To The Word – Day 107

₁Tsoho la Morena

ha le lekgutshwanyane,

hoo a ke keng a pholosa;

tsebe ya hae ha e a thibana

hoo a ke keng a utlwa.

₂Empa makgopo a lona

a le arohantse le Modimo wa lona,

dibe tsa lona

di patile fahleho sa hae,

e le hore a se ke a le utlwa.

₃Matsoho a lona

a kganathetse madi,

menwana ya lona

e silafaditswe ke bokgopo.

Le buile leshano

ka melomo ya lona,

maleme a lona a buile tse kgopo.

₄Ha ho le ya mong ya batlang toka,

ha ho le ya mong

ya buang nnete dinyeweng;

ba tshepa dikgang tsa mafeela,

ba bua leshano;

mehopolo ya bona e mebe,

mme e tswala bokgopo.

₅Ba qhotsisa mahe a marabe,

ba lohe dikgwele

tse kang tsa bolepo ba sekgo;

ya jang mahe a marabe o a shwa,

ha le leng le pshatlwa,

ho tswa marabe.

₆Bolepo ba bona

bo ke ke ba fetoha diaparo,

ba ke ke ba ikapesa

ka tseo ba di etsang.

Mesebetsi ya bona

ke mesebetsi e kgopo,

ka ketso tsa bona

ba tsosa moferefere.

₇Maoto a bona

a ba mathisetsa sebeng,

a bobebe ho tsholla madi

a se nang molato,

menahano ya bona

ke menahano e kgopo,

mehlaleng ya bona

ke mophula wa tshenyo,

le wa timetso.

₈Tsela e isang kgotsong

ha ba e tsebe,

mehlaleng ya bona

toka ha e fumanwe.

Tsela tsa bona

ke tse matswedintsweke,

ya tsamayang ho tsona

a ke ke a fumana kgotso.

₉Ka baka leo, toka e hole le rona,

le ho loka ha ho fihle ho rona.

Re batla lesedi,

empa re bona lefifi,

re batla kganya,

empa re tsamaya lefifing.

₁₀Re phopholetsa mabota

jwaloka batho ba difofu,

re phopholetsa tsela

jwalokaha eka ha re na mahlo,

re kgothometseha

hara motsheare wa lengeta

jwalokaha eka ke ka shwalane;

hara ba phelang

rona re jwaloka bafu.

₁₁Bohle re puruma jwaloka dibere,

re lla habohloko jwaloka maeba.

Re batla toka,

empa ha re e fumane,

re batla topollo,

empa e holehole le rona.

₁₂Re ditshito di ngata mahlong a hao,

re ahlolwa ke bopaki

ba dibe tsa rona.

Ditshito tsa rona

di re maname kamehla,

bokgopo ba rona

re bo tseba hantle:

₁₃Ke ho sitelwa Morena

le ho bua leshano,

ke ho furalla Modimo wa rona,

ho kgothaletsa bohatelli

le bofetohedi,

ho nahana leshano

le ho le bua ka pelong tsa rona.

₁₄Kahoo toka e tjhetjhiswa kasanthao,

ho loka ho emeletse hole le rona;

diterateng nnete ha e sa le yo,

botshepehi le bona

ha bo sa fumanwa.

₁₅E, nnete e fela e lahlehile,

ya furallang bokgopo

o etswa hampe.

Tsena tsohle Morena a di bona,

a se ke a thabiswa ke bosiyo ba toka.

₁₆Morena a bona hore ha ho na motho,

a makala ha a bona

ho se ya kenang dipakeng;

ka matla a hae a hlola dira tsa hae,

ho loka ha hae ha mo tshehetsa.

₁₇Ho loka ha sireletsa sefuba sa hae,

hloohong a rwala

katiba ya tshepe ya pholoho;

a apara diaparo tsa boiphetetso,

tjheseho ya eba yona kobo ya hae.

