To The Word – Day 157

₁Ho molemo

ho itjella dikokotwana,

ho itjella tsona ka kgotso,

ho ena le ho phela tlung

e nang le kgora le diqabang.

₂Mohlanka ya masene

a ka busa mora,

a busa mora ya sethoto

wa monga hae,

a arolelwa lefa

jwaloka bana ba monga hae.

₃Silefera e hlwekiswa

ka ho qhibidiswa pitseng,

kgauta yona e hlwekiswa

ka sebopi sa yona;

athe dipelo tsona

di hlahlojwa ke Morena.

₄Ya etsang bokgopo

o mamela polelo tsa leshano,

ya leshano yena

o mamela tsa bokgopo.

₅Ya somang mafutsana

o soma Mmopi wa hae,

ya thabelang tsietsi tsa e mong

yena o tla otlwa.

₆Ditloholwana ke mofapahlooho,

mofapahlooho a boraputswe,

bana ba ithaba

ka batswadi ba bona.

₇Sethoto ha se lokelwe

ke puo tsa bokgeleke,

puo ya leshano ha e lokele kgosana.

₈Tjotjo ke hakwe la bohlokwa,

ke la bohlokwa ho mo-e-fani,

e mo atlehisa

ho tsohle tseo a di etsang.

₉Ya lalang diphoso ka mmele

o qeka ho ratwa,

athe ya di pepesang

yena o senya setswalle.

₁₀Ya bohlale

o phakisa ho amohela kgalemo,

thoto ha se shapuwa halekgolo

ha se mamele.

₁₁Motho ya kgopo

o thabela meferefere,

ya jwalo o romellwa leqosa,

leqosa le sehloho.

₁₂Ho molemo ho kopana

le bere e tshehadi,

bere e nketsweng madinyane a yona,

ho ena le ho kopana

le sethoto se poqang

bothotong ba sona.

₁₃Ya buseletsang botle ka bokgopo,

bokgopo bo ke ke ba tloha

lapeng la hae.

₁₄Qabang e qala jwaloka metsi

a faposwa mosele,

wena e kwekwetle e eso ka e kekela.

₁₅Ya lokollang ya kgopo

le ya ahlolang ya lokileng,

bobedi ba bona

ke manyala ho Morena.

₁₆Thuso ke efe,

ya ho nea sethoto tjhelete

athe ha se na kutlwisiso

ya ho reka bohlale?

₁₇Motswalle o na le lerato kamehla,

ngwanabo motho

o tswaletswe ho thusa,

ho thusa mohla tsatsi la ditsietsi.

₁₈Ya hlokang kelello

o itlama ka ditshepiso,

o itlama ho lefa

melato ya ba bang.

₁₉Ya ratang diphapang o rata sebe,

ya ikgohomosang o ipitsetsa timelo.

₂₀Motho ya pelo e kgopo

ha a atlehe;

ya leme le tletseng thetso

o tla timela.

₂₁Ya tswalang sethoto

o itswalla ditsietsi,

ntata sethoto o hloka thabo.

₂₂Pelo e thabileng

e tseba ho fodisa,

empa moya o hlorileng

o tepeletsa mmele.

₂₃Motho ya kgopo

o amohela tjotjo sephiring,

ka yona o kgopamisa ditsela tsa toka.

₂₄Bohlale bo mahlong a ya masene,

mahlo a sethoto wona

a thalatsa kahohle.

₂₅Mora ya sethoto

o tlisa masisapelo ho ntatae,

bohloko ba pelo ya mmae

bo baba seka leshokgwa.

₂₆Ke phoso ho ahlola motho

a se na molato,

kapa ho otlela mahosana

ho loka ha wona.

₂₇Ya nang le tsebo

o tswara leme la hae,

ya nang le kutlwisiso

ha a ke a halefa.

₂₈Sethoto ha se kgutsitse

ho thwe se hlalefile,

se na le kutlwisiso

ha se tshwara leme la sona.

