To The Word – Day 169

₂“O mang wena,

o fifatsang merero ya ka

ka ho pepeta, empa o se na tsebo?

₃Itlame letheka, o eme senna,

ke o botse dipotso,

wena o nkarabe.

₄“Ha ke rala metheo ya lefatshe

o no le kae?

Haeba o na le tsebo,

ako bolele he!

₅Kaha o tsebanyane:

Tekanyetso tsa lona

di rerilwe ke mang?

Thapo e methang bonamo

e harolotswe ke mang?

₆Tshiya tsa metheo ya lona

di epetswe kae?

Lejwe la mantlha lona

la bewa ke mang,

₇mohla bo-Mphatlalatsane

ba binang ba le mmoho,

mangeloi wohle a howa ka thabo?

₈“Mohla lewatle le phatlohang

mohloding wa lona,

menyako e ne tinketswe ke mang

ho le thibela?

₉Ha ke ne ke le etsetsa

kobo ya maru,

ke le tlama mokgubu

ka fifi la bo-nka-ntjana;

₁₀ha ke ne ke le sehela

meedi ya lona,

ke le tinkeletsa

ka mamati le mekwallo,

₁₁ka na ka re:

‘Maremelo a metsi a hao ke ana,

maqhubu a hao a bilohang

a tla fella mona!’

₁₂“Haesale o tswalwa

na o kila laolela meso dinako,

wa laela mafube ho hlaha

ka nako ya wona,

₁₃hore pheletso tsa lefatshe

a di aparele,

ba kgopo ba be ba phasaphase?

₁₄Jwalokaha mmopo wa tempe sa tiiso

o sala letsopeng,

sedi le bonahatsa

bopeho tsa lefatshe hantle,

le di bonahatse

sa mokgabiso seaparong.

₁₅Ba kgopo ba ke ke ba bona lesedi,

matla a bona a tla fediswa.

₁₆“Na mehloding ya lewatle

o kila fihla?

Kapa kgotjheletsane tsa madiba

wa di tsamaya?

₁₇Na menyako ya ntlo ya lefu

o kila e bona?

Kapa wa bona

menyako ya Nqalo ya Bafu?

₁₈Na bonamo ba lefatshe

o a bo tseba?

Haeba tsena tsohle o a di tseba,

ako bolele!

₁₉“Tsela e yang habo lesedi ke efe?

Lehae labo lefifi lona le hokae?

₂₀Na o ka di isa habo tsona?

Na tsela tse yang teng

o a di tseba?

₂₁O a di tseba,

hoba o tswetswe pele ho tsona!

Lemo tsa ho phela ha hao di ngata!

₂₂“Na o kila kena matlung

a polokelo ya lehlwa,

kapa wa bona matlo

a polokelo ya sefako,

₂₃tseo ke di boloketseng

nako ya ditsietsi,

tsatsi la ho futuha le la dintwa?

₂₄Tsela e yang ntswanatsatsi

yona e kae?

E yang habo moya wa botjhabela

yona e kae?

₂₅“Metsi a dikgohola

a tjheketswe molapo ke mang,

letolo le thwathwaretsang

la rallwa tsela ke mang,

₂₆hore pula e nele nahathothe,

lehwatateng leo

ho seng baahi ho lona,

₂₇bataolo le dikaka

di tle di nwesetswe,

mobung ho fupuhe jwang

bo botalana?

₂₈Ntata pula ekaba yena ke mang?

Marothodi a phoka wona

a tswetswe ke mang?

₂₉Ekaba leqhwa

le tswa ho ya mang popelo?

Rame sa lehodimo se lalang

sona se tswetswe ke mang?

₃₀Metsi a a hwama,

a be sengangata jwaloka lejwe,

leqhwa le aparele madiba kahohle.

₃₁“Na o ka tlamahanya

mahlaahlela a Selemela,

kapa wa lokolla

kgwele tsa Makolobe?

₃₂Na o ka hlahisa dinaledi

ka dinako tsa tsona,

wa tsamaisa Bere

le naletsana tsa yona?

₃₃Melao e tsamaisang tsa lehodimo

na o a e tseba?

Na le moo lefatsheng

o ka e sebedisa?

₃₄“Ka ntswe la hao,

na maru o ka a laela hore a o apese

ka pula ya ditlwebelele?

