Bible Reading Plan – Day 180

₂₄Morena wa mabotho o hlapantse,

a re: “Jwalokaha ke hopotse,

ho tla ba jwalo;

jwalokaha ke rerile,

ho tla phethahala.

₂₅Ke tla phetshela Baasiria

naheng ya ka,

dithabeng tsa ka ke ba hatakele;

joko ya bona ke tla e tlosa

hodima tjhaba sa ka,

mojaro wa bona ke o tlose

mahetleng a sona,

₂₆Morero ona

ke o etseditsweng lefatshe lohle,

lena ke letsoho

le phahamiseditsweng

ditjhaba tsohle.”

₂₇Morena wa mabotho o sa rerile;

ebe ke mang ya ka thibelang?

Letsoho la hae le se le phahame;

ke mang ya ka le kgutlisang?

₂₉Se nyakalleng

lona Bafiletsita bohle,

la re molamu o neng o le otla

o robehile,

hoba lelokong la noha eo

ho tla tswalwa qowane,

yona e tswale kganyapa

e fofang ka setsokotsane.

₃₀Ba futsanehile baholo

ba tla kgora,

bahloki ba tla dula ba pholohile,

ditloholo tsa hao tsona

di shwe ke tlala,

masalla a hao le wona e a bolaye.

₃₁Bokolla wena monyako!

Meketsa wena motse!

Lona bohle ba Filesitiya

thothomelang!

Mosi o kang leru

o foqoha o etswa leboya,

hara mabotho a hae

ha ho ya tla salla.

₃₂Ho tla thweng

ha ho arajwa maqosa a naha eo?

“Morena o tsitsisitse Sione,

bahlophehi ba tjhaba sa hae

ba tla tshabela teng.”

Ka bosiu bo le bong

Are e Moabe e timeditswe!

Ka bosiu bo le bong

Kire e Moabe e timeditswe!

₂Batho ba Dibone

ba nyolohetse tempeleng ya bona,

ba nyolohetse ho ya llela

dibakeng tsa bona tsa borapedi;

baahi ba Moabe

ba llela Nebo le Medeba,

ba ikutile lekorana,

ba ipeotse le ditedu.

₃Ba tsamaya terateng tsa motse,

ba apere tse mahwashe,

bohle ba lla

ba le hodima marulelo,

le mabaleng a motse,

ba itabanya fatshe ba ntse ba lla.

₄Ba Heshebone le ba Elale

ba a howeletsa,

mantswe a bona a utlwahala hohle

ho ya fihla Jahase;

kahoo le bahlabani ba Moabe

ba a howeletsa,

bahlabani bohle ba a thothomela.

₅Pelo ya ka e llela ba Moabe,

baphaphathehi ba bona

ba balehetse Soware,

ba baleha

ho ya fihla Egelate-Sheleshiya,

ba nyoloha ka tsela e yang Lohite,

ba nyolohela Lohite

ba ntse ba lla,

ba llela timelo ya bona

ba le tseleng e yang Horanaime.

₆Metsi a Nimerime a pshele,

jwang bo omeletse,

dimela di fedile,

ha ho letho le letalana.

₇Maruo ao

ba a sebeditseng ka thata,

ba a bokella,

ba a kakatetse

ho ya tshela

Molatswana wa Meduwane.

₈Mokgosi wa bona o hoballa,

ho ya fihla meeding ya Moabe,

seboko sa bona se fihla Egelaime,

sello sa bona

se fihle le Beere-Elime.

₉Metsi a Dimone

a tlerefetse ke madi,

ke hona ke sa tla tlisa koduwa,

ke e tlisetse Dimone:

Baphaphathehi ba Moabe

ba tla bolawa ke tau,

ba tla sala teng

le bona e tla ba bolaya.

₁Thellang mmusi wa naha

ka ho romela dikonyana,

di romelwe di etswa Sela,

mose wane ho lehwatata,

di romelwe thabeng

ya moradi wa Sione.

₂Baradi ba Moabe

ha ba le madibohong a Arenone,

ba ka nonyana tse phuphuselang,

di lelekilwe sehlaheng sa tsona.

₃“Re eletse, o re etsetse qeto,

moriti wa hao

o re sireletse motsheare,

sa fifi la bosiu;

pata ba lelekilweng,

o se eke baphaphathethi.

₄Eba setshabelo sa Bamoabe,

Bamoabe ba lelekilweng,

o ba sireletse ho ya ba timetsang.”

Motlatlapi o tla kgaotsa ho tlatlapa,

mosenyi yena a kgaotse ho senya,

mohatelli le yena

a fediswe naheng eo.

₅Ka mohau terone e tla tsitsiswa,

ya tla e dula a e dule ka botshepehi,

e leng e mong wa leloko la Davida,

ya tla ahlola ka toka,

a thahaselle ho loka.

₆Re utlwile hore Moabe o a ikgantsha,

ho ikgantsha ha hae

ke ho tlolang moedi,

o a ikakasa, o a ikgantsha, o bohale,

empa boithoriso ba hae

ke ba lefeela.

₇Kahoo tjhaba sa Moabe

se tla itelela,

bohle ba itelele ba le mmoho,

ba llela dijo tse monate

tsa Kire-Harese,

ba lla pelo tsa bona di le bohloko.

₈Masimong a Heshebone le a Sibema

morara o ponne,

o motlemotle

o neng o taha babusi ba naha,

morara o neng o lemilwe

ho tloha Jasere,

o lemilwe ho ya fihla lehwatateng,

oo makala a wona

a neng a thathaletse,

ho ya tshela lewatle.