₁₈O tla ba putsa

ho ya ka diketso tsa bona,

a halefele dira tsa hae

a be a di otle,

ba dihlekehlekeng

a ba nee moputso wa bona.

₁₉Bitso la Morena le tla tshajwa,

le tshajwe ho tloha bophirimela,

tlotla ya hae e tshajwe,

e tshajwe ho tloha botjhabela.

Ha sera se futuha jwaloka sekgohola,

Moya wa Morena

o tla se lelekela hole.

₂₀“Mopholosi o tla tla Sione,

a tle ho ba Jakobo

ba bakelang dibe tsa bona,”

ho rialo Morena.

₁“Tsoha, phatsima,

hobane sedi la hao le tlile,

tlotla ya Morena

e phatsima hodima hao.

₂Lefifi le tla aparela lefatshe,

tjhaba di be fifing la bo-nka-ntjana;

empa Morena o tla phatsima,

a phatsime hodima hao,

tlotla ya hae e bonahale ho wena.

₃Baditjhaba ba tla hohelwa

ke sedi la hao,

kgosi di hohelwe

ke redi le phatsimang la hao.

₄“Phahamisa mahlo

o qamake kahohle:

Bohle ba a phutheha,

ba itlisa ho wena;

bara ba hao ba tla tswa holehole,

baradi ba hao ba tle

ba sikilwe ka matsoho.

₅Tsena o tla di bona,

thabo ya hao e kgaphatsehe,

pelo ya hao e kokomohe

ke ho nyakalla haholo.

Matlotlo a lewatle e tla ba a hao,

maruo a baditjhaba

a tla tliswa ho wena.

₆“Boiyane ba dikamele

bo tla putukana ho wena,

mekoloko ya dikamele

e tswang Midiane le Efa;

Basheba bohle

ba tla tlisa kgauta le mokubetso,

ba bine thoko tsa Morena,

ba mo tumise.

₇Mehlape yohle ya Kedare

e tla phuthwa, e tliswe ho wena,

dipheleu tsa Nabajota

di tla o sebeletsa, di etswe nyehelo

e amohelehang aletareng ya ka,

ebe Tempele ya ka

ke e tlotlisa haholo.

₈“Baa ba pakaselang

jwaloka leru ke bafe?

Baa ba kang maeba

a fofela dihlaheng tsa wona?

₉Ke dikepe tse bokanang mabopong,

mabopong a dihlekehleke,

dikepe tseo batsamaisi ba tsona

ba ntebeletseng,

dikepe tsa Tarashishe

di di eteletse pele,

di tlisa bara ba hao

ba tswang holehole,

ba tlang ba kakatetse

silefera le kgauta ya bona,

ho tla tlotlisa Morena,

Modimo wa hao,

e leng Ya Halalelang wa Iseraele,

hoba ke yena ya o tlotlisitseng.

₁₀“Baditjhaba

ba tla tsosa marako a hao,

dikgosi tsa bona di o sebeletse;

le hoja ha ke halefile

ke ile ka o otla,

empa ka baka la lereko la ka

ke o hauhetse.

₁₁Kgoro tsa hao

di tla dula di ntse di butswe,

ha di ka ke tsa kwalwa

motsheare le bosiu,

batho ba o tlisetse maruo,

maruo a baditjhaba,

dikgosi tsa bona

di tla di entse mokoloko.

₁₂Tjhaba sa mmuso

o ke keng wa o sebeletsa,

se tla timela,

e, tjhaba seo

se tla fela se timelle ruri.

₁₃“Tlotla ya Lebanone

e tla tliswa ho wena:

Difate tsa modutu le tsa phaene,

le tsa kiperese,

tsena di tla tliswa

ho kgabisa sehalalelo sa ka,

mme ke tla tlotlisa Tempele

eo ke ahileng ho yona.

₁₄Bara ba bahatelli ba hao

ba tla o obamela,

bohle ba neng ba o nyedisa

ba koqame maotong a hao,

ebe ba o bitsa Motse wa Morena,

Sione ya Ya Halalelang wa Iseraele.

