To The Word – Day 179

₂₉“ ‘Wena Jerusalema,

beola moriri wa hao, o o lahle,

bina kodi-ya-malla hodima maralla,

hobane Morena,

ka baka la kgalefo ya hae,

o lahlile, a furalla

moloko o mo halefisitseng.

“ ‘Ha motho a wela fatshe,

na ha a ke a tsoha hape?

Ha motho a kgeloha tsela,

na ha a ke a kgutlela ho yona?

₅Ke ka baka lang

ha tjhaba see se kgelohile?

Keng ha baahi ba Jerusalema

ba kgeloha kamehla?

Ba kgomaretse leshano,

ba hana ho kgutla

mekgweng ya bona.

₆Ke ba utlwile,

ka ba sekehela tsebe,

empa ha ba bue letho

le nepahetseng.

Ha ho motho

ya bakelang bokgopo ba hae,

ya reng: “Ke entse eng?”

Motho ka mong

o inketse tsela ya hae,

jwaloka pere e itukubetsang ntweng.

₇Le mokotatsie o fofang hodimo,

o tseba nako tsa wona tsa ho falla;

leeba le lehaqasi le moholodi,

le tsona di tseba nako ya ho oroha,

empa molao wa Morena

tjhaba sa ka ha se o tsebe.

₈“ ‘Le ka bua jwang, la re:

“Re hlalefile,

hoba Molao wa Morena

re a o tseba?”

Bonang, Ditsebi tsa Molao

di o sokamisitse,

pene tsa tsona

di o fetotse leshano.

₉Bahlalefi, dihlong di ba hlabile,

ba tsielehile,

ba feletswe ke meelelo.

Lentswe la Morena ba le lahlile;

ebe jwale ba na le bohlale bofe?

₁₀Kahoo basadi ba bona

ke tla ba nea banna basele,

masimo a bona

ke a nee ba ba hlotseng;

ho tloha ho e monyenyane

ho isa ho e moholo,

bohle ba labalabela qhoqha,

baporofeta le baprista

ka ho tshwana,

kaofela ha bona

ba phela ka bolotsana.

₁₁Maqeba a tjhaba sa ka ba a a oka,

ba a oka jwalokaha eka

ba oka mengwapo.

“Kgotso! Kgotso!”

ba rialo ho batho,

le hoja ba tseba

hore kgotso eo ha e yo.

₁₂Na ba ke ba be dihlong

ha ba entse manyala?

Le ho ka!

Ho hang ho bona dihlong ha di yo!

Le ho pudufallwa ha ba pudufallwe;

kahoo ba tla wela

kahara ba weleng;

mohla ke ba otlang ba tla timela,

ho rialo Morena.

₁₃“ ‘Ruri ke tla ba timetsa,’

ho rialo Morena.

‘Morara ha o ka ke

wa ba le ditholwana,

fate sa feiye

se ke ke sa ba le ditholwana,

mahlaku a sona le wona a tla pona,

tseo ke ba fileng tsona

di tla ba phonyoha!’ ”

₁₄“Re sa duletseng?

A re kgobokaneng bohle!

A re tshabeleng metseng

e haheleditsweng,

lefu ha le fihla

le re fumane moo!

Morena Modimo o re abetse timelo,

o tla re nwesa metsi

a tletseng mahloko,

hobane rona re sitetswe Morena.

₁₅Re ne re lebeletse kgotso,

empa ha re a fumana molemo;

ra lebella nako ya ho fodiswa,

empa ra tlelwa ke ditsietsi.

₁₆Ho kgorohla ha pere tsa Sera

ha utlwahala,

ha utlwahala ho etswa Dane,

naha yohle ya thothomela

ha e utlwa ho tsetsela

ha pere tsa dishoqopa,

hoba di tlile ho tla timetsa naha,

ho timetsa le tsohle

tse leng ho yona:

Motse le baahi bohle ba wona.”

₁₇“Ke tla romela dinoha hara lona,

ke romele diqowane

tseo le ke keng la di upa,

mme di tla le loma,”

ho rialo Morena.

₁₈Maswabi a ka

nka a mamella jwang?

Pelo ya ka e nyahame, e tepeletse.

₁₉Utlwang sello sa tjhaba sa ka

se naheng e hole:

“Na Morena ha a sa le teng Sione?

Na Kgosi ya Sione

ha e sa le yo moo?”

Morena a re:

“Ba nkgalefiseditseng

ka medimo ya bona ya bohata,

le ka medimo ya mafeela,

medimo ya baditjhaba?”

₂₀Setjhaba sa re:

“Nako ya ho kotula e se fetile,

hlabula le lona le se le fedile,

empa rona ha re eso pholoswe.”

