To The Word – Day 168

₂“Lona bahlalefi

mamelang polelo tsa ka!

Lona bo-tsebanyane

theang tsebe le mmamele!

₃Tsebe e hlwaya mantswe

ha a buuwa,

jwalokaha dijo

di latsuwa ke mahalapa.

₄A re ikgetheleng

se lokileng ka borona,

a re tsebeng

ka borona se leng molemo.

₅“Jobo o re:

‘Nna ha ke na molato,

empa Modimo o nkamohile

tokelo ya ka.

₆Le hoja ke nepile tjena

ho thwe ke leshano,

le hoja ke se na sebe,

qeba la ka le hana ho fola.’

₇“Motho ke ofe ya tshwanang le Jobo?

O momorotsa nyefolo

jwalokaha metsi a nowa;

₈yena o tsamaya

mokgatlong wa baetsadibe,

ba kgopo

o tsamaisana tsela le bona;

₉o re: ‘Motho a ke ke

a putswa ka letho,

leha a leka ho kgahlisa Modimo.’

₁₀“Lona bahlalefi,

mmameleng ke hona:

Modimo a ke ke

a ba a etsa bokgopo,

Ya Matla wohle a ke ke

a ba a etsa phoso.

₁₁O putsa motho

ho ya ka mesebetsi ya hae,

o putsa motho

ho ya ka metsamao ya hae.

₁₂Ruri Modimo a ke ke

a ba a etsa bokgopo,

Ya Matla wohle a ke ke

a kgopamisa ho loka.

₁₃O beilwe ho okamela lefatshe

ke mang?

Fatshe lohle lona le theilwe

ke mang?

₁₄Haeba e ne le morero wa hae,

a busetsa moya wa bophelo ho yena,

₁₅tsohle tse phelang di ne di tla timela,

motho le yena, a kgutlele leroleng.

₁₆“Ha o le bohlale, ako mamele,

polelo tsa ka o di sekehele tsebe!

₁₇Na ya hloileng toka,

ho busa a ka ho tseba?

Kapa o ahlola Ya Matla,

Ya Lokileng?

₁₈Yena ya reng ho kgosi:

‘O motho-dikobo,’

ho mahosana:

‘Lona le balotsana!’

₁₉Ha a ye ka leeme

ha a sebeletsa babusi,

morui le mofutsana

ke ditshwantshwang ho yena,

kahoba bohle ke mmopo

wa matsoho a hae.

₂₀Ka ho panya ha ntshi

ba shwa le hara bosiu,

tjhaba se hlokolehe,

bona ebe ba iketse;

natla di nyamele

di sa angwa ke letsoho la motho!

₂₁“Mahlo a hae a disitse

metsamao ya batho,

mehato yohle ya batho

le yona o a e bona.

₂₂Ha ho na lefifi le letsholetsho,

moo baetsadibe

ba ka tsebang ho ipata.

₂₃Modimo ha a hloke

ho balla batho dinako

ho tla kahlolong, kapele ho yena.

₂₄O thuakanya bo-ramonatla

ho se na nyewe,

tulong tsa bona ebe o bea ba bang.

₂₅Ka baka leo,

mesebetsi ya bona o a e tseba,

ba phetholwa e le bosiu,

ebe ba a phetshelwa.

₂₆Modimo o ba otlela

bokgopo ba bona,

o ba otlela

pontsheng ya batho bohle,

₂₇hobane ba kgaoditse ho mo latela,

ha ba a ka ba natsa

tsela tsohle tsa hae.

₂₈Dillo tsa mafutsana

ba di fihlisitse ho yena,

dillo tsa bahlomohi

Modimo o a di utlwa.

₂₉“Haeba a ikgutsetsa

a ka nyatswa ke mang?

Ha ipata sefahleho,

teng a ka bonwa ke mang?

O okametse batho le ditjhaba

ka ho tshwana.

₃₀O thibela motho ya kgopo ho busa,

a mo thibele

ha a tjhehela setjhaba maraba.

₃₁“Haeba motho

a ka re ho Modimo:

‘Ke ipona molato,

nke ke ka sitwa hape;

₃₂ako nthute tseo ke sa di tsebeng,

haeba ke entse bokgopo

nke ke ka pheta hape;’

₃₃na o re Modimo

a ye ka thato ya hao,

athe wena o nyatsa diketso tsa hae?

Boikgethelo ke ba hao,

hase ba ka,

kahoo wena bolela

seo o se tsebang.

₃₄“Ba nang le kutlwisiso

ba tla bolela,

banna ba bohlale,

ba nkutlwang, ba re:

₃₅‘Jobo o ipuela feela a se na tsebo,

polelo tsa hae bohlale di a bo hloka.’