₁₅“Le hoja o no furaletswe,

o bile o hloilwe,

ho se na motho ya keng a o tjhakele,

ke tla o etsa ya kgabane

kamehla yohle,

ya tla thabisa

e mengatangata meloko.

₁₆O tla anya lebese la baditjhaba,

o anye matswele

a dikgosi tsa bona,

o tsebe hore nna Morena,

ke Mopholosi wa hao,

Molopolli wa hao,

Ya Matla wa Jakobo.

₁₇Bakeng sa lethose

ke tla o tlisetsa kgauta,

bakeng sa tshepe

ke o tlisetse silefera;

bakeng sa lehong

ke tla o tlisetsa lethose,

ke o tlisetse tshepe

bakeng sa majwe a moralla.

Ke tla etsa hore kahohle

kgotso e rene,

ho loka e be yena mmusi wa hao.

₁₈Lerata la dintwa

ha le sa tla utlwahala,

naheng ya hao,

leha e le tshenyo

le nanaola meeding ya hao;

marako a hao

o tla a rea lebitso la Topollo,

kgoro tsa hao

tsona o di ree la thoriso.

₁₉Letsatsi e ke ke ya hlola

e eba lesedi la hao motsheare,

le bosiu ngwedi e ke ke ya hlola

e o bonesetsa;

Morena e tla ba lesedi la hao,

sedi la kamehla yohle,

Modimo wa hao

e be yena tlotla ya hao.

₂₀Tsatsi la hao ha le ka ke

la hlola le sa dikela,

kgwedi ya hao ha e ka ke

ya hlola e eya fifing;

hoba Morena e tla ba lesedi la hao,

sedi la kamehla yohle,

tshiu tsa bofifi ba hao

le tsona di fele.

₂₁Tjhaba sa hao sohle

e tla ba sa ba lokileng,

naha e be lefa la sona

la kamehla yohle,

e be lehlomela

le hlomilweng ke nna,

e be mosebetsi wa matsoho a ka,

oo ke tlotliswang ka wona.

₂₂Lelapa le lenyenyane

le tla ngatafala e be dikete,

setjhaba se fokolang

sona se matlafale,

nna Morena, ke tla potlakisa sena,

ke se potlakise ka nako ya sona.”

₁Moya wa Morena Modimo

o hodima ka,

hobane o ntlotseditse

ho bolella mafutsana,

molaetsa o molemo.

O nthometse ho thoba pelo

tsa ba swabileng,

ho phatlalletsa bathopuwa

tsa tokoloho,

le hore ba tjhankaneng

ba tla lokollwa;

₂ho phatlalatsa selemo sa Morena,

lemo sa mehauhelo,

le letsatsi la phetetso

ya Morena wa rona,

le ho tshedisa bohle

ba leng bofifing;

₃ho nea ba Sione ba leng bofifing

moqhaka o kgabane

bakeng sa molora,

ole ya thabo

bakeng sa bofifi,

seaparo sa thoriso

bakeng sa maswabi,

ba tle ba bitswe fate tsa ho loka,

tse lenngweng ke Morena

hore a tle a tlotliswe.

₄Ba tla tsosa masupi a kgale,

ba ntjhafatse thako tsa boholoholo;

ba tla tsosa metse e neng e ripitlwe,

dithako tsa meloko e mengatangata.

₅Baditjhaba ba tla le sebeletsa,

ba be ba dise le mehlape ya lona,

melata e le lemele masimo,

e le hlomele le morara wa lona.

₆Lona le tla bitswa

baprista ba Morena,

le bitswe

basebeletsi ba Modimo wa rona.

Maruo a baditjhaba

a tla jewa ke lona,

le ithorise ka tlotla ya bona.

