To The Word – Day 125

₂Oho, Morena, ke tla kopa thuso

ho fihlela neng,

empa wena o sa mmamele?

Ke ipiletse ho wena,

ke re: “Dikgoka!”

empa wena o sa mpholose?

₃O etsetsang

hore ke bone mahlomola,

ke bone tshenyeho,

le dikgoka ke di bone?

Kahohle ke dintwa

le ditsekisano feela.

₄Ka lebaka lena,

molao o nyehlisitswe,

toka le yona ha e phethahatswe.

Ba lokileng

ba qhekanyetswa ke ba kgopo,

ka hona kahlolo di etswa

di sokamisitswe.

₅“Tadima ditjhaba, o ke o lebelle;

ako makale, o be o hlollwe.

Ke etsa ho hong

mehleng ena ya hao,

ke etsa hoo

o neng o ke ke wa ho dumela

leha o ne o ka ba wa ho bolellwa.

₆Bona he,

jwale ke tsosa Bakalatiya,

tjhaba sane se bohale, se lehala,

se thalatsang kahohle le lefatshe,

ho ikgapela metse

eo e seng ya sona.

₇Ke setjhaba se tshabehang,

tjhaba se sehloho;

melao ya sona,

le yona tlotla ya sona,

ke tse iketseditsweng

ke sona ka bosona.

₈Pere tsa sona

di lebelo ho feta mangau,

di bohale

ho feta diphiri ka phirimana;

bapalami ba di kgemisa,

ba di kgemisa lekgarakgara,

bapalami ha ba tswe mona le mona,

ba fofa sa letlaka le ubella sefifi.

₉Bohle ba futuha

ba kalatisaka dikgoka,

mabotho a bona a fiela sa moya,

a fiela sa moya wa lehwatata;

bathopuwa ba bona ba bangata,

ba bangata sa lehlabathe la lewatle.

₁₀Dikgosi ba a di soma,

babusi ba a ba teola;

diqhobosheane tsohle

tsona ba a di tella,

ba haha metero ya mobu,

ba hape metse.

₁₁Ba fefola sa moya o foka,

o ba o feta,

ba fefola jwalo, ebe ba a ikela;

banna bana ke banna ba sehloho,

matla ke wona modimo wa bona.”

₁₂Oho, Morena, o bile teng

pele le ho tlholeho!

O Modimo wa ka,

o Ya Halalelang wa ka!

O Modimo wa ka,

Modimo ya sa shweng.

Oho, Morena,

o ba kgethetse ho phetha kahlolo.

Oho, Lefika la ka,

o ba reretse ho re kgalema.

₁₃Mahlo a hao

a halalela ka ho fetisa,

a halalela hoo

a ke ke a tadima bokgopo.

Diphoso le tsona

ha o ko di mamella.

Jwale ho ya kang

ha o mamella balotsana?

O kgutseditseng

ha ba kgopo ba timetsa batho,

ba ba fetang ka ho loka?

₁₄O tshwantshitse batho

le tsa lewatle ditlhapi,

le dibopuwa tse lelemelang

di se na mmusi.

₁₅Tsohle di tshwaswa ka dilope,

di tshwaswa ke sera,

se be se di tshwase

ka letlowa la sona,

se nto di hula

ka seketswana sa sona,

se etse ditlatse tsa nyakallo

ha se tshwasitse.

₁₆Kahoo se etsetsa

letlowa la sona mahlabelo,

diketswana le tsona

di tjhesetswe mokubetso,

hoba ke ka tsena

se phelang ka boiketlo,

le dijo tsa sona

ke dimenyemenye.

₁₇Na sera se tla nne

se tsomule sabole,

se nne se harinye ditjhaba

ho se mohau?

₁Ke tla ema sethaleng sa ka,

ke lalle ke le toreng,

toreng ya balebedi,

ke mamele

seo Morena a se buang ho nna,

ke imamelle

hore na ke tla mo araba jwang.

₂Yaba Morena o a nkaraba, o re:

“Ngola taba tsa pono ena

hodima matlapa,

o di ngole hantle

babadi ba se ke ba hakwa.

₃Pono ena e sa emetse nako ya yona,

e haufi e phethahala,

mme e ke ke ya thetsa.

Leha e ka dieha, wena o e emele,

e tla fela e phethahale,

ha e ka ke ya dieha.

₄Bona, ya kgopo yena

a ke ke a phela,

athe ya lokileng

o tla phela ka tumelo ya hae.”

