To The Word – Day 131

₁Lona ba iketlileng le le Sione

le madimabe,

le lona ba tshabetseng

thabeng tsa Samaria;

lona baetapele

ba tjhaba se kapele ho tse ding,

bao ntlo ya Iseraele

e phallelang ho bona!

₂Eyang motseng wa Kalene

le yo bona;

le tlohe moo,

le fetele Hamate e kgolo,

le nto theohela motseng

wa Bafilesita wa Gate!

Na mebuso eo le e feta ka letho?

Na naha ya yona e kgolo

ho feta ya lona?

₃Ha le dumele

hore tsatsi la koduwa le haufi,

empa ketso tsa lona di a le atametsa,

di atametsa puso e sehloho!

₄Le paqama

mealong e kgabisitsweng,

e kgabisitsweng ka manaka a tlou;

le kakalla tulong tsa lona,

tulong tse butshabutsha,

le ja nama ya dikonyana e bonojwana,

le je le ya manamane a nontshitsweng.

₅Le letsa harepa tsa lona

jwaloka Davida,

pina tsa diletsa le di qapele seemeng.

₆Veine ya lona

le e nwa ka mopotjwana,

le itlotse ka ditlolo tsa bohlokwa,

empa ha le llele

ho timetswa ha Josefa.

₇Kahoo ke lona ba pele

ba tla thopuwa,

mekete ya lona ya dijo e tla fela.

“Ke nyonya boikakaso ba Jakobo,

ke hloile matlo a bokwele a hae;

ke tla neelana ka motse ona,

ke neelane ka tsohle tse ho wona.”

Ntlo e kgolo o tla e pshatlaka,

e nyenyane le yona a e thuake.

₁₂Na dipere di ka matha mafikeng?

Na pholo di ka lema lewatleng?

Empa lona toka le e fetotse tjhefo,

tholwana ya ho loka

la e fetola leshokgwa.

₁₃Lona ba thabelang Lo-Dabare,

lona le re:

“Na ha re a ikgapela Karanaime,

ra ikgapela yona ka matla a rona?”

“Lona Baiseraele,

ke tla le phepheletsa setjhaba,

se le hatelle

ho tloha Kgalong la Hamate,

se le hatelle

ho ya fihla Kgohlong ya Araba.”

“Sena se ke ke sa etsahala,”

ho rialo Morena.

“Le sena se ke ke sa etsahala,”

ho rialo Morena Modimo.

₉“Dibaka tsa borapedi tsa Isaka,

di tla heletswa,

le dihalalelo tsa Iseraele

di fetolwe masupi;

ke tla futuhela ntlo ya Jeroboame,

ke e futuhele ka sabole ya ka.”

“ ‘Jeroboame o tla bolawa,

a bolawe ka sabole,

ruri Baiseraele ba tla thopuwa,

ba thopelwe hole,

hole le naha ya habo bona.’ ”

“ ‘O se ke wa porofetela Iseraele,

thutong ya hao

o se ke wa nyatsa ntlo ya Isaka.’ ”

“ ‘Mohatsa hao

otla fetoha seotswa hara motse,

bara le baradi ba hao

ba bolawe ka sabole.

Naha ya heno e tla arolelwa basele,

wena o yo shwela naheng,

naheng e silafetseng.

Ruri Baiseraele ba tla thopuwa,

ba thopelwe hole,

hole le naha ya habo bona.’ ”

₄Lona ba hatakelang bahloki,

utlwang mona!

Lona ba timetsang mafutsana,

mafutsana a naha ena.

“Kgwedi e ntjha

e tla ya neneng fifing,

re tswe re rekisa mabele a rona?

Tsatsi la Sabatha le tla feta neneng,

re tswe re bapatsa ka koro ya rona?

Re ntse re fokotsa tekanyo

re nyolla theko,

re qhekella bareki

ka dikala tsa rona tse sa nepahalang?

