To The Word – Day 21

₁“Hape o tla etsa leaho ka masira a leshome, a entsweng ka lesela la lene, a loehileng, le a maputswa, le a perese, le a mafubedu; setsebi se lohelle ditshwantsho tsa dikerubime ho wona. ₂Bolelele ba lesira ka leng e be dimethara tse leshome le metso e mmedi, bophara ba lesela ka leng e be dimethara tse pedi, mme masira wohle a lekane. ₃Masira a mahlano a rokahanngwe hammoho; le a mang a mahlano hape a rokahanngwe hammoho. ₄O tle o etse dikgoketsane ka lesela le leputswa ntlheng ya lesira la pele, moo masira a tla kopana teng, mme o etse jwalo le ntlheng ya lesira la bobedi, moo masira a tla kopana teng. ₅O tla etsa dikgoketsane tse mashome a mahlano lesireng la pele, o etse hape dikgoketsane tse ding tse mashome a mahlano ntlheng ya lesira la bobedi, moo masira a tla kopana teng, dikgoketsane tseo di tobane. ₆O tla etsa dihokelo tsa kgauta tse mashome a mahlano, o hokanye masira a mabedi ka dihokelo tseo, e le hore leaho e be ntho e le nngwe.

₇“Ka boya ba dipodi o tla etsa masela a tente e kwahelang leaho; o tla etsa masela a leshome le motso o mong. ₈Bolelele ba lesela ka leng e be dimethara tse leshome le metso e meraro, bophara ba lesela ka leng e be dimethara tse pedi, mme masela ao a leshome le motso o mong a lekane. ₉O tla rokahanya masela a mahlano hammoho, le a mang a tsheletseng o a rokahanye hammoho; lesela la botshelela le tla menwa habedi monyakong wa tente. ₁₀O tla etsa dikgoketsane tse mashome a mahlano ntlheng ya lesela la pele, moo masela a tla kopana teng; le dikgoketsane tse mashome a mahlano ntlheng ya lesela la bobedi, moo masela a tla kopana teng. ₁₁O tla etsa dihokelo tsa lethose tse mashome a mahlano, ebe o kenya dihokelo dikgoketsaneng; jwale o kopanye tente hore e be ntho e le nngwe. ₁₂Karolo e setseng e leketlile ya masela, ke hore halofo ya lesela e setseng, e tla lepellela fatshe, kamorao ho leaho. ₁₃Disenthimethara tse mashome a mahlano tse setseng ka lehlakoreng la pele, le disenthimethara tse mashome a mahlano tse setseng ka lehlakoreng la bobedi, ke ho re tse setseng boleleleng ba lesela la Tente ya Morena, di tla lepellela mahlakoreng a leaho, ka nqena le ka nqane ho leaho, hore di tle di le kwahele. ₁₄O tla etsetsa Tente ya Morena marulelo ka matlalo a dipheleu a mmasa; o tla e etsetsa marulelo a mang a kahodimo ho ao ka matlalo a diqibi.

₁₅“O tla etsetsa leaho ditshiya tsa dithupa tsa sefate sa mositsane; di tla hlongwa. ₁₆Bolelele ba thupa ka nngwe e be dimethara tse nne, mme bophara ba thupa ka nngwe e be disenthimethara tse mashome a tsheletseng a metso e tsheletseng. ₁₇O tla etsa dimapo tse pedi, tse bapileng, tshiyeng e nngwe le e nngwe, mme o tla etsa jwalo ka ditshiya tsohle tsa leaho. ₁₈O tla etsetsa leaho ditshiya tseo; ditshiya tse mashome a mabedi di be ka lehlakoreng le ka borwa. ₁₉O tla etsetsa ditshiya tseo tse mashome a mabedi ditshehetso tsa silefera, tse nang le mekotjana, tse mashome a mane. Ditshehetso tse pedi di be katlasa tshiya e nngwe le e nngwe, moo dimapo tse pedi tsa yona di tla kena teng. ₂₀Ka lehlakoreng la bobedi la leaho, e leng le ka leboya, o etse ditshiya tse mashome a mabedi. ₂₁O etse le ditshehetso tsa tsona tsa silefera, tse mashome a mane, moo dimapo tse pedi tsa tshiya ka nngwe di tla kena teng.

₂₂“Lehlakoreng le kamorao la leaho, e leng le ka bophirimela, o etse ditshiya tse tsheletseng. ₂₃O tla etsa ditshiya tse pedi dihukung tsa lehlakore leo le kamorao la leaho. ₂₄Di tla kopanngwa ho tloha fatshe, ho ya fihla hodimo, moo ho nang le mofitshane wa pele. Ditshiya tsena tse pedi, tse dihukung, di tla etswa jwalo. ₂₅Ho tla ba le ditshiya tse robedi, le ditshehetso tsa silefera tse leshome le metso e tsheletseng; tse pedi di be katlasa tshiya e nngwe le e nngwe.

₂₆“O tla etsa maballo ka ditshiya tsa sefate sa mositsane. Maballo a mahlano a be kahodima ditshiya tse ka lehlakoreng le leng la leaho; ₂₇le a mang a mahlano a be kahodima ditshiya tse ka lehlakoreng le leng hape la leaho, mme a mang a mahlano a be kahodima ditshiya tse ka lehlakoreng le kamorao la leaho, ka nqeng ya bophirimela. ₂₈Leballo le bohareng ba leaho le tla tloha ntlheng e nngwe ya lona, ho isa ho e nngwe. ₂₉Ditshiya tsena o tla di maneha kgauta, o di etsetse mefitshane ya kgauta, eo ho tla kgweswa maballo ho yona, mme ao le wona o tla a maneha kgauta.

₃₀“O tla etsa leaho ho latela setshwantsho seo o se bontshitsweng ha o le thabeng.

