Bible Reading Plan – Day 134

₁Bana, mamelang thuto,

thuto ya ntata lona,

le e ele hloko,

e tle le ruise kutlwisiso.

₂Ke le nea thuto ya sebele,

se e furalleng ke hona.

₃Ha ke ne ke le ngwana

ya ratwang ke ntatae,

ngwana ya mong feela,

sebokotswa-ke-mmae,

₄ntate a na nthuta, a re:

“Polelo tsa ka

di se tlohe pelong ya hao,

boloka taelo tsa ka o tle o phele.

₅Iphumanele bohlale,

iphumanele kutlwisiso,

se lebale polelo tsa ka,

o se di kgelohe;

₆se furalle bohlale, bo tla o sireletsa;

bo rate, bo tle bo o lebele.

₇Bo kahodimo ho tsohle,

iphumanele bona,

ka tsohle tseo o nang le tsona,

o bo reke, o iphumanele kutlwisiso.

₈Bo thoholetse, bo tla o phahamisa;

ha o bo kgomarela bo tla o tlotla.

₉Bo tla kgabisa hlooho ya hao,

bo e kgabise

ka moqhaka o bohehang,

bo o rwese mofapahlooho wa tlotla.”

₁₀Mora wa ka, mamela,

o amohele polelo tsa ka,

lemo tsa bophelo ba hao di tle di ate.

₁₁Ke o rutile tsela tsa bohlale,

ka o tsamaisa tseleng tse otlolohileng.

₁₂Ha o tsamaya

o ke ke wa sitiswa ke letho,

ha o matha o ke ke wa kgoptjwa.

₁₃Tshwara thuto ena, o e mamarele,

o e dise ka thata,

ke yona bophelo ba hao.

₁₄Se tsamaye tseleng tsa ba kgopo,

se tsamaye tseleng ya baetsadibe.

₁₅E kgese, o be o e kwekwetle;

e kgelohe, o ikele ka tsela ya hao.

₁₆Ha ba sa etse bokgopo

ha ba robale,

ba fadimehiswa

ke takatso ya ho bolaya.

₁₇Ba ja bohobe ba bokgopo,

ba nwe veine ya meferefere.

₁₈Tsela ya ba lokileng

e ka mafube a meso,

kganya ya yona e eketseha,

ho fihlela hara mpa motsheare.

₁₉Tsela ya ba kgopo e ka fifi le letsho,

ha ba tsebe se ba kgothometsang.

₂₀Mora wa ka,

mamela mantswe ana a ka,

o sekehele polelo tsa ka tsebe.

₂₁Polelo tsa ka o se di lebale,

o di boloke ka pelong ya hao;

₂₂ke bophelo ho ba di amohelang,

di phedisa mmele ya bona hamonate.

₂₃Baballa pelo ya hao,

e baballe ho feta tsohle,

hobane ke yona diba sa bophelo.

₂₄Se bue leshano ka molomo wa hao,

puo tse thetsang

di se tswe ka hanong la hao.

₂₅Mahlo a hao

a tadime kapele ho wena,

dintshi tsa hao di se ke tsa panya.

₂₆Qamaka ka hloko

moo o hatang teng,

tsela tsohle tsa hao di tle di tsitse.

₂₇Se kgelohele ka ho le letona

kapa ka ho le letshehadi,

mehato ya hao

e o phemise bokgopo.

₁Mora wa ka,

ela bohlale ba ka hloko,

thuto ya ka o e sekehele tsebe,

₂o tle o be le tlhalohanyo,

molomo wa hao o rue tsebo.

₃Molomo wa mosadi wa sehlola

o qhitsa dinotshi,

leme la hae

le borethe ho feta leokwana;

₄qetellong le baba sa leshokgwa,

le bohale sa sabole,

sabole e mahalemabedi.

₅Maoto a hae a theohela lefung,

mehato ya hae e lebisa lebitleng;

₆tsela ya bophelo

ha a re letho ka yona,

metsamao ya hae

e kgopametse moo a sa tsebeng.

₇Kahoo bana ba ka,

mmameleng ke hona:

Polelo tsa ka

le se ke la di kgeloha;

₈le tsamayeng tseleng tse hole,

tse hole le sehlola,

monyako wa ntlo ya sona

le se o atamele,

₉esere matla a lona

a itjellwa ke ba bang,

dilemo tsa lona

tsa fella ho ya sehloho,

₁₀ba bang ba ithabisa

ka maruo a lona,

mofufutso wa lona

wa ruisa lapa lesele.

₁₁Qetello ya bophelo ba hao

e tla ba mefehelo,

ha mmele wa hao o motetse,

o so le masatswane.