₆Re reka mafutsana ka silefera,

re ananya mohloki ka meqathatso,

re rekisa koro le ditlhoka tsa yona?”

₈“Na naha yohle

ha e na ho thothomela,

le bohle ba ahileng ho yona

ba bokolle?

Naha yohle e tla kokomoha,

e kokomohe jwaloka Nile,

e be e nne e hlokolehe,

e nto bohlela

jwaloka noka ya Egepeta.

₉“Mohlang oo,”

ho rialo Morena Modimo,

“Ke tla diketsa letsatsi

hara mpa motsheare,

fifi le kwahele lefatshe

motsheare o moholo.

₁₀Mekete ya lona e kgethehileng

ke tla e fetola,

ke e fetole, ke e etse ya bofifi,

le dipina tsa lona tsohle

e be kodi-ya-malla.

Bohle ke tla ba apesa,

ke ba apese tse mahwashe,

ke ba kute, ke ba beole lekorana.

Nako eo e tla ka ya ho lla,

ho llela mora ya inotshi,

qetello ya yona

e ke tsatsi la mahlomola.

₁₁“Matsatsi a a tla,”

ho rialo Morena Modimo,

“ao ka wona ke tla dihela

naha ena sekoboto,

e seng sekoboto

sa ho hloka dijo feela,

leha e le lenyora

la ho nyorelwa metsi;

e tla ba sa ho hlolohelwa

lentswe la Morena,

empa lentswe leo

ha ba ka ke ba le utlwa.

₁₂Batho ba tla lelera

le mawatle wohle,

ba phaqole

ho tloha leboya ho ya botjhabela,

ba ntse ba batla lentswe la Morena,

empa ha ba ka ke ba le fumana.

₁₃“Mohla tsatsi leo,

pabala tsa barwetsana

le tsa bahlankana,

di tla akgeha, di akgehiswe ke lenyora.

₁₄Ba hlapanyang

ka medingwana ya Samaria,

kapa ba reng:

‘Ka modimo wa hao, ya phelang,

wena Dane,’

kapa ba reng:

‘Ka modimo ya phelang,

modimo wa Beeresheba,’

ba tla wa, ba sa tlohlola ba tsoha.”

“Pshatla hlooho tsa ditshiya,

dikosene di sisinyehe,

mathule a pshatlehele

hodima hlooho tsa bohle,

masalla wona

ke tla a bolaya ka sabole;

ha ho le ya mong ya tla baleha,

ha ho le ya mong ya tla phonyoha.

₂Leha ba ka phunyeletsa

ho ya fihla Nqalong ya Bafu,

tsoho la ka le tla ba ntsha hona moo.

Leha ba ka nyolohela hodimo,

hodimo mahodimong,

le hona moo ke tla ba theola.

₃Leha ba ka ipata

tlhorong ya Karamele,

ke tla ba tsoma,

ke ba tshware hona moo.

Leha ba ka ipatela nna

ka mpeng ya lewatle,

ke tla laela kganyapa

e ba lomele hona moo.

₄Leha dira tsa bona di ka ba thopa,

ke tla laela hore ba bolaelwe moo,

ba bolaelwe hona moo ka sabole.

Ke rerile hore ke ba timetse,

e seng hore ke ba thusetse.”

₅Morena Modimo wa mabotho

o ama lefatshe,

a ame lefatshe, ebe le a qhibidiha,

bohle ba phelang ho lona

ebe ba a lla.

Naha yohle

e tla kokomoha jwaloka Nile,

e nto bohlela

jwaloka noka ya Egepeta.

₆Yena eo leaho la hae

le leng mahodimong,

metheo ya lona

o e hlomme hodima lefatshe;

yena ya bokellang metsi a lewatle,

a a bokelle,

a a tshollele hodima lefatshe;

lebitso la hae ke Morena.

₇“Na lona Baiseraele,

ho nna ha le ke Bakushe?”

ho rialo Morena.

