To The Word – Day 132

₂“Tsohle tse lefatsheng

ke tla di fedisa,”

ho rialo Morena.

₃“Ke tla timetsa batho,

ke timetse diphoofolo,

ke timetse nonyana

tse fofang sepakapakeng,

ditlhapi tsa lewatle

le tsona ke di timetse.

Ke tla fedisa dikgopiso

mmoho le ba kgopo,

batho bohle lefatsheng

le bona ke ba timetse,”

ho rialo Morena.

₄“Ke tla otlolla tsoho la ka,

ke le otlollele hodima Juda,

ke le otlollele le hodima Jerusalema.

Masalla wohle a Baale ke tla a fedisa,

ke a fedise sebakeng sena,

le baprista ba bohata ke ba fedise;

₅bona ba obamang

ba le hodima matlo,

bona ba obamang,

ba kgumamela dinaledi,

ba kgumamela kgwedi,

ba kgumamela letsatsi,

bona ba obamang,

ba hlapanye ka bitso la Morena,

empa ba ntse ba hlapanya

le ka Milekome.

₆Batho bana

ke ba furaletseng Morena,

ba mo furalla, ba se ke ba mmatla,

leha e le hona ho ipiletsa ho yena.

₇Kgutsang ha le le kapele ho Morena,

kapele ho Morena Modimo,

hobane tsatsi la Morena le atametse.

Morena o sa lokisitse sehlabelo,

le bamemuwa ba hae

o sa ba kgethile.

₈Mohla Morena a etsang sehlabelo,

ke tla otla mahosana

le bara ba kgosi,

le bohle ba apereng meaparo esele.

₉Mohla tsatsi leo ke tla otla,

ke otle ba sa hateng

kosene ya monyako,

ke otle ba tlatsang

ntlo ya mong bona,

ba e tlatse

ka tse hapilweng ka dikgoka,

ba e tlatse

ka tse hapilweng ka bolotsana.

₁₀“Mohla tsatsi leo,”

ho rialo Morena,

“mokgosi o tla utlwahala

Monyakong wa Ditlhapi,

seboko se utlwahale

se etswa motsemotjha,

le modumo o moholo

o utlwahale maralleng.

₁₁Bokollang, lona ba ahileng

tlase ho motse,

hoba bahwebi bohle ba lona

ba tla fediswa,

bohle ba ananyang ka silefera

ba timetswe.

₁₂Ka nako eo

Jerusalema ke tla e lekola,

ke e lekole

ke e kgantshitse ka mabone;

ke otle bohle ba dutseng ba iketlile,

ba kang maritsa a veine a qitile,

ba duletseng ho bua ka pelo, ba re:

‘Morena a ke ke be a etsa letho,

a ke ke be a etsa botle

leha e le bobe.’

₁₃Matlotlo a bona a tla lobelwa,

matlo a bona a heletswe,

e be masupi.

Matlo a bona wona ba tla a haha,

empa ha ba ka ke ba dula ho wona;

morara le wona ba tla o hloma,

empa veine ya wona

ha ba ka ke ba e nwa.”

₁₄“Tsatsi le leholo la Morena

le atametse, le tla le potlakile,

Utlwang, tsatsi la Morena ke leo!

Mohlabani o tla howa a se na tshepo.

₁₅Tsatsi leo ke tsatsi la kgalefo,

ke tsatsi la tlokotsi le la mahlomola,

ke tsatsi la timelo le la tshenyeho,

ke tsatsi la lefifi la bo-nka-ntjana,

tsatsi le phetheselang maru,

maru a matshomatsho!

₁₆Ke tsatsi la lenaka ho houtsa,

ke tsatsi la mokgosi wa ntwa,

ke tsatsi la ho futuhela metse,

la ho futuhela marako,

marako a tshireletso!

₁₇Ke tla bakela batho mahlomola,

tsela ba e phopholetse sa difofu,

hoba ba entse sebe,

ba sitetswe Morena.

Madi a bona

a tla tsholoha sa lehlabathe,

mala a bona

a petletsehe sa bolokwe.

₁₈Mohla tsatsi leo

la kgalefo ya Morena,

silefera ya bona,

esita le yona kgauta,

tsena ha di ka ke

tsa tseba ho ba pholosa.

