To The Word – Day 154

₂Ya kgopo o laolwa ke sebe,

sebe se botebong ba pelo ya hae;

ho tshaba Modimo

ha ho yo ho yena.

₃Mehopolong ya hae o a ithetsa

hoo a sa boneng sebe sa hae,

hoo a sa se hloyeng.

₄Mantswe a tswang

molomong wa hae,

ke mantswe a mabe, a thetsang;

o tlohetse bohlale leha e le botle.

₅O rera bokgopo

a ntse a le phateng tsa hae,

o tsamaya tseleng e sa lokang,

ha a kgese bobe.

₆Morena, mohau wa hao

o fihla mahodimong,

botshepehi ba hao

bo fihla marung,

₇ho loka ha hao

ho jwaloka thaba tse telele,

dikahlolo tsa hao di jwaloka bodiba,

bodiba bo tebileng:

Morena, o pholosa motho

le yona phoofolo.

₈Modimo, mohau wa hao

ke wa bohlokwa hakaakang!

Bana ba batho ba tshabela moriting,

moriting wa mapheo a hao.

₉Ba kgora manoni a ntlo ya hao;

o ba nwesa nokaneng

ya menate ya hao.

₁₀Sediba sa bophelo se ho wena,

mme ka sedi la hao re bona lesedi.

₁₁O nne o be mohau ho ba o tsebang,

o nne o sitse ba pelo di ntle

ka ho loka ha hao.

₁₂Moikgohomosi

a se bee leoto pela ka,

letsoho la ya kgopo le se nteleke.

₁₃Ba etsang bokgopo ke bao, ba wele!

Ba dihetswe fatshe,

ba ke ke ba hlola ba tsoha.

O se ke wa itlhonamisa

ka ba etsang bokgopo,

o se ke wa honohela

ba etsang tse sa lokang.

₂Ba tla omella kapele jwaloka jwang,

ba tla pona jwaloka ditlama,

ditlama tse talana.

₃Tshepa Morena, o etse botle,

o tle o iphelele lefatsheng ka kgotso.

₄Thabela Morena,

mme o tla o nea tse lakatswang

ke pelo ya hao.

₅Ipee matsohong a Morena;

o mo tshepe, ho tla sebetsa yena.

₆O tla etsa

hore ho loka ha hao ho kganye,

ho kganye jwaloka lesedi,

le ditokelo tsa hao

di kganye jwaloka letsatsi,

motsheare o moholo.

₇Kgoba matshwafo, o lebelle Morena;

o se ke wa itlhonamisa

ka eo tsohle di mo atlang,

e leng

ya phethang merero e kgopo.

₈Kgaotsa ho halefa, o tlohele bohale;

o se ke wa itlhonamisa,

esere wa etsa bobe.

₉Ba etsang bokgopo ba tla fediswa;

empa ba tshepang Morena

lefatshe e tla ba lefa la bona.

₁₀Ho se ho se hokae:

Ya kgopo o tla be a nyametse;

leha o tadima tulong tsa hae,

o tla be a le siyo.

₁₁Ba ikokobetsang,

lefatshe e tla ba lefa la bona,

ba thabele kgotso e phethehileng.

₁₂Ya kgopo o rera ya lokileng,

o mo tsikitlanyetsa meno;

₁₃empa Morena o tsheha ya kgopo,

hobane o bona hore

tsatsi la hae le a tla.

₁₄Ba kgopo

ba tsomula sabole tsa bona,

ba hula diqha tsa bona,

ho fula bahlophehi le mafutsana,

ho bolaya ba metsamao e metle.

₁₅Sabole tsa bona

di tla ba hlaba dipelo,

diqha tsa bona di tla robeha.

₁₆Sejosenyane sa ya lokileng

se molemo

ho ena le kgora ya ya kgopo;

₁₇hobane matla a ya kgopo

a tla fediswa,

athe Morena o tshehetsa ya lokileng.

₁₈Morena o tseba ditshiu

tsa ba hlokang kodi,

lefa la bona e tla ba le sa feleng.

