To The Word – Day 126

“Tsamaya, o yo nyala,

o nyale mosadi wa seotswa,

o inkele le bana,

bana ba bootswa ba hae,

hobane lefatshe le furaletse Morena,

la mo furalla

ka ho hloka botshepehi.”

“Mo ree lebitso la Jesereele,

hoba haufinyane

ntlo ya Jehu ke tla e otla,

ke e otle,

ke phetetse madi a Jesereele,

bokgosi ba Baiseraele ke bo fedise.

₅Mohlang oo seqha sa Iseraele

ke tla se roba,

ke se robele kgohlong ya Jesereele.”

“Yena o mo ree

lebitso la Mohanuwa,

hoba ke tla hana

ho hauhela Baiseraele,

le ho ba tshwarela

nke ke ka ba tshwarela.

₇Empa ke tla hauhela

ba ntlo ya Juda,

nna Morena Modimo wa bona,

ke ba pholose.

Ha nka ke ka ba pholosa

ka seqha kapa sabole,

kapa ka ntwa

kapa dipere kapa bapalami.”

“Yena o mo ree lebitso la Lebamang,

hoba lona ha le setjhaba sa ka,

le nna ha ke Modimo wa lona.”

₁₀“Empa Baiseraele

ba tla ngatafala,

ba ngatafale sa lehlabathe la lewatle

le ke keng la methwa

leha e le ho balwa.

Moo ho neng ho thwe ho bona:

‘Lona ha le setjhaba sa ka’,

ho tla thwe:

‘Le bana ba Modimo ya phelang’.

₁₁Bajuda le Baiseraele ba tla kopana,

ba ikgethele mookamedi a le mong;

ba hole, ba atlehe naheng ya bona,

hoba tsatsi la Jesereele

le tla ba leholo!”

₂“Kgalemang mma lona,

le mo kgaleme,

hoba yena ha e sa le mosadi wa ka,

le nna ha ke sa le monna wa hae.

Lebososelo la bootswa a le fedise,

dinyatsi di tlohe sefubeng sa hae.

₃Ho seng jwalo ke tla mo tsodisa,

a be poosho sa mohla a tswalwang;

ke mo etse hore a ke lehwatata,

ke mo fetole e be sebataolo,

ke mmolaye ka ho mmolaisa lenyora.

₄Bana ba hae nke ke ka ba hauhela,

hoba ke bana ba tswetsweng,

ba tswetsweng ka bootswa.

₅Mma bona a na a iketsa seotswa,

a itlontlolla ha a ba emola,

a re: ‘Ke tla ikela

le medingwana ya ka,

yona e mphang dijo, e mphe le metsi,

e mphang boya, e mphe le motsitla,

e mphang ole, e mphe le dino tsa ka.’

₆Ka meutlwa tsela hae ke tla e ralla,

ke be ke e thibe ka ho haha lerako,

a se ke a tsamaya

ka tsela tsa hae tsa kgale.

₇O tla manakisa medingwana hae,

a e manakise, a se ke a e tshwara;

o tla e batlisisa, a se ke a e fumana.

Ke moo he a tla re:

‘Ke tla kgutlela

monneng wa ka wa pele,

ho yena ke ne ke iketla

ho feta kajeno.’

₈O na sa tsebe hore mofani ke nna,

mofani wa koro le veine le ole,

ya mo fileng silefera

le kgauta e ngata,

eo ba sebeleditseng Baale ka yona.

₉“Kahoo ke tla mo amoha

koro ya ka e butswitse,

ke mo amohe veine ya ka e ritelehile,

ke mo amohe boya le motsitla wa ka,

tseo a patang bofeela ba hae ka tsona.

₁₀Jwale bofeela ba hae

ke tla bo pepesa,

ke bo pepese

mahlong a medingwana ya hae;

ha ho ya tla mo namolela

matsohong a ka.

₁₁Ke tla fedisa menyaka yohle ya hae,

mekete ya hae ya selemo ka seng,

ya ho thwasa ha kgwedi

le ya Disabatha,

mekete yohle e halalelang ke e fedise.

₁₂Ke tla senya fate tsa morara,

ke senye le tsa feiye,

tseo a reng ke moputso wa hae,

moputso o tswang ho medingwana ya hae,

medingwana eo a e ratang haholo.

Fate tseo ke tla di etsa mofero,

batana tsa naha di itjelle tsona.

₁₃Ke tla mo otlela

matsatsi a hae a pele,

matsatsi a ho sebeletsa bo-Baale,

ao ka wona

a na ba tjhesetsa mokubetso,

a ikgabisitse ka masale le mabenyane,

a manakisana le medingwana ya hae,

mme nna a se a bile a ntebetse,”

ho rialo Morena.

₁₄“Bonang, jwale ke tla mo qekisa,

ke ye le yena kwana lehwatateng,

teng ke bue le yena ka lerato.

