To The Word – Day 189

₁Motse o neng

o diila batho kahohle,

kajeno o bodutu hakaakang!

O ne o le moholo hara ditjhaba,

kajeno o fetohile mohlolohadi!

E ne e le mofumahadi hara ditjhaba

kajeno o fetohile lekgabunyane!

₂Jerusalema o lla

sa mmokotsane bosiu,

keledi di keleketla marameng a hae.

Hara baratuwa bohle ba hae,

ha ho le ya mong ya mo tshedisang.

Metswalle ya hae yohle e mo ekile,

metswalle e fetohile dira tsa hae.

₃Ka baka la ditlhoriso

le ho sebediswa ka thata,

Juda e isitswe bothopuweng.

Juda e phela kahara baditjhaba,

e hloka le sebaka sa ho phomola.

Bahlorisi ba yona bohle

ba e tsomeditse,

ba e tsometsa e le makaqabetsing.

₄Tsela tsa Sione

di se di le bodutu,

hoba ha ho ya tlang

meketeng e halalelang.

Kgoro tsa Sione tsohle

ha di na batho,

baprista ba yona

ba qetwa ke mefehelo,

barwetsana ba yona

ba matshwenyehong.

Sione e tlokotsing

tse bohloko haholo.

₅Ba lwantshang Sione

e se le babusi ba yona,

dira tsa yona di dutse ka boiketlo.

Morena o tliseditse

Sione matshwenyeho,

ka baka la dibe tsa yona bongata.

Bana ba yona

ba isitswe bothopuweng,

ba thopilwe

ke ba neng ba ba lwantsha.

₆Botle bohle bo se bo hlakohile,

bo hlakohile ho Moradi wa Sione;

mahosana a hae a ka dikgama,

a ka dikgama

di sitwa ho fumana lekgulo;

di baleha

di se di kenwe ke mokgathala,

di baleha bamanakisi ba tsona.

₇Nakong ya matshwenyeho a yona

le ya ho lelera,

Jerusalema e hopola matlotlo,

matlotlo a yona wohle,

ao e ne e le a yona

mehleng ya kgalekgale.

Ha tjhaba sa yona

se wela matsohong a dira,

ha ho a ba le ya kileng

a e thusetsa.

Dira tsa yona di ile tsa e sheba,

tsa etsa metlae

ka ho timetswa ha yona.

₈Jerusalema e sitilwe haholo,

ka baka leo, e silafetse,

bohle ba neng ba e hlompha,

ba a e nyedisa,

ba e nyedisa hobane ba e bonetse.

E, Jerusalema e qetwa ke mefehelo,

e a reteleha, e ipata sefahleho.

₉Tshila tsa Jerusalema

di kgomaretse,

di kgomaretse aparong tsa yona,

ha e a ka inahanela

pheletso ya yona.

Ho wa ha yona e bile ho makatsang,

ha ho a ba le ya mong

ya e tshedisang.

“Oho, Morena,

ako bone matshwenyeho a ka,

sera ke sena kajeno se a ithorisa!”

₁₀Sera se nanabeditse

letsoho la sona,

sa le nanabetsa,

sa nka maruo wohle a yona;

Jerusalema e bone

baditjhaba ba kena,

ba kena ka Sehalalelong sa yona,

bona bao o neng o laetse,

o itse ba se kene

phuthehong ya hao.

₁₁Tjhaba sohle sa yona

se qetwa ke mefehelo,

se fehelwa

ha se ntse se sikila bohobe;

matlotlo a sona se a ananya dijo,

hore se nne se tsebe ho phela.

“Oho, Morena, ako tadime,

o be o bone;

bona kamoo ke nyedisehang kateng!”

₁₂“Lona bohle, bo-mofeta-ka-tsela,

na hoo ha ho re letho ho lona?

Qamakang kahohle le ke le bone:

Na matshwenyeho

a tshwanang le a ka a teng,

matshwenyeho ao

ke otlilweng ka wona,

ao Morena a a theoletseng hodima ka,

mohla tsatsi la kgalefo

e tlokomang ya hae?

₁₃Morena o rometse mollo

o theoha hodimo,

wa nkena masapong,

wa tjhatjhametsa;

maotong a ka o tjhehile leraba,

a etsa hore ke be ke kgutle,

ke kgutle ka santhao.