₁Ya iketsang mokgelo

o ithata boyena,

tsohle tsa bohlale

o hanyetsana le tsona.

₂Sethoto ha se thabele

ho ba le kutlwisiso,

se thabela

ho pepesa mehopolo ya sona.

₃Bokgopo bo tsamaya le ho tella,

dihlong di tsamaya le ho nyatseha.

₄Dipolelo tsa motho di ka bodiba,

mohlodi wa bohlale

e ka diba se runyarunyang.

₅Ha ho molemo

ho bontsha leeme ho ba kgopo,

ebe o sitisa ya lokileng

ho ahlolelwa ka toka.

₆Leleme la sethoto

le baka diqabang,

polelo tsa sona

di se memela ho shapuwa.

₇Sethoto se timetswa

ke dipuo tsa sona,

se tshwaswa

ke leraba la polelo tsa sona.

₈Polelo tsa heletwane di a hlabosa,

di theohela hamonate

ka pelong ya motho.

₉Ya monyebe mosebetsing wa hae,

yena ke ngwanabo sesenyi.

₁₀Lebitso la Morena ke qhobosheane,

ya lokileng o tshabela teng,

a sireletsehe.

₁₁Matlotlo a barui

ke qhobosheane ya bona,

ba hloma e ka ke marako

a phahameng, a ba sireletsang.

₁₂Boikakaso bo etella timelo pele,

boikokobetso bona

bo tla pele ho tlotla.

₁₃Ya arabang a sa imamela hantle

ke sethoto, o hlabisa dihlong.

₁₄Ya kulang

o matlafatswa ke moya wa hae,

moya o hlomohileng

o ka phekolwa ke mang?

₁₅Ya nang le kutlwisiso

o fumana tsebo,

tsebe ya ya bohlale

e lethwethwe ho mo mamela.

₁₆Mpho e betlela mofani tsela,

e mmee kapele ho mahosi a hae.

₁₇Moqosi ha a bua ka kgotla

e ye e ke o bua nnete,

ho fihlela ha moqosuwa

a mo hloma dipotso.

₁₈Ha laola ka lotho

ho fedisa diqabang,

ho namole ba matla,

ba lwantshanang.

₁₉Ngwanabo motho ha a kgenne

o thata ho feta qhobosheane,

qhobosheane e matla,

diphapang tsona

e ka mekwallo ya qhobosheane.

₂₀Motho o kotula

seo a se jalang ka leme la hae,

o kgotsofatswa

ke polelo tsa molomo wa hae.

₂₁Leleme le ka phedisa,

hape le ka bolaya,

ba ratang ho hehla

ba tla kotula tholwana tsa hona.

₂₂Ya inyaletseng mosadi wa sebele

o lehlohonolo,

ya jwalo Morena o mo hauhetse.

₂₃Mofumanehi o kopa mohau

ka boikokobetso,

morui ha a araba

o moshashabetsa ka bohale.

₂₄Metswalle mmotwana

e isa motho timelong,

wa sebele yena o tshepahala

ho feta ngwanabo motho.

₁Ho molemo ho ba mofutsana

ya hlokang kodi,

ho ena le ho ba sethoto

se buang leshano.

₂Ho tjheseha motho a hloka tsebo

ha ho na thuso,

ho ba mahlahahlaha

ho lahlisa motho tsela.

₃Bothoto ba motho

bo timetsa bophelo ba hae,

ka pelong ya hae

a korotlele Morena.

₄Leruo le atisetsa motho metswalle,

athe mofutsana

o furallwa le ke metswalle.

₅Paki ya bohata e tla ahlolwa,

ya buang leshano

a ke ke a phonyoha.

₆Ba bangata ba qekisa

ho ratwa ke kgosi,

bohle ke metswalle

ya ya fanang dimpho.

₇Mofutsana o hlouwa le ke ba habo,

metswalle ya hae

yona e mo kgesa hakaakang!

Leha a re o ipiletsa ho bona,

ha ho moo a ba bonang teng.