₁₅Moo teng ke tla mmuseletsa,

ke mmuseletse dirapa tsa morara,

kgohlo ya Akore

ke e etse monyako wa tshepo.

Teng o tla tsanyaola,

a tsanyaole sa botjheng ba hae,

sa mohla a neng a nyoloha Egepeta.

₁₆“Mohla tsatsi leo,”

ho rialo Morena,

“wena o tla mpitsa: ‘Monna wa ka’,

ha o sa tla hlola o mpitsa: ‘Baale’,

e leng ho bolela: ‘Monga ka’.

₁₇Mabitso a bo-Baale ke tla a fedisa,

le ho bitswa a ke ke a hlola a bitswa.

₁₈Mohla tsatsi leo

ke tla ba etsetsa selekane,

ke ba etsetse sona

le batana tsa naha,

ke ba etsetse sona

le nonyana tse fofang,

le tsona dihahabi

tse holobang mobung.

Ke tla fedisa seqha le sabole ya ntwa,

ke di fedise hona naheng eo,

bohle ba tle ba phele,

ba iphelele ka kgotso.

₁₉Ke tla o nyala o be wa ka kamehla,

ke o nyale ka toka le ka ho loka,

ka lerato le ka kutlwelobohloko.

₂₀Ke tla o nyala ka botshepehi,

mme o tla tseba hore ke nna Morena.

₂₁“Mohla tsatsi leo ke tla araba,”

ho rialo Morena,

“ke tla arabela mahodimo,

mahodimo wona a arabele lefatshe.

₂₂Lefatshe le lona le tla arabela,

le medise koro le veine le ole,

tsena di arabele Jesereele.

₂₃Ke tla mo jakisa naheng ena,

ke hauhele

ya neng a bitswa Mohanuwa;

ho bao e neng e se setjhaba sa ka

ke tla re: ‘Le setjhaba sa ka,’

bona ba re: ‘O Modimo wa ka.’ ”

₁Lona Baiseraele,

utlwang ntswe la Morena!

Morena o qosa baahi ba naha ena,

hobane ha ho nnete, ha ho mohau,

le ho tseba Modimo naheng ena

ha ho eo.

₂Ke mahlapa, ke leshano,

ke dipolao, ke boshodu,

ke ho etsa bohlola!

Melao yohleyohle ba a e tlola,

madi a tsholoha a sa tswa tsholoha!

₃Kahoo naha e tla apara bofifi,

bohle ba phelang ho yona

ba tla timela,

ho timele dibatana tsa naha,

ho timele nonyana tse fofang,

tlhapi tsa lewatle le tsona di timele!

₄“Empa ho se be motho ya tsekang,

kapa motho ya nyatsang e mong;

ke nna ya qosang wena moprista.

₅Ka baka leo,

o tla kgothometseha motsheare,

bosiu moporofeta

a kgothometsehe le wena,

mme nna ke tla timetsa mmao.

₆Tjhaba sa ka

se timetswa ke ho hloka tsebo.

“Kahobane tsebo o se o e lahlile,

le nna ke tla o lahla jwalo,

o ke ke wa ba moprista wa ka;

kaha o lebetse molao

wa Modimo wa hao,

le nna bana ba hao ke tla ba lebala.

₇Ha baprista ba ntse ba ngatafala,

ba ile ba ntshitelwa haholo;

kahoo tlotla ya bona

ke tla e fetola dihlong.

₈Ba ruiswa ke sebe sa tjhaba sa ka,

ba thabela ha se etsa bokgopo.

₉Jwaloka setjhaba,

baprista le bona ba tla otlwa,

ke tla ba otla,

ke ba otlele metsamao ya bona,

ke ba putse

ka baka la diketso tsa bona.

₁₀“Ba tla ja mahlabelo,

empa ba ke ke ba kgora;

ba tla ineella bootswa,

empa ba ke ke ba ata,

hobane ha ba sa tsotella Morena,

₁₁ba ineeletse ho etsa bootswa.”

“Veine e ntjha le veine ya molatsa

e hlokisa tjhaba sa ka kelello.

₁₂Tjhaba sa ka se laola ka dikoqwana,

melangwana ke yona

e buang le sona.

Moya wa bootswa o a se kgelosa,

se furaletse Modimo,

se etsa bootswa.

₁₃Tlhorong tsa dithaba

ba nyehela ka mahlabelo,

maralleng teng

ba tjhesetse mokubetso,

le tlasa eike le popoleri le leoka,

hoba teng moriti ke o maphodi.

Kahoo baradi ba lona

ba etsa bootswa,

dingwetsi tsa lona le tsona di a feba.

₁₄“Baradi ba lona

nke ke ka ba otlela bootswa,

le dingwetsi tsa lona

ha di etsa bofebe,

hobane banna bona

ba matha le diotswa,

ba nyehela ka mahlabelo

ba ena le matekatse,

tjhaba se hlokang kutlwisiso

se tla timela!