₁₂O tla re:

“Ke ne ke hloile ho kgalengwa,

ho ntshwa diphoso

le hona ke ho hloile!

₁₃Thuto tsa baruti ba ka

ke ne ke sa di natse,

balai ba ka le bona

ke sa ba mamele.

₁₄Jwale ke fihlile dintshing tsa timelo,

ke eme kahara phutheho yohle.”

₁₅Jwale nwa metsi

a diba sa ho tjhekwa ke wena,

metsi a phallang a mohlodi wa hao.

₁₆O re bonna ba hao

bo tsholohele ditseleng,

matla a bona a hafakwe mabaleng?

₁₇Eka kgona e be ba hao o le inotshi,

o se ka bo abelana le ba bang.

₁₈Bonna ba hao

bo ke bo hlohonolofale,

o ithabise

ka mosadi wa hao wa matswathaka,

₁₉ya ratehang sa tshepe,

ya natlailang sa kgama;

kamehla matswele a hae

a o thabise,

kamehla rato la hae

le ke le o hohele.

₂₀Mora wa ka,

ho ya kang

ha sehlola se o hohela?

O manamelang

fubeng sa mosadi wa motho?

₂₁Tsela tsohle tsa motho

Morena o a di bona,

metsamao yohle ya hae

le yona o a e lekola.

₂₂Motho ya kgopo

o tshwaswa ke makgopo a hae,

dikgwele tsa dibe tsa hae

di mo kgatele ruri.

₂₃O tla bolawa ke ho hloka kgalemo,

tsela a e kgeloswe

ke bothotohadi ba hae.

₁Mora wa ka,

ha o itlamme

ho lefa molato wa wa heno,

wa hlapanyetsa e mong ho mo lefella,

₂polelo tsa hao di tla o tshwasa,

mantswe a hao a o etsetse leraba.

₃Ha o rata ho itokolla, mora ka,

kahobane o tla be o le matsohong,

matsohong a mohaeno,

etsa tjena:

Eya, o ikokobetse ho yena,

o mo rapele ho fihlela a o mamela.

₄O se ke wa robala,

leha e le hona ho otsela.

₅Ipholose sa tshepe

matsohong a setsomi,

ipholose sa nonyana

rabeng la motshwasi wa yona.

₆Hela! wena sekgoba,

tsamaya o ye ho bohlwa!

Hlahloba mekgwa ya bona,

o tlo hlalefe!

₇Leha bo se na motsamaisi,

bo se na mmusi le mohlahlobi,

₈hlabula bo ipatlela dijo tsa bona,

bo ipokellele tsona ha ho kotulwa.

₉Wena sekgoba,

o tla robala ho fihlela neng?

O tla tsoha neng borokong ba hao?

₁₀O re: “A nke ke re shwa!

ke boele ke re shwa!

ke phuthaphuthe matsoho,

ke iphomolele.”

₁₁Fuma ba hao bo tla o nanarela,

bo o nanarele jwaloka senokwane,

tlala e o wele hodimo

sa motho a nkile dihlomo.

₁₂Motho e mobe, ya kgopo,

o tsamaya a fefetha leshano;

₁₃o roba leihlo la hae,

a ngolangole fatshe ka leoto,

a qhwayaqhwaye ka monwana;

₁₄o rera thetso ka pelong ya hae,

kamehla o jala moferefere.

₁₅Koduwa e tla mo wela hodimo,

e mo wele hodimo ka tsometso,

a timetswe hanghang

ho se na pheko.

₁₆Ntho di tsheletse,

tseo Morena a di hloileng,

e, di supile

tseo e leng manyala ho yena:

₁₇Ke mahlo a ikgohomosang,

leleme le tletseng thetso,

matsoho a tshollang madi,

madi a se nang molato;

₁₈pelo e rerang bokgopo,

maoto a potlakelang bobeng;

₁₉paki ya bohata, e bolelang leshano,

le ya jalang diqabang

hara bana ba motho.

₂₀Mora wa ka,

boloka taelo tsa ntatao,

o se furalle thuto ya mmao;

₂₁di boloke ka pelong ya hao,

di rwale molaleng wa hao.

₂₂Ha o tsamaya di tla o etella pele,

ha o robala ebe di a o lebela,

ha o tsoha ebe di bua le wena.

₂₃Taelo ke lona lebone,

thuto ke lona lesedi,

kgalemo ke bona bophelo,

₂₄ho o phemisa mosadi wa sehlola,

le molomomonate wa seraburabu.

₂₅Pelo ya hao

e se lakatse botle ba sona,

mahlo a sona a se ka o hohela,

₂₆hoba seotswa,

le ka sengwatho o ka se reka,

athe sehlola sona

se tsoma bophelo ba hao.

