To The Word – Day 165

₂“Ho shwahla ha hao

ho tla kgaotsa neng?

Imamele pele, re ntano buisana!

₃O re tadimelang

jwaloka diphoofolo?

Mahlong a hao re le mahelehele?

₄Kgalefo ya hao e o entse maharola!

O re fatshe le furallwe

ka baka la hao?

Mafika a suthiswe tulong tsa wona?

₅“Bone la ya kgopo

ke lona le tla tingwa;

tlhase ya mollo wa hae

e ke ke be ya hotela.

₆Ka lapeng la hae sedi le tla fifala,

bone la hae lona le time.

₇Mehato ya hae e hwantang

e tla therekela,

a kudupanngwe fatshe

ke masene a hae.

₈Maoto a hae

a mo akgela ka letloweng,

o ntsa itsamaela hodima leraba;

₉sefi se tla kgata serethe sa hae,

letlowa le mo tshwase, le mo harele;

₁₀mobung ba mo patetse sekgoqetsane,

tseleng ya hae ba mo tjhehetse sefi.

₁₁Matshabeho a lefu

a mo tshosa kahohle,

hohle moo a yang teng a mo salame.

₁₂Tlala e fedisa matla a hae, a fokole,

hang ha a hloleha

koduwa e mo wela hodimo.

₁₃Bolwetse bo mo natholotsa letlalo,

ditho tsa hae

di jewa ke lefu le tshabehang.

₁₄Boiketlong ba lapa la hae

o a thakgolwa,

o kgothelwa pele

ho ya ho kgosi ya matshabeho;

₁₅lapeng la hae

ho tla nonotswa ka sebabole,

basele ba tle ba phele

ka ho lona.

₁₆Metso ya hae e omellela mobung,

kahodimo mahaba a hae

wona a be a pone.

₁₇Hohle lefatsheng o a lebalwa,

diterateng ha ho sa buuwa

ka lebitso la hae,

₁₈o lelekwa leseding, a iswe lefifing,

hohle lefatsheng ebe o a falatswa.

₁₉Tjhabeng sa habo ha a na ngwana,

leha e le setloholo,

lapeng la hae

ha ho a sala le thokolwana.

₂₀Meloko e mo hlahlamang

e tla tshoswa ke pheletso ya hae,

e boneng ka mahlo

yona e tshwarwe ke thothomelo.

₂₁Ona ke mokgwa wa ho fela

ha lapa la ya kgopo,

le jwalo lehae

la ya sa natseng Modimo.”

₂“Ebe le tla nlhokofatsa

halelele hakae,

le ntshithabetse ka dipolelo

ho fihlela neng?

₃Ke ka makgetlokgetlo

le nnyahanya,

le sa hlajwe ke dihlong ho nnyefola;

₄haeba ke nnete, ke entse phoso,

phoso eo ke ya ka,

ha e le ame ka letho.

₅Haeba le iphahamisetsa

kahodimo ho nna, le nqosa

ka baka la tlokotsi ena ya ka;

₆jwale tsebang: Modimo ke yena

ya nkentseng hampe,

o ntanteletse ka letlowa la hae.

₇Ha ke howa, ke re: ‘Bosoro!’

ha ke arabelwe!

Ke howa haholo,

empa toka ha e eo!

₈“O tinkeditse tsela, ke sitwa ho feta;

tselana tsa ka di aparetswe ke lefifi.

₉O nkamohile boitlhompho ba ka,

o nthodisitse le mofapahlooho,

₁₀o ntlepola kahohle,

mme ke a ikela,

tshepo ka ya

o e fothotse seka sefate.

₁₁Ke tlokomelwa ke kgalefo ya hae,

yena o ntadima ke le sera sa hae;

₁₂ke futuhetswe ke mabotho a hae,

a hlomme diahelo

ho potapota lapa la ka.

₁₃“Modimo o entse hore bana beso

ba nkwekwetle,

metswalle le yona

e mphuralle ho qeta.

₁₄Bahaeso le bona ba se ba ntahlile,

balekane ba ka ba se ba ntebetse.

₁₅Ho baeti le makgabunyane

a lapa la ka,

ke tadingwa ke le moeti,

ke le molata.

₁₆Ha ke bitsa mohlanka wa ka

ha a arabele,

esita leha ke ipiletsa ho yena.

₁₇Mohatsa ka

o nkgelwa ke moya wa ka,

bana beso le bona ba a nnyonya;

₁₈diratha le tsona di a nnyedisa,

ha ke hlaha eba di a ntlaka.

₁₉Ba ntshanang se inong le nna

ba a nnyonya,

ke furaletswe

le ke baratuwa ba ka.

₂₀Ke moote, ke manne,

o ka mpala dikgopo,

ke phonyohile feela

ka la mohaswa lesoba.

₂₁“Nkgauheleng! Nkgauheleng!

lona metswalle ya ka!

ke otlilwe ke Modimo

ka tsoho la hae!

₂₂Le ntlhorisetsang

jwalokaha Modimo a ntlhorisa?

Ha le kgotsofale

ha ke hlepholeha dinama?

