To The Word – Day 180

₁₅Theang tsebe le mamele,

le se ke la ikakasa,

hoba ke Morena ya seng a buile.

₁₆Tlotlisang Morena,

Morena Modimo wa lona,

mo tlotliseng a eso tlise lefifi,

maoto a lona

a eso kgothometsehe,

a kgothometseha

hodima thaba tse lefifi.

Lona le lebeletse lesedi,

Morena o tla le fetola

fifi le letsholetsho,

a le fetole

fifi la bo-nka-ntjana!

₁₇Empa haeba le ke ke la mamela,

ke tla llela

boikgohomoso ba lona sephiring,

mahlo a ka a keleketle dikeledi,

hobane mohlape wa Morena

o tla bo thopilwe.

₁₈Ere ho kgosi

le ho mofumahadi, mmakgosi:

“Theohang diteroneng le ikokobetse,

hoba le rodisitswe

mefapahlooho ya tlotla.”

₁₉Metse e ka Borwa

e etseditswe thibella,

ha ho le ya mong

ya kenang ho yona,

baahi bohle ba Juda ba a thopuwa,

ba a thopuwa, e ba kgorolakoqo.

₂₀Phahamisang mahlo a lona,

le bone ba le futuhelang

ba etswa leboya.

O kae mohlape oo o neng o o disa,

mohlape wa hao o neng o kgahleha?

₂₁O tla reng

ha bao o no re ke metswalle,

ba o hlweswa hodimo,

e eba babusi ba hao?

Na ha o na ho tshwarwa ke mahlaba,

o tshwarwe ke mahlaba

sa mosadi a kena tlung?

₂₂Ha o ka ipotsa ka pelong ya hao,

wa re: “Ke ka baka lang

ha tsee di ntlhahetse?”

Ka baka la dibe tsa hao

tse ngatangata,

mese ya hao e ila apolelwa hodimo,

mmele wa hao wa sala o le feela.

₂₃Na Mokushe

a ka fetola lebala la hae,

kapa lengau

la fetola maroboko a lona?

Haeba ho jwalo,

le lona ba itlwaeditseng tse mpe

le ka nna la tseba ho etsa tse ntle!

₂₄“Kahoo ke tla ba hasanya

sa mmoko o fefoha,

o fefolwa ke moya wa lehwatata.

₂₅Lena ke lona lefa la hao,

ke seabo seo ke se abetseng wena,

hobane wena o ila ntebala,

wa itshepela medimo ya bohata,”

ho rialo Morena.

₂₆“Kahoo ke apotse mese ya hao,

ka e apolela hodimo,

ke o kwahetse ka yona mahlong,

bofeela ba hao bo lepalapaleng.

₂₇Bofebe ba hao ke bo bone hantle,

le ho lla ha hao

ho kang ha pere e palesitse!

Ke bone diketso tsa bootswa ba hao,

le manyala a hao

hodima maralla le masimong.

O madimabe hakaakang,

wena Jerusalema!

O tla ba sesila ho fihlela neng?”

₂“Juda e bofifing,

metse e shwa ke lenyora,

tjhaba se rapaletse fatshe,

se apere bofifi,

sello sa Jerusalema

le sona se hlaba hodimo!

₃Mahosana a rometse bahlanka

ho ya kga metsi,

ba fihla didibeng,

ba fumana di se na metsi;

ba kgutla dinkgo tsa bona di le feela,

ba hlabilwe ke dihlong, ba tsielehile,

matsoho ba a beile hodima dihlooho.

₄Naha e omeletse

hobane pula ha e yo,

balemi le bona

pelo tsa bona di nyahame,

matsoho ba a beile hodima dihlooho.

₅Kgama le yona

e tswaletse hara naha,

e siile ledinyane

hoja e qeta ho le tswala,

e le siya

hobane naha e se na jwang.

₆Tonki tse hlaha,

hodima maralla a phollatsi,

di fofonela moya

jwalokaha eka ke diphokojwe,

mahlo a tsona a a eba,

hobane jwang ha bo yo!”

₇Oho, Morena,

leha re qoswa ke dibe tsa rona,

ako re thuse

ka baka la lebitso la hao.

Re kgelohile haholo,

re fela re o sitetswe!

₈Oho, wena tshepo ya Iseraele,

Mopholosi wa yona

ka nako ya ditsietsi,

ke hobaneng

o kang moeti naheng ee,

o kang motsamai

ya fapohelang ho robaletsa?

₉Ke hobaneng

o kang motho ya tsielehileng?

O kang senatla

se sitwang ho re pholosa?

Oho, Morena, wena o hara rona,

wena o itse re setjhaba sa hao;

oho, se re furalle ke hona!