O nkentse hore ke sale ke le inotshi,

o ntjesa bodutu kamehla yohle.

₁₄“Dibe tsa ka tsohle

Morena o a di tseba,

ka tsoho la hae a di loha,

tsa etsa thapo,

molaleng wa ka

a di tlama jwaloka joko,

boima ba tsona

ba mphokodisa haholo.

Morena o neelane ka nna

ho dira tsa ka,

a nnea bao

nke keng ka ba lwantsha.

₁₅Dinatla tsa ka tsohle

tse neng di mpotile,

kaofela ha tsona

Morena o di phetshetse;

o mmemetse lebotho

ho tla mphutuhela,

le mphutuhele,

tjhatjha ya ka le e pidile.

Morena o tlabiketse morwetsana,

Moradi wa Juda,

a mo tlabikela

sa morara setlhotlelong.

₁₆“Ke ka baka la tsona ke llang,

mahlo a ka a keleketla dikeledi,

hobane motshedisi wa ka

o hole le nna,

yena ya neng a ka kgatholla

moya wa ka.

Bana ba ka ba setse ba itlhophere,

hobane nna

ke hlotswe ke sera sa ka.”

₁₇Sione e phakaladitse matsoho a yona,

empa ya ka e tshedisang

yena ha a yo.

Malebana le Jakobo,

Morena o entse taelo:

Dira tsa hae

di mo etsetse sakana-la-nkope.

Jerusalema e fetohile manyala,

Jerusalema e silafetse.

₁₈“Morena yena o lokile,

hobane ke fetohetse molao wa hae.

Lona ditjhaba tsohle, mmameleng!

Tadimang,

le bone matshwenyeho a ka!

Thwetsana ya ka

le tlhankana ya ka,

kaofela ha bona

ba isitswe bothopuweng!

₁₉Ke ipileditse ho baratuwa ba ka,

empa ke bona ba ileng ba nkeka.

Baprista le baetapele ba ka

ba shwele,

ba shweletse diterateng tsa motse,

ba eshwa ba ntse ba sikila bohobe,

hore ba tle ba tsebe ho iphedisa.

₂₀Oho, Morena, bona ke tsielehile!

Moya wa ka o ferekane haholo!

Pelo ya ka e tshwenyehile haholo,

hobane ke o fetohetse haholo!

Diterateng sabole e a bolaya,

ka matlung ho nkga lefu feela!

₂₁Batho ba utlwile mefehelo ya ka,

empa ha ho na motho

ya ntshedisang.

Dira tsa ka tsohle

di utlwile tsietsi ya ka,

di nyakaladitswe

ke ketso ena ya hao.

Potlakisa tsatsi

le boletsweng ke wena,

dira tsa ka

di tle di tshwane le nna.

₂₂Bokgopo ba dira tseo

bo pepesehe ho wena,

le tsona kotlo ya tsona

di e fumane,

o di otle

jwalokaha le nna o nkotlile,

o nkotla

ka baka la dibe tsa ka tsohle.

Mefehelo ya ka e mengata haholo,

pelo ya ka le yona e nyahame.”

₁Bonang kamoo Morena

a halefileng kateng!

O sithabeditse Sione

ka leru le letsholetsho!

Tlotla ya Iseraele

o e lahletse fatshe,

a e lahlela fatshe

e theoha lehodimong.

Mohla tsatsi leo

la kgalefo ya hae,

ha a a ka a hopola

bonamelo ba maoto a hae.

₂Morena o timeditse

diahelo tsa Jakobo,

a di timetsa kaofela,

mohau a se na wona;

qhobosheane tsa Moradi wa Juda

a di ripitla,

a di ripitla,

kgalefo ya hae e ntse e tlokoma;

mmuso wa teng a o tlontlolla,

a o tlontlolla le babusi ba wona.

₃Naka la Iseraele o le robile,

a le roba

kgalefo ya hae e tlokoma;

tsoho la hae le letona, le matla,

a le honyetsa ha sera se futuha.

A halefela Jakobo

sa mollo o malakabe,

o malakabe, o timetsang kahohle.

₄O hutse seqha sa hae jwaloka sera,

o eme sa mohlabani,

tsoho le letona le phahame;

bohle ba kgahlang mahlo

a ba bolaya.