₂₁Jwalokaha tjhaba sa heso

se nyahame dipelo,

le nna pelo ya ka

e nyahame jwalo.

Ke kene kahara bofifi,

ke tshwerwe ke tshabo.

₂₂Na ebe Gileade

ha ho sa na meriana?

Na ebe ngaka le yona

ha e yo naheng eo?

Ke ka baka lang

tjhaba sa ka se sa phekolweng?

₁Hoja hlooho ya ka

ke sediba sa metsi,

mahlo a ka

ebe ke mohlodi wa dikeledi,

ke tle ke lle motsheare le bosiu,

ke llele tjhaba sa heso se bolailweng.

₂Hoja ke na le motlotlwane

hara lehwatata,

moo baeti ba ka robaletsang teng,

ke tle ke tlohe

hara tjhaba sena sa heso,

ke itsamaele ke ye hole le sona,

hoba kaofela ha sona ke difebe,

ke mokgopi wa batho ba bolotsana!

₃“Maleme a sona

a kobehile sa seqha,

leshano ke metsu

eo se fulang ka yona;

hase nnete

e se neang matla lefatsheng.

Bokgopo se bo etsa

ka ho bo hlahlamanya,

athe nna ha se ntsebe

le ho ntseba,”

ho rialo Morena.

₄“Motho ka mong

a hlokomele motswalle wa hae,

ngwaneno le yena

o se ke wa mo tshepa,

hoba ngwanabo motho ka mong

ke mokgohlisi,

motswalle ka mong

ke moetseletsi.

₅Motho ka mong

o thetsana le motswalle,

ha ho le ya mong ya buang nnete.

Batho ba tlwaeditse maleme a bona

ho bua leshano,

ba ipakela mokgathala

ka ho etsa sebe.

₆O phela hara batho

ba buang leshano,

shano la bona

le etsa hore ba se ntsebe,”

ho rialo Morena.

“Ke tla ba hlwekisa

ke be ke ba tsheke,

hoba tjhaba sa ka

nka se tlohela jwang?

₈Maleme a sona

a ka metsu e mahloko,

kamehla ha se bua, se bua leshano.

Ka molomo, motho o bua hamonate,

o bua ho motswalle,

ka pelong

o ntsa mo lokisetsa maraba.

₉Na ha ke a tshwanela

ho ba otlela ketso tsee?”

ho rialo Morena.

“Na ha ke a tshwanela

ho iphetetsa ka tjhaba se tjee?”

₁₀“Ke tla llela dithaba,

ke di hlomohele,

makgulo a lehwatata

ke a binele kodi-ya-malla,

ke a binele hobane a omeletse

hoo ho wona

ho seng le mofeta-ka-tsela.

Motho ha a ka ke a utlwa

kgomo e bohla,

nonyana tsa lehodimo di balehile,

phoofolo tsa naha

le tsona di itahlile!

₁₁“Ke tla fetola Jerusalema

e be masupi,

ke e fetole

e be selao sa diphokojwe,

metse ya Juda ke e fetole nanaola,

ho se be ya ka phelang ho yona.

₁₂“Monna ya bohlale,

ya ka utlwisisang tsee ke ofe?

Eo Morena a mo rutileng

ho di hlalosa ke mang?

Ke ka baka lang

ha naha e fetohile nanaola,

e omeletse sa lehwatata

le ke keng la tsamauwa?”

“A le ke le nahane se etsahalang!

Bitsang basadi

ba llang sa mmokotsane,

le bitse kgeleke

tsa kodi-ya-malla di tle.

₁₈Basadi bao ba potlake ba re llele,

keledi di keleketle

marameng a rona,

kgapha di phorosele

di etswa ntshing tsa rona.

₁₉Seboko se utlwahala

se etswa Sione:

‘Bonang kamoo

re timeditsweng kateng!

Dihlong tsa rona ke tse kaakang!

Re tlameha ho furalla naha ya rona,

matlo a rona a fetohile masupi.’ ”

₂₀“Lona basadi

utlwang lentswe la Morena,

polelo tsa hae le di sekehele tsebe.

Rutang baradi ba lona ho bokolla,

le rutane ho bina kodi-ya-malla:

₂₁Lefu le kene

ka difesetere tsa matlo,

la kena le ka matlung

a dikgosi tsa rona,

la hleka bana diterateng tsa motse,

la hleka le bahlankana

mabaleng a motse.

₂₂“Bolelang hore Morena o bua tjena:

Topo tsa banna di tla rapalla fatshe,

di ke kgapane

e qhalane hara masimo,

di ke ditlhaka

ha di helwa ke mokotudi,

di rapalle

ho se ya ka di phuthang!”

