ba dimethara tse mashome a mane a metso e mene. Ditshiya tse ka lehlakoreng lena tse mashome a mabedi le ditshehetso tsa tsona tse mashome a mabedi, di ne di entswe ka lethose. Dihokelo tsa ditshiya, le mefapo ya tsona, e ne e le tse entsweng ka silefera.

₁₂Ka lehlakoreng le ka bophirimela le teng ho ne ho lepeletse masela a bolelele ba dimethara tse mashome a mabedi a metso e mmedi. Ditshiya tsa wona di ne di le leshome, le ditshehetso tsa tsona di le leshome. Dihokelo tsa ditshiya, le mefapo ya tsona, di ne di entswe ka silefera. ₁₃Ka lehlakoreng le ka botjhabela ho ne ho lepeletse masela a bolelele ba dimethara tse mashome a mabedi a metso e mmedi. ₁₄Bolelele ba masela a neng a lepeletse ka lehlakoreng le leng la monyako e ne e le dimethara tse tsheletseng le disenthimethara tse mashome a tsheletseng; a ne a ena le ditshiya tse tharo le ditshehetso tsa tsona di le tharo. ₁₅Ka lehlakoreng la bobedi, ka nqena le ka nqane ho monyako wa seotlwana, le teng ho ne ho lepeletse masela a bolelele ba dimethara tse tsheletseng le disenthimethara tse mashome a tsheletseng; a ne a ena le ditshiya tse tharo, le ditshehetso tsa tsona di le tharo. ₁₆Masela wohle a lepeletseng, a potapotileng seotlwana, e ne e le a entsweng ka lene, a loehileng. ₁₇Ditshehetso tsa ditshiya di ne di entswe ka lethose, dihokelo tsa ditshiya, le dithupa tsa tsona, di ne di entswe ka silefera. Dihlooho tsa tsona di ne di manehilwe silefera, mme ditshiya tsohle tsa seotlwana di ne di hokahantswe ka dithupa tse entsweng ka silefera.

₁₈Lesira la monyako wa seotlwana le ne le entswe ke sehomi, lesela le leputswa, le le perese, le le lefubedu, le le entsweng ka lene, le loehileng. Bolelele ba lona e ne e le dimethara tse robong; bophara ba lona e le dimethara tse pedi, hore le tshwane le masela a lepeletseng a seotlwana. ₁₉Ditshiya tsa lesira leo di ne di le nne, le ditshehetso tsa lona di le nne, di entswe ka lethose, dihokelo tsa tsona di entswe ka silefera. Dihlooho tsa tsona di ne di manehilwe silefera, le dithupa tse di kopanyang e ne e le tsa silefera. ₂₀Dimapo tsohle tsa Leaho, le tsa seotlwana, ho potoloha, di ne di entswe ka lethose.

₂₁Ena ke kakaretsa ya dintho tsa Leaho, tse ileng tsa bokellwa, tsa Leaho la areka e kentseng matlapa a ngotseng Molao. Dintho tsena di ile tsa bokellwa ka taelo ya Moshe, ke Balevi, ba le taolong ya Itamare, mora wa moprista Arone.

₂₂Besalele, mora wa Uri, mora wa Hure, wa leloko la Juda, a etsa tsohle tseo Morena a di laetseng Moshe. ₂₃O ne a thuswa ke Oholeabe, mora wa Ahisamake, wa leloko la Dane. Oholeabe e ne e le lelala, le setsebi sa mesebetsi; le sehomi se homang masela a maputswa, le a perese, le a mafubedu, le a entsweng ka lene, a loehileng.

₂₄Kgauta yohle e ileng ya sebediswa mosebetsing wohle wa ho haha Sehalalelo, e ne e le kgauta e tswang dimphong tsa baithaopi; e ne e etsa boima ba dikilo tse sekete, tse lekantsweng ka tekanyo e sebediswang ka Sehalalelong.

₂₅Silefera e neng e bokeletswe ke setjhaba e ne e etsa boima ba dikilo tse dikete tse tharo le makgolo a mane le mashome a mararo, tse lekantsweng ka tekanyo e sebediswang ka Sehalalelong. ₂₆Motho ka mong wa ba badilweng, ho qala ka ya dilemo tse mashome a mabedi, ho ya hodimo, a ntsha keramo tse tsheletseng, tse lekantsweng ka tekanyo e sebediswang ka Sehalalelong. Palo ya ba ntshitseng ya eba dikete tse makgolo a tsheletseng a metso e meraro, le makgolo a mahlano le mashome a mahlano. ₂₇Ho ile ha sebediswa silefera e etsang boima ba dikilo tse dikete tse tharo le makgolo a mane, ho etsa ditshehetso tsa Sehalalelo, le ditshehetso tsa lesira: ditshehetso tse lekgolo tsa etswa ka silefera e etsang boima ba dikilo tse dikete tse tharo le makgolo a mane; setshehetso ka seng sa etswa ka silefera e etsang boima ba dikilo tse mashome a mararo a metso e mene. ₂₈Ka silefera e etsang dikilo tse mashome a mararo, ha etswa dihokelo tsa ditshiya, ditshiya tsa manehwa dihlooho, mme ha etswa dithupa.

₂₉Lethose la dimpho tsa boithaopo le ne le etsa boima ba dikilo tse dikete tse pedi le makgolo a mane le mashome a mabedi a metso e mehlano. ₃₀Ka yona ha etswa ditshehetso tsa monyako wa Tente ya Morena, le aletare ya lethose, le mokgabiso wa lethose o kang letlowa, le tsohle tsa aletare, ₃₁le ditshehetso tse potapotileng seotlwana le ditshehetso tsa monyako wa seotlwana, le dimapo tsohle tsa Leaho, le dimapo tsohle tse potapotileng seotlwana.