“Na hase nna ya ileng

a le ntsha naheng ya Egepeta,

Bafilesita le bona

ka ba ntsha Kafatore,

Baarame bona

ka ba ntsha naheng ya Kire?

₈“Ruri Morena wa mabotho

o tadimile mmuso ona o kgopo.

Ke tla o timetsa

hodima lefatshe lohle,

empa ntlo ya Juda

nke ke ka e timetsa kaofela,”

ho rialo Morena.

₉“Nna ke tla fela ke etse taelo,

ntlo ya Iseraele ke e hlokole,

ke e hlokole hara ditjhaba tsohle,

ke e hlokole

sa koro e hlokolwa ka sefe,

empa ho se thollo le e nngwe

e welang fatshe.

₁₀Baetsadibe bohle ba setjhaba sa ka

ba tla bolawa, ba bolawe ka sabole,

ho bolawe le bohlebohle ba reng:

‘Koduwa e ke ke be ya re kgaoletsa,

e ke ke be ya re wela hodimo.’ ”

₁₁“Mohlang oo

ke tla tsosa ntlo ya Davida,

ntlo e seng e wele.

Dikgeo tsa marako a yona

ke tla di thiba,

dithako tsa yona

le tsona ke di tsose,

ke e hahe,

e ntjhafale sa mohla monene;

₁₂e le hore ba tle ba rue

masalla a Edomo,

le baditjhaba bohle

ba bitswang ka lebitso la ka,”

ho rialo Morena, yena ya tla etsa tsena.

₁₃“Matsatsi a a tla,”

ho rialo Morena,

“ao ka wona ya kotulang a tla siuwa,

ya kotulang a siuwe ke ya lemang;

ya jalang le yena o tla siuwa,

a siuwe ke ya tlhotlang morara.

Veine e ntjha e tla kolla dithabeng,

e phalle e kopotsa maralleng wohle.

₁₄Ke tla kgutlisa

tjhaba sa ka sa Iseraele,

ke kgutlise

tjhaba sa ka bothopuweng;

se tla tsosa metse e se e le masupi,

se e tsose, se phele ho yona.

Se tla lema dirapa tsa morara,

se di leme, se nwe veine ya wona;

se tla lema dirapa,

se je tholwana tsa tsona.

₁₅Ke tla tsitsisa Baiseraele

naheng ya bona,

ke ba tsitsise,

ba se hlole ba tloswa,

naheng eo ke ba abetseng yona,”

ho rialo Morena Modimo wa lona.

Morena Modimo

o bua tjena ka Edomo:

Re utlwile molaetsa

o tswang ho Morena,

leqosa le rometswe ho baditjhaba,

le re: “Emang,

re futuheleng Edomo!”

₂“Wena Edomo,

ke tla o nyenyefatsa,

ke o nyenyefatse hara baditjhaba,

ba tle ba o nyope, ba o nyedise.

₃Boikgohomoso ba pelo ya hao

bo o thetsitse,

wena ya phelang mafarung,

hara mafika,

eo leaho la hao

le leng hara dithaba,

wena ya ithorisang ka ho re:

‘Ke mang

ya ka ntheolelang tlase?’

₄Leha o ka fofela hodimo sa ntsu,

wa haha hlaha sa hao,

wa se haha hara dinaledi,

ke tla o tlosa hona moo,

ke o theole,”

ho rialo Morena.

₅“Ha mashodu

a ka o futuhela bosiu,

dinokwane tsa o nanarela bosiu,

leha tshenyehelo ya hao

e tla ba kgolo,

na a ke ke a utswa feela

tseo a di hlokang?

Ha bakotudi ba morara

ba o kotulela,

na ba ke ke ba siya makgwahlapiso?

₆Esau o runtsolotswe hakaakang!

Matlotlo a hae a patilweng

a lobelwa hakaakang!

