To The Word – Day 127

₁“Letsa lenaka, o hlabe mokgosi!

Ntsu ke eo e ubella Moreneng,

hobane tjhaba se sentse,

sa senya selekane sa ka,

sa ba sa tlola le molao wa ka.

₂Tjhaba sa Iseraele se a ipiletsa,

se a ipiletsa, se re ho nna:

‘Oho, Modimo wa rona,

rona re a o tseba!’

₃Empa Baiseraele

ba furaletse tse molemo,

kahoo sera se tla ba phaladisa.

₄Ba ipeetse kgosi

ba sa ka ba ntherisa;

ba bea mahosana

nna ke sa ka ka tseba.

Ka silefera le ka kgauta ya bona

ba iketseditse medingwana ya bona,

kahoo Baiseraele ba tla timela.

₅Wena Samaria,

ke nyonya medingwana ya hao,

medingwana ya hao ya manamane,

kgalefo ya ka

e tlokomela baahi ba Samaria!

Ba tla sitwa ho itlhwekisa

ho fihlela neng?

₆Namane ena

e ne e etswe naheng ya Iseraele,

e entswe ke lelala,

empa yona hase Modimo.

Namane ya Samaria

e tla thuakanngwa!

₇“Ba jetse moya,

ba tla kotula sefefo,

kaofela mabele a bona a phutsitse,

kahoo dijo di ke ke tsa eba teng;

leha eba a ne a ka beha haholo,

baditjhaba ba ne ba tla a lobela.

₈Baiseraele ba kwentswe,

ba kwentswe bokwiditane,

jwale ba se ba lweba

kahara baditjhaba,

ba ka ntho e se e se na molemo.

₉Ba nyolohile, ba ikela Asiria,

sa tonki e hlaha, e lelerang le naha;

Efraime yena o ikgiretse basireletsi.

₁₀Le hoja ba ithekisitse,

ba ithekisitse ho baditjhaba,

nna ke tla ba phutha, ke ba bokelle.

Ba tla qala ho fella dikobong,

ha ba hatellwa ke kgosi ya Asiria.

₁₁“Le hoja Efraime

a hahile dialetare tse ngata,

a tle a etsetse tefelo ya sebe ho tsona,

aletare tsena

di fetohile sentele sa dibe.

₁₂Ke mo ngoletse melao

e se nang palo,

empa o e tadima e le ntho tsa basele.

₁₃Ba nketsetsa dinyehelo,

nyehelo tsa mahlabelo,

ba itjella nama eo ya mahlabelo,

empa ho nna Morena,

ha a amohelehe.

Ke tla hopola bokgopo ba bona,

ke ba otlele dibe tsa bona,

ke ba kgutlisetse naheng ya Egepeta.

₁₄Iseraele o lebetse Mmopi wa hae,

a haha matlo a dikgosi tsa hae;

Juda o hahile metse e mengata,

metse e haheleditsweng,

empa metse eo

ke tla e tjhesa ka mollo,

o tjhese matlo a yona a bokgosi.”

₁Se ke wa nyakalla, wena Iseraele!

Se ke wa thaba

jwaloka ditjhaba tse ding!

O entse bootswa

ka ho furalla Modimo wa hao,

o hloma eka

moputso wa bootswa ba hao

ke mabele a polwang,

a polwang seotlong ka seng.

₂Seotlo le setlhotlelo

di ke ke tsa fepa setjhaba,

veine e ntjha le yona e tla se haella.

₃Se ke ke sa aha naheng ya Morena,

Efraime yena o tla kgutlela Egepeta,

tjhaba se je dijo tse sesila,

se di jele Asiria.

₄Ha se ka ke sa etsetsa Morena

nyehelo tsa veine,

mahlabelo a sona

ha a amohelehe ho yena,

ho sona a tla ka dijo tsa bofifi,

bohle ba di jang ba tla silafala.

Dijo tsa bona

di tla itjellwa ke bona feela,

di ke ke tsa kenngwa

ka Tempeleng ya Morena.

₅Le tla etsang

mohla tsatsi le halalelang,

mohla letsatsi

la mokete wa Morena?

₆Ha ba phasaphasa,

ba baleha timelo,

Egepeta e tla ba kgobokanya,

e ba kgobokanye mmoho,

Memefise yona ebe e a ba epela.

Matlotlo a silefera

a tla melella bobatsi,

meutlwa e ririellane

ka ditenteng tsa bona.

₇A se a fihlile matsatsi a kahlolo!