₇Kaha dihlong tsa lona

di phetahane habedi,

ho songwa le mahlapa

e bile kabelo ya lona,

leruo la naha ya lona

le tla eketseha habedi,

thabo ya lona

e be ya kamehla le mehla.

₈“Nna Morena, ke rata toka,

bolotsana le bokgopo

ke di hloile;

ke tla tshepahala,

ke ba nee moputso wa bona,

ke etse selekane

sa kamehla yohle le bona.

₉Moloko wa bona

o tla tsejwa ke baditjhaba,

ditloholo tsa bona

di tsejwe hara matjhaba;

bohle ba di bonang

ba tla di tseba,

ba di tsebe e le moloko,

moloko o hlohonolofaditsweng,

wa hlohonolofatswa ke Morena.”

₁₀Ke tla thabela Morena

ka pelo ya ka yohle,

moya wa ka

o thabele Modimo wa ka haholo,

hobane o nkapesitse kobo

ya ho pholoswa,

a nkwahela ka seaparo sa ho loka,

jwalokaha monyadi

a ikgabisa ka moqhaka,

a ikgabisa

jwaloka moprista a ikgabisa,

monyaduwa a tlatlapela

mabenyane a hae.

₁₁Jwalokaha mobu

o medisa dimela tsa wona,

tshimo le yona e medisa

dijalo tsa yona,

Morena Modimo o tla medisa

ho loka le ho rorisa,

tsena a di medise

moo matjhaba wohle a di bonang.

₁Ka baka la Sione

ha nka ke ka kgutsa,

ka baka la Jerusalema

ha nka ke ka phomola,

ho fihlela

ho loka ha yona ho kganya

ho kganya sa mafube a meso,

topollo ya yona

e tshwana le lebone le tukang.

₂Baditjhaba ba tla bona

ho loka ha hao,

dikgosi tsohle di bone

tlotla ya hao;

wena o tla bitswa

ka lebitso le letjha,

leo o tla la rewa

ke Morena ka seqo.

₃Matsohong a Morena

o tla ba mofapahlooho wa tlotla,

matsohong a Morena

o be moqhaka wa bokgosi.

₄Ha o ka ke wa hlola

o bitswa Molahluwa,

kapa naha ya hao e bitswe Nanaola;

empa o tla bitswa Monnyakalatsi,

naha ya hao e bitswe Monyaduwa,

hobane Morena o thabiswa ke wena,

naha ya hao

e tla ba mohatsa Morena.

₅Jwalokaha mohlankana

a nyala morwetsana,

bara ba hao le bona

ba tla o nyala;

jwalokaha monyadi

a thabela monyaduwa,

Modimo wa hao le yena

o tla o thabela.

₆“Ke beile balebedi

hodima marako a hao,

wena Jerusalema,

ba ke keng ba kgutsa

motsheare le bosiu:

Lona ba rapelang Morena

le se ke be la kgutsa,

₇Morena le se ke be la mo fa phomolo,

ho fihlela a hlomamisa Jerusalema,

a etsa hore lefatsheng mona

e be Sebabatso!

₈“Morena o hlapantse

ka tsoho le letona la hae,

a hlapanya

ka matla a tsoho la hae, a re:

‘Ruri ha nka ke ka hlola

ke fana ka mabele a hao,

ke a nea dira tsa hao

hore e be dijo tsa tsona;

baditjhaba ha ba ka ke ba hlola,

ba enwa veine ya hao,

veine eo o e sebeleditseng ka thata.

₉Ba kotulang mabele

ke bona ba tla a ja,

ba a je, ebe ba rorisa Morena;

ba kgang morara

ke bona ba tla nwa veine,

ba e nwelle mabaleng,

mabaleng a Sehalalelo sa ka.’ ”

₁₀Tswang! Tswang!

ka dikgoro tsa motse,

le lokise tsela ya tjhaba sa ka;

batalatsang, batalatsang mmila,

le suthise majwe,

le phahamisetse

ditjhaba tsohle mokgele.