₃₁“O tla etsa lesira ka lesela le leputswa, le le perese, le le lefubedu, le le entsweng ka lesela la lene, le loehileng; e be le entsweng ke ditsebi, le homilweng ditshwantsho tsa dikerubime. ₃₂O tla le leketlisa ditshiyeng tse nne, tse entsweng ka dithupa tsa sefate sa mositsane, tse manehilweng kgauta. Di be le dihokelo tsa kgauta, mme di hlongwe hodima ditshehetso tsa silefera. ₃₃O tla leketlisa lesira dihokelong, mme ka nqane ho lona o bee areka ya selekane. Lesira leo le tla arohanya Sehalalelo ho Sehalalelo se halalelang ka ho fetisisa. ₃₄Ka Sehalalelong se halalelang ka ho fetisisa o tla bea sekwahelo sa tefelo ya sebe hodima areka ya selekane. ₃₅O tla bea tafole ka kwano ho lesira; le sedulwana sa lebone pela tafole, ka lehlakoreng la leaho le ka nqeng ya borwa. Tafole yona o tla e bea ka lehlakoreng le ka leboya.

₃₆“Jwale ebe o etsa lesira la monyako wa Tente ya Morena; o le etse ka lesela le leputswa, le le perese, le le lefubedu, le la lene, le loehileng, mme le etswe ke sehomi. ₃₇Lesira leo o le etsetse ditshiya tse hlano, tse entsweng ka dithupa tsa sefate sa mositsane, tse manehilweng kgauta. Di be le dihokelo tsa kgauta; o be o di etsetse ditshehetso tse hlano tsa lethose.”

₁“O tla etsa aletare ka dithupa tsa sefate sa mositsane; bolelele ba yona e be dimethara tse pedi le halofo, bophara ba yona e be dimethara tse pedi le halofo. Aletare eo e be le mahlakore a mane, a lekanang, mme bophahamo ba yona e be methara le halofo. ₂O tla etsa manaka a yona hodima dihuku tse nne tsa yona; manaka ao a etswe ka thupa e le nngwe le aletare, mme o a manehe lethose. ₃O tla e etsetsa dithotobolo tsa yona, le dikgarashwana tsa yona, le dinwelo tsa yona, le difereko tsa yona tse hlabang nama, le dipane tsa yona; thepa yohle ya yona e etswe ka lethose. ₄O e etsetse le mokgabiso, o kang letlowa le entsweng ka lethose. Hodima mokgabiso ona o etse mefitshane e mene ya lethose, dintlheng tsa yona tse nne. ₅O bee mokgabiso ona katlase ho aletare, o tlohe tlase o yo fihla bohareng ba aletare. ₆O etsetse aletare mefeng; mefeng eo e be dithupa tsa sefate sa mositsane, o e manehe lethose. ₇Mefeng eo ya yona e kgweswe mefitshaneng, hore e tle e be mahlakoreng a mabedi a aletare ha e jarwa. ₈O tle o e etse ka dithupa, tse fatilweng sekoti hare; o e etse hore e be jwalokaha o ile wa e bontshwa ha o le thabeng.”

₉“O tla etsetsa leaho leo seotlwana. Ka lehlakoreng le leng, le ka nqeng ya borwa, seotlwana se tla ba le masela a lepeletseng, a lene, a loehileng, a bolelele ba dimethara tse mashome a mane a metso e mene. ₁₀Ditshiya tse ka lehlakoreng lena di be mashome a mabedi, le ditshehetso tsa tsona di be mashome a mabedi, e be tse entsweng ka lethose. Dihokelo tsa ditshiya le mefapo ya tsona e be tse entsweng ka silefera. ₁₁Ka lehlakoreng le ka nqeng ya leboya ho lepelle masela a bolelele ba dimethara tse mashome a mane a metso e mene. Ditshiya tsa wona di be mashome a mabedi, le ditshehetso tsa wona di be mashome a mabedi; e be tse entsweng ka lethose. Dihokelo tsa ditshiya le mefapo ya tsona e be tse entsweng ka silefera.

₁₂“Ka bophareng ba seotlwana, lehlakoreng le ka bophirimela, le teng ho lepelle masela a bolelele ba dimethara tse mashome a mabedi a metso e mmedi; a be le dishiya tse leshome, le ditshehetso tsa tsona tse leshome. ₁₃Le ka bophareng ba seotlwana, lehlakoreng le ka botjhabela, le teng ho lepelle masela a bolelele ba dimethara tse mashome a mabedi a metso e mmedi. ₁₄Bolelele ba masela a tla lepella ka lehlakoreng le leng la monyako e be dimethara tse tsheletseng le disenthimethara tse mashome a tsheletseng; a be le ditshiya tse tharo, le ditshehetso tsa tsona di be tharo. ₁₅Ka lehlakoreng la bobedi le teng ho lepelle masela a bolelele ba dimethara tse tsheletseng le disenthimethara tse mashome a tsheletseng; a be le ditshiya tse tharo, le ditshehetso tsa tsona di be tharo.

₁₆“Monyakong wa seotlwana ho tla ba le lesira le bolelele ba dimethara tse robong, le entsweng ka lesela le leputswa, le le perese, le le lefubedu, le la lene le loehileng, le entsweng ke sehomi. Lesira le be le ditshiya tsa lona tse nne, le ditshehetso tsa tsona di be nne. ₁₇Ditshiya tsohle tsa seotlwana tse se potapotileng, di hokahanngwe ka dithupa tse entsweng ka silefera. Dihokelo tsa ditshiya e be tsa silefera, ditshehetso e be tsa lethose.

₁₈“Bolelele ba seotlwana e be dimethara tse mashome a mane a metso e mene, bophara e be dimethara tse mashome a mabedi a metso e mmedi, mme bophahamo e be dimethara tse pedi le disenthimethara tse mashome a mabedi. Ho be le masela a lepeletseng, a lene, a loehileng; le ditshehetso tsa wona e be tsa lethose. ₁₉Thepa yohle ya leaho, e sebediswang ditshebeletsong tsohle tsa lona, le dimapo tsohle tsa lona, le dimapo tsohle tsa seotlwana, e be tsa lethose.”

