Bible Reading Plan – Day 246

₁Ka selemo sa pele sa puso ya Siruse, kgosi ya Peresiya, Morena a phethahatsa polelo eo a neng a e bolele ka Jeremia. Morena a susumetsa Siruse hore a etse phatlalatso ka lengolo, mme le romelwe mmusong wohle wa hae. Kgosi ya e ngola, ya re:

₂“Siruse, kgosi ya Peresiya, o bua tjena: ‘Morena Modimo wa mahodimo, o nneile mebuso yohle ya lefatshe, mme o ntaetse hore ke mo hahele Tempele Jerusalema, naheng ya Juda. ₃E mong le e mong wa setjhaba sa hae, ya teng mona hara lona, ke re Modimo wa hae a ke a be le yena, mme eo a nyolohele Jerusalema e naheng ya Juda, a yo haha Tempele ya Morena Modimo wa Iseraele. Ke yena Modimo ya leng Jerusalema. ₄Bohle ba ntseng ba phela, hohle moo ba jakileng teng, baahi ba sebaka seo ba ke ba ba thuse ka silefera, le ka kgauta, le ka diphahlo, le ka dikgomo, le ka dimpho tsa boithaopo, tsa Tempele ya Morena, e Jerusalema.’ ”

₅Jwale dihlooho tsa malapa a ba morabe wa Juda, le wa Benjamine, le baprista, le Balevi, le bohle bao Morena a neng a susumeditse meya ya bona, ba itokisetsa ho ya haha Tempele ya Morena Jerusalema. ₆Bohle ba neng ba ahisane le bona ba ba thusa ka dintho tse entsweng ka silefera, le ka kgauta, le ka diphahlo, le ka dikgomo, le ka dintho tsa bohlokwa, ntle ho dimpho tsa boithaopo.

₇Le kgosi Siruse a ntsha thepa yohle ya Tempele ya Morena, eo Nebukadenesare a neng a ile a e nka Jerusalema, a e bea ka tempeleng ya medimo ya hae. ₈Tsena tsohle kgosi Siruse a di bea tlasa taolo ya Miteredate, eo e neng e le ramatlotlo; yena a di balla Sheshebasare, kgosana ya Juda.

₉Palo ya tsona ke ena: mekeke ya kgauta e mashome a mararo, le mekeke ya silefera e sekete, le mefuta e meng ya dijana e mashome a mabedi a metso e robong, ₁₀le dikotlolo tsa kgauta tse mashome a mararo, le dikotlolo tsa silefera tse makgolo a mane le leshome, le dijana tse ding tse sekete.

₁₁Palo ya dintho tsena tsohle tse entsweng ka kgauta le ka silefera e ne e le dikete tse hlano le makgolo a mane. Tsena tsohle Sheshebasare a tla le tsona, ha bathopuwa ba neng ba le Babilona ba kgutlela Jerusalema.

₁Bana ke baahi ba naha ya Juda, bao Nebukadenesare, kgosi ya Babilona, a neng a ile a ba thopa, a ba isa Babilona. Jwale ba boela ba kgutlela Jerusalema le naheng ya Juda; motho ka mong a kgutlela motseng wa habo. ₂Ba ne ba tle le Serubabele, le Jeshua, le Nehemia, le Seraya, le Reelaya, le Moredekai, le Bileshane, le Misepara, le Bigifai, le Rehume, le Baana.

Palo ya banna ba setjhaba sa Iseraele ke ena: ₃Ba lelapa la Paroshe e ne e le dikete tse pedi le lekgolo le mashome a supileng a metso e mmedi; ₄ba lelapa la Shefatiya e le makgolo a mararo le mashome a supileng a metso e mmedi; ₅ba lelapa la Arake e le makgolo a supileng le mashome a supileng a metso e mehlano; ₆ba lelapa la Pahate-Moabe, e leng ditloholo tsa Jeshua le tsa Joabe, e le dikete tse pedi le makgolo a robedi le leshome le metso e mmedi; ₇ba lelapa la Elame e le sekete le makgolo a mabedi le mashome a mahlano a metso e mene; ₈ba lelapa la Satu e le makgolo a robong le mashome a mane a metso e mehlano; ₉ba lelapa la Sakai e le makgolo a supileng le mashome a tsheletseng; ₁₀ba lelapa la Bani e le makgolo a tsheletseng le mashome a mane a metso e mmedi; ₁₁ba lelapa la Bebai e le makgolo a tsheletseng le mashome a mabedi a metso e meraro; ₁₂ba lelapa la Asegade e le sekete le makgolo a mabedi le mashome a mabedi a metso e mmedi; ₁₃ba lelapa la Adonikame e le makgolo a tsheletseng le mashome a tsheletseng a metso e tsheletseng; ₁₄ba lelapa la Bigifai e le dikete tse pedi le mashome a mahlano a metso e tsheletseng; ₁₅ba lelapa la Adine e le makgolo a mane le mashome a mahlano a metso e mene; ₁₆ba lelapa la Atere, ke ho re la Hesekiya, e le mashome a robong a metso e robedi; ₁₇ba lelapa la Besai e le makgolo a mararo le mashome a mabedi a metso e meraro; ₁₈ba lelapa la Jora e le lekgolo le leshome le metso e mmedi; ₁₉ba lelapa la Hashume e le makgolo a mabedi le mashome a mabedi a metso e meraro; ₂₀ba lelapa la Gibare e le mashome a robong a metso e mehlano.