₁₉Ba ke ke ba hlajwa ke dihlong

nakong tse mpe,

matsatsing a tlala ba tla kgora.

₂₀Empa ba kgopo ba tla timela;

bao e leng dira tsa Morena

ba tla fela jwaloka botle ba makgulo,

ba nyamele jwaloka mosi.

₂₁Ya kgopo o a adima,

empa ha a busetse;

ya lokileng o na le mohau, o a fana.

₂₂Bao Morena a ba hlohonolofaditseng

lefatshe e tla ba lefa la bona;

bao a ba rohakileng ba tla fediswa.

₂₃Morena ke yena

ya tiisang mehato ya batho,

mme o kgahlwa ke metsamao ya bona.

₂₄Leha ba ka wa, ha ba tjapallele ruri,

hobane Morena

o ba nenesa ka letsoho.

₂₅Nkile ka ba motjha,

kajeno ke tsofetse,

empa ha ke eso bone

ya lokileng a lahlilwe,

le ditloholo tsa hae di kopa bohobe.

₂₆Kamehla ya lokileng o mohau,

o a adimana,

mme ditloholo tsa hae

ke tlhohonolofatso.

₂₇Furalla bobe, o etse botle,

o tle o be le leaho kamehla.

₂₈Morena o rata ho loka,

mme a ke ke

a furalla batshepuwa ba hae.

Ba kgopo ba tla timella ruri,

ditloholo tsa bona di tla fediswa.

₂₉Ba lokileng

lefatshe e tla ba lefa la bona,

ba phele ho lona kamehla le mehla.

₃₀Molomo wa ya lokileng

o bolela tsa bohlale,

leleme la hae le bua tsa ho loka.

₃₁Molao wa Modimo wa hae

o ka pelong ya hae,

maoto a hae ha a thelle.

₃₂Ya kgopo o laletse ya lokileng,

o batla ho mmolaya.

₃₃Morena a ke ke

a mo tlohella matsohong a eo,

Morena a ke ke

a dumela hore a ahlolwe,

a fumanwe a le molato,

ha a qoswa.

₃₄Tshepa Morena,

o tiye tseleng ya hae;

o tla o phahamisa,

lefatshe e tle e be lefa la hao,

mme o bone ba kgopo ha ba fediswa.

₃₅Ke bone motho ya kgopo,

motho wa mohatelli,

a atleha sa fate sa leholela;

₃₆ka boela ka feta,

ka bona a se a le siyo;

ka mmatla,

a se ke a hlola a fumanwa.

₃₇Hlokomela ya phethehileng,

o tadime ya lokileng:

Motho wa kgotso

o tla ba le ditloholo;

₃₈empa baetsadibe

ba tla timetswa ho hang,

le ditloholo tsa ba kgopo

di tla fediswa.

₃₉Pholoho ya ba lokileng

e tswa ho Morena,

ke yena setshabelo sa bona

nakong ya tlokotsi.

₄₀Morena o a ba thusa, o a ba lopolla;

o tla nne a ba lopolle ho ba kgopo,

a ba pholose,

hobane ba tshabetse ho yena.

₂Oho, Morena,

o se ke wa nkotla o nkgalefetse,

o se ke wa nkgalemela o le bohale.

₃Metsu ya hao e ntlhabile,

letsoho la hao le nkotlile habohloko.

₄Ha ho moo ho seng bohloko

mmeleng wa ka,

ka baka la kgalefo ya hao;

ha ho bophelo masapong a ka,

ka baka la sebe sa ka.

₅Melato ya ka e mpupeditse hlooho,

e nkimela jwaloka mojaro o boima.

₆Maqeba a ka a a nkga,

a phephetha boladu,

ka baka la bothoto ba ka.

₇Ke kotlobane, ke a kgokgoba,

ke tsamaya tsatsi lohle ke hlomohile.

₈Letheka la ka le a futha,

ha ho moo ho seng bohloko

mmeleng wa ka.

₉Ke a fokola, ke robehile ditho,

ke dumaela ka baka la ho hlora

ha pelo ya ka.

