Bible Reading Plan – Day 231

₁₈“ ‘Morena Modimo o bua tjena: Ka letsatsi la pele la kgwedi ya pele, o tla nka pohwana e se nang sepha, o hlwekise Sehalalelo. ₁₉Moprista o tla nka madi a phoofolo ya nyehelo e tlosang sebe, mme ka wona a tlotse dikosene tsa menyako ya Tempele, le manakana a mane a mohaolwana wa aletare, le dikosene tsa kgoro ya lebala le kahare. ₂₀Ka letsatsi la bosupa la kgwedi, o tla etsa jwalo bakeng sa e mong le e mong ya entseng sebe ka baka la bofokodi kapa ka baka la ho se tsebe. Ka mokgwa o jwalo le tla etsetsa Tempele pheko.

₂₁“ ‘Ka letsatsi la leshome le metso e mene la kgwedi ya pele, le tla etsa mokete wa Paseka, mme ka matsatsi a supileng le je bohobe bo sa lomoswang. ₂₂Ka lona letsatsi leo, kgosana e tla nka pohwana, e iketsetse nyehelo e tlosang sebe, e be e etsetse le setjhaba sohle sa naha. ₂₃Ka letsatsi le leng le le leng la matsatsi a supileng a mokete, kgosana e tla etsetsa Morena nyehelo ya setjheso ka dipohwana tse supileng tse se nang sepha, le ka dipheleu tse supileng tse se nang sepha. Ka letsatsi le leng le le leng la matsatsi a supileng, e nke potsanyane, e etse nyehelo e tlosang sebe. ₂₄Bakeng sa pohwana e nngwe le e nngwe le pheleu e nngwe le e nngwe, eo ho nyehelwang ka yona, kgosana e tla etsa nyehelo ya koro e boima ba dikilo tse leshome le metso e tsheletseng, le dilethara tse tharo tsa ole ya mohlwaare.

₂₅“ ‘Ho tloha ka letsatsi la leshome le metso e mehlano la kgwedi ya bosupa, ka matsatsi a supileng a mokete, kgosana e tla etsa nyehelo e tlosang sebe, le nyehelo ya setjheso, le nyehelo ya dijo, le nyehelo ya ole ya mohlwaare ka mokgwa o tshwanang.’ ”

₁“ ‘Morena Modimo o bua tjena: Kgoro ya lebala le kahare e tadimileng botjhabela e kwalwe ka matsatsi a tsheletseng a mosebetsi, empa ka letsatsi la Sabatha e tla bulwa, e be e bulwe le mohla kgwedi e thwasitseng. ₂Kgosana e busang e tla kena ka lethule le kantle la kgoro eo, ebe e ema pela ditshiya tsa kgoro. Baprista ba tla e etsetsa nyehelo ya setjheso, le nyehelo ya teboho. Kgosana e tla kgumama lethuleng la kgoro, e nto tswa, empa kgoro ha e ka ke ya kwalwa ho fihlela mantsiboya. ₃Ka mokgwa o jwalo, ka Disabatha le ha kgwedi e thwasitse, setjhaba se tla kgumamela Morena se le monyako wa kgoro.

₄“ ‘Ka letsatsi la Sabatha nyehelo ya setjheso eo kgosana e tla e etsetsa Morena, e tla ba dikonyana tse tsheletseng tse se nang sepha, le pheleu e se nang sepha. ₅Bakeng sa pheleu ka nngwe eo ho nyehelwang ka yona, kgosana e tla etsa nyehelo ya dijo tse etsang boima ba dikilo tse leshome le metso e tsheletseng; bakeng sa konyana ka nngwe eo ho nyehelwang ka yona kgosana e tla etsa nyehelo ya dijo kamoo e ka ratang kateng, e be e etse le nyehelo ya dilethara tse tharo tsa ole ya mohlwaare bakeng sa nyehelo ka nngwe ya dijo. ₆Mohla kgwedi e thwasitseng, kgosana e tla nyehela ka pohwana e se nang sepha, le ka dikonyana tse tsheletseng, tse se nang sepha, le ka pheleu e se nang sepha. ₇Bakeng sa pohwana eo ho nyehelwang ka yona, kgosana e tla etsa nyehelo ya dijo tse etsang boima ba dikilo tse leshome le metso e tsheletseng, le bakeng sa pheleu eo ho nyehelwang ka yona e etse nyehelo e kaalo. Bakeng sa dikonyana tseo ho nyehelwang ka tsona e tla etsa nyehelo ya dijo kamoo e ka ratang kateng, e be e etse le nyehelo ya dilethara tse tharo tsa ole ya mohlwaare bakeng sa nyehelo ka nngwe ya dijo. ₈Ha kgosana e kena, e tla kena ka lethule la kgoro, mme ha e etswa, e tswe ka lona lethule leo.

