To The Word – Day 141

₁Satane a tsohela Baiseraele matla, mme a hlohleletsa Davida hore a bale Baiseraele. ₂Davida a re ho Joabe le ho balaodi ba mabotho: “Tsamayang, le yo bala Baiseraele ho tloha Beeresheba, ho ya fihla Dane; le ntlisetse palo ya bona, ke tle ke e tsebe.”

₃Joabe a re: “Morena a ke a atise palo ya setjhaba sa hae halekgolo! Feela, monga ka, kgosi ya ka, ha ke re Baiseraele bohle ke bahlanka ba monga ka? Jwale ke ka lebaka lang ha monga ka a lakatsa ho etsa ntho ee? Ke ka lebaka lang ha monga ka a etsa Baiseraele ba tle ba sitwe?”

₄Leha ho le jwalo, yaba le se le dumme; Joabe a tsamaya le naha yohle ya Iseraele, mme qetellong a kgutlela Jerusalema.

₅Joabe a fihla a bolella kgosi Davida palo ya setjhaba. Baiseraele bohle, bao e neng e le matsholathebe, ba ne ba le mileone le dikete tse lekgolo. Ba morabe wa Juda ba ne ba le dikete tse makgolo a mane le mashome a supileng. ₆Empa Joabe o ne a sa ka a balella ba morabe wa Levi le ba morabe wa Benjamine, hobane o ne a hanyetsa taelo ya kgosi.

₇Ketso ena ya Davida ya se ke ya kgahla Modimo, mme ka baka leo, a otla Baiseraele.

₈Yaba Davida o re ho Modimo: “Ke entse sebe se seholo ka ho etsa ntho ena. Empa jwale ke a o rapela: Ako hlakole bokgopo bona ba mohlanka wa hao, hobane ke sebeditse ka bothoto bo boholo.”

₉Morena a bua ho Gade, senohe sa Davida, a re ho yena: ₁₀“Eya ho Davida, o fihle o re ho yena: ‘Morena o bua tjena: Dintho ke tsena tse tharo: Ikgethele e le nngwe ya tsona, eo ke tla o otla ka yona.’ ”

₁₁Yaba Gade o fihla ho Davida, o re ho yena: “Morena o bua tjena: ‘Ikgethele! ₁₂Ho be le sekoboto ka dilemo tse tharo; kapa ka nako ya kgwedi tse tharo o balehe dira tsa hao ha di ntse di o manakisa ka disabole; kapa, ho seng jwalo, ka matsatsi a mararo Morena a o futuhele ka sabole ya hae, e leng hore a dihele naha ee sewa, lengeloi la Morena le tsamaye hohle kahare ho naha ya Iseraele, le ntse le timetsa tsohle?’ Ka baka leo, inahanele karabo eo ke tla e isetsa ya nthomileng.”

₁₃Davida a re ho Gade: “Ke tlaletswe haholo! Ho ena le ho wela diatleng tsa motho, nka mpa ka wela diatleng tsa Morena, hobane mohau wa hae o moholo haholo.”

₁₄Jwale Morena a romela sewa naheng ya Iseraele, mme ha eshwa batho ba dikete tse mashome a supileng. ₁₅Modimo a romela lengeloi Jerusalema ho ya e timetsa, empa yare ha le ntse le e timetsa, Morena a bona, mme a hauha ha a nahana koduwa eo, a re ho lengeloi le neng le ntse le timetsa batho: “Ho lekane! Kgaotsa!” Lengeloi la Morena le ne le eme seotlong sa Orenane wa Mojebuse.

₁₆Ha Davida a re mahlo tloha! a bona lengeloi la Morena le eme sepakapakeng, le tshwere sabole, le e kokoseditse hodima Jerusalema. Bo-Davida le baholo ba setjhaba, ba neng ba apere diaparo tse mahwashe, ba obamela fatshe ka difahleho.

