To The Word – Day 102

₁“Tshedisang setjhaba sa ka,

se tshediseng,”

ho rialo Morena.

₂Kgothatsang Jerusalema ka lerato,

e bolelleng:

Bokgoba ba yona bo fedile,

sebe sa yona se tshwaretswe,

Morena o e otletse sona haholo.

“Lokisang mmila wa Morena,

le o lokise felleng,

le otlollele Modimo wa rona

mmila lehwatateng.

₄Dikgohlo tsohle di tla katwa,

dithaba le maralla di bothalatswe,

le tsona ditutudu di bothalatswe,

baka tse makukuno di batalatswe.

₅Tlotla ya Morena e tla bonahatswa,

batho bohle

ba tla e boha ba le mmoho,

hoba Morena o boletse jwalo.”

Yaba nna ke re:

“Ke tla howa ke reng?”

Ere:

“Batho bohle ba jwaloka jwang,

tlotla ya bona

e ka ya palesa tsa naha.

₇Jwang bo a pona,

palesa di foforehe,

ha moya wa Morena

o fokela ho tsona.

Ruri batho ba jwaloka jwang.

₈Jwang bo a pona,

palesa di foforehe,

empa ntswe la Modimo wa rona

le hlola kamehla.”

₉Wena Sione,

ya tlisang molaetsa o molemo,

nyolohela thabeng e phahameng.

Wena Jerusalema,

ya tlisang molaetsa o molemo,

howeletsa haholo o se na tshabo.

Bolella metse ya Juda, o re:

“Bonang,

Modimo wa lona ke enwa!”

₁₀Bonang, Morena Modimo

o tla e le Ya Matla,

o tla busa ka letsoho la hae.

Bonang, o tla le moputso wa hae,

phetetso ya hae e mo eteletse pele.

₁₁O katla mohlape wa hae

jwaloka modisa,

dikonyana o di sika

ka matsoho a hae,

a di sikele sefubeng sa hae,

ditswetse tsona a di kganne hantle.

₁₂Ya kila metha metsi a lewatle

ke mang,

a a metha ka seatla sa hae?

Ya kila seha moedi wa mahodimo

ke mang,

a o seha ka seatla sa hae?

Ya kila kga role la lefatshe

ka sethoto ke mang?

Ya kila bea dithaba le maralla,

a di bea sekaleng, ke mang?

₁₃Ya kila ruta Moya wa Morena

ke mang?

Ya kila mo ruta

e le moeletsi wa hae ke mang?

₁₄Morena o kopile mang

hore a mo eletse?

Ho ahlola ka toka

a ho rutwa ke mang?

Tsebo yona a e rutwa ke mang?

Tsela ya kutlwisiso

a e bontshwa ke mang?

₁₅Ruri tjhaba di ka lerothodi

rothodi la metsi ka nkgong,

di ka lerolenyana

ha le le sekaleng;

ho yena boima ba dihlekehleke

bo ka lerolenyana.

₁₆Fate tsa Lebanone

ha di lekane ho besa,

ho besa mollo aletareng,

phoofolo tsa teng

ha di lekane ho etsa setjheso.

₁₇Tjhaba tsohle ke lefeela ho yena,

o di tadima e le mafeela

a se nang thuso.

₁₈Jwale Modimo

le ka mo lekanya le mang?

Hona le ka re o tshwana le mang?

₁₉Setsebi se etsa setshwantsho

sa modimo wa bohata,

ebe lelala le se maneha kgauta,

le se etsetse ketane tsa silefera.

₂₀Mofutsana ya sitwang

ho etsa nyehelo e jwalo,

o kgetha sefate

se ke keng sa ba sa bola;

a batle setsebihadi sa mohlalefi

ho mo etsetsa setshwantsho

sa modimo wa bohata,

se ke keng sa wa.

₂₁Na ha le tsebe,

kapa ha le eso utlwe?

Ha le a ka la tsebiswa

ho tloha tshimolohong?

Ha le eso utlwisise

haesale lefatshe le thewa?

₂₂Modimo o dutse teroneng

kahodima lefatshe,

baahi ba lona

ba tshwana le mehlwanyane.