₉“ ‘Ha setjhaba se etla pela Morena, mohla mekete e halalelang, motho ya keneng ka kgoro e ka leboya ho tla kgumamela Morena, ha a etswa o tla tswa ka kgoro e ka borwa; ya keneng ka kgoro e ka borwa, ha a etswa o tla tswa ka kgoro e ka leboya. Ha ho motho ya tla tswa ka kgoro eo a keneng ka yona; e mong le e mong o tla tswa ka kgoro e tadimaneng le eo a keneng ka yona. ₁₀Ha setjhaba se kena, kgosana le yona e tla kena, ha se etswa, le yona e tswe.

₁₁“ ‘Mohla mekete e halalelang le e kgethehileng, bakeng sa pohwana eo ho nyehelwang ka yona ho tla etswa le nyehelo ya dijo tse etsang boima ba dikilo tse leshome le metso e tsheletseng; le bakeng sa pheleu eo ho nyehelwang ka yona ho tla etswa nyehelo ya dijo tse etsang boima ba dikilo tse leshome le metso e tsheletseng. Empa bakeng sa nyehelo ya dikonyana ho tla etswa nyehelo ya dijo ho ya kamoo motho a ka ratang kateng, ho be ho etswe le nyehelo ya dilethara tse tharo tsa ole ya mohlwaare bakeng sa dijo tse etsang boima ba dikilo tse leshome le metso e tsheletseng. ₁₂Ha kgosana e etsetsa Morena nyehelo ya boithaopo, e ka ba nyehelo ya setjheso kapa nyehelo ya teboho, kgosana e tla bulelwa kgoro e ka botjhabela, ebe e etsa nyehelo ya setjheso le nyehelo ya yona ya teboho jwalokaha e etsa ka letsatsi la Sabatha. Ha e qetile e tla tswa, ebe kgoro e a kwalwa.’ ”

₁₃“ ‘Ka letsatsi le leng le le leng, hoseng ho hong le ho hong, o tla nyehella Morena ka konyana e nang le selemo, e se nang sepha, e leng nyehelo ya setjheso. ₁₄Hoseng ho hong le ho hong o tla etsa nyehelo ya dijo tse etsang boima ba dikeramo tse pedi, le ya lethara ya ole e tla duba phofo e thumisehileng ya nyehelo. Nyehelo ena ya dijo e etsetswang Morena, ke taelo ya kamehla yohle. ₁₅Ka mokgwa o jwalo hoseng ho hong le ho hong ho tla etswa nyehelo ya konyana, le ya dijo, le ya ole, e le nyehelo ya setjheso ya kamehla yohle.’ ”

₁₆“ ‘Morena Modimo o bua tjena: Ha kgosana e efa e mong wa bara ba yona mpho e tswang lefeng la yona, mpho eo e tla ba lefa la mora eo wa yona le la ditloholo tsa hae. ₁₇Empa haeba kgosana e efa e mong wa bahlanka ba yona mpho e tswang lefeng la yona, mpho eo e tla ba ya mohlanka eo ho fihlela mohla selemo sa tokoloho. Kamorao ho moo mpho eo e tla kgutlela ho kgosana, hobane lefa la yona le jewa ke bara ba yona feela. ₁₈Kgosana ha e a lokela ho nka letho lefeng la setjhaba ka ho se hatella. E tla abela bara ba yona lefa leo e leng la yona, e le hore ho se be motho wa setjhaba sa ka ya ka falatswang.’ ”

₁₉Jwale monna eo a nntsha ka monyako o lehlakoreng la kgoro, a nkisa dikamoreng tse halalelang, tse tadimileng leboya, e leng tsa baprista, mme a mpontsha sebaka se ka bophirimela. ₂₀Yaba o re ho nna: “Sebaka sena ke seo ho sona baprista ba tla phehela nyehelo ya tefelo ya sebe, le nyehelo e tlosang molato. Ke moo ba tla phehela le nyehelo ya dijo teng, e le hore ba se ke ba di ntshetsa lebaleng le kantle, esere ba halaletsa setjhaba.”