₂₁Ba tswang Betlelehema e ne e le lekgolo le mashome a mabedi a metso e meraro; ₂₂ba tswang Netofa e le mashome a mahlano a metso e tsheletseng; ₂₃ba tswang Anatote e le lekgolo le mashome a mabedi a metso e robedi; ₂₄ba tswang Asemafete e le mashome a mane a metso e mmedi; ₂₅ba tswang Kiriate-Jearime, le Kefira, le Beerote e le makgolo a supileng le mashome a mane a metso e meraro; ₂₆ba tswang Rama le Geba e le makgolo a tsheletseng le mashome a mabedi a motso o mong; ₂₇ba tswang Mikemase e le lekgolo le mashome a mabedi a metso e mmedi; ₂₈ba tswang Bethele le Ai e le makgolo a mabedi le mashome a mabedi a metso e meraro; ₂₉ba tswang Nebo e le mashome a mahlano a metso e mmedi; ₃₀ba tswang Makabishe e le lekgolo le mashome a mahlano a metso e tsheletseng; ₃₁ba tswang Elame e nngwe e le sekete le makgolo a mabedi le mashome a mahlano a metso e mene; ₃₂ba tswang Harime e le makgolo a mararo le mashome a mabedi; ₃₃ba tswang Lode, le Hadide, le Ono e le makgolo a supileng le mashome a mabedi a metso e mehlano; ₃₄ba tswang Jeriko e le makgolo a mararo le mashome a mane a metso e mehlano; ₃₅ba tswang Senaa e le dikete tse tharo le makgolo a tsheletseng le mashome a mararo.

₃₆Baprista, e leng bara ba Jedaya, wa lelapa la Jeshua, e ne e le makgolo a robong le mashome a supileng a metso e meraro; ₃₇ba lelapa la Imere e le sekete le mashome a mahlano a metso e mmedi; ₃₈ba lelapa la Pashahure e le sekete le makgolo a mabedi le mashome a mane a metso e supileng; ₃₉ba lelapa la Harime e le sekete le leshome le metso e supileng.

₄₀Balevi, e leng ditloholo tsa Jeshua le Kademiele, ba lelapa la Hodafiya, e ne e le mashome a supileng a metso e mene.

₄₁Dibini, e leng ditloholo tsa Asafo, e ne e le lekgolo le mashome a mabedi a metso e robedi.

₄₂Ba malapa a balebedi ba Tempele, e leng ditloholo tsa Shalome, le Atere, le Talamone, le Akube, le Hatita, le Shobai, e ne e le lekgolo le mashome a mararo a metso e robong.

₄₃Basebeletsi ba Tempele e ne e le ditloholo tsa Siha, le tsa Hasufa, le tsa Tabaote, ₄₄le tsa Kerose, le tsa Sia, le tsa Padone, ₄₅le tsa Lebana, le tsa Hagaba, le tsa Akube, ₄₆le tsa Hagabe, le tsa Salemai, le tsa Hanane, ₄₇le tsa Gidele, le tsa Gahare, le tsa Reaya, ₄₈le tsa Resine, le tsa Nekoda, le tsa Gasame, ₄₉le tsa Usa, le tsa Paseya, le tsa Besai, ₅₀le tsa Ashena, le tsa Mehunime, le tsa Nefusime, ₅₁le tsa Bakabuke, le tsa Hakufa, le tsa Harehure, ₅₂le tsa Basalote, le tsa Mehida, le tsa Haresha, ₅₃le tsa Barakose, le tsa Sisera, le tsa Tema, ₅₄le tsa Nesia, le tsa Hatifa.