Mahodimo o a sarolotse

jwalokaha eka ke lesira,

a a ala sa tente

eo ho phelwang ho yona.

₂₃Mahosana o a etsa mafeelafeelane,

babusi ba fatshe lena

a ba fetole lefeela.

₂₄Ba jwaloka sethopo

se qetang ho hlongwa,

seo metso ya sona e eso ka e tiya;

ha moya wa Modimo o foka

se ye se pone,

setsokotsane se se fefole

jwalokaha eka ke mmoko.

₂₅“Jwale le ka ntekanya le mang?

La re thaka ka yena ke mang?”

ho rialo Ya Halalelang.

₂₆Lelalang, le tadime mahodimo:

Tseo le di bonang

di bopilwe ke mang?

Ke ya balang naledi tsa lehodimo

a di bale ka bomong,

lebotho ka leng

a le bitse ka lebitso la lona?

Ka baka la matla a hae a maholo,

le ka baka la bonatla ba hae,

ha ho le le leng le lahlehang.

₂₇Wena Jakobo, o leng Iseraele,

ke hobaneng ha o bua, o re:

“Metsamao ya ka

Morena ha a e tsebe,

Modimo wa ka

ha a natse tokelo ya ka?”

₂₈Na ha le tsebe,

kapa ha le eso utlwe?

Morena ke Modimo

wa kamehla yohle,

ke yena Mmopi wa lefatshe lohle.

A ke ke a kgathala kapa a tepella,

mehopolo ya hae

e ke ke be ya fihlelwa.

₂₉O matlafatsa ba tepeletseng,

ba kgathetseng

o ba tsosa molota.

₃₀Batjha ba a kgathala,

mme ba tepelle,

bahlankana ba kgothometsehe,

ba be ba we;

₃₁empa ba tshepileng Morena

ba tla tsoha molota,

ba fofele hodimo jwaloka ntsu;

ba tla matha,

empa ba ke ke ba kgathala,

ba tsamaye,

ba se ke ba fellwa ke matla.

₁“Lona dihlekehleke

kgutsang kapele ho nna!

Ditjhaba a di ke di imatlafatse!

A di ke di atamele di bue,

re kopaneng mmoho

tulong sa kahlolo.

₂“Ya tswang botjhabela

o ila tliswa ke mang,

yena ya hlolang hohle

moo a yang teng?

Ya mo neileng matla

a ho hlola ditjhaba ke mang,

hore a hatakele dikgosi

tse mo emang kapele?

O di fekefa ka sabole,

a di fetole lerole,

ka seqha sa hae

a di fefole sa mmoko!

₃O a di phaladisa,

a tswe a se na mongwapo,

a potlake hoo

ekang le mobu ha sa o hata!

₄Ya entseng hore tsee di etsahale

ke mang?

ya bitsitseng meloko

ho tloha tshimolohong

ke mang?

Ke nna Morena,

ebile ke nna wa ho qala,

ke nna Morena

ya tla ba le ba ho qetela.”

₅Ba dihlekehlekeng ba ile ba bona,

mme ba kenwa ke tshabo,

ba pheletsong tsa lefatshe

bona ba thothomela,

yaba ba a tla, ba atamelana,

₆motho ka mong

o thusana le mohahabo,

motho ka mong

o re ho ngwanabo: “Matlafala!”

₇Kahoo sebetli

se kgothatsa lelala la kgauta,

ya photlang ka noto

o kgothatsa sefuthi,

o re ho sona: “E kopane hantle!”

O kgokgothela modimo wa bohata

ka dipekere, e le hore o tiye,

o se ke wa ketoha.

₈“Empa wena Iseraele,

o leng mohlanka wa ka,

wena Jakobo,

eo ke mo kgethileng,

wena tloholo sa Aborahama,

motswalle wa ka,

₉ke o latile pheletsong tsa lefatshe,

ka o bitsa

o le qoleng tse hole tsa lona,

ka re ho wena:

‘O mohlanka wa ka,’

ke ikgethetse wena,

ha kea o lahla.

₁₀O se ke wa tshaba,

hobane ke na le wena,

o se tsielehe,

hobane ke Modimo wa hao.