Kgalefo ya Morena

e tukang malakabe,

e tla tlokoma, e tjhese lefatshe lohle.

Baahi bohle ba lefatshe

o tla ba timetsa,

a ba timetse hang,

ka ho panya ha ntshi.”

₁“Lona tjhaba se hlabisang dihlong,

phuthehang, le kgobokane,

₂nako e boletsweng e eso fihle,

tsatsi leo le le fefola sa mmoko;

pele kgalefo ya Morena e le fihlela,

tsatsi la kgalefo ya Morena

le le tjhabela.

₃Lona ba ikokobetsang ba lefatshe,

lona ba mamelang taelo ya Morena,

batlang Morena, le mmatlisise.

Batlang ho loka,

le batle boikokobetso;

mohlomong le ka sireletseha

mohla tsatsi la kgalefo ya Morena.”

₄“Baahi ba Gasa ba tla e baleha,

Ashekelone e sale e le masupi.

Baahi ba Ashedode

ba tla phaladiswa,

ba phaladiswe

hara motsheare wa lengeta,

Ekerone yona ebe e a ripitlwa.

₅Le madimabe lona

ba ahileng bopong la lewatle,

le madimabe lona tjhaba sa Bakerete!

Morena ke yena ya o qosang,

wena Kanana, naha ya Bafilesita,

ke tla o ripitla,

ho be ho hlokwe le masalla.

₆Naha e bopong la lewatle

e tla ba makgulo,

e tla ba ya badisa le ya meraka.

₇E tla ba ya masalla

a ba ntlo ya Juda,

moo a alosetsang

mehlape ya wona teng.

Mantsiboya a tla botha

ka matlung a Ashekelone,

Morena Modimo wa wona,

a a baballe,

a a buseletse boiketlo ba wona.”

₈“Mahlapa a Bamoabe ke a utlwile,

nyefolo tsa Baamone

le tsona ka di utlwa,

ka utlwa ha ba hlapaola tjhaba sa ka,

ba ithorisetsa

ho kena meeding ya sona.

₉Ka baka leo, ke a hlapanya,”

ho rialo Morena wa mabotho, Morena Modimo wa Iseraele.

“Moabe e tla ba jwaloka Sodoma,

Amone yona e be jwaloka Gomora,

naha e tletseng bobatsi

le matjheko a letswai,

naha e fetohileng nanaola

ya mehla yohle.

Masalla a tjhaba sa ka a tla e lobela,

ba phonyohileng ba tjhaba sa ka

ba e hape.

₁₀Ona ke moputso

wa boikgohomoso ba bona,

kaha ba hlapaotse tjhaba

sa Morena wa mabotho,

ba se hlapaola ba ba ba ithorisa.

₁₁Ho bona Morena o tla tshabeha,

a fedise medingwana yohle ya lefatshe.

Tjhaba tsohle tse mabopong

di tla mo kgumamela,

motho ka mong

a mo kgumamele a le ha habo.”

₁₂“Le lona Bakushe

le tla timetswa,

sabole ya Morena e le bolaye.”

₁₃Morena o tla otlolla tsoho la hae,

a le otlollele leboya,

a le otlolle, a timetse Asiria,

a timetse Ninife, e fotohe nanaola,

e sale e omeletse e ka lehwatata.

₁₄Mohlape o tla botha hona moo,

le phoofolo tsa naha

ka mefuta ya tsona.

Sephooko le sephookwana

di tla robala teng,

di robale kahodima ditshiya,

tshiya tse ntseng di eme;

bo-makgohlo ba hihitse

ba le difesetereng,

kupukupu ya mobu

e thibile menyako,

hobane kedare tsa yona

di tla be di wele.

₁₅Ke wona motse wane o motlehadi,

o neng o ituletse ka kgotso,

o neng o ikgohomosa ka ho re:

“Ke nna feela, ha ho na e mong.”

O fetohile lesupi le lekaakang!

O fetohile letsaba la dibatana!

Bo-mofeta-ka-tsela ba a o makalla,

ba letsa molodi, ba opa diatla!

₁O madimabe motse wa Jerusalema,

motse wa batlatlapi,

motse wa bafetohedi o silafetseng!