₁₅“Wena Iseraele,

leha o iphetotse letekatse,

Juda a se ke a ba molato

jwaloka wena,

Gilegale teng le se ke be la hata,

le Bete-Afene le se nyolohele teng,

kapa la hlapanya

ka Modimo ya phelang!

₁₆Baiseraele ba manganga

sa kgomo ya sethole,

na ebe Morena a ka ba alosa,

a ba katla sa dikonyana phuleng?

₁₇Efraime o kgomaretse medingwana,

mo leseng, le mo tlohele.

₁₈Dino tsa bona di a ba tahisa,

ba etse bootswa ba sa kgaotse;

babusi ba bona

ba hlanyetsa tse dihlong.

₁₉Setsokotsane se tla ba sobokella,

se ba sobokelle, se ba fefole,

mahlabelo a bona

a ba hlabise dihlong.”

₁“Lona baprista, utlwang mona!

Lona ba ntlo ya Iseraele,

elang hloko!

Lona ba ntlo ya kgosi,

sekehang ditsebe!

Kahlolo ena e tobane le lona:

Le bile leraba la ho tshwasa Misepa,

letlowa le adilweng hodima Tabore.

₂Bafetohedi ba tetebetse hara dipolao,

ke tla ba otla kaofela ha bona.

₃Tsa Efraime ke di tseba sethapo,

tsa Iseraele hase bofihla ho nna.

Wena Efraime, o etsa bootswa,

Iseraele yena o itshilafaditse.”

₄“Diketso tsa bona di a ba thibela,

ba sitwa ho kgutla,

ho kgutlela ho Modimo wa bona.

Moya wa bootswa o se o ba hapile,

Morena yena ha ba mo tsotelle.

₅Boikgohomoso ba Iseraele

bo a mo ahlola,

Iseraele le Efraime

ba tla kgothometseha,

ba be ba we

ka baka la bokgopo ba bona,

Juda le yena a we le bona.

₆Ba tla ya ka mehlape,

ya dikgutshwane le ya makgomo,

ba ye ka yona ho ya batla Morena,

empa ha ba ka ke ba mo fumana,

hobane yena o arohane le bona.

₇Ha ba a ka ba tshepahala ho Morena,

ba mo tswaletse bana,

bana ba dikgaupane.

Jwale etlare ha kgwedi e thwasa,

ba timetswe le masimo a bona.”

₈“Letsang lenaka le le Gibea,

le letse terompeta le le Rama;

hlabang mokgosi le le Bete-Afene,

pele-a-pele wena Benjamine!

₉Mohla le fihlang tsatsi la kahlolo,

naha ya Efraime

e tla fetoha nanaola.

Ke phatlalletsa merabe ya Iseraele,

ke e phatlalletsa seo e leng nnete.

₁₀Mahosana a Juda

a ka ba tsekang meedi,

ba suthisang

mekolokotwane ya meedi.

Ke tla hlatsa kgalefo ya ka,

ke e hlatsetse hodima wona,

ke e tshollele hodima wona,

ke e tshollele sa morallo wa metsi.

₁₁Efraime o hateletswe,

o hlotswe ke nyewe,

hobane a ne a batla thuso,

a e batla ho medingwana.

₁₂Ho ba ntlo ya Efraime

ke tshwana le tshwele,

ho ba ntlo ya Juda ke ka diboko.

₁₃“Ha Efraime

a bona bolwetse ba hae,

Juda yena a bona diso tsa hae,

Efraime yena

a ikela naheng ya Asiria,

a ya kopa thuso

ho kgosi ya mohlabani.

Empa kgosi e sitilwe ho mo fodisa,

ya hlolwa ho phekola diso tsa hae.

₁₄Ho ba ntlo ya Efraime

ke tla tshwana le tau,

ho ba ntlo ya Juda eke ke tawana.

Nna ka sebele

ke tla harola, ke ikele,

ke ba hlasinye,

ba hloke monamoledi.

₁₅Ke tla tsamaya ke ikgutlelle haeso,

ho fihlela ba dumela molato wa bona,

ba o dumela, ba bile ba mpatla.

Matshwenyehong a bona

ba tla mpatla, ba mpatlisise.”

₁“Tloong, re kgutleleng ho Morena:

Ke yena

ya re hlenhlantseng dinama,

empa ke yena ya tla re fodisa;

ke yena

ya re ntshitseng maqeba,

empa ke yena ya tla a tlama.

₂Kamora matsatsi a mabedi

o tla re phedisa,

ka tsatsi la boraro ebe o a re emisa,

re tle re phele mmoho le yena.

₃A re lekeng ho tseba Morena,

re ikitlaeletseng ho mo tseba.