Ke tla o matlafatsa,

ke be ke o thuse,

ke o tshehetse

ka tsoho la ka le letona,

ka tsoho le letona

le etsang ho loka.

₁₁“Batho bohle ba o halefelang

ba tla tlontloloha,

ba aparelwe ke dihlong;

batho bohle

ba lwantshanang le wena

ba tla fetoha lefeela,

ba be ba timele.

₁₂Leha o ka tsoma dira tsa hao,

ha o ka ke wa ba wa di fumana.

Batho ba o futuhelang ka ntwa

ba tla tshwana le lefeelafeelane,

₁₃hoba ke nna Morena,

Morena Modimo wa hao,

ya utlang tsoho la hao le letona,

ya reng: ‘Se tshabe,

nna ke tla o thusa.’

₁₄“O se ke wa tshaba,

wena Jakobo, sebokonyana,

wena Iseraele wa motwantwanyane;

ke nna ya tla o thusa,”

ho rialo Morena,

Molopolli wa hao,

Ya Halalelang wa Iseraele.

₁₅“Bona, ke tla o etsa selei

se phophothang, se setjha,

se nang le meno e ntjhotjho.

O tla thua dithaba,

o di phophothe,

maralla wona o a sile, a ke mmoko;

₁₆tsena o tla di olosa,

moya o di fefole,

sefefo se matla se di hasanye.

Thabo ya hao e tla ba ho Morena,

tlotla ya hao

e be Ya Halalelang wa Iseraele.

₁₇“Mafutsana le bahloki

ba batla metsi,

empa metsi ha ba a fumane,

maleme a bona

a omeletse ke lenyora.

Empa nna Morena, ke tla ba araba,

nna Modimo wa Iseraele,

nke ke ka ba furalla.

₁₈Ke tla phunya mehlodi ya dinoka,

ke e phunye

tutudung tsa lehlabathe,

kahara dikgohlo didiba di phorosele.

Lehwatata ke tla le fetola

le tlale matsha,

naha e omeletseng

e runyarunye didiba.

₁₉Ke tla medisa

fate tsa dikedare lehwatateng,

ke medise mositsane,

mohlakola le mohlwaare;

matswatlareng ke tla medisa

fate tsa modutu,

di mele hammoho

le tsa phaene le kiperese.

₂₀Batho ba tla bona tsena

ba be ba tsebe,

ba hlokomele, ba be ba utlwisise:

Morena o entse tsena

ka letsoho la hae,

Ya Halalelang wa Iseraele

o di hlodile.”

₂₁“Ritelang nyewe ya lona,

lona medingwana,”

ho rialo Morena.

“Bolelang mabaka a lona,”

ho rialo Kgosi ya Jakobo.

₂₂“Atamelang, le ke le bolele,

le re bolelle tse tla etsahala.

Re bolelleng

hore na tsa kgalekgale ke dife,

e le hore re tle re di nahane,

re be re tsebe

le pheletso ya tsona;

kapa le re bolelle

tse tla etsahala.

₂₃Re tsebiseng

tseo e leng hona di tla tla,

re tle re tsebe

hore efela le le medimo.

Etsang tse ntle

kapa le etse tse kgopo,

re tle re bone,

ebe re tlalwa ke tshabo.

₂₄Bonang, ho hang lona ha le letho,

mesebetsi ya lona

ke mafeelafeelane;

ya ikgethelang lona ke manyala!

₂₅“Ke tsositse e mong leboya,

mme ke enwa o a tla,

ya tswang botjhabela

o tla ipiletsa ho nna.

O hatakela babusi

jwaloka hoja e le seretse,

jwaloka sebopi se kgoba letsopa.

₂₆Ya boletseng tsee tshimolohong

ke mang re tle re tsebe?

Kapa a di bolela pele,

re tle re re o ne a nepe?

Ha ho ya kila di bolela,

ha ho ya kila di senola,

polelo tsa hae

ha ho ya kila di utlwa!

₂₇Ke nna wa pele

ya boleletseng Sione:

‘Bona, ako ba bone ke bao!’

Ka roma leqosa Jerusalema

ho isa molaetsa o molemo.