₃₅Na ke wena ya ka laelang lehadima

ho thwakgatsa?

Na le ye le tle ho wena,

le re: ‘Ke nna enwa?’

₃₆Pelo ya motho

bohlale e bo filwe ke mang?

Mohopolo wona

kutlwisiso wa e newa ke mang?

₃₇Mohlalefi ke ofe

ya tsebang ho bala maru,

ya ka thulamisang merifi,

merifi ya lehodimo,

₃₈ha role la lefatshe

le fetoha sengangata,

makwete a momana,

a etsa diqitikwe?

₃₉“Na o ka tsomela

tauhadi dinyamatsane,

kapa tawana tsa yona

wa di kgorisa ha di lapile,

₄₀di ntse di qatjhame

dilaong tsa tsona,

kapa di laletse kahara dihlahla?

₄₁Ke mang

ya baballang lekgwaba ka dijo,

ha madinyane a lona

a ipiletsa ho Modimo,

a lelera hohle ke ho hloka dijo?

₁“Na o tseba nako ya ho tswala

ha podi ya naha?

Na o kila bona kgama

ha e phatla, e tswala?

₂Na o ko bale kgwedi

tsa kemaro ya tsona?

Kapa o tsebe tsatsi

la ho tswala ha tsona?

₃Di botha fatshe,

di tswale manamane a tsona,

bohloko ba ho tswala

ebe bo fedile.

₄Manamane a tsona a holela naheng,

ha a sa shahlile

ebe a lahla mohlape.

₅“Tonki e hlaha

e neilwe bolokolohi ke mang?

Meja e ne e kgatile

e lokolotswe ke mang?

₆Ke e abetse lehwatata

hore e phele ho lona,

masabasaba a lenyekethe

e be bodulo ba yona.

₇Lehesheheshe la metse

e etsa metlae ka lona,

mehoo ya moqhobi

ha e fihle tsebeng tsa yona.

₈E alohela thabeng

ho ya tsoma lekgulo,

e nyakurele kahohle

ho batla ho hotalana.

₉“Na nare e ka thapa,

ya eba pelesa ya hao?

Kapa ya robala e bothile

pela sejelo sa hao?

₁₀Na o ka e pana mohomeng

hore e o lemele?

Makwete ya a phophotha

e o setse morao?

₁₁Na o ka e tshepa

ka baka la matla a yona?

Wa e tshepela ho phetha

mesebetsi ya hao e boima?

₁₂Na o ka e tshepela

ho pola mabele a hao,

le ho a thothela hae

ha a le otlong sa hao?

₁₃“Mapheo a dimpshe

a phuphusela ka thabo,

empa e ke ke ya fofa

jwaloka mokotatsie.

₁₄Mpshe e behela

mahe a yona mobung,

e a tlohelle teng

ho alangwa ke lehlabathe.

₁₅Ha e elellwe hore leoto

le ka a bjaratsa,

kapa sebatana

sa a hatakela hodimo.

₁₆E sotla madinyane a yona

jwalokaha eka hase a yona,

ha e tsotelle letho,

leha eba e tswaletse lelea,

₁₇hobane yona

Modimo o ila e tima bohlale,

a se ka e tsipela

le kelello ena e pala!

₁₈Empa ha e thathalatsa mapheo

ho matha,

e a keketeha

ha e bona pere le mopalami!

₁₉“Na pere matla e a filwe ke wena,

molala wa o kgabisa

ka moetse o maebeebe?

₂₀Na o ka tseba

ho e qotomisa sa tsie,

wa e kgorohlisa ka dinko

ho tshosa batho?

₂₁E tila fatshe ka kgohlong,

e thabetse matla,

e itukubetse kahara marumo

sa motswelantweng.

₂₂Pere e tsheha tshabo,

ha ho letho le e tshosang;

ha e ke e furalla

ke ho tshaba sabole.

₂₃Kgopong tsa yona

ho shohlomana kgohlopo,

ho bile ho tsekema marumo

le ditsenene!

₂₄E koma mobu ka bohale

le ka mabifi,

leha ho letswa lenaka

ho tila ha e ho kgaotse.

₂₅Ha naka le lla

e a howa, e re: ‘Aha!’

E dupa monko wa ntwa

e sa le hole!

E dupe mehoo ya balaodi

le mekgosi ya ntwa.