₂₀“O tla laela bana ba Iseraele hore ba o tlisetse ole e hlwekileng ya sefate sa mohlwaare, ya ho bonesa, e le hore lebone le tle le nne le tuke. ₂₁Ka Tenteng ya Morena, feela ka kwano ho lesira le siretseng areka ya selekane, Arone le bara ba hae ba tla hotetsa lebone kapele ho Morena; lebone leo le tuke ho tloha ka shwalane ho fihlela hoseng. Hona e tla ba molao o tla bolokwa kamehla yohle ke meloko yohle ya bana ba Iseraele.”

₁“Bitsa moholwane wa hao Arone, le bara ba hae, Nadabe, le Abihu, le Eleasare, le Itamare; o ba kgethe hara bana ba Iseraele, ba tle ba ntshebeletse e le baprista ba ka. ₂O etsetse moholwane wa hao Arone diaparo tse halalelang, tsa hlompho le bokgabane. ₃O tla buisana le bohle ba bohlale, bao ke ba hlalefisitseng, mme ba tla etsetsa Arone diaparo ho mo halaletsa, hore a tle a ntshebeletse e le moprista. ₄Tsena ke diaparo tseo ba tla mo etsetsa tsona: mokgabiso wa sefuba, le setipe, le seaparo, le seaparo se fihlang maotong se lohilweng, le katiba, le leqhama. Ba tla etsetsa moholwane wa hao Arone le bara ba hae diaparo tse halalelang, tseo ba tla di apara ha ba ntshebeletsa e le baprista. ₅Ba tla nka kgauta, le lesela le leputswa, le le perese, le le lefubedu, le la lene.”

₆“Ba tla etsa setipe ka lesela le nang le mmala wa kgauta, le ka le leputswa, le le perese, le le lefubedu, le la lene, le loehileng; se etswe ke setsebi. ₇Setipe se tla ba le masela a mabedi, a tla rokellwa mahetleng, dintlheng tsa sona tse pedi. ₈Leqhama la setipe le etswe ka mokgwa o tshwanang le sona: ka lesela le nang le mmala wa kgauta, le ka le leputswa, le le perese, le le lefubedu, le la lene, le loehileng.

₉“O nke majwe a mabedi a bohlokwa a kareneleane, hodima wona a ngole mabitso a bara ba Iseraele. ₁₀Mabitso a tsheletseng a ngolwe hodima lejwe la pele, mme mabitso a mang a tsheletseng, a setseng, a ngolwe hodima lejwe la bobedi, ho ya ka ho hlahlamana ha bona. ₁₁O tla ngola mabitso a bara ba Iseraele majweng a mabedi ao, jwalokaha setsebi sa mongolo se ye se ngole setempe sa bopaki; ebe o a kenya shweshweng e entsweng ka kgauta. ₁₂O rokelle majwe ao a mabedi hodima masela a setipe a mahetleng, e be majwe a kgopotso ya bara ba Iseraele. Arone o tla apara setipe se rokeletsweng majwe ao, hore Morena a tle a ba hopole. ₁₃O tla etsa dishweshwe tsa kgauta, ₁₄le diketane tse pedi tsa kgauta e hlwekileng, tse lohilweng jwaloka thapo, o di hokele dishweshweng tseo.”

₁₅“O tla etsa le mokgabiso wa sefuba wa kahlolo, o etswe ke setsebi. O o etse jwalokaha ho entswe setipe, ka lesela le nang le mmala wa kgauta, le ka le leputswa, le le perese, le le lefubedu, le la lene, le loehileng. ₁₆Mokgabiso wa sefuba o tla ba le mahlakore a mane, a menahantsweng; bolelele ba wona bo lekane le seatla, le bophara ba wona bo lekane le seatla. ₁₇Ka ho wona o rokelle mela e mene ya majwe a bohlokwa, a kgabisitsweng. Moleng wa pele e be lejwe la rubi, le la topase, le la karanete. ₁₈Moleng wa bobedi e be lejwe la emeraleda, le la safire, le la daemane. ₁₉Moleng wa boraro e be lejwe la turukose, le la akate, le la ametise. ₂₀Moleng wa bone e be lejwe la berile, le la kareneleane, le la jasepere. Majwe ao a kenngwe shweshweng e entsweng ka kgauta. ₂₁Majwe ana a be leshome le metso e mmedi, ho ya ka mabitso a bara ba Iseraele. Lejwe ka leng le ngolwe lebitso la o mong wa merabe e leshome le metso e mmedi ya bana ba Iseraele, jwalokaha ho ngolwa setempe sa bopaki.

₂₂“Hodima mokgabiso wa sefuba o tla etsa diketane tse lohilweng jwaloka thapo; e be mehala e entsweng ka kgauta e hlwekileng. ₂₃Hodima mokgabiso wa sefuba o tla etsa mefitshane e mmedi ya kgauta, mme mefitshane eo e mmedi o tla e hokela dintlheng tse pedi tsa mokgabiso wa sefuba. ₂₄O tla hokela mehala e mmedi ya kgauta mefitshaneng eo e mmedi, e dintlheng tsa mokgabiso wa sefuba. ₂₅Dintlha tse pedi tsa mehala o tla di hokela dishweshweng tse pedi, ebe o di tlamella maseleng a setipe a mahetleng, kapele ho setipe. ₂₆O tla etsa mefitshane e meng e mmedi ya kgauta, o e hokele dintlheng tse pedi, tse katlase, tsa mokgabiso wa sefuba o tobaneng le setipe. ₂₇O boele o etse mefitshane e mmedi ya kgauta, o e hokele ho tloha katlase ho mehala e mmedi ya setipe e mahetleng, kapele ho moo mehala eo e kopanang le setipe teng, kahodima leqhama la setipe. ₂₈O tlame mefitshane ya mokgabiso wa sefuba ka mohala o moputswa, o o tlamelle mefitshaneng ya setipe, hore mokgabiso wa sefuba o tle o dule hodima leqhama, o se ke wa lokoloha setipeng.

₂₉“Jwale Arone o tla kena ka Sehalalelong a apere mokgabiso wa sefuba wa kahlolo, o nang le mabitso a bara ba Iseraele, e le hore Morena a nne a ba hopole. ₃₀Ka mokgabisong wa sefuba wa kahlolo, o tle o kenye majwe a Urime le Thumime, a tle a be sefubeng sa Arone ha a eya kapele ho Morena. Ka mokgwa o jwalo Arone o tla nne a jare kahlolo ya bana ba Iseraele sefubeng sa hae kamehla ha a eya kapele ho Morena.”