₂₈Ha ke tadima medingwana

ha ke bone motho,

kahara yona ha ho moeletsi,

ha ho ya nkarabang ha ke e botsa.

₂₉Bonang, medingwana eo

ke ya bohata!

Mesebetsi ya yona ke ya lefeela,

medingwana ya bona

ke lefeela le kang moya!”

₁“Bonang, Mohlanka wa ka

eo ke mo kgethileng, ke eo,

mokgethwa wa ka ya nkgahlang;

ke theoletse Moya wa ka,

ka o theolela hodima hae,

o tla tlisetsa ditjhaba toka.

₂Ha a ka ke a howeletsa

kapa a phahamisa lentswe,

kapa a peroha hara diterata.

₃Ha a ka ke a roba

lehlaka le tenyetsehile,

ha a ka ke a tima lebone,

a le tima le taitsa.

O tla ahlola bohle ka botshepehi.

₄Ha a ka ke a thekesela

kapa a nyahama pelo,

ho fihlela a tsitsisa toka lefatsheng.

Dihlekehleke di tla itshepela molao,

di itshepele molao wa hae.”

₅Morena Modimo o bua tjena,

yena ya bopileng mahodimo

a ba a a ala,

ya phutholotseng lefatshe

le tsohle tse ho lona,

ya neang baahi ba lona

moya o ba phedisang,

le bophelo ho bohle

ba phelang ho lona:

₆“Nna Morena, ke o bitsitse

hobane ke lokile;

ke tla o utlwa ka letsoho,

ke o boloke,

ka wena

ke etse selekane le baditjhaba,

ka wena

ke tlisetse baditjhaba lesedi.

₇O tla tutubolla mahlo a difofu,

o lokolle batshwaruwa,

o ba lokolle ditjhankaneng,

o lokolle ba dutseng

lefifing la tjhankana.

₈“Ke nna Morena,

lena ke lona lebitso la ka!

Nke ke be ka nea e mong

tlotla ya ka,

kapa medimo ya bohata

tlotliso ya ka.

₉Bonang, tsa pele di se di fetile,

jwale ke le bolella tse ntjha;

ke le phatlalletsa tsona

di eso etsahale.”

₁₀Binelang Morena sefela se setjha,

mo tlotliseng

ho tloha pheletsong tsa lefatshe,

lona ba sesisang dikepe lewatleng,

le dibopuwa tsohle

tse phelang lewatleng,

lona dihlekehleke,

le bohle ba phelang ho tsona.

₁₁Lehwatata le metse ya lona

le ke le howe,

metsana ya Bakedare e nyakalle.

Baahi ba Sela ba bine ka thabo,

ba howe

ba le ditlhorong tsa dithaba.

₁₂Ba ke ba tlotlise Morena,

ba phatlalatse

thoriso ya hae dihlekehlekeng.

₁₃Morena o tla futuha

jwaloka mohale ya matla,

jwaloka mohlabani

o tla tsosa tjheseho ya hae;

o tla howa,

a hlabe mokgosi wa ntwa,

dira tsa hae le tsona a di ripitle.

₁₄“Ke kgale ke kgutsitse,

ke thotse, ke itshwere,

empa jwaloka mosadi

ya bohlokong ba pelehi

ke tla howeletsa ke bipetsane,

ke fehelwa.

₁₅Ke tla thua dithaba le maralla,

ke omeletse dimela tsohle,

dimela tsohle tse ho wona;

dinoka ke tla di fetola,

ke di fetole dihlekehleke,

matsha le wona ke a pshese.

₁₆Ke tla tsamaisa difofu

ka tsela eo di sa e tsebeng,

ke di tataise

tseleng eo di sa e tlwaelang;

lefifi ke tla le fetola lesedi

kapele ho tsona,

ke batalatse baka tse makukuno.

Tsena ke ntho tseo ke tla di etsa,

mme ha nka ke ka tlohela ho di etsa.

₁₇Empa ba tshepang

medimo ya bohata,

ba reng ho yona:

‘Le medimo ya rona,’

ba tla kgutliswa

ba hlabilwe ke dihlong.”

₁₈“Mamelang, lona bo-tsebetutu!

Tadimang le bone, lona difofu!