₈Ya ipatlelang bohlale

o rata bophelo ba hae,

ya nang le kelello,

katleho ke ya hae.

₉Paki ya bohata e tla ahlolwa,

ya buang leshano o tla timela.

₁₀Sethoto ha se lokele

ho hafa ka nkatana,

jwalokaha lekgoba le sa lokele

ho busa mahosi.

₁₁Bohlale ba motho

bo tswala mamello,

ho iphapanyetsa diphoso

ke yona tlotla ya hae.

₁₂Kgalefo ya kgosi

e jwaloka tau ha e puruma,

mohau wa yona

o jwaloka phoka hodima jwang.

₁₃Mora ya sethoto

o tlisetsa ntatae koduwa,

komang tsa mosadi

di ka metsi a rothang, ho ya ho ile

ha pula e na.

₁₄Ntlo le maruo ke lefa

le fumanwang ho bo-ntata,

mosadi ya bohlale

ke mpho ya Morena.

₁₅Botswa bo isa motho

le sephume sa boroko,

sekgoba sona se bolawa ke tlala.

₁₆Ya bolokang ditaelo

o baballa bophelo ba hae,

ya sa hlokomeleng metsamao ya hae

o tla shwa.

₁₇Ya hauhelang bafumanehi

o adima Morena,

seo a faneng ka sona

Morena o tla mmuseletsa sona.

₁₈Laya ngwana wa hao

o sa na le tshepo,

o se thohothellwe ho mmolaya.

₁₉Motho ya halefang haholo

o tla otlwa,

ha o mo pholosa

o tla boela o pheta hape.

₂₀Sekehela keletso tsebe,

o mamele ditaelo,

e le hore qetellong

o tle o hlalefe.

₂₁Merero e mengata

ka pelong ya motho,

empa wa Morena

wona o hlola kamehla.

₂₂Meharo e hlabisa motho dihlong;

ho molemo ho futsaneha

ho ena le ho bua leshano.

₂₃Ho tshaba Morena ho a phedisa,

ya nang le tshabo eo

o tla phela ka boiketlo,

bobe bo ke ke ba mo wela hodimo.

₂₄Tsoho la ya botswa

le hanella ka sejaneng,

o tswafa le ho le isa

ka hanong la hae.

₂₅Shapa mosomi,

ya se nang tsebo a tle a hlalefe;

kgalema ya hlalefileng,

yena o tla fumana tsebo.

₂₆Ya shapang ntatae,

a phaladise mmae,

ke ngwana ya hlabisang dihlong,

ya tlontlollang.

₂₇Mora wa ka,

ha o ka kgaotsa ho mamela ditaelo

o tla kgeloha dithuto tsa bohlale.

₂₈Paki e kgopo e bapala ka toka,

ya kgopo bokgopo bo a mo natefela.

₂₉Basomi ba emetswe ke kahlolo,

mekokotlo ya dithoto

yona e emetswe ke phafa.

₂Ke ile ka lebella Morena

ka mamello;

a retelehela ho nna,

a mamela sello sa ka.

₃A nnyolla mokoting wa timelo,

tebetebeng ya seretse,

a nkemisa hodima lefika,

a tiisa mehato ya ka.

₄A etsa hore ke bine sefela se setjha,

se rorisang Modimo wa rona.

Ba bangata ha ba bona hona,

ba tla tshaba Morena, ba mo tshepe.

₅Ho lehlohonolo motho ya tshepang,

ya beileng tshepo ya hae ho Morena,

ya sa kgemeng le baikakasi,

le ba kgeloswang ke mashano.

₆Morena Modimo wa ka,

o re etseditse tse kgolo,

e leng mesebetsi ya hao

e makatsang,

le merero ya hao

e makatsang;

ha ho ya ka lekanngwang le wena.

Ha nka rata ho e bolela

le ho e phatlalatsa,

e mengata hoo e ke keng ya balwa.

₇Ha o kgahlwe ke sehlabelo

kapa nyehelo,

o thibolotse tsebe tsa ka.