₃₆Jobo a nna lekwe ho-ya-ho-ile,

hobane o araba sa batho ba kgopo.

₃₇Dibe tsa hae

o di eketsa ka bofetohedi,

o etsa nyediso moo re mo utlwang,

ka polelo tse ngata

o nyedisa Modimo.”

₂“Na o bona ho nepahetse

ha o re:

‘Nna ke lokile ho feta Modimo?’

₃O re ho yena:

‘Molemo ke ofe oo ke tla o bona?

ke tla boellwa keng

ka ho se etse sebe?’

₄“Jwale nna polelo tsa hao

ke tla di araba,

le tsona tsa metswalle ya hao.

₅Lelalla mahodimong o ke o bone,

tadima maru a o phahametseng.

₆Ha o etsa sebe

Modimo o mo senyetsa eng?

Ha o ngatafatsa tshito tsa hao,

hoo hona ho mo etsetsa eng?

₇Haeba o lokile o mo nea eng?

Kapa o amohela eng

letsohong la hao?

₈Bokhopo ba hao

bo senyetsa ba jwaloka wena,

ho loka ha hao

ho thusa ba jwaloka wena.

₉“Batho ba lliswa

ke ho hatellwa haholo,

ba llela ho namolelwa

kgokeng tsa ramonatla.

₁₀Empa ha ho ya reng:

‘Modimo, Mmopi wa ka, o kae,

ya re kgothatsang ka difela bosiu,

₁₁ya re rutang

ho fetisa phoofolo tsa naha,

ya re hlalefisang

ho fetisa nonyana tse fofang?’

₁₂Leha ba ipiletsa,

yena ha a arabe,

ka baka la boikakaso

ba ba etsang bokgopo.

₁₃Ruri Modimo a ke ke

a mamela mafeela,

Ya Matla wohle

a ke ke a a natsa.

₁₄“A ka o mamela jwang,

o re ha o mmone;

o re nyewe ya hao

e kapele ho yena,

wena o so lebeletse yena feela?

₁₅O ithetsa ka ho re

kgalefo ya hae ke mosesetso,

esita le bokgopo

Modimo ha a bo natse.

₁₆Ka baka lena, Jobo o bua feela,

o pepeta haholo,

feela a se na tsebo.”

₂“Bea butle ho se hokae,

nke ke o bontshe:

Polelo tse emelang Modimo

di sa le teng.

₃Tsebo ke tla e fuputsa

hole le hohle,

ha ke buella ho loka

ha Mmopi wa ka.

₄Polelo tsa ka hase tsa bosawana;

ya buang le wena

ke monna wa mohlalefi.

₅“Modimo o matla,

empa ha a nyedise batho;

ha ho letho leo a sa le tsebeng.

₆A ke ke a tlohela

moetsadibe a phela,

empa mafutsana

o a sebeletsa ka toka.

₇Ba lokileng ha a kgaotse

ho ba hlokomela,

o ba bea le dikgosi

hodima diterone;

o ba bea teng,

a ba phahamise kamehla yohle.

₈Empa ha ba tlamilwe

ka mahlaahlela,

ba bofilwe

ka kgwele tsa tlokotsi,

₉o ba supisa mesebetsi ya bona,

dibe tse entsweng ka boikgantsho.

₁₀O etsa hore

ba mamele kgalemelo ya hae,

a ba laele hore

ba furalle bokgopo.

₁₁Ha ba mo mamela, ba mo sebeletsa,

ba tla qeta matsatsi a bona

ka boiketlo,

lemo tsa bona

ba di qete ba atlehile.

₁₂Empa ha ba ithiba ditsebe,

ba sa mamele,

lefu la bona e tla ba la sabole,

ba be ba shwe tsebo ba se na yona.

₁₃“Baetsadibe ba tletse kgalefo

dipelong tsa bona,

leha ba se ba tlamilwe

ha ba ke ba kopa thuso.

₁₄Ba shwa ba sa le batjha,

ba shwe ba phela le bo-ramaotwana.

₁₅Ba ditlokotsing

o ba pholosa ka ditlokotsi,

a thibolle tsebe tsa bona

ka matshwenyeho.

₁₆“Le wena

a ka ba o ntshitse ditsietsing,

a o isitse bakeng

se sa patisanang,

moo tafole ya hao

e tla tlala mapetle!

₁₇Kahlolo ya ba kgopo

e o wetse hodimo,

kahlolo le toka di se di o maname.

₁₈Hlokomela, esere maruo a o hohela,

o se ka dumela

ha tjotjo e o kgelosa.