₁₉Sefofu ke mang

haese mohlanka wa ka,

kapa ya tsebetutu

jwaloka moromuwa wa ka?

Ke mang ya foufetseng

jwaloka ya ikabetseng nna,

ya foufetseng

jwaloka mohlanka wa Morena?

₂₀O bone ntho tse ngata,

empa ha o di ele hloko;

tsebe tsa hao di lethwethwe,

empa ha o utlwe letho.”

₂₁Ho kgahlile Morena

ka baka la ho loka ha hae,

hore Molao wa hae o be moholo,

o tlotlehe.

₂₂Empa tjhaba sena se senyeditswe,

sa utswetswa,

batho bohle ba wetse ka mameneng,

ba patilwe ditjhankaneng;

batho bohle ba fetohile lelobelo,

ha ho le ya mong ya ba pholosang,

ba senyeditswe,

ha ho ya reng: “Ba buseletseng!”

₂₃Ke mang wa lona

ya tla mamela tsee,

eo ho tloha jwale

a tla di sekehela tsebe?

₂₄Ya neelaneng ka Jakobo

hore e be lelobelo ke mang?

Ya neelaneng ka Iseraele

ho basenyi ba hae ke mang?

Na hase Morena

eo re mo sitetsweng?

Ha ba a ka ba rata

ho tsamaya ka tsela tsa hae,

ha ba a ka ba rata

ho mamela Molao wa hae.

₂₅Kahoo o hlatsitse kgalefo ya hae,

a e hlatsetsa hodima bona,

a hlatsa le bohale ba ntwa,

a bo hlatsetsa hodima bona.

Kgalefo ya ba aparela

ka malakabe,

empa ba se ke ba utlwisisa letho,

ya ba tlabola,

empa ba se ke ba e natsa.

₁Empa jwale, ke sena

seo Morena a se bolelang,

yena ya o bopileng, wena Jakobo,

yena ya o entseng, wena Iseraele:

“O se ke wa tshaba,

hobane ke o lopolotse;

ke o bitsitse ka lebitso,

ke o bitsitse, o wa ka.

₂Ha o tshela hara madiba

ke tla ba le wena;

ha o tshela dinoka

ha di ka ke tsa o nka.

Ha o tsamaya hara mollo

ha o ka ke wa tjha,

malakabe ha a ka ke a o tjhesa.

₃Ke nna Morena Modimo wa hao,

Ya Halalelang wa Iseraele,

Mopholosi wa hao;

ke fana ka Egepeta

hore ke o lopolle,

ke fana ka Kushe le Seba

bakeng sa hao.

₄Kaha o bile ntho ya bohlokwa,

o hlompheha mahlong a ka,

hobane ke o rata,

ke tla fana ka batho

bakeng sa hao,

ke fane ka ditjhaba

bakeng sa bophelo ba hao.

₅O se ke wa tshaba,

hobane ke na le wena;

ditloholo tsa hao

ke tla di lata botjhabela,

ke o bokelle o etswa bophirimela.

₆Ho batho ba ka leboya ke tla re:

‘Neelanang ka bona!’

Ho ba ka borwa ke re:

‘Le se ke la hana ka bona!’

Kgutlisang bara ba ka

ba etswa hole,

le baradi ba ka

ba dipheletsong tsa lefatshe,

₇e leng bohle ba ipitsang

ka lebitso la ka,

bao ke ba bopileng hore ba ntlotlise,

bao ke ba bopileng

ka ba ka ba etsa.”

₈Tlisang ba foufetseng

empa ba ena le mahlo,

bao e leng ditholo

empa ba ena le ditsebe.

₉Matjhaba wohle

a phutheha hammoho,

ditjhaba le tsona di a kgobokana;

ke mang hara tsona

ya boletseng tsee,

a ba re bolella tsa kgalekgale?

A ba ke ba tlise

dipaki tsa bona mona,

di tle di pake hore ba nepile,

e le hore di ba utlwe,

di re: “Ke nnete!”

₁₀“Wena Iseraele, o paki ya ka,”

ho rialo Morena,

“o mohlanka wa ka

eo ke mo kgethileng,

o tle o tsebe, o dumele ho nna,

mme o utlwisise

hore ke nna Modimo.