“Se rata ho lelera haholo,

se sitwa ho thibela maoto a sona.

Kahoo Morena ha a se amohele,

jwale o tla hopola bokgopo ba sona,

a se otle ka baka la dibe tsa sona.”

“ ‘Mahlo a ka a ke a keleketle dikeledi,

di keleketle bosiu le motsheare,

di keleketle di se ke tsa kgaotsa,

hoba moradi wa morwetsana,

e leng tjhaba sa ka,

o qhemeditswe, a etswa ditsekana,

maqeba a hae ha a ka ke a fola.

₁₈Ha ke tsamaya ke kena hara naha,

ke bona ba bolailweng ka sabole!

Ha ke re ke kena kahara motse,

ke bona ba bolailweng ke sekoboto!

Moporofeta le moprista

ka ho tshwana

ba lelera hara naha

ba sa e tsebe.’ ”

₁₉“Na o fela o lahlile Juda ho hang?

na o fela o se o nyonya Sione?

Ke hobaneng ha o re otlile,

re se na pheko?

Re ne re lebeletse kgotso,

empa molemo ha re o fumane;

re ne re lebeletse

nako ya ho fodiswa,

empa re bona ditsietsi feela!

₂₀Morena, re ipolela bokgopo,

bokgopo ba rona;

re bolela le molato,

molato wa bo-ntata rona,

hobane re fela re o sitetswe.

₂₁Ka baka la bitso la hao

o se ke wa re nyonya,

o se ke wa tlontlolla

terone e tlotlehang ya hao.

Hopola selekane

seo o se entseng le rona,

o se hopole,

o se ke wa se fedisa.

₂₂Hara medingwana ya mafeela,

medingwana ya baditjhaba,

na o teng

o ka tsebang ho nesa pula?

Na lehodimo

le theola mafafatsane ka bolona?

Na hase wena Morena,

Modimo wa rona?

Ka baka leo, rona re tshepile wena,

hoba tsena tsohle di etswa ke wena.”

“ ‘Ba abetsweng lefu,

ba tla bolawa ke lefu,

ba abetsweng sabole,

ba tla bolawa ke sabole,

ba abetsweng sekoboto,

ba tla bolawa ke sekoboto,

ba abetsweng bothopuwa,

ba tla thopuwa.’

₅“O tla utlwelwa bohloko ke mang,

wena Jerusalema?

O tla llelwa ke mang,

wena Jerusalema?

O tla fapohelwa ke mang

ho o botsa bophelo?

₆Ke furaletswe ke wena,

wa nna tjhetjha ka santhao,”

ho rialo Morena.

“Ke tla o tshwara

ka letsoho la ka ke o timetse,

ke se ke kgathetse ke ho o hauhela.

₇Ke tla ba fefera

ka fereko ya ho fefera,

ke ba feferele menyakong ya motse.

Ke tla ba bolaela bana,

tjhaba sa ka ke se fedise,

hobane tsela tsa sona tse kgopo

ha se a di kgeloha.

₈Ke tla eketsa bahlolohadi

hara setjhaba sena,

ba ngatafale

ho feta hlabathe la lewatle.

Hara mpa motsheare

ke tla tlisa motimetsi,

a timetse basadi

ba tswetseng bahlankana,

hanghang tshabo le thothomelo

di ba wele hodimo.

₉Ya nang le bana ba supileng

o tla kgathala,

a kgathalle ruri, a idibane.

Tsatsi le tla mo dikella

e ntse le motsheare,

a hlajwe ke dihlong,

a be a tlontlolohe.

Masalla a setjhaba

ke tla neelana ka wona,

ke a nee dira

di a bolaye ka sabole,”

ho rialo Morena.

₁₀Ke madimabe hakaakang, mme,

ha o ila wa mpeleha,

wa mpelehela

hore ke be motho wa diqabang,

motho wa meferefere

hara lefatshe lohle!

Ha ke a ka ka adima

kapa ka adimana,

empa e mong le e mong

o a nthohaka.

“Ruri wena

ke tla o matlafatsa haholo,

ruri dira tsa hao

di tla be di o rapele,

di o rapele nakong ya mahlonoko,

di o rapele le nakong ya ditsietsi.

₁₂“Na motho a ka roba tshepe,

a roba tshepe kapa lethose

le tswang leboya?

₁₃Matlotlo a hao le maruo a hao,

ke tla neelana ka wona,

a etswe lelobelo

ka thupa ya mmowana,

ka baka la dibe tsohle tsa hao,

dibe tseo o di entseng

naheng ena yohle.

₁₄Ke tla o etsa lekgoba,

kgoba la dira tsa hao,

ke o etse lekgoba

naheng eo o sa e tsebeng.