₁₉Ha o llela thuso,

maruo a hao a ke ke

a o tswela molemo,

kapa matla a hao

a o ntsha tsietsing tsa hao.

₂₀Se labalabele

bosiu ba kahlolo ho fihla,

ha tjhaba di timela

dibakeng tsa tsona.

₂₁Hlokomela,

o se sekamele bokgopong,

boo o bo ratang ho feta tlokotsi.

₂₂“Modimo o phahametse bohle

ka matla a hae;

moruti ke ofe

ya tshwanang le yena?

₂₃Tsela ya hae

o e kgethetswe ke mang?

Ke ofe ya ka reng ho yena:

‘Mona jwale o fositse?’

₂₄Hopola ho tlotlisa

mesebetsi ya hae,

mesebetsi eo batho

ba e rokang ka difela.

₂₅Batho bohle ba bone mesebetsi eo,

ba e boha ba le hole le yona.

₂₆Modimo o moholo

ho feta kutlwisiso ya rona,

palo ya lemo tsa hae

ha re ka ke ra e fihlela.

₂₇“O monya marothodi a metsi,

ka mouwane wa ona

ebe o nesa pula.

₂₈Maru a pula

a tlhotlela diphororo fatshe,

mafafatsane e be ditlwebelele,

e be ditlwebelele ho batho.

₂₉Ya tsebang ho thiba ha maru

ke mang,

le ho thwathwaretsa

ha lehodimo la hae?

₃₀Hadima la hae

le takolotsa le lehodimo,

botebo ba lewatle

o a bo kguruma.

₃₁Ke ka tsona a ahlolang ditjhaba,

ke ka tsona a di fang nala.

₃₂O tshwere lehadima

ka matsoho a hae,

o laela hore le otle botsekeng.

₃₃Letolo ke selelekela

sa sefefo sa hae,

ho tla ha sona

le diphoofolo di a ho tseba.”

₁“Fefo sena se thefula methapo

ya pelo ya ka,

ere ha e thanya

e be tlohe madulong.

₂Mamedisa ho thwathwaretsa

ha ntswe la Modimo,

o mamele modumo

o tswang molomong wa hae.

₃O dumisa letolo

tlasa mahodimo wohle,

hadima la hae le yo fihla

pheletsong tsa lefatshe.

₄Lentswe le purumang

le latela lehadima,

Modimo o pokosela

ka ntswe la bohosi ba hae;

ha maru a thwathwaretsa

lehadima ha a le thibele.

₅Ho pokosela ha ntswe la Modimo

ho a makatsa;

o etsa dikgolo

tse fetang kutlwisiso ya rona.

₆Ho lehlwa o re:

‘Kgethehela lefatshe!’

Ho lefafatsane:

‘Fetoha ditlwebelele!’

₇Mosebetsi wa motho ka mong

o a o emisa,

batho bohle ba tsebe

mosebetsi wa hae.

₈Batana di hohobela

dilaong tsa tsona,

ebe ka mesimeng ya tsona

di a ipothela.

₉Mamati a tjhankana ya sefefo

a petlekilwe,

meya e pepetlang e tlisa serame.

₁₀Ha Modimo a phefumoloha

leqhwa le a bopeha,

kahohle metsi a fetohe qhoqhwaane.

₁₁Maru a matsho

a dusa pula ya motloporo,

ka maru ao,

Modimo lehadima o a le hasa.

₁₂Maru a ntsa phethesela

tseleng ya wona,

a aparetse lefatshe kahohlehohle,

a phetha taelo

tseo Modimo a di entseng.

₁₃Modimo a ka nesa pula

e le kotlo ho batho,

kapa a e nesa

hore fatshe le be mongobo,

kapa a e nesa

e le supo sa lerato la hae.

₁₄“Oho, wena Jobo,

ako mamele sena:

Kgutsa, o ko nahane

dimakatso tsa Modimo!

₁₅Na o tseba kamoo Modimo

a laolang maru kateng,

le kamoo a etsang

hore hadima la hae le tsekeme?

₁₆Na o tseba kamoo maru

a tsheheditsweng kateng,

le dimakatso tsa eo tsebo ya hae

e phethehileng?

₁₇Na o tseba hore aparo

di futhumatsa jwang

ha moya o hlaha borwa,

naha e jele boya?

₁₈Na o ka mo thusa

ho sarolla mahodimo,

mahodimo a bothata

ba seipone sa lethose?

₁₉“Re rute hore na

re tle re reng ho yena;

re sitwa ho rala nyewe

hobane re lefifing.

₂₀Na a ka bolellwa

hore ke rata ho bua le yena?

Haeba motho a ka bua,

ruri o tla timetswa!