₁₀Morena, o tseba tsohle

tseo ke di lakatsang,

ho fehelwa ha ka

ha ho a pateha ho wena.

₁₁Pelo ya ka e otla habohloko,

ke feletswe ke matla;

mahlo a ka a fifetse.

₁₂Metswalle le balekane ba ka

ba emeletse thoko le bohloko ba ka,

baheso ba emeletse hole le nna.

₁₃Ba batlang bophelo ba ka,

ba ntjhehile ka maraba,

ba ntakaletsang bomadimabe,

ba ntherela timelo,

tsatsi lohle ba ntohela mano.

₁₄Empa nna ke jwaloka tsebetutu,

ha ke utlwe;

ke jwaloka semumu,

ha ke bue.

₁₅Nna ke jwaloka motho

ya sa utlweng ditsebeng,

eo molomong wa hae

ho seng dikgang.

₁₆Morena, ke tshepile wena;

ke wena ya tla nkaraba,

Morena Modimo wa ka,

₁₇ha ke re:

“Ba se ke ba ithabisa ka nna,

ba ithorisa ha leoto la ka le thella.”

₁₈Ke lekgatheng la ho wa,

ke utlwa bohloko kamehla.

₁₉Ke bolela molato wa ka,

ke swabela sebe sa ka.

₂₀Ba itshemmeng bora ho nna

ba matla,

ba ntlhoileng ntle ho lebaka

ba ngatafetse,

₂₁e leng ba mpuseletsang

botle ka bobe,

ba nqosang hobane ke latela botle.

₂₂Morena, o se ke wa ntahla;

Modimo wa ka, se be hole le nna.

₂₃Phakisa o nthuse,

Morena, wena mopholosi wa ka.

₂Ke ile ka re:

“Ke tla hlokomela metsamao ya ka,

ke tle ke se ke ka etsa sebe

ka leleme la ka;

ke tla tshwara leleme la ka

ha ya kgopo a ntse a le pela ka.”

₃Ke ne ke kgutsitse jwaloka semumu,

ke thotse;

ka baka la katleho ya hae,

bohloko ba ka ba nna ba tota,

₄pelo ya ka ya tlallana,

ha ke ntse ke fehelwa

ka tuka malakabe,

ka ba ka bua, ka re:

₅“Morena, ako ntsebise

pheletso ya ka,

le bolelele ba matsatsi a ka;

a nke ke tsebe

hore na bophelo ba ka

bo feta kapele hakaakang!

₆Bona, matsatsi a ka o a lekantse,

o a lekantse ka bophara ba seatla,

bolelele ba bophelo ba ka

hase letho mahlong a hao.

Ruri motho ya phelang ke lefeela.

₇“Motho ya tsamayang

o ka seriti feela,

maruo ao a ipokellelang wona

ke lefeela;

ha a tsebe

hore na a tla sebediswa ke mang.”

₈Jwale, Morena,

ekaba ke sa lebeletseng?

Tshepo ya ka e ho wena.

₉Ntopolle ditlolong tsa ka tsohle,

se nketse sesomo ho dithoto.

₁₀Ke jwaloka semumu, ha ke na puo,

hobane ke wena ya sebetsang.

₁₁Mphemise dikotlo tsa hao,

letsoho la hao le nqetile.

₁₂O kgalemela motho ka ho mo otla,

ka ho mo otlela melato ya hae,

o fedisa seo a se ratang

jwalokaha eka se jewa ke tshwele.

Ruri motho ke lefeela.

₁₃Morena, ako utlwe thapelo ya ka,

o sekehele thapedi ya ka tsebe,

o se hane ho mamela sello sa ka.

Ke mojaki naheng ya hao,

ke mofeti jwaloka bo-ntate.

₁₄Se ntjamele, ke tle ke thabe,

ke eso ikele, mme ka ba siyo.

₁Ya arabang ka boikokobetso

o tima kgalefo,

empa polelo e kgahlapetsang

e baka bohale.

₂Leme la ya bohlale

le ratisa batho tsebo,

empa molomo wa sethoto

o kopotsa bothoto.