₂Motse ona ha o mamele keletso,

kgalemelo le yona ha o e amohele;

esita le Morena ha o mo tshepe,

ha o ikatametse ho Modimo wa wona.

₃Mahosana a wona

ke tau tse purumang

baahlodi ba wona

ke phiri tse jang bosiu,

ere bo esa di be di jele di qetile.

₄Baporofeta ba wona ke baikakasi,

ke banna ba tletseng bolotsana;

baprista ba wona

ba silafaditse Sehalalelo,

molao le wona ba ba ba o tlola.

₅Ho loka ha Morena

ho teng motseng ona,

ha a ka ke a etsa bokgopo ba letho.

Kamehla ha ho esa o diha kahlolo,

kamehla ha bo esa ha a fose,

empa ya kgopo

ha a hlajwe ke dihlong.

₆“Matjhaba wohle ke a timeditse,

qhobosheane tsa wona ka di heletsa.

Diterata tsa wona di setse feela,

ha ho le ya mong

ya tsamayang ho tsona.

Metse ya tsona yohle e ripitlilwe,

ha ho sa na le motho,

ha ho sa na moahi.

₇Ka na ka bua

ho baahi ba motse, ka re:

‘Ruri le sa tla be le ntlhomphe,

le qetelle le mametse kgalemo ya ka,

e le hore leaho la lona le se ripitlwe,

le kahlolo tsa ka

di se le wele hodimo.’

Empa ba nna ba hahamala,

ba hahamala ho ya pele,

ba eketsa ketso

tse bodileng tsa bona.

₈Kahoo nkemeleng,”

ho rialo Morena,

“le nkemele ho fihlela ha ke le qosa.

Ke na le morero

wa ho phutha ditjhaba,

wa ho di phutha le mebuso ya tsona,

ke hlatsetse kgalefo ya ka

hodima tsona,

e leng bohale ba ka

bo tukang malakabe.

Lefatshe lohle

le tla timetswa ka mollo,

ka mollo wa kgalefo ya ka

ya ho boulela.

₉Mohlang oo ke tla fedisa

puo tse mpe tsa ditjhaba,

bohle ba tle ba ipiletse ho Morena,

ba mo sebeletse ba le ntsweleng.

₁₀Ho tloha ka nqane

ho noka ya Kushe,

tjhaba sa ka se qhalakaneng

se tla nkgumamela,

se ntlisetse dinyehelo.

₁₁Mohla tsatsi leo

ha o na ho ba dihlong

ka baka la ho ntshitelwa ha hao.

Ba ithorisang ka boikakaso ba hao

ke tla ba fedisa kahare ho wena;

o ke ke wa hlola o ikgohomosa,

o le thabeng ya ka e halalelang.

₁₂Tjhaba se mosa, se ikokobetsang,

se tla o salla se ntse se phela,

se ntse se phela, se tshepile Morena.

₁₃Masalla a Iseraele

a ke ke a etsa bokgopo,

leha e le hona ho bua mashano;

a ke ke a thetsa ka maleme a wona.

Masalla ao a tla fula, a bothe,

ho se na ya ka hlolang a a

tshosa.”

₁₄Wena Moradi wa Sione, bina haholo!

Wena Iseraele, howeletsa haholo!

Wena Moradi wa Jerusalema,

thaba haholo,

ka pelo ya hao yohle,

nyakalla haholo!

₁₅Morena o fedisitse kahlolo ya hao,

o timeditse le tsona dira tsa hao.

Morena, Kgosi ya Iseraele,

o na le wena,

ha o ka ke wa tshoha koduwa.

₁₆Mohla tsatsi leo

ba tla re ho Jerusalema:

“Wena Sione, o se ke be wa tshaba,

matsoho a hao a fele a tiye!

₁₇Morena Modimo wa hao,

o na le wena,

ke senatlahadi se tla o lwanela.

O tla o thabela ka nyakallo,

a o rate ka lerato la sebele,

a howeletse,

a o hlabele medidietsane,

a e hlabe

sa mohla tsatsi la mokete.”

₁₈“Ke tla phutha

ba neng ba llela mekete,

ba llela mekete e halalelang,

e leng ba neng ba le hole,

hole le wena,

ba neng ba jere sekgobo sa hao.

