Bible Reading Plan – Day 176

₂Mohla matsatsi a ho qetela,

thaba eo Tempele ya Morena

e leng hodima yona

e tla phahamela dithaba tsohle,

e phahamele le maralla wohle,

ditjhaba tsohle di phallele ho yona.

₃Matjhabatjhaba a tla fihla, a re:

“Tloong, re nyoloheleng

Thabeng ya Morena,

re nyoloheleng

Tempeleng ya Modimo,

Tempeleng ya Modimo wa Jakobo.

O tla re ruta ditaba tsa hae,

re tle re tsamaye tseleng tsa hae;”

kaha molao

o tla tswa Thabeng ya Sione,

ntswe la Morena

le tswe Jerusalema.

₄Morena o tla ahlolela ditjhaba,

a fedise ho se utlwane

hara tjhaba tse ngata;

sabole tsa tsona

di tla di etsa mehoma,

marumo a tsona di a etse disekele,

tjhaba di ke ke

tsa hlola di nkelana disabole,

di ke ke

tsa hlola di itokisetsa dintwa.

₅Lona ba ntlo ya Jakobo tloong,

a re tsamayeng seding la Morena.

₆Morena, o lahlile tjhaba sa hao,

e leng ntlo ya Jakobo,

se tletse tumelo

tse tswang Botjhabela,

e bile ke dinohe jwaloka Bafilesita,

se kgomaretse meetlo ya baditjhaba.

₇Naha ya sona

e tletse silefera le kgauta,

matlotlo a tsona

ha a na pheletso;

naha ya sona

e tletse pere tse ngata,

kariki tsa sona tsa ntwa

ha di na palo.

₈Naha ya sona

e tletse medimo ya bohata,

se kgumamela

mesebetsi ya matsoho a sona,

mesebetsi e bopilweng

ke menwana ya sona.

₉Batho bohle ba tla obama,

banna bohle ba ikokobetse,

o se ke wa ba tshwarela, Morena.

₁₀Ipateng hara mafika,

le ipate le madumeleng,

ka baka la ho tshaba Morena

le kganya ya botlotlehi ba hae!

₁₁Moikakasi o tla kokobetswa,

baikgohomosi bona ba nyenyefatswe,

mohlang oo ke Morena feela,

ya tla phahamela tsohle.

₁₂Tsatsi le teng

le beilweng ke Morena wa mabotho,

le beetsweng

baikgantshi le baikgohomosi,

le bohle ba ikakasang,

hore a tla ba kokobetse;

₁₃le beetswe le kedare tsa Lebanone,

dikedare tse telele, tse phahameng,

le dieike tsohle tsa Bashane;

₁₄le dithaba tsohle tse tlhoro di telele,

le maralla wohle a phahameng;

₁₅le tora e nngwe le e nngwe

e phahameng,

le marako wohle a haheleditsweng;

₁₆le dikepe tsohle tsa Tarashishe,

le mesebetsi yohle

e kgahlang mahlo.

₁₇Boikgantsho ba motho

bo tla kokobetswa,

boikgohomoso ba hae bo fediswe,

mohlang oo ke Morena feela

ya tla phahamela tsohle;

₁₈medimo ya bohata

e tla fediswa yohle.

₁₉Batho ba tla balehela mahaheng,

ba balehele katlasa mafika,

ba kene mekoting

e tjhekilweng fatshe,

ka baka la ho tshaba Morena

le kganya ya botletlehi ba hae,

ha a phahama ho tshosa lefatshe.

₂₀Mohlang oo medingwana ya bohata

ya silefera, le ya kgauta,

eo batho ba e etseditseng

ho e kgumamela,

ba tla e akgella

dikgwiti le bo-mmankgane.

₂₁Batho ba tla balehela mahaheng,

katlasa mafika le mafarung,

ka baka la ho tshaba Morena,

le ho tshaba kganya

ya botlotlehi ba hae,

ha a phahama ho tshosa lefatshe.

₂₂Kgaotsa ho tshepa motho,

motho ya phefumolohang feela.

Hona motho e ne e le eng?

₁Bonang Morena,

Morena mabotho,

o kgatheng la ho amoha

Jerusalema le Juda,

tsohle tseo di iphedisang ka tsona,

a di amohe dijo tsohle

le metsi wohle.