₃₁“Seaparo se aparwang tlasa setipe o tla se etsa ka lesela le leputswa feela. ₃₂Lesoba la ho se kgetshemetsa hloohong le tla ba hare ho sona, mme ho potoloha lesoba leo ho etswe lemeno le le phethang, le entsweng ke selohi. Lesoba leo le be jwaloka la molala wa baki ya mohlabani, hore le se ke la taboha. ₃₃Lemenong la seaparo o tle o etse dikgarenate ka lesela le leputswa, le le perese, le le lefubedu, ho se potoloha. Pakeng tsa tsona, ho potoloha, o etse mangenengene a kgauta; ₃₄ke hore ho etswe lengenengene la kgauta, ho nto etswa kgarenate; ho etswe lengenengene la kgauta, ho nto etswa kgarenate, jwalojwalo, ho potoloha lemeno la seaparo. ₃₅Arone o tla apara seaparo sena ha a ntshebeletsa, mme modumo wa mangenengene o tla utlwahala ha Arone a kena ka Sehalalelong, kapele ho Morena, leha a etswa, e le hore a se ke a shwa.

₃₆“O tla etsa moqhaka ka kgauta e hlwekileng, mme hodima yona o ngole jwalokaha ho ngolwa setempe sa bopaki, o re: Mohalaledi wa Morena. ₃₇Moqhaka oo o rokellwe katibeng ka mohala o moputswa; o rokellwe phatleng ya katiba. ₃₈Moqhaka oo o be phatleng ya Arone, a tle a jare melato e ka etswang ke bana ba Iseraele, ha ba fana ka dimpho tsa bona tse halalelang. O tla nne o be phatleng ya hae kamehla, e le hore dimpho tseo tsa bona di tle di amohelehe ho Morena.

₃₉“O etse seaparo se fihlang maotong ka lesela le lene, le katiba o e etse ka lesela le jwalo, o be o etse le leqhama le homilweng. ₄₀Bara ba Arone bona o tla ba etsetsa diaparo tse fihlang maotong le maqhama; o be o ba etsetse le dituku tsa hlompho le bokgabane. ₄₁Tsena o di apese moholwane wa hao Arone le bara ba hae; o ba bee ka ho ba tlotsa ka ole, o ba halaletse, ba tle ba ntshebeletse e le baprista ba ka.

₄₂“O ba etsetse marikgwe a lesela le lene, ba tle ba a tene; marikgwe ao a tlohe thekeng, a yo fihla diropeng. ₄₃Arone le bara ba hae ba a tene ha ba kena ka Tenteng ya Morena, kapa ha ba atamela aletareng ho ya sebeletsa Sehalalelong. Ka mokgwa o jwalo ba ke ke ba jara molato, yaba ba a shwa.

“Molao ona ke wa mehla yohle ho yena, le ho ditloholo tsa hae.”

₁“Sena ke seo o tla se etsa ho Arone le ho bara ba hae, ha o ba halaletsa, hore e tle e be baprista ba ka. Nka pohwana e le nngwe, le dipheleu tse pedi, tse se nang sepha; ₂le bohobe bo sa lomoswang, le dikuku tse sa lomoswang, tse dubilweng ka ole; le moqathane o sa lomoswang, o tlotsitsweng ka ole; tsena o di etse ka phofo ya koro e thumisehileng. ₃O tla di kenya ka serotong, o di tlise ka sona seroto seo, mmoho le pohwana le dipheleu tse pedi.

₄“Jwale o atametse Arone le bara ba hae pela monyako wa Tente ya Morena; o ba hlatswe ka metsi. ₅O nke diaparo, o apese Arone seaparo se fihlang maotong, le seaparo se aparwang tlasa setipe, le setipe, le mokgabiso wa sefuba; ebe o mo tlama thekeng ka leqhama le tlamang setipe. ₆O mo rwese katiba hloohong, ebe o bea moqhaka o halalelang hodima katiba eo. ₇O nke ole ya ho tlotsa, o e tshele hodima hlooho ya hae, ebe o a mo tlotsa. ₈Jwale o atametse bara ba hae, o ba apese diaparo tse fihlang maotong. ₉O tlame Arone le bara ba hae ka maqhama, o ba rwese dituku, mme e tla ba baprista ka molao wa mehla yohle. Ka mokgwa o jwalo o tla halaletsa Arone le bara ba hae.

₁₀“Jwale o tla tlisa pohwana kapele ho Tente ya Morena, ebe Arone le bara ba hae ba bea matsoho a bona hodima hlooho ya pohwana. ₁₁O tla hlaba pohwana ena e le kapele ho Morena, monyakong wa Tente ya Morena. ₁₂O tla nka madi a mang a pohwana, o qopetse monwana wa hao ho wona, ebe o tlotsa manaka a aletare ka wona. Madi a mang o a tshollele motheong wa aletare. ₁₃O tla nka mohlehlo, le phapohane, le diphiyo tse pedi, mmoho le tshotso ya tsona, o di tjhesetse hodima aletere. ₁₄Ha e le nama ya pohwana ena, le letlalo la yona, le moswang wa yona, o tla di tjhesetsa kantle ho diahelo tsa lona. Hona ke sehlabelo se etsetswang tefelo ya sebe.

₁₅“Jwale o nke pheleu ya pele, Arone le bara ba hae ba tle ba bee matsoho a bona hodima hlooho ya pheleu eo. ₁₆O tla hlaba pheleu eo, ebe o nka madi a yona, o foke aletare ho e potapota. ₁₇O kgabele nama ya pheleu eo; o hlatswe dikahare tsa yona, le ditlhakwana tsa yona, o di bee hodima nama e kgabetsweng, le hodima hlooho ya yona. ₁₈Pheleu eo yohle o tla e tjhesetsa hodima aletare, e be sehlabelo sa setjheso, se monko o monate, se amohelehang ho Morena.