₁₉Mohla tsatsi leo ke tla otla,

ke otle bohle ba o hateletseng;

ke tla pholosa ba holofetseng,

ke phuthe ba neng ba qhalakane.

Hohle moo ba neng

ba tlontlolotswe teng,

thabo le tlotla di tla ba aparela.

₂₀Mohla tsatsi leo

ke tla le kgobokanya,

ke le kgobokanye, le kgutlele hae.

Thabo le tlotla di tla le aparela,

le le hara tjhaba tsohle tsa lefatshe,

mohla ke le kgutlisetsang

ha habo lona,

ke le kgutlisa le ntse le tadimile,”

ho rialo Morena.

₂Morena, ke o boka

ka pelo ya ka yohle,

ke bolela dimakatso tsohle tsa hao.

₃Ke a o thabela,

ke nyakallela ho wena;

ke roka lebitso la hao,

wena Ya Hodimodimo.

₄Dira tsa ka di tjhetjhile ka santhao,

di kgopilwe, tsa timela ha o hlaha,

₅hobane o emetse nyewe ya ka

le ditokelo tsa ka,

o dutse teroneng ya hao

o le moahlodi ya lokileng.

₆O kgalemetse ditjhaba,

wa timetsa ba kgopo,

mabitso a bona wa a hlakolela ruri.

₇Dira di ripitletswe ruri;

metse ya tsona o e fetotse masupi,

ha e sa tla hlola e hopolwa.

₈Empa Morena o busa kamehla,

terone ya hae o e theetse ho ahlola.

₉O ahlola lefatshe ka toka,

ditjhaba o di ahlola a se na leeme.

₁₀Morena e ke e be qhobosheane

ya ba hatellwang,

qhobosheane

nakong ya matshwenyeho.

₁₁Ba tsebang lebitso la hao

ba ke ba o tshepe,

ba o tshepe hobane wena Morena,

o ke ke wa furalla ba o batlang.

₁₂Rokang Morena ya busang Sione,

phatlalatsang diketso tsa hae,

le di phatlalatse hara ditjhaba,

₁₃hobane ya phetetsang madi

o hopola bahlophehi,

ha a lebale sello sa bona.

₁₄Nkgauhele Morena,

tadima kamoo

ke hlophehileng kateng,

ke hlophehile

ka baka la ba ntlhoileng,

wena ya nnyolotseng kgorong

ya motse wa bafu,

₁₅e le hore

ke tle ke bolele dithoko tsa hao,

ke di bolele

kgorong ya motse wa Sione,

mme ke nyakalle

hobane o mpholositse.

₁₆Ditjhaba di wetse lemeneng

leo di le tjhekileng,

maoto a tsona a tshwasitswe

ke leraba leo di le tjhehileng.

₁₇Morena o itsebahaditse,

o phethahaditse kahlolo,

ba kgopo ba kgatilwe ke mesebetsi,

mesebetsi ya diatla tsa bona.

₁₈Ba kgopo ba ikela Nqalong ya Bafu:

tjhaba tsohle

tse sa reng letho ka Modimo.

₁₉Mafutsana a ke ke a leballwa ruri,

tshepo ya bahlophehi

e ke ke ya fetoha lefeela.

₂₀Thusa, Morena!

Motho a se ke a kgantsha matla,

ditjhaba di ahlolwe kapela hao.

₂₁Di kenye letswalo, Morena;

ditjhaba di ke di tsebe

hore e ntse e le batho feela.

Ke tshabela ho Morena.

Keng ha le re ho nna:

“Balehela thabeng

jwaloka nonyana?”

₂Ba kgopo ba se ba hula

diqha tsa bona,

ba kgwesa metsu ya bona,

ba e kgwesa ba le lefifing

ho fula ba pelo di ntle.

₃Ha metheo e se e heleditswe,

ya lokileng a ka etsa eng?

₄Morena o ka tempeleng ya hae

e halalelang,

terone ya Morena e mahodimong.

Mahlo a hae a bona bana ba batho,

o a ba tadimisisa, o a ba hlahloba.

₅Morena o hlahloba

ya lokileng le ya kgopo,

ya sehloho yena o mo hloile.

₆Ba kgopo o tla ba nesetsa mashala,

mashala a hlenneng le sebabole,

kabelo ya bona

e tla ba moya o tukang.