₂₆“Na ke ka bohlale ba hao

phakwe e tsebang ho fofa,

e thathalatsang mapheo,

ebe e leba borwa?

₂₇Na ke ka taelo ya hao

ntsu e tsebang ho fofa,

e hahang hlaha sa yona

hodimo tsullung?

₂₈E phela dilomong,

bosiu e lala hona teng,

qhobosheane ya yona e ka lefarung.

₂₉Diselo e di tsoma

e dutse hona moo,

mahlo a yona

a di bona di le hole.

₃₀Madinyane a yona

a phela ka ho nwa madi,

kamehla yona e fumanwa

hara dififi.”

₂“Na monyatsi a ka phea kgang

le Ya Matla wohle?

Ya nyatsang Modimo a ke a arabe!”

₄“Bona, ha ke letho!

Nka o araba jwang?

Ka tsoho la ka

ke thiba molomo wa ka.

₅Ke se nkile ka bua,

nke ke ka hlola ke araba;

ke ile ka bua habedi,

nke ke ka bua ho feta moo.”

₇“Itlame letheka, o eme senna,

ke o botse dipotso,

wena o nkarabe.

₈“Na kahlolo ya ka

o tla fela o e hanyetse,

ebe o mpea molato,

hore o itokafatse?

₉Na tsoho la hao

le tshwana le la Modimo,

hoo o ka kirietsang

ka ntswe le kang la hae?

₁₀Ikgabise he ka tlotla

le ka bokgosi,

o ikapese ka hlompho

le botlotlehi.

₁₁Filo la kgalefo ya hao

o hlo le hlatse,

ha o bona moikgohomosi

o mo kokobetse;

₁₂ha o bona moikgohomosi

o mo theole,

o tlabikelle ba kgopo

tulong tsa bona;

₁₃o ba epele leroleng ba le mmoho,

topo tsa bona

o di kwahelle ka lebitleng.

₁₄Jwale le nna

ke tla o thoholetsa, ke re:

‘Tsoho la hao le letona

le ka o pholosa!’

₁₅“Tadimisisa kubu hantle!

Ke e bopile jwalokaha ke o bopile,

empa yona e fula jwang

jwaloka kgomo.

₁₆Ako bone matla a letheka la yona!

Bona bothata ba ditshika

tsa mohodu wa yona!

₁₇E peralatsa mohatla wa yona,

e o peralatse jwaloka fate sa kedare,

ditshika tsa rope tsa yona

di teteane;

₁₈masapo a yona

a tshwana le pompo tsa lethose,

masapo a yona

a tshwana le ditshiya tsa tshepe.

₁₉Hara mmopo wa Modimo

ke thahadima,

e ka hlolwa feela

ke Mmopi wa yona.

₂₀Dijo tsa yona di theoha dithabeng,

moo phoofolo tsa naha

di bapallang teng.

₂₁E botha tlasa difate tsa leoka,

e ipata mokgwabong hara lehlaka.

₂₂Leoka le e etseditse moriti,

e etseditswe sakana-la-nkope,

la e etsetswa ke meduwane,

meduwane ya melatswana.

₂₃Ha e balehiswe

ke ho tlala ha noka,

ha e tshohe

leha Jorodane e ka phuthumana,

ya phuthumanela

ka hanong la yona.

₂₄E ka tshwarwa ke mang

e ntse e shebile,

Ya kenngwa kgwathatha ka nkong

ke mang?”

₁“Na ka selope

kganyapa o ka e tshwasa,

kapa ka kgwele

leleme la yona wa le tlama?

₂Na o ka e kenya kgwathatha

ka nkong?

Kapa mohlaare wa yona

wa o hlaba ka moutlwa?

₃Na e tla rapela

hore o e rekolohele,

kapa e bue ka bonolo,

e nne e o qekise?

₄Na e tla etsa tumellano le wena,

hore e be kgoba la hao

kamehla yohle?

₅O tla e bapadisa

sa ha o bapadisa nonyana,

kapa o e holehele

bananyana ba hao?

₆Na bahwebi ba heno

ba tla e tsekisana ka theko,

kapa ba e arolele bareki?

₇Na ka dikwebe

tlalo la yona o ka le phunya,

kapa ka tsenene

hlooho ya yona o ka e hlaba?

₈Ako e ame ka letsoho la hao!