Kgalefo ya hae e tukang malakabe,

a e theolela hodima tente ya Sione.

₅Morena o ka sera sa rona,

Iseraele o e ripitlile,

a ripitla matlo wohle

a dikgosi tsa yona.

Qhobosheane tsa yona a di heletsa,

a atisa bofifi le dillo

tsa Moradi wa Juda.

₆O runtsolotse Tempele ya hae,

a e runtsolla sa lephephe tshimong,

sebaya sa hae sa diphutheho

a se ripitla.

Morena o entse hore Sione e lebale,

e lebale matsatsi a mekete,

e lebale le Disabatha;

ha kgalefo ya hae e tuka malakabe,

a nyedisa kgosi le yena moprista.

₇Morena o lahlile aletare ya hae,

Sehalalelo sa hae

le sona a se furalla;

marako a matlo a kgosi tsa Sione

o neelane ka wona

matsohong a dira;

ka tlung ya Morena

dira di entse lerata,

lerata le kang

la mohla tsatsi la mokete.

₈Morena o sa entse qeto

ya ho heletsa,

ya ho heletsa marako

a Moradi wa Sione;

kgwele ya ho lekanya

o se a e otlolotse,

ha a a ka a honyetsa tsoho la hae

ha le timetsa.

A etsa hore metero le marako di lle,

bobedi ba tsona a di heletsa.

₉Dikgoro tsa Sione

di kwahetswe ke mobu,

mekwallo ya tsona

o e robakile dikotwana;

kgosi le mahosana

ke bathopuwa hara baditjhaba,

ke bathopuwa ba leng moo

ho sa rutweng Molao;

baporofeta ba Sione

ha ba sa bona dipono,

pono tse tswang ho Morena.

₁₀Baholo ba Jerusalema

ba ituletse fatshe,

ba ituletse fatshe ba kgutsitse,

ba kgutsitse ba se na puo;

ba itshetse ka lerole

hodima dihlooho,

mmeleng ya bona

ba apere tse mahwashe,

barwetsana ba Jerusalema

ba inametse fatshe.

₁₁Mahlo a ka a foufaditswe,

a foufatswa ke dikeledi,

moya wa ka o ferekane haholo,

bohloko ba pelo ya ka

bo tsholohela fatshe,

ka baka la ho timetswa

ha setjhaba sa heso,

ka baka la ho timetswa

ha bana le masea,

ba timetswa

ba le diterateng tsa motse.

₁₂Bana ba llela bo-mma bona,

ba re: “Dijo di hokae,

dino tsona di hokae?”

Ba rialo ba akgeha

sa batho ba mahlatsipa,

ba akgeha

ba le diterateng tsa motse,

bophelo ba bona

bo fela kahanyane,

bo fela bo-mma bona

ba ba sikile ka matsoho.

₁₃Ke ntho efe

eo nka o pakelang ka yona?

Ke ntho efe

eo nka o tshwantshang le yona?

Ka o tshwantsha le yona,

wena Jerusalema?

Nka o lekanya le eng,

ke tle ke o tshedise?

Ke tshedise wena,

Moradi wa Sione,

Moradi wa Sione wa morwetsana?

Botebo ba leqeba la hao

bo ka ba lewatle!

Ke mang ya ka tsebang

ho o phekola?

₁₄Dipono tse bonweng

ke baporofeta ba hao

e ne e le tsa leshano,

tse se nang thuso;

ha ba a ka ba o senolela

sebe sa hao,

hore ba o fapose bothopuwa ba hao.

Ba ile ba o bolella

dipono tsa bohata,

dipono tse ileng tsa o thetsa,

tsa o kgelosa.

₁₅Bo-mofeta-ka-tsela ba opa diatla,

ba opa diatla ha ba o bona;

ba letsa molodi,

dihlooho ba a di thukutha,

ba soma Moradi wa Jerusalema,

ba re: “Na motse oo

ke wona o no le motlemotle,

o no thabisa lefatshe lohle?”

₁₆Dira tsa hao

di o bebenyetsa melomo,

di a o soma,

di o tsikitlanyetsa meno,

di re: “Re timeditse Jerusalema!

Lena ke lona tsatsi

leo esale re le emela,

le fihlile, re bile re le bone!”