₅“Ruri, veine ke moeki wa motho;

ya ikgohomosang a ke ke a phela.

O meharo jwaloka Nqalo ya Bafu;

jwaloka lefu ha a ke a kgora.

O ipokellela ditjhaba tse ngatangata,

merabe kaofela a e fetole bathopuwa.

₆“Kaofela ha bona

ba tla mo nyedisa,

ba mo nyahanye,

ba mo nyefole, ba re:

‘Ho madimabe

ya ipokellelang tsa boshodu,

ya ithuisang ka ho hanyapetsa batho!

Hoo ho tla ba jwalo ho fihlela neng?’

₇Bao o ba hanyapetsang

ha ba tlo o tsometsa,

wena o thothomele

ha ba o tsohela matla?

Wena o tla ba mothopuwa wa bona!

₈Kaha o tlatlapile

ditjhaba tse ngata,

masalla a tsona

le wona a tla o tlatlapa,

hobane o tsholotse madi a batho,

o sentse dinaha,

le metse wa e ripitla,

le baahi bohle ba yona

wa ba timetsa.

₉“Ho madimabe

ya ithuisang ka mano,

ya hahang ntlo ya hae

hodima qhowa,

hore a tla tsebe ho phema koduwa.

₁₀Merero ya hao

e hlabisitse ba heno dihlong,

merero ya ho bolaya

ditjhaba tse ngata;

kahoo o beile

bophelo ba hao kotsing.

₁₁Majwe a lerako a tla hlaba mokgosi,

maballo a lehong

a arabele mokgosi oo.

₁₂“Ho madimabe

ba hahileng motse wa bona,

ba o hahileng ka ho tsholla madi,

ba o haha

hodima moralo wa bolotsana!

₁₃Na hase Morena wa mabotho

ya ileng a rera,

hore mosebetsi wa batho

o fediswe ka mollo,

le hore ditjhaba di sebeletse lelea?

₁₄Empa tsebo e tla tlala,

e tlale lefatshe kahohle,

tsebo ya ho tseba tlotla ya Morena,

e tlale lefatshe

sa metsi a tletse lewatle.

₁₅“Ho madimabe

ya nwesang ba habo tahi,

a ba tshelle yona

ho fihlela ba tahwa,

a tla tsebe

ho bona bofeela ba bona.

₁₆O tla aparelwa ke dihlong,

e seng ke tlotla.

Nako ke ya hao jwale, ya hore o nwe!

Nwa he, bofeela ba hao bo pepesehe!

Senwelo se ka tsohong

le letona la Morena,

se a pota, se tla be se fihle ho wena,

ebe dihlong

di aparela tlotla ya hao.

₁₇Tshenyo e entsweng Lebanone

e tla o timetsa,

polao ya dibatana tsa yona

e tla o tshosa,

hoba madi a batho

a tsholotswe ke wena,

wa senya naha, le motse wa o ripitla,

baahi bohle ba wona wa ba timetsa.

₁₈“Modingwana wa bohata

o thusa mo-o-etsi ka eng?

Ke setshwantsho feela,

se bolela mashano!

Moetsi wa sona

o tshepa mmopo wa matsoho a hae,

o iketseditse modingwana,

modingwana o semumu!

₁₉Ho madimabe ya reng ho lehong:

‘Phaphama!’

le ho lejwe le semumu:

‘Phahama!’

Na medimo e tjee

e ka tseba ho porofeta?

E kgabisitswe ka kgauta

le ka silefera,

empa ka ho yona

moya wa bophelo ha o yo!

₂₀Morena yena

o ka Tempeleng ya hae,

Tempele ya hae e halalelang;

fatshe lohle

le ke le kgutse kapela hae.”

₂Morena, botumo ba hao

ke bo utlwile,

le yona mesebetsi ya hao

ke a e tshaba, Morena.

Ako e ntjhafatse

mehleng ena ya rona,

o etse hore e tsejwe

bophelong ba rona,

leha o halefile

o nno hopole ho hauhela.

₃Modimo o fihlile a etswa Temana,

Ya Halalelang

a etswa Thabeng ya Parane.

Tlotla e aparetse mahodimo,

fatshe le tletse dithoko tsa hae.

₄Kganya ya hae

e ka mahlasedi a letsatsi,

ka diatleng tsa hae

mahlasedi a a betseha!

Ke moo matla a hae

a patehileng teng.

₅Lefu la sewa le mo eteletse pele,

feberu yona

e latela mehlaleng ya hae.