₅₅Ana ke malapa a bahlanka ba Solomone, e leng ditloholo tsa Sotai, le tsa Soferete, le tsa Peruda, ₅₆le tsa Jaala, le tsa Darekone, le tsa Gidele, ₅₇le tsa Shefatiya, le tsa Hatila, le tsa Pokerete ya tswang Sebaime, le tsa Ami.

₅₈Basebeletsi ba Tempele, le ditloholo tsa bahlanka ba Solomone, e ne e le makgolo a mararo le mashome a robong a metso e mmedi.

₅₉Bana bohle ke bona ba neng ba etswa Tele-Mela, le Tele-Haresha, le Kerube, le Adone, le Imere. Empa ba ile ba hloka bopaki ba hore malapa abo bona le ditloholo tsa bona ke Baiseraele. ₆₀Ba lelapa la Delaya, le la Tobiya, le la Nekoda, e ne e le makgolo a tsheletseng le mashome a mahlano a metso e mmedi.

₆₁Ana ke malapa a baprista, e leng ditloholo tsa Habaya, le tsa Kose, le tsa Barasilai, ya neng a nyale e mong wa baradi ba Barasilai wa Mogileade, mme a ba sa ipitsa ka lebitso la mohwe wa hae.

₆₂Bana ba ile ba batla buka ya leloko la bona, hara tse ding tsa maloko, empa ba se ke ba e fumana; ka baka leo, ba ntshwa tshebeletsong ya boprista, hobane ho ne ho thwe ha ba a hlweka. ₆₃Mmusi wa naha a re ba se ke ba ja dijo tse halalelang ka ho fetisisa, ho fihlela moprista a ka ba botsetsa ho Morena ka ho sebedisa majwe a Urime le Thumime.

₆₄Setjhaba sohle ha se balwa se ile sa etsa dikete tse mashome a mane a metso e mmedi le makgolo a mararo le mashome a tsheletseng; ₆₅ho sa balwe bahlanka le makgabunyane a bona a dikete tse supileng le makgolo a mararo le mashome a mararo a metso e supileng. Hara bona ho ne ho ena le dibini tsa banna le tsa basadi tse makgolo a mabedi.

₆₆Palo ya dipere tsa bona e ne e le makgolo a supileng le mashome a mararo a metso e tsheletseng, le dimmeile tse makgolo a mabedi le mashome a mane a metso e mehlano; ₆₇dikamele di le makgolo a mane le mashome a mararo a metso e mehlano, ditonki di le dikete tse tsheletseng le makgolo a supileng le mashome a mabedi.

₆₈E ile yare ha batho bana ba fihla Tempeleng ya Morena e Jerusalema, ba bang ba dihlooho tsa malapa abo bona ba etsetsa Tempele ya Modimo dinyehelo tsa boithaopo, hore ba boele ba e hahe setsheng sa yona sa pele. ₆₉Bakeng sa mosebetsi ona ba fana kamoo ba ka kgonang kateng, ba nea ramatlotlo kgauta e etsang boima ba dikilo tse makgolo a mahlano, le silefera e etsang boima ba dikilo tse dikete tse pedi le makgolo a robedi. Ba fana ka diaparo tsa boprista tse lekgolo.

₇₀Baprista, le Balevi, le ba bang ba setjhaba, le dibini, le balebedi ba menyako, le basebeletsi ba Tempele, ba boela ba aha metseng ya bona, mme Baiseraele bohle ba aha metseng ya bona.

₁Ka kgwedi ya bosupa, ha bana ba Iseraele ba se ba tsitsitse metseng ya bona, setjhaba sa kgobokanela Jerusalema, ka kgopolo e le nngwe. ₂Jwale Jeshua, mora wa Josadake, a ema, a ena le bana babo, e leng baprista, le Serubabele, mora wa Shealetiele, le yena a ena le bana babo. Bana bohle ba haha aletare ya Modimo wa Iseraele, hore ba tle ba nyehelle dinyehelo tsa setjheso hodima yona, jwalokaha ho ngotswe Molaong wa Moshe, moporofeta wa Modimo. ₃Le hoja ba ne ba tshaba ditjhaba tsa dinaha tseo, ba haha aletare setsheng sa yona sa pele, mme hodima yona ba nyehella Morena ka dinyehelo tsa setjheso, e leng dinyehelo tsa setjheso tsa hoseng le tsa mantsiboya. ₄Ba keteka mokete wa maphephe, jwalokaha ho ngotswe Molaong. Ka letsatsi le leng le le leng ba etsa dinyehelo tsa setjheso, tse lekanang letsatsi ka leng, ho ya kamoo ho laetsweng kateng. ₅Kamora moo ba nna ba etsa le dinyehelo tsa setjheso tse tlwaelehileng tsa mokete wa ho thwasa ha kgwedi, le tsa mekete yohle e beilweng ke Morena, e kgethehileng, le tsa dimpho tsa boithaopo tsa motho ka mong. ₆Ho tloha ka letsatsi la pele la kgwedi ya bosupa, ba qala ho etsetsa Morena dinyehelo tsa setjheso, le hoja motheo wa Tempele ya Morena o ne o eso ralwe.