₇Bohle ba thusanang le wena

ba o thetsitse,

ba o kgarameletsa meeding;

balekane ba hao ba o kgelositse,

metswalle eo o e tshepang

e o tjhehetse leraba,

empa wena ha o ka ke wa le bona.

₈“Mohla tsatsi leo,”

ho rialo Morena,

“na ha ke tlo timetsa

bahlalefi ba Edomo,

thabeng ya Esau

ke fedise ba nang le kutlwisiso?

₉Wena Temana, bahlabani ba hao

ba tla thothomela,

bohle ba bolawe,

ba bolaelwe thabeng ya Esau.

₁₀“Kaha o no hlekefetse

ngwaneno Jakobo,

dihlong di tla o aparela,

wena o timele, o timelle ruri!

₁₁Mohla o no emeletse kathoko,

ha baditjhaba ba hahara leruo la hae,

melata e kena ka dikgoro,

ka kgoro tsa metse ya hae,

e laola Jerusalema ka lotho,

o ne o ka e mong wa baditjhaba.

₁₂Mohla ngwaneno

a hlahetsweng ke bomadimabe,

o se ke wa mo shebela maotong;

mohla tjhaba sa Bajuda

se timetswang,

o se thabele

ho timetswa hoo ha sona;

le mohla se leng makaqabetsing,

o se ke wa ithorisa hakaalo.

₁₃Mohla tjhaba sa ka

se wetsweng ke koduwa,

o se ke wa kena ka dikgoro tsa sona;

mohla tjhaba sa ka

se leng hara bomadimabe,

o se ke wa se somela bomadimabe boo;

le mohla se leng hara ditlokotsi,

o se ke wa ikgapela maruo a sona.

₁₄Mohla tsatsi la sona la ditsietsi,

o se ke wa lalla mateanong a ditsela,

hore o bolaye

baphaphathehi ba sona,

le ho neelana

ka ba phonyohileng ba sona.

₁₅“Tsatsi la Morena le atametse,

le tla tjhabela ditjhaba kaofela.

Kgalapa di tla buseletsana,

molamu o boele sefateng.

₁₆Seo lona tjhaba sa ka le se nweleng,

la se nwella thabeng ya ka,

thaba e halalelang,

ditjhaba tsohle

di tla se nwa ho-ya-ho-ile;

di tla se nwa, di be di minyeletse,

di be jwaloka hola di eso be teng.

₁₇“Ba phonyohileng

ba tla ba thabeng ya Sione,

yona e be sebaka se halalelang;

ba ntlo ya Jakobo ba je lefa la bona.

₁₈Ntlo ya Jakobo e tla ba mollo,

ntlo ya Josefa e be lelakabe,

ntlo ya Esau yona e be matlakala;

ba tla e hotetsa ka mollo,

ba e tjhese,

ho se be ya phonyohang

wa ntlo ya Esau,”

ho rialo Morena.

₁₉Baiseraele ba tswang Borwa

ba tla hapa,

ba hape thaba ya Esau,

ba tswang diphuleng

le bona ba hape,

ba hape naha ya Bafilesita.

Ba tla hapa Efraime,

ba hape Samaria,

Benjamine yena a ikgapele Gileade.

₂₀Letshwelehadi la bathopuwa

ba Iseraele ba Kanana

le tla hapa naha eo

ho ya fihla Sarepeta,

bathopuwa ba Jerusalema,

ba leng Sarefate,

ba tla ikgapela metse e ka Borwa.

₂₁Bapholosi ba bona ba tla nyoloha,

ba nyolohele thabeng ya Sione,

ba buse dithaba tsa Esau,

mme mmuso e tla ba wa Morena.

₁Ana ke maele a Solomone:

Ngwana ya bohlale

o thabisa ntatae,

ngwana ya sethoto

ke masisapelo ho mmae.

₂Maruo a fumanweng ka bokgopo

ha a na thuso,

empa toka e lokolla motho lefung.