₂O tla di amoha

mohale le mohlabani,

moahlodi le moporofeta,

senohe le moholo wa setjhaba;

₃le molaodi wa bahlabani le lehosana,

moeletsi le setsebi sa mesebetsi,

le ya hlalefetseng ho upella.

₄Baokamedi ba bona

e tla ba bashanyana,

tlokotsebe tsa bana

e be babusi ba bona.

₅Batho bohle ba tla hatellana,

motho ka mong a hatelle e mong,

ba ahisaneng le bona ba hatellane.

Batjha ba tla tsohela

baholo ba bona matla,

ba eisehang ba tsohele

batlotlehi matla.

₆Motho o tla tshwara

e mong wa bana babo,

a mo tshware

a le lapeng labo, a re:

“O na le seaparo,

eba mmusi wa rona,

masupi ana a ke a buswe ke wena!”

₇Mohlang oo eo o tla meketsa, a re:

“Ha nka ke ka ba pheko ya lona,

lapeng ha ka

ha ke na dijo le seaparo,

o ke ke wa nketsa mmusi,

mmusi wa tjhaba sena!”

₈Jerusalema e kgothometsehile,

Juda yona e se e putlame fatshe;

Polelo le ketso tsa tsona

di fetohetse Morena,

di kgopisa mahlo a tlotlehang a hae.

₉Fahleho tsa tsona di a di qosa,

di ipoletse sebe sa tsona

jwaloka Sodoma,

le ho se pata di sitwa ho se pata.

Di madimabe hakaakang!

Koduwa ena di imemetse yona!

₁₀Tsebisa ba lokileng

hore tsohle di tla loka,

ba tla ja ditholwana

tsa mesebetsi ya bona.

₁₁Ho madimabe ba kgopo,

hobane koduwa

e tla ba wela hodimo,

ba putswe

ho ya ka mesebetsi ya bona.

₁₂Batjha ba hatella tjhaba sa ka,

basadi ke bona babusi ba sona;

tjhaba sa ka,

badisa ba lona ba a le kgelosa,

ba le faposa tseleng ya lona.

₁₃Morena o a ema,

o bolela qoso ya hae,

o a ema, o ahlola ditjhaba.

₁₄Morena o qosa baholo

ba tjhaba sa hae,

o qosa le babusi ba sona, o re:

“Tshimo ya ka ya morara

e lobetswe ke lona,

matlo a lona

a tletse tse amohilweng mafutsana.

₁₅Ke ka baka lang

ha le hatakela setjhaba sa ka,

mafutsana le wona le a tlatlapa?”

ho rialo Morena, Morena mabotho.

₁₆Morena o re:

“Basadi ba Sione ba a ikgohomosa,

ba tsamaya melala ba e thamotse,

ka mahlo a bona ba ntse ba bonya,

ba rwanyaketsa, ba hatela haufi,

maqaqailana a bona a lla masekana.

₁₇Kahoo Morena

o tla kgophosa hlooho tsa bona,

hlooho tsa bona

a di phumole mafatla.”

₁₈Mohla tsatsi leo,

Morena o tla ba amoha mekgabiso:

mefitshane le meqhaka

le difaha tsa molala;

₁₉masale, dipetja le wona masira;

₂₀le dikola, le dithoto, le dinyepa,

le dibotlolo tsa ditlolo, le dithatho;

₂₁le masale a monwana

le masale a dinkong,

₂₂le diaparo tse majabajaba,

le ditipe, le mekotlana;

₂₃le diipone, le diaparo tsa lene,

le dituku, le ditjale.

₂₄Bakeng sa monko o monate

ho tla nkga phu!

Bakeng sa senyepa e be lerapo,

bakeng sa moriri o lohilweng

ba phumohe mafatla,

bakeng sa aparo tse ntle

e be tse mahwashe,

bakeng sa fahleho tse borethe

e be tse mabadi.

₂₅Bana ba lona

ba tla bolawa ka sabole,

e leng bona bahale ba lona ntweng.

₂₆Menyako ya Sione e tla lla,

e bokolle,

Sione e rapalle fatshe,

e fetohe lesupi.