₇Yaba ba lefa ba betlang majwe, le ba betlang mapolanka. Ba nea Basidone le Batire dijo, le dino, le ole, hore bao ba ba tlisetse difate tsa kedare, tse tswang Lebanone, ba ba isetse tsona lewatleng la Jopo, ho ya kamoo Siruse, kgosi ya Peresiya, a neng a laetse kateng.

₈Ka kgwedi ya bobedi ya selemo sa bobedi ba fihlile Tempeleng ya Modimo Jerusalema, Serubabele, mora wa Shealetiele, le Jeshua, mora wa Josadake, le bana babo bona ba bang, e leng baprista le Balevi, le bohle ba fihlileng Jerusalema, bao e neng e le bathopuwa, ba qala mosebetsi. Ba kgetha Balevi, ho tloha ka ba dilemo tse mashome a mabedi ho ya hodimo, hore ba okamele mosebetsi wa ho haha Tempele ya Morena. ₉Yaba Jeshua le bara ba hae, le bana babo, le Kademiele le bara ba hae, e leng bara ba Juda, ba okamela basebetsi ba hahang Tempele ya Modimo. Ba ne ba thuswa ke bara ba Henadade, le bana babo bona, e leng Balevi.

₁₀Eitse ha dihahi di rala motheo wa Tempele ya Morena, baprista ba ema ba apere diaparo tsa bona, ba nkile diterompeta; Balevi, e leng bara ba Asafo, bona ba nkile matlheretlhere, hore ba rorise Morena, ho latela taelo ya Davida, kgosi ya Iseraele. ₁₁Ba bina ba neeletsana, ka dihlopha tsa bona, ba rorisa, mme ba boka Morena, ba re: “O molemo, mohau wa hae ke wa kamehla yohle ho Baiseraele.” Setjhaba sohle, ha se rorisa Morena, sa howeletsa haholo, hobane motheo wa Tempele ya Morena o ne o radilwe. ₁₂Empa baprista, le Balevi, le dihlooho tsa malapa, bao e neng e se e le maqheku, ba neng ba ile ba bona ha motheo wa Tempele ya pele o ralwa, ba lla haholo, ha ba bona ho ralwa motheo wa Tempele ena, empa ba bangata bona ba etsa ditlatse tsa thabo. ₁₃Motho o ne a ke ke a kgetholla lerata la ditlatse tsa thabo ho lerata la seboko sa setjhaba, hobane setjhaba se ne se howeletsa haholo, hoo lerata la sona le neng le utlwahala hole.

₁Eitse ha dira tsa ba morabe wa Juda le wa Benjamine di utlwela hore bao e neng e le bathopuwa ba tsosa tempele ya Morena Modimo wa Iseraele, ₂yaba di tla ho bo-Serubabele le ho dihlooho tsa malapa, di re ho bona: “Ereng re le thuse ho haha, hobane le rona re sebeletsa Modimo wa lona jwaloka lona. Haesale re mo etsetsa mahlabelo ho tloha mohla Asare-Hadone, kgosi ya Asure, a neng a re tlisa mona.”

₃Empa bo-Serubabele, le Jeshua, le dihlooho tsa malapa a Iseraele, ba re ho dira tseo: “Le ke ke la haha Tempele ya Modimo wa rona le rona. Ke rona feela ba tla hahela Morena Modimo wa Iseraele Tempele, jwalokaha Siruse, kgosi ya Peresiya, a re laetse.”

₄Jwale setjhaba sa naha eo sa nyahamisa baahi ba naha ya Juda dipelo, e le hore ba tle ba tshabe ho haha. ₅Setjhaba seo sa ntshetsa baeletsi ba kgosi tjotjo, hore ba sitise morero wa Bajuda. Hona sa ho etsa ka nako yohle ya puso ya Siruse, kgosi ya Peresiya, ho fihlela mehleng ya puso ya Dariuse, kgosi ya Peresiya.