₃Ba lokileng

Morena ha a ba bolaise tlala,

takatso tsa ya kgopo o a di nyopisa.

₄Ya phuthileng matsoho

o tla futsaneha,

athe matsoho a kgothetseng

a ruisa monga wona.

₅Ya bokellang dijo hlabula

ke ngwana ya bohlale,

ya robalang ha ho kotulwa

o hlabisa dihlong.

₆Mahlohonolo a aparela ba lokileng,

polelo tsa ya kgopo

di kwetlile bosoro.

₇Ho hopolwa ha mofu ya lokileng

ho lehlohonolo,

empa bitso la ya kgopo

le ke ke la hopolwa.

₈Ya bohlale

o tla mamela molao pelong ya hae,

sethoto se beberang

sona se tla timela.

₉Motho wa nnete

o tsamaya a sireletsehile,

ya se nang nnete, yena o tla senolwa.

₁₀Ya iphapanyetsang phoso

o baka moferefere,

sethoto se beberang

sona se tla timela.

₁₁Polelo tsa ya lokileng

ke diba sa bophelo,

athe tsa ya kgopo

tsona di kwetlile bosoro.

₁₂Lehloyo le fehla moferefere,

athe lerato lona

le iphapanyetsa diphoso tsohle.

₁₃Bohlale bo fumanwa dipolelong

tsa ya nang le kutlwisiso,

empa thupa e kgalema

ya se nang kutlwisiso.

₁₄Ba bohlale ba ipokellela tsebo,

empa polelo tsa sethoto

di isa timelong.

₁₅Morui o tshepile maruo a hae,

mofutsana o timetswa

ke bofuma ba hae.

₁₆Mesebetsi ya ba lokileng

e ba tlisetsa bophelo,

empa ya ba kgopo

e ba hulela sebeng.

₁₇Ya mamelang ha a kgalengwa

o tseleng ya bophelo,

empa ya sa mameleng,

yena o a kgeloha.

₁₈Ya patang lehloyo ke mothetsi,

ya sebang ba bang, yena ke sethoto.

₁₉Ya buang haholo

sebe se teng polelong tsa hae,

ya sa buabueng

yena ke motho ya bohlale.

₂₀Polelo tsa ya lokileng

ke silefera e hlwekisitsweng,

pelo ya ya kgopo ha e na thuso.

₂₁Polelo tsa ba lokileng

di ruta ba bangata,

thoto tsona di shwa

ke ho hloka kutlwisiso.

₂₂Hlohonolo la Morena

le entsha motho,

ha ho maswabi ao le a tlisang.

₂₃Sethoto se thabela ho etsa bobe,

ya nang le kutlwisiso

o thabela bohlale.

₂₄Se tshajwang ke ya kgopo

se tla mo wela hodimo,

empa takatso ya ya lokileng

e tla phethahatswa.

₂₅Sefefo se sheshena ya kgopo

se ye le yena,

motheo wa ya lokileng

o hlola kamehla yohle.

₂₆Jwalokaha asene

e thellisa meno a motho,

mosi le wona o llisa mahlo a motho,

sekgoba se jwalo ho ba se romang.

₂₇Ho tshaba Morena

ho lelefatsa phelo ba motho,

empa lemo tsa ba kgopo

di tla kgutsufatswa.

₂₈Letshepa la ba lokileng

le hlahisa thabo,

athe la ba kgopo lona le a nyamela.

₂₉Tsela ya Morena

ke tshabelo sa ba lokileng,

empa ba kgopo bona e a ba timetsa.

₃₀Ya lokileng a ke ke a sisinyeha,

empa ba kgopo

ba tla fela lefatsheng.

₃₁Molomong wa ya lokileng

ho tswa bohlale,

leme le kgopameng le tla pongwa.

₃₂Ya lokileng

o bua puo tse thabisang,

athe ya kgopo

o tseba ho sokamisa ditaba.