₂₇Na motho a ka okga mollo,

a o okgela fubeng sa hae,

ebe aparo tsa hae

tsona ha di tuke malakabe?

₂₈Na motho a ka tsamaya

hodima mashala,

ebe maoto a hae wona ha a tjhe?

₂₉O jwalo ya kenang

kobong tsa mosadi wa motho,

ya amang mosadi,

eo a ke ke a phema kahlolo!

₃₀Shodu ha le utswa hoba le lapile,

batho ha ba ke ba le nyedisa.

₃₁Ha le ka tshwarwa le tla lefa hasupa,

le lefe ka tsohle tsa lapa la lona.

₃₂Motho ya febang o hloka kelello,

ya etsang jwalo

o timetsa bophelo ba hae;

₃₃o tla batwa leoma a tlontlolohe,

dihlong tsa hae

di se ke tsa hlola di fela.

₃₄Poulelo e halefisa monga mosadi,

ha a iphetetsa ha a qenehele letho;

₃₅a ke ke a amohela tefo

ya mofuta ofe le ofe,

a ke ke a kgotsofatswa ke dimpho,

leha mpho tseo di ka ba ngata.

₁Mora wa ka,

boloka polelo tsa ka,

o boloke taelo tsa ka,

di boloke ka pelong ya hao.

₂Boloka taelo tsa ka o tle o phele,

thuro tsa ka le tsona di hlokomele;

di hlokomele

seka thaka ya ihlo la hao.

₃Di tlamelle menwaneng ya hao,

o di ngole tlapeng la pelo ya hao.

₄Ere ho bohlale: “Wena kgaitsedi,”

kutlwisiso yona

e bitse motswalle wa hao.

₅Di tla o phemisa mosadi,

mosadi wa sehlola,

mosadi ya ekang ka dipolelo.

₆Fesetereng ya ntlo ya ka

ka tadima ka mamatjana a yona.

₇Ka tadima hara ba se nang tsebo,

ka bona mohlankana

ya hlokang kutlwisiso,

₈a feta pela huku ya seterata,

a tsamaya ka tsela e yang ha sehlola;

₉e le ka shwalane,

tsatsi le se le diketse,

fifi la bosiu le qala ho aparela.

₁₀Mosadi a betseha

ho mo kgahlanyetsa,

a apere jwaloka seotswa,

ka maqheka a sona.

₁₁O manganga, ke mmadiberwane,

ke pheka-ke-leoto, ha a dule hae;

₁₂ere a le seterateng,

a be a se a le mabaleng,

a qatjhama jwalo

hukung tsa diterata.

₁₃A mamarela mohlankana enwa,

a mo aka,

ka fahleho se hlokang tlhong

a re ho yena:

₁₄“Kajeno ke entse nyehelo ya ka,

kano tsa ka kajeno ke di phethile,

ke na le dijo tsa nyehelo eo,

ke na le tsona ha ka;

₁₅ke tlile tjena ho o kgahlanyetsa,

kgale ke o batla, jwale ke o fumane!

₁₆Hodima moalo wa ka

ke adile masela a lene,

lene e mebalabala e tswang Egepeta.

₁₇Ke nonoditse moalo wa ka ka mmira,

ka o nonotsa ka lekgala le sinamone.

₁₈Tloo, re kgotsofatse rato la rona

ho fihlela bo esa,

re ithabise ka ho mamarelana.

₁₉Hae mona monna wa ka ha a yo,

o nkile leeto, o ile hole.

₂₀O nkile mokotlana o tletse tjhelete,

o tla kgutlela hae kgwedi e tolokile.”

₂₁Ka puo tsa lehelehele lena

mohlankana a ineela,

ka molomo wa lona o ekang,

mohlankana a hapeha.

₂₂Ka ho panya ha ntshi

mohlankana a le sala morao,

a le latela sa pholo e iswa tlhabong,

sa kgama e tlolela ka lemeneng;

₂₃sa nonyana e tshwaswa

ke raba le tjhehilwe,

e sa tsebe hore jwale e ya lefung,

ho fihlela ha motsu

o e phunya sebete.

₂₄Jwale bana ba ka mmameleng,

sekehelang polelo tsa ka tsebe.

₂₅Pelo tsa lona

di se latele mekgwa ya seotswa,

le se tsamaye mehlaleng ya sona.

₂₆Mahlatsipa a mangata

se a entse mofela,

tshwele la ba bolailweng ke sona

ha le na palo.

₂₇Ntlo ya sona

ke tsela e isang lebitleng,

ke mmila o isang Nqalong ya Bafu.