₆Ha Ahashuerushe a qala ho busa, bahanyetsi ba mo ngolla lengolo, leo ka lona ba qosang baahi ba naha ya Juda le ba Jerusalema.

₇Le mehleng ya Aretaseresese, bo-Bishelame, le Miteredate, le Tabeele, le metswalle yohle ya bona, ba ngolla Aretaseresese, kgosi ya Peresiya, lengolo le ngotsweng ka ditlhaku tsa Searame, ka puo ya Searame.

₈Bo-Rehume wa mmusisi, le Shimeshai wa mongodi, ba ngolla Aretaseresese lengolo le hanyetsang ho tsoswa ha Jerusalema. Le ne le ngotswe ke ₉bo-Rehume wa mmusisi, le Shimeshai wa mongodi, le metswalle ya bona, le baahlodi, le maqosa, le baemedi ba dinaha, le bahlanka ba mmuso, le Baereke, le baahi ba Babilona, le baahi ba Susa, e leng Baelame, ₁₀le ditjhaba tse ding tsohle, tseo Asenapare ya tumileng, ya kgabane, a neng a ile a di thopa, a di bea metseng ya Samaria, le naheng yohle e ka bophirimela ho noka ya Euferatese.

₁₁Kopi ya lengolo leo ba ileng ba le ngola ke ena:

“Ho kgosi Aretaseresese.

“Rona, bahlanka ba hao, ba ahileng ka bophirimela ho noka ya Euferatese, re re: ₁₂Kgosi a e ke e tsebe hore Bajuda ba tswang moo ho wena, ba tlileng mona ho rona, ba fihlile Jerusalema. Ba ntse ba tsosa motse ona wa mahlabaphiyo, o kgopo. Ba hahile motheo, mme ba se ba qetela ho haha marako.

₁₃“Kgosi a e ke e tsebe hore haeba motse ona o ka fela wa tsoswa, mme marako a wona a phethwa, baahi ba wona ba ke ke ba hlola ba sa lefa lekgetho, le sethabathaba, le lekgetho la thepa, mme tjhelete ya kgosi e tla fokotseha. ₁₄Jwale, erekaha re phela ka kgosi, mme re sa rate ho bona ha kgosi e hlomphollwa, ke ka lebaka lena re romelang kgosi molaetsa ona, hore e tsebe, ₁₅e tle e fuputse dibukeng tsa diketsahalo tsa baholoholo ba yona. Etlare ha o ntse o fuputsa, o tla fumana hore motse ona ke wa mahlabaphiyo, o kotsi ho dikgosi le dinaha tsa tsona, le hore ka nako e fetileng motse ona o ile wa tsosa setsokotsane sa bohlabaphiyo, mme ke ka baka leo o ileng wa timetswa. ₁₆Jwale, kgosi, re o tsebisa hore haeba motse oo o ka fela wa tsoswa, mme marako a wona a phethwa, o ke ke wa hlola o sa busa ka bophirimela ho noka ya Euferatese.”

₁₇Yaba kgosi Aretaseresese o romela karabo ena ho bo-Rehume wa mmusisi, le Shimeshai wa mongodi, le ho metswalle yohle ya bona e ahileng Samaria, le ho bohle ba ahileng ka bophirimela ho noka ya Euferatese:

“Kgotso!

₁₈“Re baletswe lengolo la lona ka mokgwa o hlakileng. ₁₉Ke laetse hore ho fuputswe, mme ho fumanwe hore ka nako e fetileng motse ona o ile wa ikgohomosetsa dikgosi, wa tsosa bohlabaphiyo le bofetohedi. ₂₀Ho kile ha eba le dikgosi tse matla, tse ileng tsa busa Jerusalema le naha yohle e ka bophirimela ho noka ya Euferatese. Di ne di ntshetswa lekgetho, le sethabathaba, le lekgetho la thepa. ₂₁Laelang batho bao hore ba kgaotse, motse oo o se ke wa tsoswa, ho fihlela nna nka etsa taelo. ₂₂Hlokomelang, le se ke la fosa taelo ena, esere bobe bona ba tota, mme ba hlahisetsa dikgosi kotsi!”

₂₃Hoba lengolo lena la kgosi Aretaseresese le ballwe bo-Rehume, le Shimeshai wa mongodi, le metswalle ya bona, yaba ba potlakela Jerusalema ho Bajuda, ba fihla ba thibela mosebetsi wa bona ka dikgoka, le ka ho ba kgahlapetsa.