₁₉“Jwale o nke pheleu ya bobedi, Arone le bara ba hae ba bee matsoho a bona hodima hlooho ya yona. ₂₀O tla hlaba peleu eo; o nke madi a mang a yona, o tlotse ntlha ya tsebe ya Arone ya letsoho le letona; le dintlha tsa ditsebe tsa bara ba Arone tsa matsoho a matona; le hodima menwana e metona ya matsoho a bona a matona; le hodima menwana e metona ya maoto a bona a matona, mme ka madi a mang o foke aletare ho e potapota. ₂₁O tla nka madi a mang a aletareng, le ole e tlotsang, ebe o foka Arone le diaparo tsa hae; o foke le bara ba hae le diaparo tsa bona. Kahoo Arone le bara ba hae ba tla halalela, hammoho le diaparo tsa bona.

₂₂“O tla nka mafura a pheleu, le mafura a mohatla wa yona, le mohlehlo, le phapohane, le diphiyo tse pedi, mmoho le tshotso ya tsona, le sephaka sa letsoho le letona, hobane ena ke pheleu ya mokete wa kgalaletso. ₂₃O nke le senkgwa se le seng sa bohobe, le kuku e le nngwe e dubilweng ka ole, le moqathane o le mong; o di nke ka serotong sa bohobe bo sa lomoswang se kapele ho Morena. ₂₄Tsena tsohle o di nee Arone le bara ba hae, ba tle ba nyehele ka tsona, ka ho di akgotsa kapele ho Morena. ₂₅O tla boela o di nka matsohong a bona, mme o di tjhesetse aletareng, hodima sehlabelo sa setjheso se tjhesetswang Morena, se monko o monate, se amohelehang ho Morena. ₂₆O tla nka sefuba sa pheleu ena ya kgalaletso ya Arone, o nyehele ka sona ka ho se akgotsa kapele ho Morena, mme e tla ba seabo sa hao.

₂₇“O tla halaletsa sefuba seo o nyehelang ka sona, le sephaka seo sa seabo, e leng tse tswang pheleung ya kgalaletso ya Arone le ya bara ba hae. ₂₈Hona e tla ba molao wa mehla yohle, o tlamang bana ba Iseraele ho fana ka seabo ho Arone le ho bara ba hae. E tla ba seabo se tswang ho bana ba Iseraele, sa mahlabelo a bona a teboho, e leng seabo se etsetswang Morena.

₂₉“Diaparo tsa Arone tse halalelang e tla ba tsa bara ba hae kamora lefu la hae, e le hore ba tle ba di apare ha ba tlotswa, ba halaletswa hore e be baprista. ₃₀Mora wa hae ya tla mo hlahlama setulong sa boprista, mme a kena ka Tenteng ya Morena ho sebeletsa, o tla apara diaparo tsena ka matsatsi a supileng.

₃₁“O tla nka nama ya pheleu ya kgalaletso, o e phehele ka sebakeng sena se halalelang. ₃₂Arone le bara ba hae ba tla ja nama ya pheleu, le bohobe bo ka serotong, ba le monyakong wa Tente ya Morena. ₃₃Ba je dintho tseo tefelo ya dibe e entsweng ka tsona, ha ba ne ba bewa, ba halaletswa. Bao e seng baprista ba se ke ba di ja, hobane di a halalela. ₃₄Haeba ho fihlela ka la hosasane ho ena le nama e setseng ya mokete wa kgalaletso, kapa bohobe, o tjhese tsena tse setseng; di se ke tsa jewa, hobane di a halalela.

₃₅“O tla etsa jwalo ho Arone le ho bara ba hae, ho ya kamoo ke o laetseng kateng. Mokete wa kgalaletso ya bona o nke matsatsi a supileng. ₃₆Ka tsatsi le leng le le leng o tla nyehela ka pohwana, e le sehlabelo se etsetswang tefelo ya sebe; o hlwekise aletare, ha o etsa sehlabelo sa tefelo ya sebe, mme o e tlotse hore e halalele. ₃₇Ka matsatsi a supileng o tla etsa sehlabelo sa tefelo ya sebe aletareng, o e halaletse. Kahoo aletare e tla halalela ka ho fetisisa, mme tsohle tse tla ama aletare ena di tla halalela.”

₃₈“Sena ke seo o tla nyehela ka sona aletareng, ka tsatsi le leng le le leng, e le sehlabelo sa kamehla yohle: dikonyana tse pedi, tse nang le selemo. ₃₉Konyana ya pele o nyehele ka yona hoseng; konyana ya bobedi o nyehele ka yona mantsiboya. ₄₀Ha o nyehela ka konyana ya pele, o be o nyehele le ka phofo e thumisehileng e etsang boima ba kilo e le nngwe e dubilweng ka lethara e le nngwe ya ole ya mohlwaare; o nyehele le ka lethara e le nngwe ya veine. ₄₁Konyana ya bobedi o tla nyehela ka yona mantsiboya, mme nyehelo ya dijo le ya dino e be jwaloka ya hoseng; e be sehlabelo sa setjheso, se monko o monate, se amohelehang ho Morena.

₄₂“Sehlabelo sena sa setjheso se tla nne se etsetswe Morena kamehla yohle, ho isa melokong ya lona e tlang; se etsetswe monyakong wa Tente ya Morena, moo ke tla kopana le wena, ke be ke bue le wena hona teng. ₄₃Ke tla kopana le bana ba Iseraele hona teng, mme Tente ena ya Morena e tla halaletswa ke tlotla ya ka.

₄₄“Ke tla halaletsa Tente ya Morena, le aletare, mme ke tla halaletsa Arone le bara ba hae, hore ba tle ba sebeletse e le baprista ba ka. ₄₅Ke tla aha hara bana ba Iseraele, ke be Modimo wa bona. ₄₆Ba tla tseba hore ke nna Morena Modimo wa bona, ya ba ntshitseng naheng ya Egepeta, hore ke tle ke ahe hara bona. Ke nna Morena Modimo wa bona.”