₁₇Davida a re ho Modimo: “Ha ke re ke nna ya laetseng hore ho balwe setjhaba? Ke nna ya entseng sebe; ruri ke nna ya entseng bokgopo. Jwale dinku tsee tsona di entseng? Oho, Morena Modimo wa ka, ke a o rapela: Mpe o otle nna le ba lelapa leso, o se ke wa otla setjhaba sa hao.”

₁₈Yaba lengeloi la Morena le laela Gade hore a bolelle Davida a nyolohe, a yo hahela Morena aletare seotlong sa Orenane wa Mojebuse. ₁₉Davida a nyoloha ho ya ka polelo eo Gade a ileng a e bolela ka lebitso la Morena.

₂₀Orenane o ne a ntse a pola koro. Ha a hetla, a bona lengeloi, empa bara ba hae ba bane bona ba ipata. ₂₁Ha Davida a ntse a atamela ho Orenane, Orenane a mmona, a tloha seotlong, a isa hlompho ho Davida ka ho obama.

₂₂Davida a re ho yena: “Nnee seotlo sena ke tle ke hahele Morena aletare ho sona, e le hore sewa se tle se kgaotse setjhabeng. O nthekisetse sona ka theko ya sona.”

₂₃Orenane a re ho Davida: “Se nke feela, monga ka, kgosi ya ka, o etse ka sona kamoo o ratang kateng. Ke bile ke o fa le dipholo tsena hore o etse nyehelo ya setjheso ka tsona; ke o fa le selei sena se polang hore o etse patsi ka sona, le koro hore o etse nyehelo ya dijo ka yona. Tsena tsohle ke o fa tsona.”

₂₄Empa kgosi Davida a re ho Orenane: “Tjhe, ke tla di reka ka theko ya tsona, hobane nke ke ka nka dintho tsa hao ke di nkela Morena, empa ke sa di reka; leha e le nyehelo ya setjheso nke ke ka e etsa ka tseo ke sa di rekang.”

₂₅Yaba Davida o reka seotlo seo ka ditjhelete tsa kgauta tse ka bang boima ba dikilo tse supileng. ₂₆Davida a hahela Morena aletare hona moo, a etsa nyehelo ya setjheso, le nyehelo ya teboho. A rapela Morena, mme Morena a mo arabela ka ho theola mollo o tswang lehodimong, a o theolela hodima aletare ya nyehelo ya setjheso.

₂₇Jwale Morena a laela lengeloi, mme la busetsa sabole ya lona selateng sa yona.

₂₈Ka yona nako eo, ha Davida a elellwa hore Morena o mo arabetse a le seotlong sa Orenane wa Mojebuse, yaba o se a ntse a etsetsa mahlabelo hona moo seotlong sa Orenane wa Mojebuse. ₂₉Leaho la Morena, leo Moshe a neng a le etse ha a le nahathothe, le aletare ya nyehelo ya setjheso, di ne di ntse di le sebakeng sa borapedi se Gibeone. ₃₀Empa Davida o ne a ke ke a ya teng ho ya botsa Morena, hobane o ne a tshaba sabole ya lengeloi la Morena.

₁Jwale Davida a re: “Ena ke yona ntlo ya Morena Modimo, mme ena ke aletare ya nyehelo ya setjheso, moo Baiseraele ba tla sebeletsa Morena teng.”

₂Davida a laela hore ho phuthwe baditjhaba ba neng ba le kahara naha ya Iseraele, mme a kgetha dibetli tsa majwe a tla haha Tempele ya Modimo. ₃A bokella le tshepe e ngata, e tla etsa dipekere tsa mamati a menyako, le tsa manonyeletso a wona, le lethose le lengata hoo le neng le ke ke la lekanngwa. ₄A fana le ka difate tsa kedare tse se nang palo, hobane Basidone le Batire ba ne ba ile ba mo tlisetsa difate tse ngata tse kedare.

₅Davida a re: “Solomone, mora wa ka, o sa le monyenyane, o a tetema, mme Tempele e lokelang ho hahelwa Morena e tshwanela ho ba ntle haholo, e tume, e tlotlwe ke dinaha tsohle. Ha ho le jwalo, ke tla qalella ho etsa ditokiso tsa hore e tle e hahwe.” Kahoo, yare Davida a eso ka a eshwa, a etsa ditokiso tse kgolo.