₁₇Morena o entse

seo a neng a se rerile,

polelo tsa hae

o di phethahaditse,

polelo tse neng di bolelwe

mehleng ya kgale;

o o timeditse a se na mohau,

a etsa hore o tlakwe

ke dira tsa hao,

ba o lwantshang a ba matlafatsa.

₁₈Pelo tsa setjhaba

di ipiletsa ho Morena,

wena Jerusalema, Moradi wa Sione,

keledi tsa hao

a di ke di phalle jwaloka noka,

di phalle motsheare,

di phalle le bosiu;

o se ke wa ipha sebaka

sa ho phomola,

mahlo a hao

le wona a se ke a phomola.

₁₉Tsoha, o howeletse hara bosiu,

o howeletse

ha balebedi ba qala ho santela;

tse ka pelong ya hao

o di tsholle jwaloka metsi,

o di tshollele kapele ho Morena.

Phahamisa matsoho a hao,

o a phahamisetse ho Morena,

o a phahamise

ka baka la bana ba hao,

bana ba hao ba bolawang ke tlala,

e ba bolaya hara diterata tsohle.

₂₀“Oho, Morena, bona,

ako inahane:

Eo o kila mo etsa tjee ke mang?

Na basadi ba lokela

ho ja masea a bona,

ba je bana bao ba ba hodisitseng?

Na moprista le moporofeta

ba lokela ho bolawa,

ba bolaelwa ka Sehalalelong,

Halalelong sa Morena?

₂₁Batjha le maqheku

ba rapaletse mmoho,

ba rapaletse diterateng,

ba rapaletse hara lerole;

bahlankana le barwetsana ba ka

ba shwele,

ba eshwa ke ho bolawa ka sabole.

O ba bolaile mohla o no halefile,

wa ba bolaya

le mohau o se na wona.

₂₂O bitsitse dira tsa ka

ka nqa tsohle,

wa di bitsa

eka o di bitsetsa moketeng.

Ka tsatsi leo

o no halefile ka lona, Morena,

ha ho le ya mong ya kila phonyoha,

ha ho le ya mong ya kila sala!

Bao ke ba otlileng, ka ba hodisa,

bohle ba timeditswe ke sera sa ka!”

₁Ke nna motho

ya tsebang matshwenyeho,

ke otlilwe ka thupa ya Morena,

Morena a halefile.

₂O nkgothomeditse, a re ke tsamaye,

ke tsamaye lefifing, e seng leseding.

₃Ruri o nkotlile ka letsoho la hae,

a nkotla a bile a phetella,

a nkotla letsatsi lohle.

₄Letlalo la ka o le tlatsitse dibabetsi,

masapo a ka o a swahlamantse.

₅O nketseditse sakana-la-nkope,

a nkopela ka mahlomola

le ka ditsietsi.

₆O mpeile fifing le letsholetsho,

ke jwaloka bafu ba kgalekgale.

₇O ntinkeditse hoo

nke ke be ka phonyoha,

a ntlama ka mahlaahlela

a lethose a boima.

₈Leha ke bokolla, ke batla thuso,

thapelo ya ka ha a e mamele.

₉O thibetse mmila wa ka

ka kakawe tsa majwe,

tsela ya ka o e kgopamisitse.

₁₀Morena o ntaletse jwaloka bere,

a ntalla sa tau e le ka letsabeng.

₁₁O nkgelositse tseleng ya ka,

a ntsekolla,

a ntshiya moo ke hloka mothusi.

₁₂A hula seqha sa hae, a fula,

a nketsa sekgopi sa metsu ya hae.

₁₃O hlabile diphiyo tsa ka ka metsu,

metsu e tswang sehlajweng sa hae.

₁₄Tjhabeng sa heso

ke fetohile sesomo,

se nteola ka dipina letsatsi lohle.

₁₅O ntlopile tse babang sa leshokgwa,

a ba a ntlopa le lona lengana.

₁₆O nthobile meno

ka ho ntjesa lehlohlojane,

a mpudukanya hodima molora.

₁₇Pelo ya ka o e amohile kgotso,

le boiketlo ha ke sa bo tseba.

₁₈Yaba ke re:

“Matla a ka a se a mpheletse,

tseo ke di tshepetseng Morena

di se di fetile!”