₁“O tla etsa aletare, moo ho tla tjhesetswa mokubetso teng; o tla e etsa ka dithupa tsa sefate sa mositsane. ₂Bolelele ba yona e be disenthimethara tse mashome a mane a metso e mehlano, le bophara ba yona e be disenthimethara tse mashome a mane a metso e mehlano; e be le mahlakore a mane a lekanang. Bophahamo ba yona e be disenthimethara tse mashome a robong. Manaka a yona a etswe ka thupa e le nngwe le aletare. ₃O tla e maneha kgauta e hlwekileng kahodimo le ka mahlakoreng ho e potoloha, le manakeng a yona; ebe o e etsetsa moqhaka wa kgauta o e potolohang. ₄O e etsetse mefitshane e mmedi ya kgauta tlasa moqhaka wa yona; o e etse hodima dihuku tsa yona tse pedi, le hodima mahlakore a yona a mabedi. E tla ba moo ho kgweswang mefeng, hore aletare e tle e jarwe ka yona. ₅O tla etsa mefeng eo ka dithupa tsa sefate sa mositsane, o e manehe kgauta. ₆O tla bea aletare kapele ho lesira le siretseng areka ya selekane, kapele ho sekwahelo sa tefelo ya sebe se hodima areka eo, moo ke tla kopana le wena teng.

₇“Arone o tla tjhesetsa mokubetso o nkgang hamonate hodima aletare; a o tjhese hoseng ho hong le ho hong ha a lokisa mabone. ₈Mantsiboya ha Arone a hotetsa mabone, o tla nne a tjhesetsa Morena mokubetso ona, mme hona ho etswe kamehla, ho ya fihla melokong yohle e tlang. ₉O se ke wa tjhesetsa mokubetso osele ho yona, leha e le sehlabelo sa setjheso, kapa nyehelo ya dijo; le nyehelo ya dino e se ke ya tshelwa hodima aletare eo. ₁₀Hang ka selemo, Arone o tla etsa sehlabelo sa tefelo ya sebe. Hodima manaka a aletare o tla tshela madi a tse hlabetsweng tefelo ya sebe. Tshebeletso ena ya tefelo ya sebe e tla etswa hang ka selemo, ho ya fihla melokong yohle e tlang, hobane ho Morena aletare ena e halalela ka ho fetisisa.”

₁₁Yaba Morena o bua ho Moshe, o re: ₁₂“Ha o bala bana ba Iseraele hore ba tle ba ngodiswe, motho ka mong wa bona a ntshetse Morena seabo se lopollang bophelo ba hae, hore a se ke a welwa ke sewa ha ba ntse ba ngodiswa. ₁₃Ba tla fana ka hona: bohle ba fetelang sehlopheng sa ba seng ba ngodisitswe, ba tla ntsha silefera e etsang boima ba dikeramo tse hlano le halofo motho ka mong, ho ya kamoo e balwang kateng Sehalalelong. Digera tse mashome a mabedi ke dikeramo tse leshome le motso o mong; jwale dikeramo tse hlano le halofo e tla ba seabo se ntshetswang Morena. ₁₄E mong le e mong ya kenang sehlopheng sa ba ngodisitsweng, ho tloha ka ya dilemo tse mashome a mabedi, ho ya hodimo, o tla fana ka seabo ho Morena. ₁₅Ha le ntshetsa Morena seabo se lopollang bophelo ba lona, morui a se ke a ntsha ho feta dikeramo tse hlano le halofo, le mofutsana a se ke a ntsha katlase ho dikeramo tse hlano le halofo. ₁₆O tla bokella tjhelete ena ya topolla ya bophelo, e ntshwang ke bana ba Iseraele, mme o e sebedise mererong ya Tente ya Morena; e tla ba eo Morena a tla hopola bana ba Iseraele ka yona, mme a lopolle bophelo ba lona.”

₁₇Jwale Morena a bua ho Moshe, a re: ₁₈“o tla etsa sekotlolo sa lethose, sa ho itlhatswetsa, le sedulwana sa sona e be sa lethose; e be sekotlolo seo ho tla itlhatswetswa ho sona. O tla se bea pakeng tsa Tente ya Morena le aletare, mme o tshele metsi ka ho sona. ₁₉Arone le bara ba hae ba tla hatlella ka ho sona, ba hlatswetse le maoto a bona ka ho sona. ₂₀Ha ba kena ka Tenteng ya Morena, ba hlape ka metsi ana, hore ba se ke ba eshwa. Leha ba atamela aletareng ho ya sebeletsa, ba etsetsa Morena sehlabelo sa setjheso, ₂₁ba hatlele, ba hlatswe le maoto a bona, hore ba se ke ba eshwa. Molao ona e tla ba wa mehla yohle, ho Arone le ho ditloholo tsa hae, ho isa melokong yohle e tlang.”

₂₂Morena a bua ho Moshe, a re: ₂₃“Wena o inkele dinoko tse monate ka ho fetisisa: mira o metsi, oo boima ba wona e leng dikilo tse tsheletseng; le sinamone e nkgang hamonate, eo boima ba yona e leng halofo ya boima ba mmira oo, ke ho re dikilo tse tharo; le lehlaka le monko o monate, leo boima ba lona e leng dikilo tse tharo; ₂₄le kasia eo boima ba yona e leng dikilo tse tsheletseng, tse lekantsweng ka tekanyo e sebediswang ka Sehalalelong; le dilethara tse nne tsa ole ya sefate sa mohlwaare. ₂₅Ka tsena o etse ole e halalelang ya ho tlotsa, e tswakilweng ke setsebi. E tla ba yona ole e halalelang, e tlotsang. ₂₆Ka yona o tla tlotsa Tente ya Morena, le areka ya selekane; ₂₇le tafole, le dijana tsohle tsa yona, le sedulwana sa lebone, le tsohle tsa sona; le aletare ya mokubetso, ₂₈le aletare ya setjheso, le tsohle tse sebediswang ho yona; le sekotlolo sa ho itlhatswetsa, le sedulwana sa sona. ₂₉O di halaletse di tle di halalele ka ho fetisisa, mme eng kapa eng e tla di ama, le yona e tla halalela.