₆Jwale Davida a bitsa Solomone, mora wa hae, mme a mo laela ho hahela Morena Modimo wa Iseraele, Tempele. ₇Davida a re ho Solomone: “Mora ka, ke ne ke rerile ho hahela Morena Modimo wa ka, Tempele. ₈Empa polelo ya Morena e ile ya fihla ho nna, ya re: ‘O tsholotse madi a mangata, o lwanne dintwa tse kgolo. Ka baka lena, o ke ke wa nkgahela Tempele, hobane o tsholotse madi a mangata pontsheng ya ka. ₉Bona, o tla tswala mora, eo e tla ba motho wa kgotso. O tla phela ka kgotso le dira tsa hae tsohle, tse mo potapotileng. Lebitso la hae e tla ba Solomone, mme mehleng ya puso ya hae Baiseraele ba tla phela ka kgotso le ka kgutso. ₁₀Ke yena ya tla nkgahela Tempele. E tla ba mora wa ka, nna ke be ntatae, mme ke tla tsitsisa terone ya hae naheng ena ya Iseraele kamehla.’

₁₁“Jwale he, mora ka, Morena a ke a be le wena, a o atlehise, o tle o tsebe ho hahela Morena Modimo wa hao, Tempele, jwalokaha a itse o tla etsa. ₁₂Morena a ke a o fe bohlale le kutlwisiso, a etse hore o buse Baiseraele, o tle o tsebe ho boloka molao wa Morena Modimo wa hao. ₁₃Ha o ka ela hloko ho phethahatsa ditaelo le melao eo Morena a e laetseng Moshe malebana le Baiseraele, o tla atleha. Eba monna, o be sebete; o se ke wa tshaba leha e le ho tsieleha.

₁₄“Ke se ke ikgathaditse haholo, ke bokeletse kgauta e boima ba dithane tse ka bang dikete tse tharo le mashome a mane bakeng sa Tempele ya Morena, le silefera e boima ba dithane tse ka bang dikete tse mashome a mararo a metso e mene, le lethose, le tshepe, e leng dintho tse ke keng tsa lekanngwa ka baka la bongata ba tsona. Ke se ke bokeletse le difate le majwe. Dintho tsena o ka nna wa di eketsa. ₁₅Etswe o na le basebetsi ba bangata: ba thuang majwe, le ba a betlang, le ba betlang mapolanka, le mefuta yohle ya ditsebi tsa mesebetsi yohle. ₁₆Bongata ba kgauta, le silefera, le lethose, le tshepe, ke bo ke keng ba balwa. O eme ka maoto, o sebetse, mme Morena a ke a be le wena.”

₁₇Davida o ne a ile a laela mahosana wohle a Baiseraele hore a thuse mora wa hae, Solomone, mme a re ho wona: ₁₈“Ha ke re Morena Modimo wa lona, o na le lona? Ha ke re o le neile kgotso kahohle? O neelane ka baahi ba naha ena matsohong a ka, mme naha ena e buswa ke Morena le setjhaba sa hae. ₁₉Ka baka leo, ineeleng ho Morena Modimo wa lona, ka dipelo tsa lona, le ka meya ya lona. Emang ke hona, le hahe Sehalalelo sa Morena Modimo, e le hore areka ya selekane sa Morena, le dintho tse halalelang tsa Modimo, di tle di tliswe ka Tempeleng e tla hahelwa Morena.”

₁Ha Davida a se a hodile, e se e le mobu, a bea mora wa hae Solomone hore e be kgosi ya Baiseraele.

₂Davida a phutha mahosana wohle a Baiseraele, le baprista, le Balevi. ₃Ha balwa Balevi ho tloha ka ba dilemo tse mashome a mararo ho ya hodimo. Palo ya bona, ha ba balwa ka bomong, ya eba dikete tse mashome a mararo a metso e robedi. ₄Ba dikete tse mashome a mabedi a metso e mene ba bona ba bewa ho okamela mesebetsi ya Tempele ya Morena; ba dikete tse tsheletseng bona ya eba batsamaisi ba ditaba tsa naha ya Iseraele le baahlodi. ₅Ba dikete tse nne ya eba balebedi ba menyako, mme ba dikete tse nne hape ba rorisa Morena ka diletsa tseo Davida a neng a laele hore di etswe.