₁₉Ke hopola matshwenyeho a ka

le ditsietsi tsa ka,

ho nna ke lengana

le leshokgwa le babang!

₂₀Pelo ya ka e di hopola kamehla,

e nyahame ka sefubeng sa ka.

₂₁Tsena ke sa ntsane ke di hopola,

kahoo ke sa ntsane ke ena le tshepo.

₂₂Ka baka la lerato la Morena,

rato le sa feleng,

ha re a ka ra ba ra timela,

mehauhelo ya hae

ha e eso ka e kgaotsa;

₂₃hoseng ho hong le ho hong

e a ntjhafala,

botshepehi ba hae

bo boholo haholo!

₂₄Ka pelong ya ka nna ke re:

“Morena ke yena kabelo ya ka,

kahoo ke itshepetse yena feela.”

₂₅Morena o molemo

ho bohle ba mo tshepang,

o molemo ho bohle ba mmatlang.

₂₆Ho molemo

ha motho a eba le letshepa,

a lebella ka mamello

hore Morena a mo pholose.

₂₇Ho molemo

ha motho a jara joko ena,

a e jara nakong ya botjha ba hae.

₂₈A dule a le mong,

a dule a kgutsitse,

hobane o e jarisitswe ke Morena.

₂₉A obamele fatshe

ho hlompha Morena,

mohlomong thuso

e ka nna ya mo hlahela.

₃₀A se ke a thibela

ya mo jabelang lerama,

a mamelle mahlapa wohle

a mo tlelang.

₃₁Morena ha a ke be a lahle batho,

ha a ke a ba lahlela molahlelaruri!

₃₂Leha a tlisa maswabi,

o utlwela bohloko,

ka baka la boholo

ba mehauhelo ya hae.

₃₃Hase hore ho hlokofatsa batho

o a ho thabela,

kapa hona ho ba tlisetsa maswabi.

₃₄Ho hatakela batshwaruwa ka leoto,

batshwaruwa bohle

ba teng lefatsheng;

₃₅ho hanela motho ka tokelo tsa hae,

ha motho a le kapela

Ya Hodimodimo;

₃₆ho sokamisa toka ka makgotleng,

na tsee tsohle Morena ha a di bone?

₃₇Ya ka bolelang ntho,

ya etsahala, ke mang,

haeba ntho eo

e sa laolwa ke Morena?

₃₈Na tse bohloko le tsona tse monate

ha di tswe ho Ya Hodimodimo?

₃₉Kahoo motho

a ka belaetswa ke dife,

ha motho a otlelwa dibe tsa hae?

₄₀A re hlahlobeng tsela tsa rona,

re di lekole,

ebe re boela re kgutlela ho Morena.

₄₁A re phahamiseng dipelo

le matsoho a rona,

re di phahamisetse ho Modimo,

Modimo ya mahodimong, re re:

₄₂“Re sitilwe, ra ba ra kweneha,

wena Morena ha o a re tshwarela.

₄₃“O re phaladisitse o halefile haholo,

wa re bolaya o sa re hauhele.

₄₄O ikgurumeditse ka leru, o ipatile,

hore thapelo tsa rona

di se fihle ho wena.

₄₅O re entse hore re be mahohodi,

re be thotobolo hara baditjhaba.

₄₆Dira tsa rona tsohle

di re bebenyetsa melomo,

di a re swenyetsa.

₄₇Re tshwerwe ke tshabo,

leraba le re kgatile,

re fihletswe ke tshenyeho,

re fihletswe le ke timelo.”

₄₈Mahlo a ka a phorosela dikeledi,

di phorosela sa metsi a nokana,

ka baka la ho timetswa

ha setjhaba sa heso.

₄₉Mahlo a ka

a tla keleketla dikeledi,

di keleketle motjha-o-tjhele,

di sa kgaotse,

di keleketle jwalo,

mahlo a sa phomole,

₅₀ho fihlela Morena a tadima fatshe,

a tadima a le lehodimong,

mme a re bona.

₅₁Ke utlwiswa bohloko

ke seo ke se bonang,

ka baka la basadi ba motse wa heso.

₅₂Ke phaladisitswe ke dira tsa ka

ho se lebaka,

tsa mphaladisa

sa ha ho phaladiswa nonyana.