Kgalefo ya ka e tla hotetsa mollo,

e hotetse mollo o tla o tjhesa.”

₁₅“O a tseba, wena Morena,

ako nkgopole, o ke o nketele,

ako mphetetse ho batubi ba ka;

kaha o na le mamello,

se ke wa ntimetsa,

hopola ke hlapaolwa

ka lebaka la hao.

₁₆Hoba ke utlwe dipolelo tsa hao,

di ile tsa ka bohobe ho nna,

ka di ja,

ya eba thabo le monyaka

wa pelo ya ka,

hobane nna

ke bitswa ka lebitso la hao,

oho, wena Morena,

Modimo wa mabotho!

₁₇Ha ke eso ka ke dula

mokgatlong wa basomi,

ha ke eso ka ke ithabisa le bona;

ke ituletse ke le inotshi

ka baka la matla a hao,

hobane o entse

hore ke halefe haholo.

₁₈Ke hobaneng bohloko ba ka

ha bo sa fele?

Qeba la ka le phephetha boladu,

le hana ho fola?

Na o tla itshwantsha

le mothetsi ho nna,

o be jwaloka sediba,

diba se metsi a pshang?”

“Haeba o ka baka

ke tla o busetsa tulong tsa hao,

haeba o bua polelo tse ntle

e seng tsa mafeela,

e tla ba wena molomo wa ka,

o ntshebeletse,

tjhaba sena se ye ka ditsela tsa hao,

e seng wena o ye ka ditsela tsa sona.

₂₀Ke tla o etsa lerako

le haheleditsweng la lethose,

tjhaba sena

o tlo tsebe ho se hlola.

Se tla o lwantsha,

empa se ke ke be sa o hlola,

hoba ke na le wena

ho o pholosa le ho o lopolla,”

ho rialo Morena.

₂₁“Ke tla o pholosa

matsohong a ba kgopo,

ke o lopolle

matsohong a ba sehloho.”

₁₉Wena Morena, matla a ka

le qhobosheane ya ka,

wena tshabelo sa ka

nakong ya ditsietsi;

baditjhaba ba tla itlisa ho wena,

ba itlise

ba etswa pheletsong tsa lefatshe,

ba re: “Bo-ntata rona ba jele lefa

la mashano le la mafeela,

la medingwana ya mafeela

e se nang molemo.

₂₀Na motho a ka tseba

ho iketsetsa modimo?

E, empa eo yona hase medimo!”

₂₁“Ke ka baka lena ke tla ba ruta,

ke ba rute hape la ho qetela,

ke ba rute matla a ka

le bonatla ba ka,

mme ba tla tseba

hore nna ke bitswa Morena.”

₁“Sebe sa Bajuda se ngotswe

ka pene ya tshepe,

sa ngolwa pelong tsa bona,

sa ngolwa ka daemane e le ntjhotjho,

sa ngolwa le manakeng

a dialetare tsa bona.

₂Le bana ba bona ba ntse ba hopola,

ba hopola dialetare tsa bona,

aletare tsa Ashera,

tse tlasa fate tse talana

tse hodima maralla.

₃Thaba ya ka le naha e e potileng,

maruo le matlotlo wohle a lona,

tsena ke tla fana ka tsona

e be lelobelo,

ke fane ka dibaka tsa lona,

baka tsa lona tsa borapedi,

ka baka la sebe

se entsweng naheng ena yohle.

₄Ka baka la phoso tsa lona

le tla lahlehelwa,

le lahlehelwe ke lefa

ke le file lona.

Ke tla le etsa makgoba

a dira tsa lona,

ke le etse makgoba

naheng eo le sa e tsebeng,

hobane le entse

hore kgalefo ya ka e tuke,

e laime malakabe kamehla yohle.”

“Ho ke ho rohakehe

ya itshepisitseng batho,

yena ya tshepileng matla

a letsoho la hae,

eo pelo ya hae

e furaletseng Morena.

₆O tla tshwana le sehlahla

se metseng hara lehwatata,

ha a ka ke a bona

le tse molemo ha di etla.

O tla aha matswatlareng

a omeletseng a lehwatata,

a ahe naheng e lenyekethe,

e hlokang baahi.

₇“Ho lehlohonolo motho

ya itshepetseng Morena,

eo tshepo ya hae

e leng yena Morena.

₈O tla tshwana le sefate

se lemilweng pela metsi,

seo metso ya sona

e namelang pela molatswana.

Ha se ke se tshoswa

ke ho fihla ha lebatama,

mahlaku a sona

a matalana kamehla,

ka nako ya komello

ha se ke se tshwenyeha,

kamehla se beha

ditholwana tsa sona.”