₁₁Morena o entse phatlalatso,

a e etsa ho ya fihla dipheletsong,

pheletsong tsa lefatshe:

“Bolellang moradi wa Sione,

le re: ‘Mopholosi wa hao

o sa le tseleng,

o tla a nkile moputso wa hae,

phetetso ya hae

e mo eteletse pele.’ ”

₁₂Ba tla bitswa tjhaba se halalelang,

ba bitswe balopollwa ba Morena;

wena o tla bitswa Mpatlwane,

o bitswe motse o sa furallwang.

₁Eo ya tswang Edomo

ekaba ke mang,

ya tswang Bosera

aparo tsa hae di le kgubedu?

Eo ya apereng tse ntlentle

ekaba ke mang,

ya hwantang

ka bonatla bo boholo ba hae?

“Ke nna ya buang ka tsa ho loka,

ke nna ya nang le matla,

matla a ho pholosa!”

₂Ke hobaneng ha aparo tsa hao

di le kgubedu,

e ka tsa ya tlabikelang

tlhotlelo sa veine?

₃“Ke tlabiketse tlhotlelo sa veine

ke le inotshi,

hara baditjhaba

ha ho ya kileng a ba le nna.

Ke ile ka ba hatakela ke halefile,

ka ba tlabikela

ke loloma ke kgalefo;

madi a bona

a qaphaletsa aparo tsa ka,

kobo tsohle tsa ka

tsa silafatswa ke madi ao.

₄Ke hopotse tsatsi

leo ke tla iphetetsa ka lona,

lemo sa topollo le sona

se se se fihlile.

₅Ka qamaka kahohle,

empa ka hloka mothusi,

ka makala haholo

ha ke bona ho se motshehetsi;

yaba tsa pholoho

ke di sebetsa ka letsoho la ka,

kgalefo ya ka

ya eba yona motshehetsi wa ka.

₆Ke ile ka hatakela ditjhaba

ke halefile,

ka di tsherehanya

ke loloma ke kgalefo,

madi a tsona ka a tshollela fatshe.”

₇Ke tla bolela

tsa rato la Morena le sa feleng,

le ketso

tseo a lokelang ho di rorisetswa,

ho ya ka tsohle

tseo a re etseditseng tsona,

melemo e meholo

ho ba ntlo ya Iseraele,

eo a ba abetseng yona

ho ya ka mehauhelo ya hae,

le ho ya ka ketso tsa hae

tsa lerato, tse ngata.

₈“Ruri ke tjhaba sa ka,”

ho rialo Morena,

“bana ba ka

ba ke keng ba bua leshano;”

kahoo ya eba yena Mopholosi,

Mopholosi wa bona,

₉matshwenyeho wohle a bona

le yena a mo tshwenya.

Hase lengeloi le ba pholositseng,

ba pholositswe ke Morena ka seqo,

ka lerato le ka mohau wa hae

a ba lopolla;

ho tloha kgale a ba nka,

a ba a ba jara.

₁₀Empa ba fetohela Morena,

Moya o Halalelang ba o swabisa,

ka baka leo,

yena a fetoha sera sa bona,

a ba lwantsha e le yena ka seqo;

₁₁ke ha ba hopola matsatsi a fetileng,

ba hopola Moshe le tjhaba sa habo,

ba re: “O kae

ya neng a tshedise modisa,

a mo tshedisa

le mohlape wa hae lewatleng?

O kae ya neng a theole

Moya o Halalelang wa hae,

a o theolela hodima Moshe?

₁₂O kae ya neng a tataise

tsoho le letona la Moshe,

a le tataisa

ka tsoho le tlotlehang la hae;

ya neng a arohanye metsi

kapele ho bona,

a etsa hore bitso la hae

le tume kamehla yohle?

₁₃O kae ya neng a ba tshedise,

a ba tshedisa hara madiba?”