₅₃Di nkakgetse ka mokoting

ke ntse ke phela,

molomo wa mokoti

tsa o kwala ka lejwe.

₅₄Metsi a phophoma

hodima hlooho ya ka,

ka ba ka re:

“Jwale ke kgatheng la ho timela!”

₅₅Ka bitsa lebitso la hao,

wena Morena,

ka le bitsa

ke le botebong ba mokoti, tlase.

₅₆Wa utlwa lentswe la ka

ha ke ne ke re:

“Se thibe tsebe ya hao

ha ke fehelwa,

ha ke fehelwa ke bile ke ipiletsa.”

₅₇Wa atamela ho nna ha ke ipiletsa,

wa re ho nna: “O se ke wa tshaba!”

₅₈Ha ke ne ke qoswa

o ila nkemela, Morena,

yaba bophelo ba ka o a bo pholosa.

₅₉O bone kamoo ke tujwang kateng,

ako nkahlolele ka toka, Morena!

₆₀Boiphetetso ba bona bohle

o bo bone,

le mano wohle

ao ba ntherelang wona.

₆₁Nyefolo tsa bona

o di utlwile, Morena,

le mano wohle

ao ba ntherelang wona;

₆₂dipuo tsa bao e leng dira tsa ka,

merero eo ba ntherelang yona

letsatsi lohle.

₆₃Esita ba eme, esita ba dutse,

ka nako tsohle nna ke pina ya bona!

₆₄Ba otlele diketso tsa bona, Morena,

ho ya ka mesebetsi

ya matsoho a bona.

₆₅Ako thatafatse dipelo tsa bona,

thohako ya hao e ba wele hodimo!

₆₆Ba hlorise,

o ba timetse kgalefong ya hao,

o ba timetse, o be o ba fedise,

o ba fedise tlasa mahodimo a hao.

₁Kgauta e phatsimang

e fifetse hakaakang!

Kgauta e hlwekileng

e silafetse hakaakang!

Majwe a bohlokwa

a qhalane kahohle

hukung tsa diterata tsohle!

₂Bara ba Sione, mokgetho o kgabane,

bara bao bohlokwa ba bona

e ne e ka ba kgauta,

kajeno ba tshwana

le pitsa tsa letsopa,

ntho tse entsweng

ke matsoho a sebopi!

₃Phokojwe le tsona di ye di nyantshe,

di ye di nyantshe madinyane a tsona;

empa tjhaba sa heso

se sehloho haholo,

se tshwana le dimpshe tsa lehwatata!

₄Leme la lesea

le kgomarela mahalapeng,

le kgomarela teng

ka baka la lenyora;

ba banyenyane ba sikila bohobe,

empa ha ho ya ba neang

le sengwathwana.

₅Ba kileng ba phela

ka dimenyemenye,

ba bolawa ke tlala hara diterata;

ba neng ba apara tse mabokoboko,

kajeno ba paqame dithotobolong.

₆Kotlo ya tjhaba sa heso

e kgolo haholo,

ho feta le ya Sodoma,

e neng e timetswe

ka ho panya ha ntshi,

e sa timetswe ke letsoho la motho.

₇Mahosana a ne a phatsima

ho feta lehlwa,

bosweu ba wona

bo feta le ba lebese,

mmele e le mesehla

ho feta mabenyane,

bokgabane ba wona

e ka ba majwe a safire.

₈Empa kajeno botsho ba wona

bo feta ba mowa,

le diterateng

ha a sa tsejwa ke batho;

letlalo la wona

le manne hodima masapo,

le omeletse, le se le ka lehong.

₉Ho lehlohonolo

ba bolailweng ka sabole,

ba lehlohonolo

ho feta ba bolawang ke sekoboto,

ba fellang dikobong

ho fihlela ba eshwa,

ka baka la ho hloka

tse behwang ke naha.

₁₀Basadi ba nang le motlopotlo

wa ho tswala,

ka matsoho a bona

ba apeha bana ba bona;

ba ba apeha,

ya eba dijo tsa bona,

nakong ya ha tjhaba sa heso

se timetswa.

₁₁Morena o phethahaditse

tsa kgalefo ya hae,

bohale bo tlokomang ba hae

o bo hlatsitse.