₉Pelo e tletse mano

ho feta dintho tsohle,

e senyehile

hoo e ke keng ya phekolwa,

ke mang ya ka e utlwisisang?

₁₀“Ke nna Morena ya lekolang dipelo,

mohopolo le wona o lekolwa ke nna.

Ke putsa motho

ho ya ka diketso tsa hae,

ho latela tholwana

tsa mesebetsi ya hae.”

₁₁Jwaloka nonyana

e fuamang mahe e se a yona,

ya ruang ka mano le yena o jwalo,

bohareng ba bophelo ba hae

maruo ao a tla mo fella,

qetellong bothoto ba hae

bo bonahale.

₁₂Terone e tlotlehang, e phahameng,

haesale ho tloha tshimolohong,

ke sona sebaka

sa Sehalalelo sa rona.

₁₃Oho, wena Morena,

tshepo ya Iseraele,

bohle ba o furallang

ba tla tlontlollwa,

bohle ba o furallang

ba tla timela,

hoba ba furaletse Morena,

diba sa metsi a bophelo.

₁₄Mphodise, Morena,

mme ke tla fola,

mpholose, Morena,

mme ke tla pholoha,

hobane ke wena eo ke mo rorisang.

₁₅Ba ntse ba re ho nna:

“Di kae dipolelo tsela tsa Morena?

ha a ke a di phethahatse jwale!”

₁₆Nna ha ke a kgaotsa ho ba modisa

ya o salang morao,

ha ke eso labalabele

tsatsi la ditsietsi,

polelo tsa ka le wena o a di tseba.

₁₇Wena se ka etsa hore ke o tshohe,

o setshabelo sa ka

nakong ya ditsietsi.

₁₈Bahlorisi ba ka

ba ke ba hlabiswe dihlong,

nna ke se ke ka hlabiswa dihlong;

etsa hore bona ba tshohe haholo,

nna ke se ke be ka tshoswa ke letho.

Ako ba tlisetse tsatsi la ditlokotsi,

timetso ya bona

o e phethahatse habedi.

₂Mamelang, lona ditjhaba tsohle;

sekehang tsebe,

lona baahi bohle ba lefatshe,

₃lona bafo le lona marena,

lona barui le mafutsana hammoho.

₄Molomo wa ka o tla bua tsa bohlale,

pelong ya ka ke tla nahana

tse nang le kelello.

₅Ke tla sekehela maele tsebe,

ke tla hlalosa selotho sa ka

ke ntse ke letsa harepa.

₆Nka tshoha eng nakong tse mpe,

ha ke teetswe hare ke dira tse kgopo,

₇e leng batho

ba tshepileng matlotlo a bona,

ba ithorisang

ka maruo a bona a mangata?

₈Ha ho motho

ya ka lopollang ngwanabo,

leha e le ho mo lefella ho Modimo.

₉Tefello ya bophelo ba motho

e feta matla a hae,

a ke ke a e lekana le ka mohla!

₁₀Motho a ke ke a phela hoyahoile,

a se ke a tseba lebitla.

₁₁O tla fela a bone

hore le ba bohlale ba a shwa,

sethoto le lewatla

ba timela ka ho tshwana,

ba siele ba bang matlotlo a bona.

₁₂Mabitla a bona

ke matlo a bona a mehla yohle,

ke leaho la bona

ho isa melokong yohle,

le hoja dinaha di reeletswe ka bona.

₁₃Motho ya phelelang leruo

o hloka kelello,

o tshwana le diphoofolo tse shwang.

₁₄Ena ke yona tsela ya ba itshepileng,

ke pheletso ya ba kgotsofetseng,

ba kgotsofaletseng matlotlo a bona.

₁₅Ba kgannelwa Nqalong ya Bafu

jwaloka dinku;

lefu e tla ba modisa wa bona.

Ba tla theohela lebitleng,

sebopeho sa bona se tla senyeha;

Nqalo ya Bafu e tla ba leaho la bona.

₁₆Empa Modimo o tla ntopolla,

a nntshe diatleng tsa lefu.

₁₇O se ke wa tshoha

leha motho a ka rua,

mme matlotlo a ntlo ya hae

a eketseha;

₁₈hobane mohla a shwang

a ke ke a nka letho,

matlotlo a hae

a ke ke a mo sala morao.

₁₉Le hoja ha a sa phela,

a ne a ikuka a le lehlohonolo,

kapa a ne a rorisetswa

katleho ya hae,

₂₀o tla be a yo fihla

molokong wa bo-ntatae,

ba ke keng ba hlola ba bona lesedi.

₂₁Motho ya phelelang leruo

o hloka kelello,

o tshwana le diphoofolo tse shwang.