A se a fihlile matsatsi a phetetso!

Sena Iseraele o tla se tseba!

Le re:

“Moporofeta enwa ke sethoto!

Ya susumetswang ke moya

yena ke lehlanya!”

Hoba bokgopo ba lona bo totile,

le bora ba lona bo totile hakaalo!

₈Moporofeta ke molebedi wa Efraime,

Efraime, tjhaba sa Modimo wa ka;

empa o tjhehetswe maraba,

a a tjhehelwa tseleng tsohle,

ka Tempeleng ya Modimo wa hae

bora bo mo emetse.

₉Ba tetebetse

hara qhafutso ya bokgopo,

ba tetebetse sa mehleng ya Gibea.

Morena o tla hopola

bokgopo ba bona,

ebe o ba otlela dibe tsa bona.

₁₀“Ha ke ne ke qala

ho fumana Iseraele,

o ne a ka morara

o metseng hara lehwatata;

ha ke qala ho bona

baholoholo ba lona,

ba ne ba ka feiye ya dilopotsiya.

Empa hoba ba fihle Baale-Peore,

ba ineella modingwana

o hlabisang dihlong,

ba nyonyeha

sa manyala ao ba a ratang!

₁₁Tlotla ya Efraime

yona e tla nyamela,

e nyamele sa nonyana e fofela hole,

ho se be pelehi, kemaro, kemolo.

₁₂Leha ba ka hodisa bana ba bona,

ke tla ba timetsa,

ba hloke le thokolwana.

Ba tla ba madimabe

ha ke ba furalla!

₁₃Kamoo ke boneng Efraime kateng,

o ne a dutse monateng

sa motse wa Tire;

empa Efraime

o tla tswala bana ba hae,

a ba tswalle ho bolawa,

ho bolawa ke mmolai.”

₁₄Oho, Morena, ako ba nee!

Ekaba o tla ba nea eng, Morena?

Ba nee dipopelo,

dipopelo tse senyehelwang!

Ba nee matswele,

matswele a sa tsweng lebese!

₁₅“Bokgopo bohle ba bona

bo qadile Gilegale,

ka qala ho ba hloya ha ba le moo.

Ka baka la bokgopo bona ba bona,

ke tla ba leleka Tempeleng ya ka.

Nke ke ka hlola ke sa ba rata,

mahosana a bona wohle ke bafetohedi.

₁₆Efraime ke fate se seng se rathilwe,

motso wa hae o se o omeletse,

a ke ke a hlola a beha ditholwana.

Esita leha a ka tswala bana

ke tla bolaya bana ba popelo ya hae,

bana bao a ba ratang haholo.”

₁₇Modimo wa ka o tla ba furalla,

hobane ha ba a ka ba mo mamela;

ba tla fetoha baleleri hara baditjhaba.

₁Iseraele ke morara

o holang haholo;

ha tholwana tsa hae

di ntse di eketseha,

dialetare tsa hae

le tsona di a eketseha.

Ha mobu wa hae o atlehisa dijalo,

le yena o ntlafatsa difika,

fika tse kgumamelwang.

₂Pelo tsa Baiseraele di tletse mano,

kahoo ba fumantshwa kotlo ya bona.

Modimo o tla heletsa

dialetare tsa bona,

a dihe difika tsa medingwana bona.

₃Jwale ba tla re:

“Rona ha re na kgosi,

hobane ha re a ka ra tshaba Morena.

Esita leha re ne re ena le kgosi,

kgosi eo e ne e tla re thusa ka eng?”

₄Ba etsa ditshepiso tsa bosawana,

ba hlapanye ka leshano,

ba etse le dilekane,

kahoo ho hlaha dinyewe,

nyewe tse ngatangata,

di ke monatja o mela hara boleme.

₅Baahi ba Samaria ba tla thothomela,

ba thothometswe ke manamane,

manamane a Bete-Afene.

Tjhaba sa Samaria

se tla llela namane eo,

baprista ba yona le bona ba e llele,

bona baprista ba neng ba e thabetse,

ba nyakalletse tlotla ya namane,

tlotla e seng e tlositswe,

e tlositswe ho yona.

₆Namane eo e tla iswa Asiria,

e le nyehelo ho kgosi e kgolo.

Efraime yena o tla hlajwa ke dihlong,

Iseraele a swabiswe

ke keletso tsa hae.

₇Samaria le kgosi ya yona

di tla hoholwa,

di hoholwe sa mahohodi hodima metsi.