O hoteditse mollo

motseng wa Sione,

wa tjhesa metheo

ya motse wa Sione.

₁₂Dikgosi tsa lefatshe

di ne di sa kgolwe,

le baahi bohle ba lefatshe

ba sa kgolwe,

hore kgoro tsa motse wa Jerusalema

di ka kenwa,

tsa kenwa ke sera,

tsa kenwa ke mofutuhi!

₁₃Di kenwe ka baka la dibe

tsa baporofeta ba wona,

ka baka la makgopo

a baprista ba wona,

ba tsholotseng madi a ba lokileng,

ba a tsholla

hara motse wa Jerusalema.

₁₄Ba nnile ba lelera

sa banna ba difofu,

ba lelera hara diterata tsa motse;

ba itshilafaditse ka madi haholo,

hoo ho seng ya ka amang

diaparo tsa bona.

₁₅“Suthang, le silafetse!”

ho rialo setjhaba,

“Suthang! Suthang!

Le se ke la re ama!”

Leha ba lelera hara baditjhaba,

ha ho na moo

ba fumaneng tjako teng!

₁₆Morena ka sebele o ba qhalantse,

ha a ka ke a hlola a sa ba tsotella.

Dira di roletse baprista hlompho,

baholo ba setjhaba ha di sa ba natsa.

₁₇Re tonne mahlo ra ba ra kgathala,

ra lebella thuso,

ra se ke ra e bona!

Re lebeletse

re le hodima ditora,

ra lebella

tjhaba se sitwa ho re pholosa!

₁₈Dira di disitse metsamao ya rona,

re sitwa le ho tsamaya

diterateng tsa rona.

Bofelo ba rona bo se bo atametse,

ditshiu tsa rona di se di badilwe,

bofelo ba rona bo se bo fihlile.

₁₉Baphaladisi ba rona

ba lebelo haholo,

ba lebelo le ho feta dintsu di fofa;

ba re phaladisitse hodima dithaba,

ba re lalla hara lehwatata.

₂₀Motlotsuwa wa Morena,

eo re phelang ka yena,

o ila wela mameneng a bona;

yena eo re neng re bua ka yena,

re re: “Tlasa moriti wa hae

re tla phela hara baditjhaba!”

₂₁Thabang, le nyakalle,

lona baahi ba Edomo,

lona ba ahileng naheng ya Use,

le lona nyakallang!

Senwelo sena

se tla fetisetswa ho lona,

le tahwe, le tsole,

le sale le le feela!

₂₂Wena Sione,

kotlo ya hao e tla fela,

ha o ka ke wa hlola

o iswa bothopuweng.

Empa wena Edomo,

o tla otlelwa bokgopo ba hao,

dibe tsa hao Morena a di senole.

₁Morena, ako hopole

tse re wetseng hodimo!

Ako tadime,

o bone sekgobo sa rona!

₂Naha ya rona

e hapilwe ke baditjhaba,

melata e ikabile ka malapa a rona.

₃Re dikgutsanyana,

bo-ntata rona ba shwele,

bo-mma rona

ba fetohile bahlolohadi.

₄Re nwa metsi a rekwang ka tjhelete,

patsi re e fumana ka ho e reka!

₅Baphaladisi ba rona

ba re hateletse melala,

re sebetsa ka thata,

phomolo ha re e fumane.

₆Ra ipea tlasa Egepeta le Asiria,

re tle re tsebe ho fumana bohobe.

₇Bo-ntata rona ba entse dibe,

mme ba shwele,

rona re ahlolelwa makgopo a bona.

₈Makgoba a fetohile babusi ba rona,

ha ho ya re namolelang

matsohong a wona.

₉Re fumana dijo

re okametswe ke lefu,

ka baka la sabole e lehwatateng.

₁₀Letlalo la rona

le ntshofetse sa sebopi,

ka baka la ho phela hara sekoboto.

₁₁Ba ile ba beta basadi ba Sione,

ba beta le barwetsana

ba metse ya Juda.

₁₂Mahosana a ile a tshwarwa,

a fanyehwa,

baholo ba setjhaba

ba rolelwa hlompho.

₁₃Bahlankana ba sebetsa ka thata,

ba a sila,

bashanyana ba sudubana

tlasa mangata a patsi.