₂₁“Ho jwalokaha moya o fefera maru,

tsatsi le sala mmanameng le kganya,

batho ba sitwa ho le tadima

ke ho ba fahla;

₂₂le hlaha ka leboya e ka kgauta,

tlotla ya Modimo

e re kenyetse tshabo.

₂₃Ya Matla wohle

re ke ke ra mo fihlela,

o re phahametse ka matla

le ka dikahlolo,

a ke ke be a sokamisa toka ya hae.

₂₄Ka baka leo,

batho bohle ba a mo tshaba,

bo-tsebanyane bohle ha a ba natse.”

₁Pelo ya kgosi

e ka atleng tsa Morena,

o e isa moo a ratang

sa metsi a molatswana.

₂Motho o bona tsela tsohle tsa hae,

o di bona di nepahetse,

empa Morena ke yena

ya lekolang pelo.

₃Ho etsa ho lokileng

le ho phetha toka

ho amoheleha ho Morena

ho feta sehlabelo.

₄Fahleho se hwapileng

le pelo e ikgohomosang,

e leng lebone la ba kgopo, ke sebe!

₅Merero ya ya mafolofolo

e mo tlisetsa nala,

lepotlapotla lona le ikisa bofumeng.

₆Tlotlo le fumanwang

ka ho bua leshano

ke mouwane o fetang

le leraba la lefu.

₇Dikgoka tsa ba kgopo

di tla ba timetsa,

hoba ba hana ho etsa ho lokileng.

₈Tsela ya ba molato

e matswedintsweke,

boitshwaro ba ba hlokang kodi

bo otlolohile.

₉Ho molemo

ho iphelela sekgutlwaneng,

kahodima marulelo a ntlo,

ho ena le ho phela

le mmadikomang,

ho phela le yena

ka tlung e le nngwe.

₁₀Motho ya kgopo o labalabela bobe,

ha a qenehele ya ahisaneng le yena.

₁₁Ha mosomi a otlwa,

ya se nang tsebo o a hlalefa;

ha ya bohlale a rutwa,

yena o fumana tsebo.

₁₂Modimo ya lokileng

o hlahloba lapa la ya kgopo,

o timetsa ya kgopo

ka baka la bokgopo ba hae.

₁₃Ya ithibang ditsebe

ha mofutsana a lla,

le yena o tla lla,

empa a ke ke a mamelwa.

₁₄Mpho ya lekunutu

e thethefatsa bohale,

tjotjo e kgwaetsweng ka kobong,

e kokobetsa kgalefo e tlokomang.

₁₅Ha ho sebetswa ka toka

ba lokileng ba a thaba,

athe ba kgopo

bona ba tlalwa ke tshabo.

₁₆Ya kgelohang tsela ya kutlwisiso

pheletso ya hae

ke ho phomola hara bafu.

₁₇Ya hlanyetsang menyaka

o tla fumaneha,

ya ratang veine le dimenyemenye

ha a ka ke a rua.

₁₈Ya kgopo o rekiswa

bakeng sa ya lokileng,

ya sa tshepahaleng

yena bakeng sa ya kgabane.

₁₉Ho molemo

ho iphelela hara lehwatata,

ho ena le ho phela

le nkwapo, mmadikomang.

₂₀Lapeng la ya bohlale

ho tletse menono, le maruo,

athe sethoto sona

se hafaka se sa qenehele.

₂₁Ya thahasellang ho loka le lerato

o tla fumana bophelo

le toka le tlotla.

₂₂Ya bohlale

o hlasela qhobosheane ya bahale,

a heletse marako ao ba a tshepileng.

₂₃Ya kwalang molomo,

a tshwara leme la hae,

o iphemisa

hore a se kene ditsietsing.

₂₄Moikgohomosi ya mabefi

o bitswa “mosomi”,

boikakaso ba hae ha bo na tekanyo.

₂₅Takatso ya sekgoba ke lefu ho sona,

se leqe ho sebetsa,

ho sebetsa ka matsoho a sona;

₂₆se qeta letsatsi se lakatsa,

se sa fumane,

empa ya lokileng

o fana a sa kganane.

₂₇Sehlabelo sa ya kgopo

se a nyonyeha,

haholo ha a se etsa

ka morero o mobe.

₂₈Paki ya leshano e tla timela,

polelo tsa ya qalang ka ho mamela

di a amoheleha.

₂₉Ya kgopo

o sosobanya sefahleho,

ya lokileng

o hlokomela metsamao ya hae.

₃₀Ha ho bohlale, kelello, kapa morero

o ka atlehang ha Morena a sa o rate.

₃₁Pere e kwetlisetswa tsatsi la ntwa,

empa tlholo yona ke ya Morena.