₆Davida a ba arola dihlopha tse tharo, ho ya ka bara ba Levi, e leng Gereshone, le Kohate, le Merari.

₇Bara ba Gereshone e ne e le Ladane le Shimei. ₈Bara ba Ladane ba ne ba le bararo: Letsibolo e ne e le Jehiele, a hlahlangwa ke Setame, le Joele. ₉Bara ba Shimei le bona ba ne ba le bararo, e le Shelomite, le Hasiele, le Harane. Bana e ne e le dihlooho tsa lelapa la Ladane. ₁₀Bara ba Shimei ba ne ba le bane, e le Jahate, le Sisa, le Jeushe, le Beriya. ₁₁Jahate e ne e le yena hlooho, a hlahlangwa ke Sisa. Jeushe le Beriya ha ba a ka ba eba le bana ba bangata; ka baka leo, ba balellwa mmoho ho phetha mosebetsi o le mong.

₁₂Bara ba Kohate ba ne ba le bane, e le Amorame, le Isihare, le Heborone, le Usiele. ₁₃Bara ba Amorame e ne e le Arone le Moshe. Bo-Arone le bara ba hae ba kgethelwa hore kamehla yohle ba hlokomele dintho tse halalelang haholo, ba tjhesetse Morena mokubetso, ba mo sebeletse, ba hlohonolofatse setjhaba ka lebitso la hae kamehla. ₁₄Bara ba Moshe, mohlanka wa Modimo, bona ba ile ba balellwa le ba morabe wa Levi. ₁₅Bara ba Moshe e ne e le Gereshome, le Eleesere. ₁₆Hlooho ya bara ba Gereshome e ne e le Shebuele; ₁₇ya bara ba Eleesere e le Rehabeya. Eleesere o ne a se na bara ba bang, empa bara ba Rehabeya ba ne ba le bangata haholo. ₁₈Hlooho ya bana ba Isihare e ne e le Shelomite. ₁₉Letsibolo la Heborone e ne e le Jeriya, mora wa bobedi e le Amariya, wa boraro e le Jahasiele, wa bone e le Jekameame. ₂₀Ho bara ba Usiele letsibolo e ne e le Mmika, wa bobedi e le Jeshia.

₂₁Bara ba Merari e ne e le Mahele le Mushi; ba Mahele e le Eleasare le Kishe. ₂₂Eleasare a shwa a se na bara, a ena le baradi feela. Bana babo bona, e leng bara ba Kishe, ba ba nyala. ₂₃Bara ba Mushi ba ne ba le bararo, e le Mahele, le Edere, le Jeremote.

₂₄Bana ke bara ba Levi, ho ya ka malapa a bo-ntata bona. E ne e le dihlooho tsa malapa a bo-ntata bona, mme ba ngotswe ka bomong bukeng ya mabitso. Ba ne ba sebeletsa ka Tempeleng ya Morena, ho tloha ha ba le dilemo tse mashome a mabedi ho ya hodimo. ₂₅Davida o ne a re: “Morena Modimo wa Iseraele, o phomoditse setjhaba sa hae, e le hore se tle se ahe Jerusalema kamehla.” ₂₆Ho tloha nakong eo, ha se ke ha hlola ho sa hlokahala hore Balevi ba jare Leaho le tsohle tseo ho neng ho sebeletswa ka tsona. ₂₇Ka taelo ya ho qetela ya Davida, ha balwa Balevi ba dilemo tse mashome a mabedi ho ya hodimo.