₂₁A nkisa lebaleng le kantle, a mpotisa le dihuku tse nne tsa lona, mme hukung e nngwe le e nngwe ka bona lebala. ₂₂Dihukung tse nne tsa lebala ka leng ho ne ho ena le mabala a mang a manyenyane. Lebala ka leng le ne le etsa bolelele ba dimethara tse mashome a mabedi, le bophara ba dimethara tse leshome le metso e mehlano, mme bone ba wona a ne a lekana. ₂₃Lebala le leng le le leng la mabala ana a mane le ne le potapotilwe ke lerako la majwe, le nang le maifo a haheletsweng ho lona. ₂₄Monna eo a re ho nna: “Ena ke mekgoro eo ba sebeletsang ka Tempeleng ba tla phehela mahlabelo a setjheso a setjhaba ka ho yona.”

₁Yaba monna eo o nkgutlisetsa monyako wa Tempele, mme ka bona metsi a phalla, a etswa katlase ho monyako wa Tempele, a phallela botjhabela, kaha Tempele e ne e tadimile botjhabela. Metsi a ne a phalla a etswa katlasa lehlakore le ka borwa ho monyako wa Tempele, ka borwa ho aletare. ₂Jwale a nntsha ka kgoro e ka leboya, a mpotisa kantle ho ya fihla kgorong e kantle, e tadimileng botjhabela, mme metsi a ne a phalla, a etswa ka lehlakoreng le ka borwa.

₃Monna eo a leba botjhabela, ka letsohong la hae a tshwere kgwele e methang. Yaba o metha dimethara tse makgolo a mahlano, a nto ntshedisa metsing a neng a fihla maqaqailaneng. ₄A boela a metha dimethara tse makgolo a mahlano, a ntshedisa metsing a neng a se a fihla mangweleng. A metha hape dimethara tse makgolo a mahlano, a ntshedisa metsing a neng a se a fihla thekeng. ₅A boela a metha dimethara tse makgolo a mahlano. Jwale e ne e se e le noka eo motho a ke keng a e tshela, hobane metsi a ne a se a kokomohile, a le mangata hoo motho a ka sesang kahara wona, e se e le noka eo motho a ke keng a e tshela. ₆Yaba o re ho nna: “Wena ngwana motho, na tsee o a di bona?”

Jwale a nkgutlisetsa lebopong la noka. ₇Ha ke fihla lebopong moo, ka bona difate tse ngata, tse metseng mabopong a noka. ₈Yaba o re ho nna: “Metsi ana a phallela botjhabela, a theohele kgohlong ya Jorodane, a yo kena Lewatleng la Letswai. Hoba a kene lewatle, a hlapolla letswai, ebe metsi a lewatle a a hlweka.

₉“Hohle moo noka a phallelang teng ho tla phela dibopuwa ka mefuta yohle ya tsona. Ho tla ba le boiyane ba ditlhapi, hobane metsi ao a phallelang lewatle a hlapolla letswai, ebe metsi a lewatle a a hlweka. Kahoo hohle moo metsi a phallelang teng, dibopuwa tsohle di tla phela. ₁₀Batshwasi ba ditlhapi ba tla ema lebopong la lewatle ho tloha Ene-Gedi ho ya fihla Ene-Egelaime. Ho tla ba le moo ba anehang matlowa teng. Ditlhapi tsa teng e tla ba tsa mefuta yohle, tse tshwanang le tsa Lewatle le Leholo. ₁₁Empa metsi a mekgwabo le a mehlaka a ke ke a hlapoloha, a tla nne a be letswai. ₁₂Difate tsa mefuta yohle tsa ditholwana di tla mela mabopong a noka. Mahlaku a tsona a ke ke a pona, di tla beha ditholwana kamehla. Di tla beha ka kgwedi e nngwe le e nngwe, hobane di nwesetswa ke metsi a tswang Sehalalelong. Ditholwana tsa tsona di tla jewa, mahlaku a tsona a phekole.”

₁₃Morena Modimo o bua tjena: “Ena ke meedi eo ka yona le tla arolela merabe e leshome le metso e mmedi ya Iseraele naha, hore e be lefa. Josefa yena o tla abelwa dikarolo tse pedi. ₁₄Le e arolelane ka ho lekana. Naha ena e tla ba lefa la lona, hobane ke ne ke hlapanyetse baholoholo ba lona hore ke tla ba nea yona.

₁₅“Meedi ya naha e tla ba tjena: Ka leboya moedi o tla tloha Lewatleng le Leholo, o ikgohle ka tsela e yang Hetelone, o fete le lekgalong la Hamate, o yo fihla Sedade; ₁₆o tlohe Berota le Siberaime, pakeng tsa Damaseka le Hamate, o yo fihla Hasere-Hatekone, e moeding wa Haurane. ₁₇Kahoo moedi o tla tloha lewatle o yo fihla Hasere-Enane, moeding o ka leboya ho Damaseka le Hamate. Ona e tla ba wona moedi o ka leboya.