₁₄Maqheku ha a sa dula

kgorong ya motse,

batjha ba kgaoditse

ho letsa makodilo.

₁₅Thabo ya pelo tsa rona e fedile,

metjeko ya rona e fetohile bofifi.

₁₆Meqhaka e wele hloohong tsa rona,

re madimabe, hobane re sitilwe.

₁₇Ka baka la tsena

pelo tsa rona di nyahame,

ka baka la tsena

mahlo a rona a fifetse.

₁₈Kahobane thaba ya Sione

e le feela,

phokojwe di nyanyaka

hara masupi a yona.

₁₉Wena Morena,

o busa kamehla yohle,

terone ya hao

e hlomamiseditswe meloko yohle.

₂₀Ke ka baka lang

o re lebalang kamehla?

Ke ka baka lang

o re furallang halelele?

₂₁Re kgutlisetse ho wena Morena,

re tla kgutla,

ntjhafatsa tshiu tsa rona

di be jwaloka pele.

₂₂Kapa ebe o so re lahletse ruri?

Kgalefo ya hao ha e sa na moedi?

Modimo ya matla wohle, Morena,

o buile, o bitsa lefatshe lohle

ho tloha botjhabela

ho isa bophirimela.

₂Modimo o kganya a le Sione,

motseng o motlemotle.

₃Modimo wa rona o a tla,

a ke ke a hlola a kgutsa.

Kepele ho yena ke mollo,

mollo o tjhesang lore!

Sefefo se matla se mo teetse hare.

₄O bitsa mahodimo le lefatshe

ho tla kahlolong ya setjhaba sa hae.

₅O re: “Bokellang batshepuwa ba ka,

le ba bokelle kapele ho nna,

e leng ba entseng selekane le nna

ba se entseng ka mahlabelo.”

₆Mahodimo a bolela ho loka ha hae,

kaha Modimo ke yena moahlodi.

₇“Mamelang, lona setjhaba sa ka,

mme ke tla bua;

wena Iseraele, ke tla o qosa.

Ke nna Modimo, Modimo wa hao.

₈Ha ke o nyatsetse mahlabelo a hao,

hobane ha o kgaotse

ho nnyehella ka ditjheso.

₉Nke ke ka amohela poho

ya saka la hao,

leha e le phooko

ya mohlape wa hao;

₁₀hobane dibatana tsohle tsa meru

ke tsa ka,

le tsona diphoofolo

tse diketekete dithabeng.

₁₁Ke tseba dinonyana tsohle

tse sepakapakeng,

le dinyamatsane tsohle tsa naha

ke tsa ka.

₁₂Hoja ke ne ke lapile,

ke ne ke sa tlo o bolella,

hobane lefatshe ke la ka,

le tsohle tse ho lona.

₁₃Na ke ja nama ya dipoho?

Kapa ke nwa madi a diphooko?

₁₄Nyehella Modimo

ka sehlabelo sa teboho,

phetha dikano tsa hao

ho Ya Hodimodimo.

₁₅Ipiletse ho nna

ka nako ya matshwenyeho;

ke tla o lopolla,

mme wena o tla ntlotlisa.”

₁₆Empa ho ya kgopo Modimo o re:

“O na le tokelo efe

ya ho bolela melao ya ka,

kapa ho boledisa selekane sa ka,

o se boledisa ka molomo wa hao,

₁₇athe o hloile ho kgalemelwa,

o lahlile mantswe a ka ho hang?

₁₈Ha o bona leshodu,

o so kgema le lona;

o motswalle wa difebe.

₁₉O dumella molomo wa hao

ho bua tse mpe,

leleme la hao le loha mano.

₂₀O duletse ho bua ngwaneno hampe;

o silafatsa ngwana mmao.

₂₁Tsena o di entse;

jwale o re nka kgutsa?

O hopola hore ke tshwana le wena?

Ke tla o kgalemela,

ke totobatse tsohle mahlong a hao.

₂₂“Lona ba lebalang Modimo,

le ke le lemohe tsena,

esere ka le harola,

mme la hloka ya le namolelang.

₂₃Ya nnyehellang

ka sehlabelo sa teboho

ka sona o a ntlotlisa,

ya tsamayang ka ho loka

ke tla mmontsha

kamoo Modimo a pholosang kateng.”