₂₈Mosebetsi wa bona e ne e le ho thusa ditloholo tsa Arone ha di sebeletsa ka Tempeleng ya Morena, le mabaleng a yona, le ka dikamoreng tsa yona, le ka ho hlwekisa dintho tsohle tse halalelang, le ka ho etsa mosebetsi ofe kapa ofe wa Tempele ya Morena. ₂₉Ba ne ba hlokomela le bohobe bo halalelang, ba hlokomela le phofo e thumisehileng ya nyehelo ya dijo, le dikuku tse sa lomoswang, le tsohle tsa dipane, le tse neng di hadikwa, le tsohle tse neng di sebediswa ha ho lekanngwa bongata kapa boholo ba ntho. ₃₀Hape mosebetsi wa bona e ne e le ho tsoha hoseng ba leboha Morena, mme ba mo rorisa, ba etsa jwalo le mantsiboya; ₃₁leha ho etsetswa Morena dinyehelo tsohle tsa setjheso ka matsatsi a Sabatha, le ka mekete ya ho thwasa ha kgwedi, le ka mekete e kgethehileng. Ba ne ba etsa jwalo kapele ho Morena, ho ya ka palo eo ba e beetsweng ka molao.

₃₂Ka tsela ena ba ne ba hlokomela Tente ya Morena, le Sehalalelo, mme ba thusa bara ba Arone, e leng bana babo bona, ho hlokomela ditshebeletso tsa Tempele ya Morena.

₁Dihlopha tsa bara ba Arone ke tsena: Bara ba Arone e ne e le Nadabe, le Abihu, le Eleasare, le Itamare. ₂Empa bo-Nadabe le Abihu ba ile ba shwa pele ho ntata bona, ba se na bara; kahoo Eleasare le Itamare ya eba bona baprista. ₃Davida a ba arola dihlopha, ho ya ka mosebetsi oo ba neng ba o abetswe. Ha a ba arola o ne a thusitswe ke Sadoke, setloholo sa Eleasare, le Ahimeleke, setloholo sa Itamare. ₄Bara ba Eleasare, bao e neng e le dihlooho, ba ne ba le bangata ho feta bara ba Itamare, mme ba arolwa jwalo. Hara bara ba Eleasare, bao e neng e le dihlooho tsa malapa abo bona, ba ne ba le leshome le metso e tsheletseng, mme hara bara ba Itamare bao e neng e le dihlooho tsa malapa abo bona ba ne ba le robedi. ₅Ha ho kgethwa baprista ba Sehalalelo le baprista ba Tempele ya Modimo hara ditloholo tsa Eleasare le Itamare, ba arolwa ka lotho, ho se leeme.

₆Mongodi ya bitswang Shemaya, mora wa Netanele, e leng e mong wa Balevi, a ngola mabitso a bona bukeng, moo kgosi, le mahosana, le moprista Sadoke, le Ahimeleke, mora wa Abiatare, le dihlooho tsa malapa a baprista le a Balevi, ba leng teng. Ho ne ho ye ho ngolwe lelapa le le leng la Eleasare, ho ngolwe le le leng la Itamare, jwalojwalo.

₇Lotho la pele la ntsha Jehoyaribe, la bobedi la ntsha Jedaya, ₈la boraro la ntsha Harime, la bone la ntsha Seorime, ₉la bohlano la ntsha Malakiya, la botshelela la ntsha Miamine, ₁₀la bosupa la ntsha Hakose, la borobedi la ntsha Abiya, ₁₁la borobong la ntsha Jeshua, la leshome la ntsha Shekaniya, ₁₂la leshome le motso o mong la ntsha Eleashibe, la leshome le metso e mmedi la ntsha Jakime, ₁₃la leshome le metso e meraro la ntsha Hupa, la leshome le metso e mene la ntsha Jeshebabe, ₁₄la leshome le metso e mehlano la ntsha Bilega, la leshome le metso e tsheletseng la ntsha Imere, ₁₅la leshome le metso e supileng la ntsha Hesire, la leshome le metso e robedi la ntsha Hapisese, ₁₆la leshome le metso e robong la ntsha Petahiya, la mashome a mabedi la ntsha Jehesekele, ₁₇la mashome a mabedi a motso o mong la ntsha Jakine, la mashome a mabedi a metso e mmedi la ntsha Gamule, ₁₈la mashome a mabedi a metso e meraro la ntsha Delaya, la mashome a mabedi a metso e mene la ntsha Maasiya.