₈Dibaka tsa borapedi, tsa Afene,

di tla fediswa,

tsona tseo Iseraele

a etsetsang sebe ho tsona,

aletare tsa bona di mele meutlwa,

di mele tshehlo.

Ba tla re ho dithaba:

“Re kgurumetseng!”

Ho maralla ba re:

“Re weleng hodimo!”

₉“Wena Iseraele,

haesale o etsa sebe,

o se entse

ho tloha mehleng ya Gibea,

bofetohedi ba hao

bo qala moo Gibea,

hona moo Gibea

ntwa e tla o kgaoletsa teng.

₁₀Ke tla futuhela bafetohedi,

ke ba kgahlole,

ke ba kgobokanyetse

mabotho a baditjhaba,

ke ba otlele dibe tsa bona,

dibe tse ngatangata.

₁₁Efraime ke kgongwana

e thapisitsweng,

ke kgongwana

e ratang ho pola mabele;

molaleng wa yona o motle

ka bea joko,

ka bofella Efraime mohomeng

hore a leme,

Jakobo yena

a tle a phophothe makwete.

₁₂Motho ka mong

a kgathe thite ya hae,

a itjalle ho loka

ho tswalang lerato,

a kotule molemo

o tswalwang ke botshepehi.

Nako e fihlile ya ho batla Morena,

ya ho mmatla ho fihlela a etla,

a le nesetsa pula ya mahlohonolo.

₁₃Empa le ile la jala bokgopo,

kahoo le kotutse tholwana ya bokgopo,

la ja le yona tholwana ya leshano.

Kahobane o itshepetse

kariki tsa hao tsa ntwa,

o tshepile le boiyane

ba mabotho a hao,

₁₄morusu wa ntwa

o tla tsohela tjhaba sa hao,

qhobosheane tsohle tsa hao

ebe di a ripitlwa,

di ripitlwe

sa mohla tsatsi lane la ntwa,

ha Shalemane

a ne a ripitla Bete-Arabeele,

a pshatlaka basadi le masea a bona.

₁₅Le wena Bethele,

ho tla ba tjena ho wena,

ka baka la bokgopo

bo boholo ba hao.

Ha mafube a meso

a hlaha ka botjhabela,

kgosi ya Iseraele

e tla ripitlelwa ruri!”

₁“Ke ratile Iseraele

e sa le lesea,

ka bitsa mora wa ka

hore a tswe Egepeta.

₂Ha ke ntse ke pheeletse

ho ba bitsa kgafetsa,

ba nna ba suthella thoko ho nna;

ba nyehella bo-Baale ka mahlabelo,

ba tjhesetsa medingwana mokubetso.

₃Ke nna ya rutileng Efraime,

ka mo ruta ho tataya,

ka mo nenesa ka letsoho la ka;

empa ha ba a ka ba ela hloko

hore ke nna ya ba hlokometseng.

₄Ke ne ke ba hula

ka kgwele tsa mohau,

ke ba hula ka mehala ya lerato;

ka tlosa joko molaleng wa bona,

ka inamela fatshe, ka ba fepa.

₅“Ba tla kgutla,

ba kgutlele naheng ya Egepeta,

ba buswe ke kgosi ya Asiria,

hobane ba hanne ho kgutlela ho nna.

₆Sabole e tla tsekema

hara metse ya bona,

e robe mekwallo ya dikgoro tsa bona,

merero ya bona yohle e e nyopise.

₇Tjhaba sa ka

se itheretse ho mphuralla;

leha se ka ipiletsa

ho Ya Hodimodimo,

ha a ka ke a ba a se hlomamisa hape.

₈“Wena Efraime, nka o lahla jwang?

Wena Iseraele,

ka neelana ka wena jwang?

Nka o timetsa sa Adema jwang?

Ka o etsisa Seboime jwang?

Pelo ya ka e nkganela ho etsa jwalo,

lerato la ka le a hlasimoloha.

₉Nke ke ka phetha tsa kgalefo ya ka,

nke ke ka timetsa Efraime hape,

hoba nna ke Modimo, ha ke motho;

ke Ya Halalelang ya dulang hara lona,

ha nka ke ka tla ke halefile.

₁₀Etlare ha Morena a puruma sa tau,

tjhaba sa hae se mo sale morao;

etlare ha a puruma,

bana ba hae ba tle,

ba tle ba thothomela,

ba etswa bophirima.