₂₃Morena o bua tjena:

“Mohlalefi a se ithorise

ka bohlale ba hae,

senatla se se ithorise

ka bonatla ba sona,

morui a se ithorise

ka maruo a hae;

₂₄empa ya ithorisang

a ithorise ka ho re,

yena o a nkutlwisisa,

o bile o a ntseba;

ke nna Morena

ya tsebang ho hauhela,

ya sebetsang ka toka

le ka ho loka lefatsheng,

hobane tsena ke tsona

tse nthabisang,”

ho rialo Morena.

“Se ithuteng mekgwa ya baditjhaba,

se tshosweng ke dipontsho,

pontsho tsa lehodimo,

le hoja baditjhaba

ba tshoswa ke tsona.

₃Meetlo ya baditjhaba ke ya lefeela,

baditjhaba ba rema sefate morung,

ebe sebetli ka selepe se a se betla.

₄Ba se kgabisa ka silefera

le ka kgauta,

ba se kgokgothele ka noto

le ka dipekere,

hore se se ke sa sisinyeha.

₅Medingwana ena e ka setshosa,

e ka setshosa se hlonngwe

tshimong ya mahapu,

empa ha e le ho bua hona

ha e ho tsebe;

eka kgona ba e jare,

hobane ha e tsebe ho tsamaya.

Lona le se e tshabe,

e ke ke ya le ntsha kotsi,

ho etsa molemo le hona

ha e ho tsebe.”

₆Ha ho ya tshwanang le wena Morena,

wena o moholo,

bitso la hao le leholo, le matla.

₇Ke mang ya ke keng a o tshaba,

wena Kgosi ya ditjhaba?

E hlile ho tshajwa,

wena ho a o lokela.

Hara banna bohle

ba bahlalefi ditjhabeng,

banna ba bahlalefi

ba mebusong ya bona,

ha ho le ya mong

ya tshwanang le wena.

₈Bohle ba hloka kelello,

ba thotofetse,

thuto tsa medimo ya lehong

ke tsa lefeela.

₉Silefera e bateletsweng

e tswa Tarashishe,

kgauta yona

ke e tswang kwana Ufase,

ke mosebetsi wa setei,

o entsweng ke lelala;

medingwana e apeswa tse putswa

le tse perese:

Tsohle di entswe

ke ditsebi tsa mesebetsi.

₁₀Empa Morena

ke Modimo wa nnete,

ke Modimo ya phelang,

Kgosi ya kamehla yohle.

Ha a halefile

fatshe lohle le a reketla,

tjhaba di sitwa

ho mamella kgalefo ya hae.

₁₂Ka matla a hae

Modimo o entse lefatshe,

ka bohlale ba hae

a le tsitsisa tulong tsa lona,

ka kelello ya hae a ala le mahodimo.

₁₃Ha a thwathwaretsa

metsi a lehodimo a a hwasa,

o nyolla maru pheletsong tsa lefatshe,

ha pula e ena o tsekemisa lehadima,

a bulele difefo,

di tswe moo di kwaletsweng.

₁₄Batho bohle ha ba na tsebo,

ba thotofetse,

malala a kgauta

a hlabiswa dihlong,

a hlabiswa dihlong

ke medingwana ya wona.

Medingwana ena ya wona

ke ya leshano,

medingwana ena ya wona

ha e phefumolohe.

₁₅Ke mafeelafeelane,

ke ntho tsa ho nyediswa,

ha tsatsi la kahlolo ya yona le fihla

e tla timela!

₁₆Modimo wa Jakobo yena

ha a tshwane le yona,

hobane ke yena Mmopi wa tsohle;

o kgethile Iseraele

hore e be tjhaba sa hae,

Morena wa mabotho

ke lona lebitso la hae.

₁₇Lona ba thibeletsweng

tlamang thoto ya lona,

le e tlame,

le be le tswe kahara naha ena.

₁₈Morena o bua tjena:

“Ke tla tjekeletsa

baahi ba naha ena, kantle ho yona,

ke ba sotle,

ke ba bakele mahlomola!”

₁₉Ke madimabe

hobane ke tswile kotsi!

Leqeba la ka ha le ka ke la fola!

Empa ka pelong ka ikgothatsa,

ka re: “Ena ke tsietsi ya ka,

ke tlameha ho e mamella.”

₂₀Tente ya ka e senyehile,

kgwele tsa yona tsohle

di kgaohile;

bana ba ka bohle ba ntshiile,

ha ho ya setseng

ho hloma tente ya ka,

kapa hona ho phutholla

masira a yona.

₂₁Badisa ba hloka kelello,

thuso ya Morena ha ba e batle,

kahoo ba ke ke ba fumana katleho,

mehlape ya bona yohle e qhalakane.

₂₂Mamela! Molaetsa ke ona o a tla!

Morusu o moholo

o hlaha naheng e ka leboya!