Ho tla ha hae ke ha nnete,

ha nnete ya ho tla ha mafube;

o tla tla ho rona sa medupe ya pula,

sa pula tse kolobisang,

tse kolobisang mobu selemo.”

₄Empa Morena o re:

“Wena Efraime,

ke etse jwang ka wena?

Wena Juda, ke etse jwang ka wena?

Rato la lona le ka mohodi

o thibang hoseng,

le ka phoka ya meso

e nyamelang kapele.

₅Kahoo ke le kgalemetse

ka baporofeta ba ka,

ka dipolelo tsa ka ka le timetsa,

kahlolo tsa ka

tsa le wela sa lehadima.

₆Ke thabela mohau

e seng mahlabelo,

ho tseba Modimo,

e seng nyehelo tsa setjheso.

₇Ba sentse selekane sa ka

jwaloka motse wa Adamo,

kahoo ba ntlhokela botshepehi.

₈Gileade ke motse

wa ba etsang bokgopo,

Gileade ke motse

o kganathetseng madi a batho.

₉Jwalokaha dinokwane

di ye di lalle motho,

hlopha sa baprista le sona se a lalla,

se bolaele batho tseleng

e yang Shekeme,

mahlabisadihlong ana

se a etse ka morero.

₁₀Ke bone manyala

ka tlung ya Iseraele,

Efraime o etsa bootswa,

o bo etsetsa hona kateng,

mme Iseraele o itshilafaditse.

₁₁Le wena Juda, kahlolo e o emetse,

mohla ke kgutlisang setjhaba sa ka.”

₁“Ha ke re ke fodisa Iseraele,

dibe tsa Efraime di a pepeseha,

bokgopo ba Samaria bo senolehe:

Bobedi ba etsetsana bolotsana,

Mashodu a a thua,

a kene ka matlung,

diterateng

dinokwane di hape tsa batho.

₂Kelellong tsa bona ha ba hlokomele

hore ke hopola bokgopo ba bona.

Kahohle dibe tsa bona di ba dikile,

mme di pontsheng ya ka kamehla.”

₃“Ka bokgopo ba bona

ba thabisa kgosi,

ba thabise le mahosana

ka mashano a bona.

₄Kaofela ha bona ba etsa bofebe,

ba tuka sa sebopi se beseleditswe,

mophehi a sa hloke ho se roteletsa,

ho tloha ha a qala ho duba hlama,

ho fihlela hlama eo e ba e bela.

₅Mohla mokete wa kgosi ya rona,

ba tahisa mahosana, ba a nwesa veine,

kgosi e etsise basomi ka ho nwa.

₆Dipelo tsa bona di tjhesa sa sebopi,

ha ba qatjhame, ba laletse kgosi.

Kgalefo ya bona bosiu e a kekela,

ere bo esa e tuke sa malakabe.

₇Kaofela ha bona ba tjhesa sa sebopi,

ba fenethile babusi ba bona.

Dikgosi tsa bona di wele mofela,

ha ho e kile ya ipiletsa ho nna.

₈“Efraime o ikopantse le baditjhaba;

Efraime ke senkgwa se fubisitsweng.

₉Matla a hae a jelwe ke baditjhaba,

empa hoo yena ha a ho lemohe.

Hlooho e se e le marasi a ho taba,

empa le hoo ha a ho lemohe.

₁₀Baiseraele ba ahlolwa

ke boikgantsho ba bona,

empa ha ba kgutlele ho Morena,

Morena Modimo wa bona,

kapa ho mmatla,

leha tsena di etsahetse.

₁₁“Efraime ke leebanakgorwana,

leebanakgorwana le sethoto,

o ipiletsa ho Egepeta,

a nto ya ho Asiria.

₁₂Hohle moo ba yang teng

ke tla ba tshwasa,

ke akgele tlowa la ka hodima bona;

ke ba theole sa nonyana tse fofang,

ke ba tshwase

ha ba kgobokana mmoho.

₁₃Bomadimabe bo ba wele hodimo,

hobane ba balehile pela ka!

Kotlo e ba wele hodimo,

hobane ke mona ba ntshitetswe!

Ke ne ke re ke a ba lopolla,

empa ba nnetile ka leshano!

₁₄Ha ba ipiletse ho nna

ka dipelo tsa bona,

ba bokollela phateng tsa bona feela.

Ha ba llela koro le veine

ba a itshehaka,

empa nna ba a mphetohela.

₁₅Le hoja ke ba otlile,

ke ba matlafaditse,

empa bona ba ntherela tse kgopo.

₁₆Ba ka seqha se kgwele e hlephileng,

ha ba kgutlele ho Ya Hodimodimo.

Mahosana a bona

a tla bolawa ka sabole,

a bolaelwe boikakaso

ba dipuo tsa wona,

a jewe tlepane naheng ya Egepeta.”