₁₈“Ka botjhabela moedi o tla tloha pakeng tsa Haurane le Damaseka, o ikgohle ka Jorodane, pakeng tsa Gileade le naha ya Iseraele, o yo fihla lewatleng le ka botjhabela, o fihle le Tamare. Ona e tla ba wona moedi o ka botjhabela.

₁₉“Ka borwa moedi o tla tloha Tamare o yo fihla metsing a Meriba-Kadeshe, o ikgohle ka naha ya Egepeta, o yo fihla Lewatleng le Leholo. Ona e tla ba wona moedi o ka borwa.

₂₀“Ka bophirimela Lewatle le Leholo e tla ba lona moedi ho ya fihla lekgalong la Hamate. Ona e tla ba wona moedi o ka bophirimela.

₂₁“Le tla arolelana naha ena jwalo, ho ya ka merabe ya Iseraele. ₂₂Le e arolelane e le lefa la lona, le la baditjhaba ba ahileng hara lona, bao bana ba bona ba tswaletsweng naheng ena. Le ba tadime e le matswallwa a naha ya Iseraele, mme le ba abele lefa mmoho le ba merabe ya Iseraele. ₂₃Le abele moditjhaba lefa morabeng ofe kapa ofe oo a ahileng hara wona,” ho rialo Morena Modimo.

₁“Ana ke mabitso a merabe. Moedi wa naha ya Dane o tla tloha ka leboya, o ye lebopong la lewatle, ka tsela e lebang Hetelone, ha motho a eya Hamate le Hasere-Enane, o yo fihla moeding o ka leboya wa Damaseka, lekgalong la Hamate. Ho tloha botjhabela ho ya bophirimela Dane o tla abelwa karolo e le nngwe ya naha.

₂“Naha eo ya Dane e tla sehelana moedi le ya Ashere; ₃naha ya Ashere e sehelane moedi le ya Nafthali; ₄naha ya Nafthali e sehelane moedi le ya Manase; ₅naha ya Manase e sehelane moedi le ya Efraime; ₆naha ya Efraime e sehelane moedi le ya Rubene; ₇naha ya Rubene e sehelane moedi le ya Juda.”

₈“Ho tloha botjhabela ho ya bophirimela, naha e sehelaneng moedi le ya Juda ke naha eo le tla e kgethela Morena. Bolelele ba yona ho tloha botjhabela ho ya bophirimela bo tla lekana le bophara ba yona ho tloha leboya ho ya borwa, e be dikilomethara tse leshome le metso e mmedi le halofo jwaloka dikarolo tsa naha tse abetsweng merabe. Sehalalelo se tla ba bohareng ba yona.

₉“Bolelele ba karolo e tla abelwa Morena e tla ba dikilomethara tse leshome le metso e mmedi le halofo, bophara ba yona e be dikilomethara tse leshome. ₁₀Karolo ya sebaka sena se halalelang e tla ba naha ya baprista. Bolelele ba yona, ho tloha botjhabela ho ya bophirimela e tla ba dikilomethara tse leshome le metso e mmedi le halofo; ka borwa bophara ba yona, ho tloha leboya ho ya borwa, e be dikilomethara tse hlano. Sehalalelo sa Morena se tla ba bohareng ba yona. ₁₁Sebaka sena e tla ba sa baprista ba tlotsitsweng, bao e leng ditloholo tsa Sadoke, ba ileng ba boloka taelo ya ka, ba sa kang ba kgeloha ha bana ba Iseraele ba kgeloha, jwalokaha Balevi ba ile ba kgeloha. ₁₂Naha ena eo ba tla e newa, ho bona e tla ba mpho e halalelang haholo, mme e tla sehelana moedi le naha ya Balevi.

₁₃“Balevi le bona ba tla ba le naha e ikgohlileng ka ya baprista. Bolelele ba yona e tla ba dikilomethara tse leshome le metso e mmedi, bophara e be dikilomethara tse hlano. ₁₄Naha ena ke e ntlehadi, mme ha ba a lokela ho e rekisa, kapa ho e ananya, kapa ho e nea motho e mong, hobane ke naha e halalelang ya Morena.