₃₀“O tlotse Arone le bara ba hae, mme o ba halaletse hore e tle e be baprista ba ka. ₃₁O tle o bue le bana ba Iseraele, o re: ‘Ena e tla ba ole ya ka e halalelang, ya ho tlotsa; meloko yohle ya lona e etse jwalo. ₃₂E se ke ya ba ya tshelwa mmeleng wa motho, mme le se ke la ba la iketsetsa e tshwanang le yona ka metswako. E a halalela, mme le ho lona e halalele. ₃₃Motho ya ka etsang e jwaloka yona, kapa a e nea motho eo e seng moprista, o tla kgaolwa setjhabeng sa habo.’ ”

₃₄Morena a re ho Moshe: “Inkele dinoko tsena tse monko o monate ka ditekanyo tse lekanang: setoraka, le dikgetla tse monko o monate, le kalabanumu e monko o monate, le mokubetso o hlwekileng. ₃₅Ka tsona o tle o etse mokubetso o tswakilweng jwaloka setlolo se tswakilweng ke setsebi sa ditlolo; o nokilweng ka letswai le hlwekileng, o halalelang. ₃₆O mong wa wona o o sile, o thumisehe; o o bee kapele ho matlapa a ngotsweng Molao, ka Tenteng ya Morena, moo ke kopanang le wena teng. Ho lona mokubetso oo o tla halalela ka ho fetisisa. ₃₇Mokubetso oo le o etsang ka metswako ena, le se ke la iketsetsa o tshwanang le wona ka motswako, hobane o a halalela ho Morena. ₃₈Motho ya ka etsang o kang wona, hore a utlwe monko wa wona o monate, o tla kgaolwa setjhabeng sa habo.”

₁Morena a bua ho Moshe, a re: ₂“Bona, ke bitsitse Besalele, mora wa Uri, mora wa Hure, wa leloko la Juda. ₃Ke mo file Moya wa Modimo, le bohlale, le kelello, le tsebo ya mesebetsi yohle: ₄ho rala ditshwantsho tsa mesebetsi e etswang, le ho sebetsa ka kgauta, le ka silefera, le ka lethose; ₅le ho betla majwe a tla kenngwa mekgabisong, le ho betla dithupa, le ho etsa mesebetsi yohle. ₆Ke mo neile le Oholeabe, mora wa Ahisamake, wa leloko la Dane. Bohle ba bohlale ke ba file tsebo, mme ba tla etsa tsohle tseo ke ba laetseng tsona. ₇Ba tla etsa Tente ya Morena, le areka ya selekane, le sekwahelo sa tefelo ya sebe se hodima yona, le tsohle tse sebediswang ka Tenteng ya Morena; ₈le tafole, le tsohle tsa yona; le sedulwana sa lebone sa kgauta e hlwekileng, le tsohle tsa sona; le aletare ya mokubetso, ₉le aletare ya setjheso, le tsohle tsa yona; le sekotlolo sa ho itlhatswetsa, le sedulwana sa sona; ₁₀le diaparo tse lohilweng, le diaparo tse halalelang tsa Arone, moprista, le diaparo tsa bara ba hae tsa ha ba sebeletsa e le baprista; ₁₁le ole e tlotsang, le mokubetso o monko o monate wa Sehalalelo. Ba tla etsa tsohle ho ya kamoo ke o laetseng kateng.”

₁₂Morena a boela a re ho Moshe: ₁₃“Wena o bue le bana ba Iseraele, o re: ‘Ruri le tla boloka Disabatha tsa ka, hobane ke sesupo pakeng tsa ka le lona, le meloko yohle ya lona, hore le tsebe hore ke nna Morena, mohalaletsi wa lona.

₁₄“ ‘Jwale le tla hlompha letsatsi la Sabatha, hobane le a halalela ho lona; ba le hlomphollang, ruri ba tla bolawa. Bohle ba etsang mesebetsi ka letsatsi leo, ba tla kgaolwa setjhabeng sa habo bona. ₁₅Ho ka sebetswa ka matsatsi a tsheletseng, empa letsatsi la bosupa ke la Sabatha, la ho phomola, mme le a halalela ho Morena. Bohle ba ka etsang mesebetsi ka letsatsi la Sabatha, ruri ba tla bolawa. ₁₆Bana ba Iseraele, ba meloko yohle ba tla boloka letsatsi la Sabatha, ba hlokomele letsatsi la Sabatha, e le selekane sa mehla yohle. ₁₇Ke sesupo sa mehla yohle pakeng tsa ka le bana ba Iseraele, hobane Morena o ile a etsa lehodimo le lefatshe ka matsatsi a tsheletseng, mme ka letsatsi la bosupa a phomola, a ka a re kgefu!’ ”

₁₈Modimo ha a qeta ho bua ho Moshe a le thabeng ya Sinai, a mo nea matlapa a mabedi a ngotsweng Molao, matlapa a ngotsweng ka monwana wa Modimo.

₁Ha setjhaba se bona hore Moshe o dieha ho theoha thabeng, sa bokanela Arone, mme sa re ho yena: “Tloo, o re etsetse modimo o tla re etella pele, hobane ke mona ha re tsebe hore na Moshe, monna ya re nyolotseng naheng ya Egepeta, ho etsahetse eng ka yena.”

₂Yaba Arone o re ho sona: “Rodisang basadi ba lona, le bara ba lona, le baradi ba lona, masale a kgauta a ditsebeng tsa bona, le a tlise ho nna.” ₃Setjhaba sohle sa rola masale a kgauta, ao se neng se a rwetse ditsebeng, sa a tlisa ho Arone. ₄A nka masale ao matsohong a Baiseraele, a a qhibidihisa, a bopa namane ya kgauta ka wona. Yaba ba re: “Ona ke wona modimo wa hao, wena Iseraele, o o nyolotseng naheng ya Egepeta!”

₅Arone ha a bona ntho ena, a haha aletare kapele ho namane ya kgauta, a howeletsa, a re: “Hosasane ke mokete wa Morena!” ₆Ka la hosasane ba tsoha ka madungwadungwana, ba nyehela ka mahlabelo a setjheso, ba tlisa le mahlabelo a teboho; setjhaba sa dula fatshe, sa eja, sa enwa; yaba se a ema, se a bapala.