Ha ho modimo

o bopilweng pele ho nna,

kapa ha eba le o mong

kamorao ho nna.

₁₁“Nna, nna ke inotshi, ke Morena,

kantle ho nna ha ho Mopholosi.

₁₂Ke nna ya senotseng,

ka pholosa, ka phatlalatsa,

ke nna, e seng modimo o mong osele

o hara lona.

Lona le paki tsa ka

hore ke nna Modimo,”

ho rialo Morena.

₁₃“E, haesale ke le yena

ho tloha mehleng ya kgale,

ha ho ya ka pholosang

se ka seatleng sa ka.

Seo ke se etsang

se ka etsollwa ke mang?”

₁₄Morena, Mopholosi wa hao,

Ya Halalelang wa Iseraele,

o bua tjena:

“Ka baka la lona

ke tla otla Babilona,

babalehi bohle ba Bakalatiya

ke ba theole,

ke ba theole ba balehele dikepeng,

dikepeng tseo

ba neng ba ikgantsha ka tsona.

₁₅Ke nna Morena,

Ya Halalelang wa lona,

Mmopi wa Iseraele,

Kgosi ya lona.”

₁₆Morena o bua tjena,

yena ya phuntseng tsela lewatleng,

a seha mmila

hara metsi a befileng;

₁₇ya ntshitseng dipere

le kariki tsa ntwa,

a ntsha mabotho

le mekgahlelo ya wona,

mabotho a rapalla moo,

a rapallela ruri,

a fediswa seka lebone le tingwa:

₁₈“Lebalang tsa kgalekgale,

tse fetileng le se ke la di nahana.

₁₉Bonang, ke etsa ntho e ntjha!

Ke ena e mela, na ha le e bone?

Ke phunya tsela hara lehwatata,

le dinoka naheng e omeletseng.

₂₀Phoofolo tse hlaha

di a ntlhompha,

diphokojwe le dimpshe

di a nthorisa,

hobane didiba

ke di tjheka lehwatateng,

dinoka di phalle

naheng e omeletseng,

ho nyorolla tjhaba sa ka,

bakgethwa ba ka.

₂₁Setjhaba seo ke ipopetseng sona,

se tla ntumisa ka dithoko.”

₂₂“Empa ha o a ipiletsa ho nna,

wena Jakobo,

ha o a ikgathatsa ka nna,

wena Iseraele.

₂₃Ha o a ntlisetsa

konyana tsa setjheso,

leha e le ho ntlhompha

ka mahlabelo a hao.

Ha ke a ka ka o imetsa

ka ho batla nyehelo tsa dijo,

kapa ka o kgathatsa

ka ho o kopa mokubetso.

₂₄Ha o a nthekela

hlaka le monko o monate,

kapa wa nthabisa

ka mafura a mahlabelo a hao.

Empa o nkimeditse ka dibe tsa hao,

wa ntena ka makgopo a hao.

₂₅Nna, nna ke inotshi,

ke hlakola ditshito tsa hao,

ke di hlakola ka baka la ka,

ha ke sa hlola ke hopola

dibe tsa hao.

₂₆“Ako nkgopotse tse fetileng,

re phehisane kgang ka tsona;

bolela kamoo o hlokang

molato kateng.

₂₇Ntataomoholo o ne a etse sebe,

babuelli ba hao ba mphetohela,

₂₈kahoo ke tla tlontlolla

baokamedi ba tempele ya hao,

Jakobo yena ke mo abele timelo,

Iseraele yena a nyedisehe.”

₃₅“Ke tlile ho qabanya

mora le ntatae,

moradi le mmae,

ngwetsi le matsalayo,

₃₆mme ba ntlo ya motho

e tla ba dira tsa hae.

“ ‘Ke romela leqosa la ka ke leo,

le tla o etella pele,

le o lokisetse tsela.’

“ ‘Re le letseditse diletsa,

empa ha le a ka la etsa motjeko!

Re le binetse kodi-ya-malla,

empa ha le a ka la lla!’

“ebe o tla phahamisetswa

lehodimong?

O tla theohela tlase lebitleng!