₁₁Ba tla pakasela sa nonyana e fofa,

ba pakasele ba etswa Egepeta,

ba pakasele sa leeba ba etswa Asiria,

ke ba ahise matlung a bona,”

ho rialo Morena.

₁₂Efraime o nteetse hare,

a nteela hare ka mashano,

ba ntlo ya Iseraele bona ka thetso;

Juda yena o ntse a fetohetse Modimo,

Modimo ya tshepahalang,

Modimo ya halalelang.

₁Efraime yena o itshepetse lelea,

o kalakatisa moya wa botjhabela,

letsatsi ka leng

le mo ekeletsa leshano,

letsatsi ka leng

le mo ekeletsa tshenyeho.

Ba etsa selekane le naha ya Asiria,

ole e romelwe naheng ya Egepeta.

₂Morena o na le qoso

e tobaneng le Juda,

o tla otla Jakobo,

a mo otlele boitshwaro ba hae,

a mmuseletse

ho ya ka diketso tsa hae.

₃Ka popelong

o ne a tshwere ngwanabo serethe,

ha e se e le monna

a kolokotjhana le Modimo.

₄A kolokotjhana le lengeloi, a le hlola,

a ba a le kopa tlhohonolofatso,

a le kopa yona ka dikeledi.

A teana le Modimo a le Bethele,

a bua le yena a le hona moo.

₅Morena ke Modimo wa mabotho,

Morena ke lona lebitso la hae.

₆Wena, kgutlela ho Modimo wa hao,

o be le lerato, o be le toka,

o tshepe Modimo wa hao,

o mo tshepe kamehla yohle.

₇Mohwebi o sebedisa sekala

kala sa bolotsana,

o bile o rata le ho qhekanyetsa.

₈Efraime yena o a ithorisa, o re:

“Ke ruile haholo,

ke bokeletse matlotlo,

ha ho na sebe, ha ho na bokgopo,

ha ho na seo ba ka nqosang ka sona.”

₉Empa Morena o re:

“Ke nna Morena Modimo wa hao,

ho tloha

ha o ne o le naheng ya Egepeta;

ke tla etsa hore

o boele o phele ditenteng,

o phele teng

sa mohla mekete e halalelang.

₁₀Nna ke buile le baporofeta,

ka ba hlahisetsa dipono,

pono tse ngatangata,

ka bua le bona ka ho etsa dipapiso.”

₁₁Na bokgopo bo teng Gileade?

Batho ba teng ke mafeelafeelane!

Ba etsa mahlabelo ka dipohwana,

ba a etse Gilegale,

dialetare tsa bona di tla heletswa,

di ke mekolokotwane hara masimo.

₁₂Jakobo o balehetse naheng,

naheng ya Baarame,

Iseraele a sebeletsa ho nyala mosadi,

hore a tle a mo nyale, a alosa dinku.

₁₃Ka moporofeta,

Morena a ntsha Iseraele Egepeta,

mme ka moporofeta, a ba a mmaballa.

₁₄Efraime o phepheditse

Morena wa hae haholo,

kahoo molato wa ho tsholla madi

e tla ba wa hae,

Morena a mo otlele nyefolo

eo a nyefotseng ka yona.

₁Ha Efraime a bua,

tjhaba di ne di thothomela,

hoba o ne a le moholo

naheng ya Iseraele;

empa a kgumamela Baale,

kahoo a etsa sebe,

ka baka la sebe seo yaba o a shwa.

₂Jwale ba etsa sebe ho ya ho ile,

ba entse medingwana

ka silefera e qhibidisitswe,

ba etsa medingwana ya bona,

medingwana ya manamane,

kaofela ha yona

e le mesebetsi ya ditsebi.

Batho bana

ha ho buuwa ka bona ho thwe:

“Ha ba nyehela

ka mahlabelo a bona,

ba be ba ake

medingwana ya manamane.”

₃Kahoo ba tla tshwana

le mouwane wa hoseng,

ba je jwaloka phoka ya meso

e hlohlorehang,

ba be jwaloka mmoko

o fefolwang ke moya seotlong,

ba be jwaloka mosi

o foqohang hodima ntlo.

₄Empa Morena o re:

“Ke nna Morena Modimo wa hao,

ho tloha ha o le naheng,

naheng ya Egepeta.

Ha o a ka wa ba le Modimo e mong

kantle ho nna,

hobane ha ho Mopholosi e mong

kantle ho nna.

₅Ke o babaletse o le hara lehwatata,

o le naheng e omeletseng haholo.