₆Ha a ema, lefatshe la sisinyeha,

ha a tadima, merabe ya thothomela;

dithaba tsa boholoholo tsa heleha,

maralla a kgalekgale a batalla.

Ditsela tsa hae ke tsa kamehla yohle.

₇Ke bone baahi ba Kushane

ba tshohile haholo,

le baahi ba Midiane

ba otlanya mangwele.

₈Morena,

na o ne o halefetse dinoka?

Na kgalefo ya hao

e ne e tloketse melatswana,

kapa o ne o halefetse lewatle,

ha o no palame dipere tsa hao,

o kaletse kariki tsa hao tsa tlholo?

₉O ila hula seqha sa hao

wa se tjheha,

metsu e tletse ka sehlajweng sa hao,

wa patsola lefatshe,

dinoka tsa phalla.

₁₀Dithaba tsa o bona,

yaba di a reketla,

diphororo tsa metsi tsa phorosela,

bodiba ba metsi le bona ba hwasa,

yaba maqhubu

bo a akgoletsa hodimo.

₁₁Letsatsi le kgwedi

tsa ema themelele!

ha metsu ya hao e bebang

e tsekema,

ha rumo la hao le benyang

le phatsima.

₁₂Wa hata hodima lefatshe o halefile,

wa hatakela ditjhaba o hlokofetse.

₁₃O no futuha

ho ya lopolla tjhaba sa hao,

o ilo pholosa motlotsuwa wa hao.

Molaodi wa ba kgopo

o mo timeditse,

wa mo hlobodisa

ho tloha hodima hlooho,

wa mo hlobodisa ho ya tswa leotong.

₁₄Ka metsu ya hae

molaodi wa na wa mo hlaba,

mohla bahlabani

ba neng ba re futuhetse,

ba re futuhetse hore ba re qhalanye,

ba thabetse ho bolaya bahlophehi,

bahlophehi ba neng ba ipatile.

₁₅Wa hatakela lewatle

ka dipere tsa hao,

bodiba bo boholo wa bo lwebehlanya.

₁₆Ha ke utlwa ke ile ka ferekana,

ka bebenya melomo

ha ke utlwa modumo oo;

masapo a ka a qala ho bola,

maoto a ka le wona a rerekela.

Empa tsatsi la koduwa

ke tla le lebella,

tsatsi leo ke le lebelle ka mamello,

hore le tjhabele

tjhaba se re futuhetseng.

₁₇Leha fate sa feiye

se ke ke sa fupa,

kapa fate sa morara sa se ke sa beha;

leha mohlwaare

o ke ke wa beha ditholwana,

kapa kotulo ya eba siyo masimong;

leha masaka a dikgutswane a ka oma,

kapa masaka a dikgomo

a mela mohlwa,

₁₈nna ke tla nne ke ithabelle Morena,

ke nyakallele Modimo,

Mopholosi wa ka.

₁₉Morena Modimo ke yena

ya mmatlafatsang,

ya potlakisang maoto a ka

jwaloka a dikgama,

ya ntsamaisang hodima dihlaba.

₂Morena ke Modimo ya boulelang,

Morena ya phetetsang,

Morena o a phetetsa,

o tletse kgalefo;

Morena o iphetetsa

ho ba mo lwantshang,

kgalefo ya hae e tlokela dira tsa hae.

₃Morena o dieha ho halefa,

o matla haholo,

a ke ke a lesa ho otla ba molato.

O tsosa setsokotsane le sefefo

ha a tsamaya,

maru a ke lerole maotong a hae.

₄O kgalemela lewatle,

ebe o a le pshesa,

dinoka tse phallang

le tsona a di pshese.

Bashane le Karamele di a omella,

dithunthung tsa Lebanone

tsona di pone.

₅Ha a hlaha dithaba di a sisinyeha,

maralla le wona a qhibidihe;

lefatshe le a reketla

ha Morena a hlaha,

lefatshe le bohle ba ahileng ho lona.

₆Ha Morena a halefile,

ya ka tiisetsang ke mang?

Ha kgalefo ya Morena e tlokoma

ya ka e mamellang ke mang?

Kgalefo ya hae e tuka sa malakabe

kapele ho yena mafika a a pshatleha.

₇Morena o molemo, ke setshabelo;

ke setshabelo

mohla tsatsi la ditlokotsi,

ba mo tshepang o a ba sireletsa.