₇Morena a bua ho Moshe, a re: “Theoha kapele, hobane setjhaba sa heno, seo o se nyolotseng naheng ya Egepeta, se se se silafetse. ₈Se se se kgelohile kapele tseleng eo ke se laetseng yona. Se ipopetse namane ya kgauta, mme se e kgumametse, sa ba sa e etsetsa mahlabelo, sa re: ‘Ona ke wona modimo wa hao, wena Iseraele, o o nyolotseng naheng ya Egepeta!’ ”

₉Morena a boela a re ho Moshe: “Setjhaba sena ke se bone; ke setjhaba se manganga. ₁₀Jwale ako ntlohele, kgalefo ya ka e ke e se tlokomele, ke tle ke se timetse. Ha e le wena ke tla o etsa setjhaba se seholo.”

₁₁Yaba Moshe o leka ho kokobetsa kgalefo ya Morena Modimo wa hae, o re: “Ke ka lebaka lang, Morena, kgalefo ya hao e tlokomelang setjhaba sa hao, seo o se ntshitseng naheng ya Egepeta, ka matla a maholo, le ka letsoho le matla? ₁₂O etsetsang hore Baegepeta ba tle ba re: ‘O ba ntshitse ka morero o mobe, hore a tle a yo ba bolaela dithabeng, le ho ba timetsa lefatsheng’? Kokobetsa kgalefo ya hao e tukang, o fetole morero wa hao wa ho timetsa setjhaba sa hao. ₁₃Hopola bahlanka ba hao, bo-Aborahama, le Isaka, le Iseraele, bao o neng o ba hlapanyetse ka lebitso la hao, wa re: ‘Ke tla ngatafatsa ditloholo tsa lona di be kaalo ka dinaledi tsa lehodimo; le naha ena yohle, eo ke buileng ka yona, ke tla e nea ditloholo tsa lona, mme e tla ba ya lona kamehla yohle.’ ” ₁₄Yaba Morena o fetola morero wa hae wa ho timetsa setjhaba sa hae.

₁₅Jwale Moshe a reteleha, a theoha thabeng, matsohong a nkile matlapa a mabedi a ngotsweng Molao. E ne e le matlapa a ngotsweng ka mahlakoreng a mabedi; a ngotswe ka nqena le ka nqane. ₁₆Matlapa ana a ne a entswe ke Modimo; le mongolo e ne e le mongolo wa Modimo; o ngotswe matlapeng.

₁₇Ha Joshua a utlwa lerata la setjhaba ha se ntse se howeletsa, a re ho Moshe: “Ho na le lerata la ntwa diahelong!”

₁₈Empa Moshe a re:

₁₉Ha a atamela diahelong, mme a bona namane le metjeko, kgalefo ya Moshe ya tlokoma. A ptjatlanya matlapa a matsohong a hae fatshe, a a pshatlela mosikong wa thaba. ₂₀A nka namane eo ba neng ba e entse, a e tjhesa mollong, a e sila ho fihlela e eba phofo, a e tshela metsing, yaba o nwesa bana ba Iseraele metsi ao.

₂₁Jwale Moshe a re ho Arone: “Setjhaba see se o senyeditse eng, ha o se tliseditse sebe se sekaalekaale?”

₂₂Yaba Arone o re: “Kgalefo ya morena wa ka e se ke ya tlokoma hle! O tseba hore setjhaba sena se sekametse bokgopong. ₂₃Se ile sa re ho nna: ‘Re etsetse modimo o tla re etella pele, hobane ke mona ha re tsebe hore na Moshe, monna ya re nyolotseng naheng ya Egepeta, ho etsahetse eng ka yena.’ ₂₄Ke ile ka re ho sona: ‘Ke bo-mang ba nang le kgauta?’ Ba be ba se ba e rola, ba nnea yona. Ka e akgela mollong, yaba ho tswa namane ena.”

₂₅Moshe a hlokomela hore setjhaba se iketsetsa borata, hobane Arone a ne a se tloheletse ho iketsetsa borata, le ho iphetola sesomo hara dira tsa sona. ₂₆Moshe a ema monyakong wa diahelo, a re: “Bao e leng ba Morena a ba tle ho nna!”

Yaba bara ba Levi bohle ba bokana ho yena.

₂₇Jwale a re ho bona: “Morena Modimo wa Iseraele, o bua tjena: ‘Motho ka mong a nke sabole ya hae, a kene ka monyako ona, a tswe ka monyako wane, diahelong tsohle, a bolaye ngwanabo, a bolaye motswalle wa hae, a bolaye le ya ahelaneng le yena.’ ”

₂₈Bara ba Levi ba etsa jwalokaha Moshe a boletse. Ka letsatsi leo ha eshwa batho ba ka bang dikete tse tharo.

₂₉Yaba Moshe o re: “Kajeno le ikgethetse ho sebeletsa Morena, kaha motho ka mong a bolaile mora wa hae, a bolaile le ngwanabo, e le hore kajeno le tle le hlohonolofatswe.”

₃₀Ka le hlahlamang Moshe a re ho setjhaba: “Le entse sebe se seholo. Jwale ke tla nyolohela ho Morena; mohlomong ke tla le etsetsa tefelo ya sebe sa lona.”

₃₁Yaba Moshe o kgutlela ho Morena, o fihla, a re: “Ruri setjhaba sena se entse sebe se seholo, se iketseditse modimo wa kgauta. ₃₂Jwale ako se tshwarele sebe sena sa sona hle! Ho seng jwalo hlakola lebitso la ka bukeng eo o e ngotseng.”

₃₃Yaba Morena o re ho Moshe: “Ya ntshitetsweng ke yena eo ke tla mo hlakola bukeng ya ka. ₃₄Jwale tsamaya, o ise setjhaba moo ke itseng o se ise teng. Bona, lengeloi la ka le tla o etella pele; feela mohla letsatsi la kotlo, setjhaba sena ke tla se otlela sebe sa sona.”

₃₅Jwale Morena a otla setjhaba, hobane se ne se ile sa re Arone a se etsetse namane.