₂₃“Polelo tsena tsa ka

eka di ka be di ngolwa,

eka di ka be di ngolwa,

di etswa buka,

₂₄di ngolwa ka pene ya tshepe

tlapeng la loto,

di ngolwa lefikeng,

di hlole kamehla yohle!

₂₅“Ke a tseba:

Mopholosi wa ka o a phela,

qetellong o tla ema a mpakele.

₂₆Leha tlalo la ka

le tla be se le bodile,

ka mahlo Modimo ke tla mmona

ke se mmeleng ona;

₂₇ke yena eo

ke tla fela ke mmone ka seqo,

ke mmone ka mahlo a ka

ke sa romeletsa.

Ka pelo ya ka yohle

ke labalabela hoo!

₂₈“Haeba le ka re:

‘Re sa tla mo hlorisa,

hobane sesosa sa taba

se ka pelong ya hae!’

₂₉Lona, ka bolona,

le hle le tshabe sabole,

hoba sebe sa kgalefo,

kotlo ya sona ke sabole,

le tle le tsebe

hore efela kahlolo e teng.”

₂“Ka baka la lehala

le ka pelong ya ka,

menahano ya ka e re ke o arabe.

₃Ke utlwa kgalemelo

e ntshwenyang maikutlo,

moya wa ka o nthuta

hore ke e arabe.

₄“Ha ke re o a tseba,

ho tloha boholoholo,

ho tloha ha lefatsheng mona

ho bewa motho:

₅Modidietsane wa ba kgopo

o sekgwahla, mokoka ha o yo,

thabo ya baetsadibe

ke ya motsotswana feela?

₆Leha boikgantsho ba hae

bo ka fihla mahodimong,

hlooho ya hae

ya ithwesa tlokola ya maru,

₇o tla timella ruri

jwaloka thete la hae,

ba mmoneng ba re:

‘Ekaba o nyametse kae?’

₈O tla fela sa toro,

a se hlole a fumanwa;

jwaloka pono ya bosiu a nyamele.

₉Leihlo le mo itseng hedi!

le ke se mmone hape;

le tulo tsa hae

di ke ke tsa hlola di sa mmona.

₁₀Bara ba hae

ba qekisa ho ratwa ke mafutsana,

ba buseletsa mafutsana qhoqha

ya ntata bona.

₁₁Bokwakwariri ba botjha

bo tletse masapo a hae,

ha a kgutlela leroleng

bo tla lala le yena teng.

₁₂“Le hoja bokgopo

bo mo natefela lehano,

a bile a bo pata tlasa leleme la hae;

₁₃a sa ikutlwe

ho ka kgaohana le bona,

a bo moma,

a bo boloka ka hanong la hae;

₁₄dijo tseo di a hlasa

ha di fihla ka mohodung,

di iphetole mahloko a bo-marabe.

₁₅Menono o a e metsa,

o bile o a e hlatsa,

Modimo o a mo hlatsisa,

o kgofa mohodu wa hae.

₁₆O tla mokonyetsa bohloko

ba bo-marabe,

dikwetsepe tsa qowane tsona

di mmolaye.

₁₇Dinoka a ke ke a hlola a sa di bona,

le phororo tse phallang

tsa dinotshi le tsa lebese.

₁₈Tsa matsoho a hae

o di busetsa a so di latswe,

tse tswalwang ke kgwebo

le tsona ha di mo thabise.

₁₉O tubile mafutsana,

a a siya a itlhophere,

a ikgapela matlo

e se a matsoho a hae.

₂₀“Ha a na ho fuwa tsweya

ke takatso tsa hae,

a ke ke a ipholosa

le ka maruo a hae.

₂₁Meharo ya hae ha e a siya le pala,

boiketlo ba hae ke ba nakwana;

₂₂o tla tsieleha

a ntsa hafa ka nkatana,

mafutsana a wele ka sekgahla,

a wele hodima hae.

₂₃Etlare hoja a kgotshe

sa mpana-phatloha,

kgalefo ya Modimo

e mo tlokomele malakabe,

thala la metsu

le mo lethehele hodimo.

₂₄Leha a ka ba a phonyoha

lerumo la tshepe,

seqha sa lethose sona se tla mo fula,

₂₅motsu wa sona

o yo phunyeletsa mokokotlo,

ntlha ya wona e phatsimang

e qhale nyooko,

matshabeho a lefu

a mo aparele kahohle.

₂₆Fifi la bo-nka-ntjana le mo laletse,

o tla timetswa ke mollo

o se na sebutswelo,

ba setseng lapeng la hae

ba tamukane.

₂₇Mahodimo a tla talola

bokgopo ba hae,

lefatshe le eme ka maoto

ho mo qosa.

₂₈Ntlo ya hae

e tla hoholwa ke sekgohola,

ke phororo tsa kgalefo ya Modimo

ha e tlokoma.

₂₉Ona ke wona moputso wa ya kgopo,

lefa leo a le abetsweng ke Modimo.”