₃Mahlo a Modimo a bona kahohle,

a disa ba kgopo le ba lokileng.

₄Leme le thabisang

ke fate sa bophelo,

empa le thetsang

le senya pelo ya motho.

₅Sethoto se nyedisa

thuto ya ntata sona,

athe ya ratang kgalemo

yena o a hlalefa.

₆Ka tlung ya ya lokileng

leruo le teng,

empa ya kgopo

leruo le mmakela ditsietsi.

₇Molomo wa ya bohlale o jala tsebo,

pelo ya ya sethoto yona e mpe.

₈Mahlabelo a ya kgopo

ke manyala ho Morena,

empa thapelo ya ya lokileng

e a mo kgahla.

₉Ditsela tsa ya kgopo

ke manyala ho Morena,

ya labalabelang ho loka

yena o a mo rata.

₁₀Ya kgelohang tsela o tla otlwa haholo,

ya hloileng kgalemo yena o tla timela.

₁₁Morena o tseba

tse ka Nqalong ya Bafu,

le tse ka ho ya Timelo o a di tseba,

a ka sitwa keng ho tseba

makunutu a batho?

₁₂Mosomi yena o hloile kgalemo,

le ho ba bohlale

a ke ke a batla keletso.

₁₃Pelo ha e thabile

sefahleho se kganya kgotso,

empa ha e hlomohile

motho o utlwa bohloko.

₁₄Ya nang le kutlwisiso

o labalabela tsebo,

athe dithoto tsona

di labalabela bothoto.

₁₅Ya tshwenngwang

o phela habohloko ka nako tsohle,

ya thabileng

yena o keteka kamehla.

₁₆Sejosenyane se molemo

ha o tshaba Morena,

ho ena le maruo

a o bakelang ditsietsi.

₁₇Ho molemo ho ja moroho

o fanwang ka lerato,

ho ena le matshufu

a fanwang ka lehloyo.

₁₈Motho ya bohale o baka diqabang,

ya nang le mamello yena o a di fedisa.

₁₉Tsela ya sekgoba

e ririellane meutlwa,

athe ya ya lokileng

yona e bataletse hantle.

₂₀Ngwana ya bohlale o thabisa ntatae,

empa sethoto sona

se nyedisa le mma sona.

₂₁Ya hlokang bohlale

o thabiswa ke bothoto,

ya nang le kutlwisiso

yena o etsa ho lokileng.

₂₂Ya sa rateng dikeletso

merero ya hae e a nyopa,

ya eletswang ke ba bangata

yena o a atleha.

₂₃Karabo e nepahetseng

e thabisa monga yona,

e tlang ka nako ya yona

e molemo hakaakang!

₂₄Ho ya bohlale

tsela ya bophelo ke e yang hodimo,

ho mo phemisa

ho theohela lebitleng.

₂₅Morena o timetsa

lapa la moikgantshi,

empa o sireletsa

moedi wa lapa la mohlolohadi.

₂₆Mehopolo ya ya kgopo

ke manyala ho Morena,

polelo tsa ya lokileng

tsona di kgahlisa Morena.

₂₇Ya meharo

o tlisetsa lapa la hae tsietsi,

ya hloileng tjotjo yena o tla phela.

₂₈Ya lokileng o inahana a eso arabe,

molomong wa ya kgopo

bokgopo bo a kopotsa.

₂₉Morena o emeletse thoko,

thoko le ba kgopo,

thapelo ya ba lokileng

o e sekehela tsebe.

₃₀Ho tadima motho hantle

ho thabisa pelo ya hae,

taba tse molemo di mo tsosa molota.

₃₁Ya mamelang kgalemo

e isang bophelong,

o tla dula hamonate hara ba bohlale.

₃₂Ya sa natseng thuto o a inyedisa,

empa ya mamelang kgalemo

o ekeletswa kutlwisiso.

₃₃Ho tshaba Morena

ho ruta motho bohlale;

ikokobetse pele, mme o tla tlotlwa.

₁Pelo ya motho e rera merero,

tseo a di buang

di laolwa ke Morena.