₁₉Ba ne ba sebeletsa ka Tempeleng ya Morena ka tlhatlhamano yona ena, ho latela melao eo ba neng ba e laetswe ke Arone, moholoholo wa bona, jwalokaha Morena Modimo wa Iseraele, a ne a ile a mo laela.

₂₀Bara ba bang ba Levi e ne e le bana: Shubaele e ne e le e mong wa bara ba Amorame; Jehedeya e le e mong wa bara ba Shubaele. ₂₁Hara bara ba Rehabeya, Jishiya e ne e le letsibolo; ₂₂ho ba Isihare, e mong e ne e le Shelomote; hara bara ba Shelomote e mong e le Jahate. ₂₃Ho bara ba Heborone letsibolo e ne e le Jeriya, wa bobedi e le Amariya, wa boraro e le Jahasiele, wa bone e le Jekameame.

₂₄Ho bara ba Usiele e ne e le Mmika; ho bara ba Mmika e le Shamire. ₂₅Ngwanabo Mmika e ne e le Jishiya; ho bara ba Jishiya e le Sekariya.

₂₆Bara ba Merari e ne e le Mahele le Mushi; mora wa Jaasiya e le Beno.

₂₇Ditloholo tsa Merari tse tswetsweng ke Jaasiya e ne e le Beno, le Shohame, le Sakure, le Ibiri. ₂₈Mahele a tswala Eleasare ya sa kang a ba le bara.

₂₉Mora wa Kishe e ne e le Jerahemeele.

₃₀Bara ba Mushi e ne e le Mahele, le Edere, le Jerimote. Bana e ne e le bona Balevi ho ya ka malapa abo bona. ₃₁Jwalokaha bana babo bona, e leng ditloholo tsa Arone, ba ile ba etsa lotho, le bona ba le etsa moo Davida, le Sadoke, le Ahimeleke, le dihlooho tsa malapa a baprista le a Balevi, ba leng teng. Malapa a matsibolo le a dikgorula a ne a etswa ka ho tshwana.

₁Bo-Davida le balaodi ba mabotho ba kgetha ba bang ba bara ba Asafo, le ba Hemane, le ba Jedutune, hore ha diharepa, le dikatara, le matlheretlhere, di ba kenya moya, ba phatlalatse molaetsa wa Modimo. Lenane la banna ba neng ba sebetsa mosebetsi ona ke lena: ₂Hara bara ba Asafo e ne e le Sakure, le Josefa, le Netaniya, le Asarela. Ba ne ba okametswe ke Asafo, ya neng a phatlalatsa molaetsa ho ya ka taelo ya kgosi. ₃Hara bara ba Jedutune e ne e le Gedaleya, le Seri, le Jeshaya, le Shimei, le Hashabiya, le Matiteya. Ba ne ba tsheletse, mme ba okametswe ke ntata bona Jedutune, ya neng a letsa harepa ha a phatlalatsa molaetsa wa Modimo, a leboha Morena, a bile a mo rorisa. ₄Hara bara ba Hemane teng e ne e le Bukiya, le Mataneya, le Usiele, le Shebuele, le Jerimote, le Hananiya, le Hanani, le Eleata, le Gidaleti, le Romameti-Esere, le Joshebekasha, le Maloti, le Hotire, le Mahasiote. ₅Bana bohle e ne e le bara ba Hemane, senohe sa kgosi ditabeng tsa Modimo. Modimo a matlafatsa Hemane ka ho mo fa bara ba leshome le metso e mene, le baradi ba bararo.

₆Batho bana bohle ba ne ba okametswe ke ntata bona, ba bina ka Tempeleng ya Morena; ba letsa matlheretlhere, le dikatara, le diharepa, nakong ya ditshebeletso ka Tempeleng ya Modimo, ho latela taelo ya kgosi ho bo-Asafo, le Jedutune, le Hemane. ₇Bana bohle, hammoho le bang ka bona, ba ne ba rutilwe, mme ba tseba ho binela Morena. Ba ne ba le makgolo a mabedi, le mashome a robedi a metso e robedi. ₈Batjha le maqheku, baruti le barutuwa, ba abelwa mosebetsi ka lotho, ka ho tshwana.