Jwaloka pere e sa kgoptjweng

hara lehwatata,

le bona ha ba tshela

ha ba a ka ba kgoptjwa.

₁₄Jwaloka dikgomo tse theohelang

kahara kgohlo,

Moya wa Modimo

o ile wa ba phomotsa.

Tjhaba sa hao o se tataisitse tjena,

hore o iketsetse lebitso le tlotlehang.

₁₅Wena ya leahong la hao

le halalelang, le tlotlehang,

tadima fatshe,

o le lehodimong, o bone!

E kae tjheseho ya hao,

a kae matla a hao?

E kae kutlwelobohloko ya hao,

o kae mohau wa hao?

Oho, Morena,

o re hanetse ka tsona!

₁₆Wena Morena, ke wena ntata rona,

le hoja Aborahama a sa re tsebe,

le Iseraele a sa re letho ka rona,

oho, wena Morena,

ke wena ntata rona,

Molopolli wa rona:

Ke bitso la hao la kamehla yohle.

₁₇O re tloheletseng, Morena,

ho kgeloha tsela tsa hao?

O thatafaleditseng pelo tsa rona,

hore re se ke ra o tshaba?

Kgutla ka baka la rona

bahlanka ba hao,

rona merabe eo e leng lefa la hao.

₁₈Ke hobaneng ha ba kgopo

ba futuhetse Sehalalelo sa hao,

dira tsa rona di hataketse

baka se halalelang sa hao.

₁₉Re tshwana le bao o eso ba buse

ho tloha kgale,

ba eso ka ba bitswa

ka lebitso la hao.

₁Oho, hoja wa phetla mahodimo

wa theoha,

thaba di tle di reketle

ha di o bona!

₂Jwalokaha mollo o hotetsa patsi,

metsi a bele,

le wena theoha,

dira tsa hao di tsebe bitso la hao,

o etse hore tjhaba di thothomele

ha di o bona!

₃Ha o ne o etsa tse tshosang,

tseo re neng re sa di lebella,

o ile wa theoha,

thaba tsa reketla ha di o bona.

₄Ho tloha mehleng ya kgalekgale

ha ho ya kila utlwa,

ha ho ya kila bona

Modimo e mong ntle ho wena,

Modimo ya thusang

ba mo tshepileng.

₅O thusa ba etsang ho loka,

ba ho etsang ba thabile,

bona ba hopolang ditsela tsa hao.

Leha o no halefile

re nnile ra etsa dibe;

ebe jwale re ka pholoswa jwang?

₆Bohle re tshwana le motho,

le motho ya sesila,

ketso tsohle tsa rona tse lokileng

di ka dikatana tse ditshila;

bohle re omella sa lehlaku le omella,

dibe tsa rona

di re fefola sa moya ha o fefola.

₇Ha ho na motho

ya ipiletsang ho wena,

kapa ya lekang hore a o kgomarele;

hobane o re patetse fahleho sa hao,

wa etsa hore re motele

ka baka la dibe tsa rona.

₈Leha ho le jwalo, Morena,

wena o ntata rona;

rona re letsopa, wena o sebopi,

bohle re mosebetsi

wa matsoho a hao.

₉Oho, Morena, se ke wa halefa,

wa halefa ho feta tekanyo;

se hopole dibe tsa rona,

wa di hopola kamehla yohle.

Ako hopole hore re tjhaba sa hao.

₁₀Metse e halalelang ha hao

e fetohile lehwatata,

Sione ke lehwatata,

Jerusalema ke nanaola.

₁₁Tempele e halalelang,

e tlotlehang ya rona,

moo o neng o rorisetswa teng,

o roriswa ke baholoholo ba rona,

e tjhesitswe ka mollo, ya re lore!

Tsohle tsa bohlokwa

di fetohile masupi.

₁₂Na tse etsahetseng tsee

ha di o ame?

Na ha o na ho etsa letho, Morena?

Na o tla fela o kgutse,

o re otle ho feta tekanyo?