₂Ketso tsa motho

di tadimeha di lokile ho yena,

empa Morena

o lekola sepheo sa hae.

₃Bea mesebetsi ya hao

atleng tsa Morena,

mme merero ya hao

e tla phethahala.

₄Tsohle Morena o di entse

ka morero wa hae,

le ya kgopo

tsatsi la ditlokotsi le mo emetse.

₅Motho ya ikgantshang,

Morena o a mo nyonya,

ya jwalo Morena o tla mo ahlola.

₆Sebe se hlakolwa

ke lerato le botshepehi;

ya tshabang Morena

bobe o tla bo phema.

₇Eo metsamao ya hae

e kgahlang Morena,

Morena o mo phedisa

ka kgotso le dira tsa hae.

₈Sejosenyane se molemo

ha se fumanwe ka toka,

ho ena le maruo

a fumanwang ka bolotsana.

₉Motho o itherela tsela ya hae,

empa ke Morena ya mo tataisang.

₁₀Diqeto tsa kgosi

di tswa ho Modimo,

ha e ahlola e ahlola ka toka.

₁₁Tekanyo tse nepahetseng

ke tsa Morena,

majwe a supang boima

a entswe ke yena.

₁₂Kgosi di nyatsa ketso tse manyala

ho loka hona ho tsitsisa mmuso.

₁₃Molomo o buang tse lokileng

o thabisa dikgosi,

dikgosi di rata motho ya buang nnete.

₁₄Kgalefo ya kgosi

e tshwana le ya tlisang pehi,

empa ya bohlale

o kokobetsa kgalefo.

₁₅Ho thaba ha kgosi ho a phedisa,

mohau wa yona

o ka leru la pula selemo.

₁₆Ho fumana bohlale

ho molemo ho feta kgauta,

ho fumana kutlwisiso

ho molemo ho feta silefera.

₁₇Tsela ya ba lokileng

e kgeloha bobe,

ya e hlokomelang

o baballa bophelo ba hae.

₁₈Boikakaso bo etella timelo pele,

boikgohomoso bo etelle ho wa, pele.

₁₉Ho molemo ho ikokobetsa

o le hara mafutsana,

ho ena le ho arolelana kgapo

le baikgohomosi.

₂₀Ya elang ditaelo hloko o a atleha,

ya tshepang Morena

o a hlohonolofala.

₂₁Ya bohlale

ho thwe o na le kutlwisiso,

polelo tse monate tsona

di a kgodisa,

₂₂Bohlale ke diba sa bophelo

ho ya nang le bona,

ho ruta dithoto

ke ho itshenyetsa nako.

₂₃Ya bohlale

o hlalefiswa ke pelo ya hae,

le seo a tla se bua

o se rutwa ke yona.

₂₄Polelo tse monate

di ka mahe a dinotshi,

moyeng di a hlabosa,

di matlafatse mmele.

₂₅Tsela e teng e bonahalang

e lokile ho monga yona,

empa e qetella ka ho isa lefung.

₂₆Sekgothadi se a itshebeletsa,

se itshebeletsa ka thata,

hobane se lakatsa ho ikgotsofatsa.

₂₇Senokwane se rera bobe,

molomong wa sona

ho tswa tse tjhesang sa malakabe.

₂₈Motho ya kgopo o duka kgotso,

mosebi yena o qabanya metswalle,

metswalle ya hlooho ya kgomo.

₂₉Motho ya dikgoka

o hohela ya ahisaneng le yena,

a mo tsamaise tseleng tse sa lokang.

₃₀Ya robang leihlo o rera bokgopo,

ya petlang melomo

bobe o sa bo entse.

₃₁Moriri o moputswa

ke mofapahlooho o kgabane,

o fumanwa

ke ya phelang ka ho loka.

₃₂Ya nang le mamello

o molemo ho feta ya dikgoka,

ya itshwarang ha a halefile

o feta ya hapang motse.

₃₃Batho ba laola ditaba ka lotho,

empa diqeto tsona ke tsa Morena.