₉Lotho la pele, e leng la lelapa la Asafo, la ntsha Josefa. La bobedi la ntsha Gedaleya, le bana babo, le bara ba hae, mme kaofela ba eba leshome le metso e mmedi. ₁₀La boraro la ntsha Sakure, le bara ba hae, le bana babo, mme kaofela ba eba leshome le metso e mmedi. ₁₁La bone la ntsha Isiri, le bara ba hae, le bana babo, mme kaofela ba eba leshome le metso e mmedi. ₁₂La bohlano la ntsha Netaniya le bara ba hae, le bana babo, mme kaofela ba eba leshome le metso e mmedi. ₁₃La botshelela la ntsha Bukiya, le bara ba hae, le bana babo, mme kaofela ba eba leshome le metso e mmedi. ₁₄La bosupa la ntsha Jesharela, le bara ba hae, le bana babo, mme kaofela ba eba leshome le metso e mmedi. ₁₅La borobedi la ntsha Jeshaya, le bara ba hae, le bana babo, mme kaofela ba eba leshome le metso e mmedi. ₁₆La borobong la ntsha Mataneya, le bara ba hae, le bana babo, mme kaofela ba eba leshome le metso e mmedi. ₁₇La leshome la ntsha Shimei, le bara ba hae, le bana babo, mme kaofela ba eba leshome le metso e mmedi. ₁₈La leshome le motso o mong la ntsha Asariele, le bara ba hae, le bana babo, mme kaofela ba eba leshome le metso e mmedi. ₁₉La leshome le metso e mmedi la ntsha Mashabiya, le bara ba hae, le bana babo, mme kaofela ba eba leshome le metso e mmedi. ₂₀La leshome le metso e meraro la ntsha Shubaele, le bara ba hae, le bana babo, mme kaofela ba eba leshome le metso e mmedi. ₂₁La leshome le metso e mene la ntsha Matiteya, le bara ba hae, le bana babo, mme kaofela ba eba leshome le metso e mmedi. ₂₂La leshome le metso e mehlano la ntsha Jerimote, le bara ba hae, le bana babo, mme kaofela ba eba leshome le metso e mmedi. ₂₃La leshome le metso e tsheletseng la ntsha Hananiya, le bara ba hae, le bana babo, mme kaofela ba eba leshome le metso e mmedi. ₂₄La leshome le metso e supileng la ntsha Joshebekasha, le bara ba hae, le bana babo, mme kaofela ba eba leshome le metso e mmedi. ₂₅La leshome le metso e robedi la ntsha Hanani, le bara ba hae, le bana babo, mme kaofela ba eba leshome le metso e mmedi. ₂₆La leshome le metso e robong la ntsha Maloti, le bara ba hae, le bana babo, mme kaofela ba eba leshome le metso e mmedi. ₂₇La mashome a mabedi la ntsha Eleata, le bara ba hae, le bana babo, mme kaofela ba eba leshome le metso e mmedi. ₂₈La mashome a mabedi a motso o mong la ntsha Hotire, le bara ba hae, le bana babo, mme kaofela ba eba leshome le metso e mmedi. ₂₉La mashome a mabedi a metso e mmedi la ntsha Gidaleti, le bara ba hae, le bana babo, mme kaofela ba eba leshome le metso e mmedi. ₃₀La mashome a mabedi a metso e meraro la ntsha Mahasiote, le bara ba hae, le bana babo, mme kaofela ba eba leshome le metso e mmedi. ₃₁La mashome a mabedi a metso e mene la ntsha Romameti-Esere, le bara ba hae, le bana babo, mme kaofela ba eba leshome le metso e mmedi.

₁Pesalema ya Solomone. Sefela sa ho nyolohela Jerusalema.