₇Morena o lokile,

mme o rata tse lokileng;

ba pelo di ntle

ba tla bona fahleho sa hae.

₁Morena o hloile sekala

se qhekanyetsang,

empa boima bo nepahetseng

bona bo a mo thabisa.

₂Boikakaso bo etella dihlong pele,

boikokobetso bona

bo tsamaya le bohlale.

₃Ba tshepahalang

ba tataiswa ke botshepehi ba bona,

ba sa tshepahaleng bona ba timela,

ba timetswa

ke ho se tshepahale ha bona.

₄Kgalefo ya Modimo

e ke ke ya fediswa,

ya fediswa ke maruo a motho,

empa ho loka

ho lopolla motho lefung.

₅Ho loka ha ba se nang molato

ho lokisa tsela tsa bona,

ba kgopo ba timetswa

ke bokgopo ba bona.

₆Ho loka ha ba lokileng

ho a ba lopolla,

ba hlokang botshepehi

ba tshwaswa ke ditakatso,

takatso tsa bona tse mpe.

₇Ha ya kgopo a eshwa,

tshepo ya hae e a fela,

maruo ao a neng a a tshepile

le wona a a fela.

₈Ya lokileng

o pholoswa tsietseng ya hae,

ebe ya kgopo yena o wela ho yona.

₉Polelo tsa ya kgopo

di timetsa mohahabo,

empa ya lokileng

yena o pholoswa ke tsebo.

₁₀Ha ba lokileng ba atleha

motse o a nyakalla,

ha ba kgopo ba timela,

hara motse ke medidietsane.

₁₁Ho hlohonolofatswa ha ba lokileng

ho haha motse,

athe leme la ya kgopo

lona le a o timetsa.

₁₂Sethoto se nyedisa mohahabo sona,

empa ya nang le kutlwisiso

yena ke lethola.

₁₃Ya ratang ditshebo

o hlahatsa makunutu,

ya tshepahalang yena o na le sefuba.

₁₄Tjhaba se hlokang botsamaisi

se a lahleha,

se nang le baeletsi ba bangata

se a bolokeha.

₁₅Ya itlamang ka molato wa motho

o a itsietsa,

ya hanang ho itlama

o iphemisa kotsi.

₁₆Mosadi ya mosa

o kgaba ka hlompho,

banna ba dikgoka

ba ikgapela maruo.

₁₇Monna ya mohau

o iketsetsa tse molemo,

athe ya sehloho

yena o a itshitelwa.

₁₈Motho ya kgopo

o amohela moputso wa bolotsana,

ya jalang ho loka

o kotula moputso wa nnete.

₁₉Motho ya lokileng

o tla rua bophelo,

ya pheeletseng bobe

yena o tla timela.

₂₀Morena o hloile ba pelo di kgopo,

empa o thabela

ba metsamao e lokileng.

₂₁Ruri ba kgopo ba tla ahlolwa,

ba lokileng bona ba pheme kahlolo.

₂₂Mosadi ya hlokang boitshwaro

leha a le motle,

o jwaloka sale la kgauta

nkong ya kolobe.

₂₃Ya lokileng

o lakatsa tse molemo,

ya kgopo yena

o emetswe ke kgalefo.

₂₄E mong o fana haholo,

leruo le mo atele,

e mong e be lekgonatha,

bofuma bo mo aparele.

₂₅Ya fanang haholo

o tla fumana katleho,

ya fanang ka metsi

le yena o tla a fuwa.

₂₆Ya hanang ho rekisa koro

batho ba a mo rohaka,

empa ya ba rekisetsang

yena o a hlohonolofala.

₂₇Ya pheellang tse molemo

o tla hauhelwa,

ya pheellang bobe

bo tla mo wela hodimo.

₂₈Ya tshepang maruo a hae

o tla timela,

ya lokileng o atleha

jwaloka hlaku le letalana.

₂₉Ya hlorisang lapa la hae

a ke ke a rua letho,

sethoto se tla fetoha

kgoba la ya bohlale.

₃₀Tholwana ya ho loka

ke sefate sa bophelo,

ya bohlale yena

o hapa meya ya batho.

₃₁Ya lokileng

o tla fumana moputso a sa phela,

ya kgopo le moetsadibe

le bona ba tla putswa.