₈Jwaloka sekgohola,

kgohola se phuthumanang,

Ninife o tla e timetsa jwalo,

dira tsa hae a di lelekele lefifing.

₉Le rera mano afe

a ho lwantsha Morena?

O tla le timetsa, le timelle ruri!

Sera se ke ke

sa mo tsohela matla habedi.

₁₀Ba tla tjheswa

sa meutlwa e harahane,

ba tjheswe sa dirite di omeletse,

ba ntse ba itlopile veine ya bona.

₁₁Motho ya rerelang Morena bokgopo,

ya kgothaletsang bomenemene,

o hlahile hara motse wa Ninife.

₁₂Morena o bua tjena:

“Leha ba ka ba matla,

ba eba bangata,

ba tla bolawa, ba timelle ruri!

Lona tjhaba sa ka, ke ile ka le otla,

nke ke ka hlola ke le otla hape.

₁₃Ke tla roba joko

e le hatileng melala,

mahlaahlela a le holehileng

ke a kgaole.”

₁₄Malebana le Ninife,

Morena o entse taelo:

“Wena Ninife o tla hloka ditloholo,

tloholo tse tla bitswa

ka lebitso la hao.

Medingwana ya hao ke tla e pshatla,

ke e pshatlele ka tempeleng ya yona,

ke pshatle le yona e bopilweng.

Bitla la hao ke tla le etsa sesomo.”

₁₅Bonang maoto a moromuwa

hodima dithaba,

maoto a ya tlisang

molaetsa o molemo,

ya phatlalatsang molaetsa wa kgotso!

Wena Juda keteka mekete ya hao,

dikano tsa hao o di phethahatse.

Ya kgopo a ke ke

a hlola a o futuhela,

o timeditswe, a timeletswa ruri.

₁Sera se a o futuhela, wena Ninife,

bea balebedi marakong a tshireletso,

bea dihlwela le ditseleng tsa hao;

itlame letheka, o hlomelle ntwa,

o kgobokanye mabotho wohle a hao!

₂Morena o tla tsosolosa

tlotla ya Jakobo,

a e tsosolose le tlotla ya Iseraele,

le hoja basenyi ba mo hlobodisitse,

ba hataketse makala a morara wa hae.

₃Thebe tsa bahlabani ba hae

ke tse kgubedu,

aparo tsa bona le tsona

ke tse kgubedu.

Kariki tsa bona tsa ntwa di a tsekema,

thekong ya ntwa

di tsekema malakabe;

ka marumo bahlabani ba a hlakisa.

₄Kariki tsa bona

di phunyeletsa hara diterata,

di etsa menyakwe mabaleng a motse;

di phatsima

sa dirumola di phatsima,

di tjhalametsa

sa lehadima le tjhalametsa.

₅Ninife e hlabela

bahlabani ba yona mokgosi,

empa tseleng ya bona

ba a kgothometseha,

ba kgoroha

ba leba lerakong la motse,

ba kgoroha

ba se ba teteantse dithebe.

₆Marako a thibelang noka

a a phatloha,

ntlo ya bokgosi yona e a heleha.

₇Ninife e a hlobodiswa, e a thopuwa,

makgabunyane a Ninife a a lla,

a lla sa maebanakgorwana,

a lla a ntsa ikotla difuba kgafetsa.

₈Ninife e ka letamo le phatlohile.

Mokgosi ke oo: “Sekwele! Sekwele!”

Empa ha ho le ya mong

ya kgutlang.

₉Lobelang silefera,

le lobele le kgauta!

Tlotlo le wele makgwabane,

ke nyakafatane!

₁₀Ninife e futuhetswe,

ya lobelwa, ya timetswa!

Pelo di saretswe,

mangwele a a tsherema,

matla a fedile,

fahleho tsohle di pudufetse.

₁₁Ebe jwale letsaba la tau le hokae?

Selao sa ditawana sona se kae?

Moo tau e neng e fepela teng

ke kae?

Moo tawana di neng di ipothela,

di ipothela teng, di se na tshabo?

₁₂Tau e ne e harola, e fepa ditawana,

diphofu e di harolela ditauhadi;

matsaba a yona e a tlatsa diphofu,

e a tlatsa ka dinama

tseo e di harotseng.

₁₃“Wena Ninife ke a o lwantsha,”

ho rialo Morena wa mabotho.

“Ke tla tjhesa kariki tsa hao tsa ntwa,

bahlabani ba hao

ba bolawe ka sabole,

ke o amohe tsohle

tseo o di hapileng,

bonatla ba hao lefatsheng bo fele,

maqosa a hao

a se hlole a bo boledisa.”