Metse ya Juda

e tla fetolwa nanaola,

e fetohe dilao tsa diphokojwe.

₂₃Morena, sena ke a se tseba,

motho ha a ikgethele tsela ya hae,

hase yena ya laolang mehato ya hae.

₂₄Oho, Morena,

ako nkgalemele ka toka,

o se ke wa nkgalemela o halefile,

esere wa mphetola lefeelafeelane.

₂₅Halefela tjhaba tsena

tse sa o tsebeng,

o halefele batho

ba sa ipiletseng ho wena.

Tjhaba tsena di metsitse Jakobo,

tsa mo metsa bokwiditane,

tsa mo timetsa,

metse ya hae tsa e fetola nanaola.

₁₅“Moratuwa o etsang

ka tempeleng ya ka,

ha e le moo

a rera merero ya bolotsana?

Ebe nama tsa mahlabelo

di ka o phemisa kotlo ya hao?

Ha o etsa bokgopo

eba jwale o a thaba!”

₁₆Morena o ile a o rea lebitso,

a re o fate sa mohlwaare

se setalana, se kgahlehang,

se behang tholwana di le monate.

Empa ka modumo,

modumo o thwathwaretsang,

o ila hotetsa mollo hodimo sona,

makala a sona a etjha, a re lore!

“A re timetseng sefate

le tholwana tsa sona;

a re mo tloseng lefatsheng,

fatsheng la ba phelang,

hore bitso la hae

le se hlole le sa hopolwa.”

₂₀Empa wena Morena wa mabotho,

wena ya ahlolang ka toka,

wena ya lekolang pelo le kelello,

a nke ke bone phetetso ya hao

hodima bona,

nna ke beile nyewe ya ka

kapele ho wena.

₁Wena Morena, o lokile kamehla,

ha ke bea nyewe ya ka

kapele ho wena, o lokile,

empa a nke ke bue le wena

ka toka ya hao:

Ke hobaneng ha ba kgopo

ba atleha mererong ya bona?

Ke hobaneng ha ba bolotsana

ba phela ka boiketlo?

₂O ba hlomile,

metso ya bona e tebile;

ba a mela, ba beha ditholwana.

Ba bua ka wena ka molomo feela,

empa pelo tsa bona tsona

di hole le wena!

₃Wena Morena, o ntseba hantle,

o a mpona,

o lekola menahano ya ka

mabapa le wena.

Ba hule sa nku e iswa tlhabong!

Wena o ba beele kathoko,

bakeng sa tsatsi la tlhabo

ba beele kathoko.

₄Naha ee e tla dula e omeletse,

e dule e omeletse ho fihlela neng,

dimela di pone ho fihlela neng?

Kahobane ba phelang naheng ena

ba kgopo,

diphoofolo le dinonyana di shwele.

Ho feta mona, batho ba re:

“Ha a na ho bona

seo re se etsang.”

₅“Ha o ila wa kgathala

o ipeisa le batho,

jwale dipere

o tla ipeisa jwang le tsona?

Haeba o ka kgoptjwa

naheng e bataletseng,

mahohoding a Jorodane

o ka tsamaya jwang?

₆Bang ka wena esita le bana beno,

bana le bona ba o ekile,

ba kene hara letshwele

ho o lwantsha,

o se ka ba tshepa,

leha ba o buisa hantle.”

₇“Ke furaletse ntlo ya ka,

ka siya lefa la ka,

moratuwa ka neelana ka yena,

matsohong a dira tsa hae.

₈Lefa la ka le tshwana le tau ya moru;

e a nthorela, kahoo ke e hloile.

₉Lefa la ka le tshwana le nonyana,

nonyana e kgwarahlana,

e ubellwang

ke nonyana tse ding kamahohle.

Tsamayang le yo phutha

batana tsohle tsa naha,

le di phuthe di tle moketeng.

₁₀Badisa ba bangata

ba sentse tshimo ya ka,

ba hataketse morara wa yona,

ba o hatakela ka maoto,

tshimo ya ka e ntle

ba e fetola lehwatata.

₁₁Ba e fetotse lehwatata le omeletseng,

le nkotlang pelo ha ke le bona.

Naha yohle e fetohile lehwatata,

hobane ha ho le ya mong

ya e tsotellang.

₁₂Maralla wohle a lehwatateng

a nyeunya basenyi,

hobane sabole ya Morena

e tla timetsa tsohle,

e timetse

dipheletso tsohle tsa lefatshe,

ha ho le ya mong

ya tla phela ka kgotso.

₁₃Ba jetse koro,

ba kotula hlabahlabane,

ba sebetsa ka thata,

ba sebeletse lelea,

kotulo ya bona

e ba hlabisitse dihlong,

ka baka la kgalefo ya Morena,

kgalefo e tlokomang.”