₉Ke llela morara wa Sibema

jwalokaha Jasere e llela wa yona,

wena Heshebone le wena Elale

ke le tshela ka dikgapha!

Mehoo e thabelang ho butswa

ha morara wa lona,

le e thabelang kotulo ya lona

e kgaoditse.

₁₀Masimong a dikgwiti

thabo le monyaka ha di sa le yo,

ha ho pina kapa mehoo

masimong a lona a morara,

ha ho ya tlhotlelang veine

tlhotlelong sa hae,

hoba mehoo ya lona

ke nna ya e fedisitseng.

₁₁Pelo ya ka e llela Moabe sa harepa,

le yona Kire-Harese e e llela jwalo.

₁₂Ha Bamoabe ba nyolohela

bakeng tsa bona tsa borapedi,

ba nyolohela lefeela;

ha ba nyolohela tempeleng ya bona

ho ya rapela,

le teng ha ho na thuso.

“Damaseka ha e sa tla hlola

e eba motse,

Damaseka e tla ba qubu

ya masupi feela.

₂Metse ya Arowere e tla hloka baahi,

e tla fetoha metebo,

mehlape e fule teng,

ho se motho ya tla e tshwenya.

₃Motse o haheleditsweng

o tla ba siyo Efraime,

le wona mmuso wa Damaseka

o tla fela,

masalla a Arame a tla fela

sa tlotla ya Iseraele,”

ho rialo Morena wa mabotho.

₄“Mohla tsatsi leo,

tlotla ya Jakobo e tla fifala,

monono wa hae le wona o fele.

₅Ho tla tshwana le ha mohedi

a hela koro,

a kotula koro ka diatla tsa hae;

ho tshwane le ha motho

a kgwahlapisa qwapi tsa koro,

a di kgwahlapisa

ka kgohlong ya Refaime.

₆Empa tholwana tse ding tsona

di tla sala,

jwalokaha ho hlohlorwa

sefate sa mohlwaare,

ho salang tse pedi kapa tse tharo

makaleng a hodimo,

ho sale tse nne kapa tse hlano

makaleng a behang,”

ho rialo Morena, Modimo wa Iseraele.

₇Mohla tsatsi leo,

motho o tla sheba Mmopi wa hae,

mahlo a motho a shebe

Ya Halalelang wa Iseraele.

₈A ke ke a sheba dialetare

tse entsweng ke matsoho a hae.

A ke ke a sheba

tse etsedisweng

tshwantsho tsa Ashera,

le aletare tsa mokubetso

tse entsweng ke matsoho a hae.

₁₀O lebetse Modimo,

Mopholosi wa hao,

ha o a hopola Lefika,

qhobosheane ya hao,

kahoo leha o ka lema

difate tse ntlentle,

wa lema le morara

o tswang mafatsheng a mang;

₁₁leha o ka mela mohla o o hlomileng,

ka la hosasane wa tsoha o fupuditse,

kotulo yona e ke ke ya eba teng

mohla tsatsi la mafu

a ke keng a phekolwa.

₁₂Utlwang modumo

wa matshwele a ditjhaba!

A duma sa lewatle le tsudubutlana!

Bonang kamoo

tjhaba di kgorohang kateng!

Di kgoroha

sa maqhubu a phuthumana!

₁₃Tjhaba di tla kgoroha

sa metsi a le mangata,

empa ha Modimo a di kgalema

di a baleha,

di fefolwa ke moya

sa mmoko hodima dithaba,

jwalokaha mahlokwa

a fefolwa ke sefefo.

₁₄Mantsiboya

di bakela bohle matswalo,

le eso tjhabe

tsona di se di nyametse!

Ena ke yona kabelo

ya ba hapang tsa rona,

ke yona kabelo

ya ba senyang tsa rona.

₁Jo! Naha ya kokwanyana

tse bobolang,

naha e mose ho dinoka tsa Kushe,

₂e romela maqosa a etla ka lewatle,

ka kepe tsa lehlaka

tse sesang metsing!

Eyang baromuwa

ba tsebang ho potlaka,

eyang tjhabeng sa batho

ba balelele, ba sotseng,

tjhaba se tshajwang hole le haufi,

tjhaba se matla, se hatakelang,

seo naha ya sona

e tletsatletseng dinoka.

₃Lona baahi bohle ba lefatshe,

lona ba ahileng lefatsheng,

tadimang ha mokgele

o phahamiswa dithabeng,

mamelang ha lenaka le lla.

₄Morena o itse ho nna:

“Ke tla tadima

ke le leahong la ka, ke kgutsitse,

sa ha tsatsi le tjhesa haholo,

sa phoka e lalang ha ho kotulwa.”

₅Etlare ho eso kotulwe,

thunthung di se di ponne,

ha tholwana tsa morara

di qala ho bopeha,

a kgaole mahlomela

ka thipa ya ho faola,

a kgaole makala

a qalang ho thathalla.

₆Bohle ba tla tlohellwa matlaka

hara dithaba,

ba tlohellwe

le tsona batana tsa naha;

hlabula matlaka

a tla ja dinama tsa bona,

mariha batana tsa naha

di ba harole.

₇Ka nako eo Morena wa mabotho

o tla tlisetswa dimpho,

ke ba balelele, ba sotseng,

ba tjhaba se tshajwang hole le haufi,

tjhaba se matla, se hatakelang,

seo naha ya sona

e tletsatletseng dinoka;

mpho di tliswe Thabeng ya Sione,

moo ho kgumamelwang

Morena wa mabotho.