₁Ho madimabe motse

o kganathetseng madi,

o tletseng thetso,

o tletseng le kgapo,

motse o sa kgaotseng ho lobela!

₂Ho lla sephadi, makoloi a a kititsa,

dipere di a kgema, ho lla tlhako,

le kariki tsa ntwa di a kgehlemana.

₃Bapalami ba dipere ba a kgoroha,

sabole di a tsekema,

marumo a a phatsima!

Ditopo ke mofela, di robellane feela,

bongata ba tsona ha bo na palo,

batho ba kgothometseha

hodima tsona.

₄Ninife e otlwa jwalo

hobane e le seotswa,

boloi ba yona

bo ke ke ba ba ba bolelwa,

ka bootswa ba yona e hohela ditjhaba,

ka boloi ba yona

e fetole merabe makgoba.

₅“Wena Ninife, ke a o lwantsha,”

ho rialo Morena wa mabotho.

“Ke tla o hlobodisa, ke o tsodise.

Ke tla pepesetsa ditjhaba

bofeela ba hao,

mebuso e bone tse dihlong tsa hao.

₆Ke tla o silafatsa,

ke o hlabise dihlong,

ke o etse

sebonwang-se-bonwa-ke-bohle.

₇Bohle ba o bonang

ba tla o baleha, ba re:

‘Motse wa Ninife o fetohile masupi,

ekaba ke mang ya tla o llela?’

Ke tla fumana mang

ya tla o tshedisa?”

₈Na o lokile ho feta Tebese,

e neng e hahilwe bopong la Nile,

e neng e potapotilwe ke metsi?

Lewatle le ne le e haheleditse,

metsi a lona a e etseditse lerako.

₉Kushe le Egepeta di ne di e hlomella,

di e hlomella, ho se na moedi;

Pute le Lebia tsona di e thusetsa.

₁₀Empa le yona Tebese

e ile ya haptjwa,

tjhaba sa yona sa iswa bothopuweng.

Mateanong a diterata tsohle,

bana ba yona ba pshatlakanngwa;

mahosana a yona a laolwa ka lotho,

yaba bahlomphehi ba yona

ba a tlangwa,

ba tlangwa ka mahlaahlela.

₁₁Le wena Ninife, o tla tahwa,

o tahwe, o be o thekesele,

o batle moo

o ka ipatelang sera teng.

₁₂Qhobosheane tsohle tsa hao

di ka fate tsa feiye,

fate tsa feiye tse butswang pele:

Ha di hlohlorwa, di a wa,

di wela ka hanong la moji wa tsona.

₁₃Ako tadime mabotho a hao,

kaofela a itshwanela le basadi feela!

Dikgoro tsa naha ya hao di ahlame,

di ahlametse

hore dira tsa hao di kene;

mollo o tjhesitse mekwallo ya tsona.

₁₄Ikgelle metsi,

o itokisetse thibella,

qhobosheane tsa hao o di matlafatse;

tjheka letsopa, o dube seretse,

ebe jwale o bopa setene!

₁₅Mollo o tla o tjhesetsa hona teng,

sabole e o bolaele hona moo,

e o je sa ditsie di kumola dijalo.

Ata, o ikatise sa ditsienyane,

o ikatise jwaloka bookgolane!

₁₆O ekeditse palo ya bahwebi ba hao,

wa e eketsa

ho feta naledi tsa lehodimo.

Jwalokaha ditsie di ye di je,

ebe di a ikela,

le bona ba tla o ja, ebe ba a ikela.

₁₇Balebedi ba hao

ba itshwanela le ditsie,

bangodi ba hao

ba ka boiyane ba ditsie,

tse itshwarellang marakong

mohla mohatsela,

ere ha le tjhaba, di futhumala, di fofe,

di fofele moo

ho seng motho ya tsebang.

₁₈Oho, wena kgosi ya Asiria,

babusi ba hao ba kgalehile,

mahosana a hao a ipaqametse fatshe.

Tjhaba sa hao

se qhalakane dithabeng,

ha ho le ya mong ya se phuthang.

₁₉Leqeba la hao ha le na pheko,

leoma la hao le isa lefung.

Bohle ba utlwang

ditaba tsena tsa hao,

ba opela ho wa ha hao mahofi.

Ke mang

ya phonyohileng sehloho sa hao,

sehloho sa hao se sa kgaotseng?