₁₅“Karolo e setseng, e etsang bolelele ba dikilomethara tse leshome le metso e mmedi le halofo, le bophara ba dikilomethara tse pedi le halofo, yona hase e halalelang, mme ke e tla sebediswa ke setjhaba ho haha metse, matlo a bodulo le ho etsa makgulo. Motse o tla ba bohareng ba karolo ena. ₁₆Ditekanyo tsa motse e tla ba tsena: Bolelele ba wona bo tla lekana le bophara ba wona, e be dimethara tse dikete tse pedi le makgolo a mabedi le mashome a mahlano. ₁₇Makgulo a potapotileng motse a tla lekana ka bolelele le ka bophara, e be dimethara tse lekgolo le mashome a mabedi a metso e mehlano. ₁₈Sebaka se setseng, se sehelanang moedi le karolo e halalelang, seo ka botjhabela se tla etsa dikilomethara tse hlano, le ka bophirimela se etse dikilomethara tse hlano, e tla ba masimo, mme tse kotulwang ho sona e be tsa baahi ba motse. ₁₉Basebeletsi ba motse e tla ba ba merabe yohle ya Iseraele.

₂₀“Ditekanyo tsa sebaka se bohareng ba karolo e kgethehileng di tla lekana, bolelele le bophara ba sona e be dikilomethara tse leshome le metso e mmedi le halofo, ho se ho balellwa le sebaka seo motse o hahilweng ho sona.

₂₁“Sebaka se setseng ka mahlakoreng a mabedi a karolo e kgethehileng, le se setseng kathoko ho setsha sa motse, se tla abelwa kgosana. Ho tloha sebakeng se kgethehileng, sebaka seo se tla namela moeding o ka botjhabela, se be se namele le moeding o ka bophirimela. Dibaka tsena tse pedi, tse ikgohlileng ka meedi ya naha e abetsweng merabe, e tla ba tsa kgosana, mme sebaka se kgethehileng, se nang le Tempele, se tla ba bohareng ba dibaka tsena tse ding. ₂₂Karolo ya naha e abetsweng Balevi le e abetsweng motse e tla ba bohareng ba karolo ya naha ya kgosana. Karolo ya kgosana e tla ba pakeng tsa moedi wa Juda le moedi wa Benjamine.”

₂₃“Merabeng e meng e setseng, Benjamine o tla ba le karolo e le nngwe ya naha, ho tloha botjhabela ho ya bophirimela.

₂₄“Naha ya Benjamine e tla sehelana moedi le ya Simeone. ₂₅Naha ya Simeone e sehelane moedi le naha ya Isakare. ₂₆Naha ya Isakare e sehelane moedi le ya Sebulone. ₂₇Naha ya Sebulone e sehelane moedi le ya Gade.

₂₈“Moedi o ka borwa wa naha ya Gade o tla leba borwa ho tloha Tamare, ho ya fihla sedibeng sa Meriba-Kadeshe, o ikgohle ka naha ya Egepeta, ho ya fihla Lewatleng le Leholo.

₂₉“Naha ena ke yona eo le tla e arolela merabe ya Iseraele, hore e be lefa la yona, mme tsena e tla ba tsona dibaka tsa merabe eo,” ho rialo Morena.

₃₀“Tsena e tla ba dikgoro tse tswang ka motseng, lerakong le ka leboya, le bolelele ba dimethara tse dikete tse pedi le makgolo a mabedi le mashome a mahlano. ₃₁Dikgoro tsena di tla reellwa merabe ya Iseraele. Tse tharo, tse ka leboya, di tla bitswa Kgoro ya Rubene, le Kgoro ya Juda, le Kgoro ya Levi.

₃₂“Lerakong le ka botjhabela, le bolelele ba dimethara tse dikete tse pedi le makgolo a mabedi le mashome a mahlano, ho tla ba le dikgoro tse tharo: Kgoro ya Josefa, le Kgoro ya Benjamine, le Kgoro ya Dane.

₃₃“Lerakong le ka borwa, le bolelele ba dimethara tse dikete tse pedi le makgolo a mabedi le mashome a mahlano, ho tla ba le dikgoro tse tharo: Kgoro ya Simeone, le Kgoro ya Isakare, le Kgoro ya Sebulone.

₃₄“Lerakong le ka bophirimela, le bolelele ba dimethara tse dikete tse pedi le makgolo a mabedi le mashome a mahlano, ho tla ba le dikgoro tse tharo: Kgoro ya Gade, le Kgoro ya Ashere, le Kgoro ya Nafthali.

₃₅“Bolelele ba lerako leo, ho potoloha motse, e tla ba dimethara tse dikete tse robong.

“Ho tloha mohlang oo, lebitso la motse e tla ba: MORENA O TENG MONA.”