Ntwa e tla ba ya kgumamela;

o ke ke be wa hlola o pheta hape!

₉“Tshepo ya ho e hlola

ke lefeelafeelane,

motho ha a e bona

pelo ya hae e a nyahama.

₁₀Ha ho na ya sebete se lekaneng

ho e qholotsa;

ebe jwale ke ofe

ya ka thulanang le nna, Modimo?

₁₁Ya ntsekisang molato ke ofe,

ke tsebe ho mo lefela?

Ditsohletsohle tlasa lehodimo

ke tsa ka.

₁₂“Ha nka ke ka tlohela

ho bua ka ditho tsa kganyapa,

ka matla a yona

le bopeho se kgahlehang sa yona.

₁₃Bokantle ba tlalo la yona

bo ka ebolwa ke mang?

Ya ka atamelang ke mang,

a e kenya tomo hanong?

₁₄Ya ka itetang sefuba

ho e ahlamisa mehlaare ke mang?

Meno a yona a dikwetsepe

a a tshabeha!

₁₅Mokokotlo wa yona

o kwahetswe ke makgekgebu,

makgekgebu a momahaneng

eka a manamisitswe ka boka;

₁₆a momahane haholo,

moya o ke ke wa tswa

pakeng tsa wona.

₁₇A kopantswe hathatathata,

a momahane hoo

a ke keng a arohanngwa.

₁₈Ha e thimola,

ka nkong tsa yona ho tswa lesedi;

mahlo a yona eka mahlasedi

ha mafube a hlaha.

₁₉Malakabe a tlola

ka molomong wa yona,

tlhase di betseha

seka motjhotjhonono.

₂₀Mosi o foqoha ka nkong tsa yona,

jwaloka mosi ha pitsa

e mollong wa ditlhaka e bela.

₂₁Moya wa yona

o butswela mashala a hlene,

malakabe a tlole

ka hanong la yona.

₂₂Molala wa kganyapa o shidikane,

ba e bonang

ba phakgasela ke tshabo.

₂₃Maphutha a tlalo la yona

a momahane, a sataletse,

a ke ke a sisinyeha.

₂₄Bothata ba pelo ya yona

ekare ba lejwe,

bothata ba yona

bo tshwana le ba lwala la moralla.

₂₅Ha e soballa

natla di a phakgasela,

di suthe kapele ho yona ke tshabo.

₂₆Kahodima yona ho kuba sabole,

ho kube lerumo, le motsu,

le yona tsenene!

₂₇Ho yona tshepe e tshwana

le setoroi feela,

lethose le tshwana

le patsi e bodile.

₂₈Ha e balehiswe ke metsu e betswa,

majwe a letjeketjane

a ka mmoko ho yona.

₂₉Ho yona koto e tshwana

le setoroi feela,

ho shohlomana ha marumo

ho a e keketehisa.

₃₀Mpa e makgekgebu

a thata sa mangetana,

e siya mohlala

jwaloka selei se hulwa seretseng.

₃₁E tsapodisa madiba

jwaloka pitsa e bela,

lewatle le bele

sa pitsa e phehile mafura.

₃₂Tseleng e siya mophula

wa metsi a benyang lekweba,

o ka re moriri o moputswa

o metse lewatleng.

₃₃Fatsheng lohle

kganyapa ke torobela,

ke bopuwa

se sa bopellwang le tshabo.

₃₄Tsohle tse mabela

e di shebela maotong,

ke kgosi ya batana tsohle

tse ikakasang.”

₂“Ke a tseba

hore tsohle o ka di etsa,

le hore ha ho morero

o ka o sitang.

₃O ila botsa, wa re:

‘Ya sitisang merero ya ka

a se na tsebo, ke mang?’

Ke kahoo ke reng:

‘Ke buile ka tseo

ke sa di utlwisiseng,

tse makatsang haholo

hoo ke sa di tsebeng.’

₄“Yaba o re: ‘Mamela jwale,

mme nna ke tla bua.

Ke tla o botsa dipotso,

wena o nkarabe.’

₅Ke utlwile feela

ha o ntso bolelwa,

empa jwale ke o bone

ka mahlo a ka.

₆Ka baka lena,

ke swabela polelo tsa ka,

ke ikwahlaya ke le leroleng,

ke le moloreng.”