₂“Ako mamele puo ya ka,

o e mamele ka hloko,

ho mmamela hoo

e be ho nketsetsa matshediso;

₃bea pelo,

le nna ke bolele tsa ka,

ha ke qetile

ebe jwale o a ntshoma.

₄“Na ebe ke ipelaetsa ho motho?

ho hloka mamello

ebe ha ke ho lokele?

₅Ntadimeng, le tswe le makala,

le thibe melomo ka matsoho a lona.

₆Tsena ha ke di hopola ke a nyaroha,

mmele wa ka wohle o a thothomela.

₇“Ke hobaneng

ha ba kgopo ba phela,

ba tsofala, ba bile ba matlafala?

₈Ba bona bana ba bona ba hola,

ba bile ba atleha,

le tloholo tsa bona ba be ba di bone.

₉Malapa a bona a na le kgotso,

a hloka tshabo,

kotlo ya Modimo

ha e eso ba wele hodimo.

₁₀Poho ya ya kgopo e a katika,

ha e ke e lala,

thole tsa hae di a tswala,

ha di ke di folotsa.

₁₁Bashanyana ba bona ha ba etswa

e ka re mohlape,

bana ba bona ba a tlola,

ba a thalaka.

₁₂Ba bina melodi

ka moropa le ka harepa,

ba thabela ho utlwa

modumo wa lekodilo.

₁₃Bophelo ba bona

ba bo qeta ba atlehile,

hanghang ba theohele

Nqalong ya Bafu.

₁₄Feela ba re ho Modimo:

‘Re hlokomolohe!

Ha re lakatse ho tseba

ditsela tsa hao!

₁₅Ya Matla wohle

re ka mo sebeletsa ha e le mang?

Ho mo rapela

ebe ho ka re putsa ka eng?’

₁₆Feela katleho ya bona

ha e laolwe ke bona;

nna ke thoko le dikeletso,

keletso tsa ba kgopo.

₁₇“Le tingwa hakae

lebone la ba kgopo?

Koduwa yona

e ba wela hodimo hakae,

ha Modimo a aba dikotlo a halefile?

₁₈Ke hakae ba kang dirite

ha moya o pepetla,

ba kang mmoko

ha sefefo se o fefera?

₁₉Modimo o isa kotlo tsa motho

baneng ba hae;

eka a ka be a otla yena mo-di-etsi,

a mo otle le yena a tla ikutlwele.

₂₀Kotlo eo e mo tlele a e shebile,

kgalefo ya Ya Matla wohle

a e habole;

₂₁hoba palo ya kgwedi tsa hae

ha e fedile,

boiketlo ba lapa la hae

ha a sa bo natsa.

₂₂Ke mang

ya ka rutang Modimo bohlale,

athe Modimo o ahlola

le ba lehodimo?

₂₃“E mong motho o shwa

e le sekwankwetla,

a kgotsofetse, a bile a iketlile;

₂₄mmele wa hae o shahlile, o fepehile,

moko o tiile ka masapong a hae;

₂₅e mong o shwa a hlorile moyeng,

le boiketlo a sa ka ba bo tseba;

₂₆ba robala ba bapile roleng la lebitla,

bobedi ba bona ba nyeunye diboko.

₂₇“Ke tseba ya lona mehopolo,

le mano ao le ntherelang wona

ke a a tseba.

₂₈Le ntse le re:

‘Lapa la sekwele jwale le kae?

Malapa a ba kgopo wona a kae?’

₂₉Ha le eso botse bo-mafeta-ka-tsela?

Polelo tsa bona ha le di natse,

ha ba re:

₃₀‘Ha koduwa e etla

ya kgopo o a pholoswa,

tsatsi la kgalefo

le lona o a le phemiswa?’

₃₁Ya ka mo nyatsang sefahlamahlo

ke mang?

Ketso tsa hae tsona

a ka di ahlolelwa ke mang?

₃₂Empa o a nkwa, a iswe lebitleng,

bitla la hae le lebelwe ka thata.

₃₃Qubu ya mobu e hodima hae

ha e mo imele,

batho bohle ba koloka kamora hae,

kapele ho yena

boiyane bo mo eteletse pele.

₃₄“Mafeela a lona

a ka ntshedisa jwang?

Karabo tsa lona

di tletse thetso!”

“Ke hlapanya ka nna,

ho rialo Morena,

mangwele wohle

a tla nkgumamela,

mme maleme wohle

a tla tlotlisa Modimo.”

“Dinyefolo tsa ba o nyefolang,

le nna di nkwetse hodimo.”

“Ka baka leo,

ke tla o boka hara baditjhaba,

ke roke lebitso la hao.”

“Nyakallang, lona baditjhaba,

mmoho le setjhaba sa hae.”

“Rorisang Morena,

lona baditjhaba bohle,

mo tlotliseng,

lona merabe yohle.”

“Ho tla tla setloholo sa Jese,

se tla bewa ho busa baditjhaba,

mme baditjhaba ba tla se tshepa.”

“Ba tla be ba bona

seo ba esong ho se bolellwe;

seo ba esong ho se utlwe

ba tla se utlwisisa.”