Ha o batle setjheso kapa sehlabelo

e leng tse etswang ka baka la dibe.

₈Ke moo ke ileng ka re:

“Bona, ke a tla.

Ho ngotswe ka nna Bukeng ya

Molao:

₉Ke thabela ho etsa thato ya hao,

Modimo wa ka.

Molao wa hao o ka pelong ya ka.”

₁₀Ke boletse tsa ho loka ha hao,

ka di bolela phuthehong e kgolo;

wena Morena, o a tseba,

ha ke a ka ka kgutsa.

₁₁Ha ke a ka ka pata ho loka ha hao,

ka ho pata pelong ya ka,

ke boletse botshepehi ba hao,

ka bolela le yona thuso ya hao;

ha ke a ka ka pata,

ka patela phutheho e kgolo,

ka e patela mohau le nnete ya hao.

₁₂Morena, o se ke wa ntima

lerato la hao,

mohau wa hao le nnete ya hao

di nne di mpoloke ka mehla yohle.

₁₃Ke aparetswe ke ditlokotsi,

tlokotsi tse ke keng tsa balwa,

melato ya ka e ntshwere,

e ntshwere

hoo ke sitwang le ho sheba,

e mengata

ho feta qoba tsa moriri wa ka,

pelo ya ka e nyahame.

₁₄Ako kgahlwe ho nnamolela, Morena;

Morena, phakisa o nthuse.

₁₅Ba batlang ho timetsa bophelo ba ka

ba ke ba hlajwe ke dihlong,

ba ferekane kaofela.

Ba ntakaletsang bobe

ba ke ba tjhetjhe, ba tlontlolohe.

₁₆Ba ke ba swabe haholo

ka baka la ho tlontloloha ha bona,

bana ba reng ka nna: “Aha! Aha!”

₁₇Bohle ba o batlang

ba ke ba nyakalle,

ba o thabele.

Ba ratang ho pholoswa ke wena,

ba nne ba re: “Morena o moholo!”

₁₈Ha e le nna

ke mohlophehi le mofutsana,

empa Morena o a nkgopola.

Ke wena mothusi le molopolli wa ka;

Modimo wa ka, se diehe.

₂Ho lehlohonolo

ya hlokomelang mofutsana;

Morena o tla mo lopolla,

a mo lopolle mohla tsatsi la tlokotsi.

₃Morena o tla mo sireletsa,

a mo phedise hamonate lefatsheng;

a ke ke a tlohella dira tsa hae

ho etsa borata ka yena.

₄Morena o tla mo thusa

diphateng tsa lefu,

a nne a fetole diphate tsa hae,

a di fetole ha a ntse a kula.

₅Ha e le nna ke ile ka re:

“Morena, nkgauhele,

mphodise hobane ke o sitetswe.”

₆Dira tsa ka di tla mpua hampe, di re:

“O tla shwa neng,

lebitso la hae le tswe le fela?”

₇Ha motho a tlilo mpona,

o bua mafeela,

pelo ya hae e rwalla tse mpe,

tseo etlare hoba a tswe,

a tsamaye a di hasanya.

₈Bohle ba ntlhoileng

ba bokanela ho ntsheba,

ba ntherela bomadimabe.

₉Ba re: “O kenwe ke lefu le lebe,

o rapaletse, a ke ke a hlola a tsoha.”

₁₀Esita le motswalle

wa hlooho ya kgomo,

eo ke ntshanang se inong le yena,

o nthahile ka serethe.

₁₁Empa wena Morena,

ako nkgauhele, o ntsose,

ke tle ke ba buseletse.

₁₂Ka hona ke tla tseba

hore o kgahlwa ke nna,

ha sera sa ka

se se se sa ithorisetse nna.

₁₃O tla mpoloka ke se na kodi,

o mpee kapela hao kamehla.

₁₄Ho bokwe Morena,

Modimo wa Iseraele,

kamehla yohle,

e se nang qaleho le qetello.

Amen. Amen.