₆Ka ba fepa, ba eja, ba ba ba kgora;

yare ha ba kgotshe

ba qala ho ikgohomosa,

kahoo yaba ba se ba ntebala.

₇Jwale ke tla ba futuhela,

ke ba futuhele sa lekakuba,

tseleng teng ke ba lalle sa lengau.

₈Ke tla ba futuhela

se bere e le tshehadi,

sa bere

e bolaetsweng madinyane a yona,

ke tsekolle maaparapelo a bona,

ke ba harole jwaloka tauhadi,

jwaloka hoja

ba harotswe ke sebatana.

₉“Wena Iseraele, ke tla o timetsa!

Ebe ke mang

ya ka tsebang ho o thusetsa?

₁₀E kae kgosi ya hao

e ke e o namolele,

e o sireletse metseng yohle ya hao?

Babusi bohle

ba metse ya hao ba kae,

bona bao o ne o bue ka bona,

wa re: ‘Ako mphe kgosi,

o be o mphe le mahosana’?

₁₁Ka o nea kgosi eo ke halefile,

ka ba ka o amoha yona ke halefile.

₁₂Bokgopo ba Efraime

bo ngotswe bukeng,

sebe sa hae se ke ke sa lebaleha.

₁₃Mahlaba a pelehi a tla tshwara mmae,

empa Efraime ke ngwana ya sethoto,

o lesisitheho

ho belehwa ka nako ya teng.

₁₄“Na nka ba phemisa,

ka ba phemisa Nqalo ya Bafu?

Na nka ba lopolla tleneng tse lefu?

wena lefu, lokisa mahloko a hao!

Wena lebitla, tjhorisa motsu wa hao!

Ha ke na ho ba le kutlwelobohloko!

₁₅Leha a ka atleha hara bana babo,

moya o hlahang botjhabela

o tla tsoha,

moya o tswang ho Morena

o tsohe lehwatateng;

mohlodi wa Efraime o tla nyamela,

sediba sa hae se kopotsang

ebe se a psha.

Matlo a polokelo ya hae

a tla lobelwa,

matlotlo wohle a bohlokwa

a haptjwe.

₁₆Samaria e tla fumana kotlo,

hobane e fetohetse Modimo wa yona.

Baahi ba yona

ba tla bolawa ka sabole,

masea a bona

a pshatlanngwe fatshe,

baimana ba bona

ba tabolakwe dimpa.”

₁Wena Iseraele,

kgutlela ho Morena,

Morena Modimo wa hao,

hobane o wele

ka baka la bokgopo ba hao.

₂Itokisetseng tseo le tla di bua,

le kgutlele ho Morena,

le re ho yena:

“Ako re tshwarele

bokgopo bohle ba rona,

mme thapedi ya rona o e amohele.

Bakeng sa ho nyehela

ka mahlabelo a dipohwana,

re tla o boka ka melomo ya rona.

₃Asiria e ke ke ya re pholosa,

ha re sa tla palama dipere tsa ntwa.

Tse entsweng ka matsoho a rona

re ke ke ra hlola re re

ke medimo ya rona,

hobane kgutsana

e utlwelwa bohloko ke wena.”

₄Jwale Morena o re:

“Bokwenehi ba bona ke tla bo fedisa,

ke ba rate ka rato lohle la pelo ya ka,

hobane kgalefo ya ka e ba fapohile.

₅Ho Iseraele ke tla ba jwaloka phoka,

Iseraele o tla thunya sa mohaladitwe,

a mele metso sa kedare ya Lebanone.

₆Makala a hae a tla hlomela,

a thathalle, a kgahlehe

jwaloka fate sa mohlwaare,

a nkge hamonate

sa kedare ya Lebanone.

₇Ba tla boela ba dula

moriting wa sona,

ba leme mabele, ba a tjhaye haholo,

ba etse dithunthung

jwaloka fate sa morara,

botumo ba bona

e ke ba veine ya Lebanone.

₈Ekaba Efraime

o sa tla etsang ka medingwana?

Ke mo utlwile,

ke tla be ke mo lebele.

Nna ke ka sefate sa kipere,

fate se setalana,

ke ka thuso ya ka

o behang ditholwana.”

₉Ya bohlale ke mang?

Tsena o tla di hlokomela.

Ya masene ke mang?

Yena o tla di utlwisisa.

Ditsela tsa Morena di nepahetse,

ba lokileng ba tla tsamaya ka tsona,

baetsadibe

ba kgothometsehe ho tsona.