Bible Reading Plan – Day 124

Morena, ke ipiletsa ho wena,

ako mpotlakele;

sekehela lentswe la ka tsebe,

ha ke ipiletsa ho wena.

₂Thapelo ya ka

e nyolohele ho wena,

e nyolohe jwaloka mokubetso,

ke phahamise matsoho a ka

e le nyehelo ya mantsiboya.

₃Morena, ako bee molebedi,

o mmee molomong wa ka,

o dise monyako wa molomo wa ka;

₄pelo ya ka e se ke ya sekama,

ya sekamela dinthong tse mpe.

Ke se ke ka etsa

mesebetsi ya bokgopo

mokgatlong wa batho ba sa lokang;

ke se ke ka latswa menate ya bona.

₅Ho molemo

ha ke otlwa ke ya lokileng,

ke kgalemelwa ke yena;

hoo ke ole eo hlooho ya ka

e ke keng ya e hana,

ke tla nne ke rapele

leha ba kgopo ba ntshwenya.

₆Mohla baahlodi ba bona

ba dihelwang dilomong,

ke hona batho ba tla tseba

hore mantswe a ka e ne e le a nnete.

₇Jwalokaha ho kgathwa,

ho tabolwa thite,

masapo a bona

a tla qhalanngwa jwalo,

a qhalanngwe

kgorong ya Nqalo ya Bafu.

₈Morena, monga ka,

mahlo a ka a tadimile ho wena,

ke tshabela ho wena,

se ntlohelle hore ke timele.

₉Nqobise sefi

seo ba ntjhehileng ka sona,

le mamena

a ba etsang tse sa lokang.

₁₀Bohle ba kgopo

ba ke ba wele marabeng a bona,

ha nna ke phonyoha.

₂Ke lla ho Morena

ka lentswe le phahameng,

ke etsa thapedi ho Morena

ka lentswe le phahameng.

₃Ke hlahisa sello sa ka,

ke se hlahisa kapele ho yena,

ke bea tsietsi ya ka kapele ho yena.

₄Ha moya wa ka o imetswe,

wena o tseba tsela ya ka.

Tseleng eo ke tsamayang ho yona

ba ntjhehetse sefi.

₅Ke tadima ka tsohong la ka le letona:

Ha ho ya ntsotellang;

ha ho moo nka tshabelang teng,

ha ho motho ya nnatsang.

₆Morena, ke lla ho wena,

ke re: “Ke wena setshabelo sa ka,

o kabelo ya ka

lefatsheng la ba phelang.”

₇Ako mamele sello sa ka,

hobane ke kokobeditswe haholo.

Nnamolele ho ba ntlhorisang,

hobane ba mpheta ka matla.

₈Ako nntshe tjhankaneng,

ke tle ke boke lebitso la hao.

Ba lokileng ba tla mpokanela,

hoba o tla be o ntswetse molemo.

Morena, ako utlwe thapelo ya ka,

o sekehele thapedi ya ka tsebe;

o nkarabe

ka baka la botshepehi ba hao,

le ka baka la ho loka ha hao.

₂O se ke wa qosa mohlanka wa hao,

hobane ho wena

ha ho ya lokileng.

₃Sera se a ntelekisa,

se nkgatakella fatshe,

se mphedisa lefifing

jwaloka ba shweleng kgalekgale.

₄Moya wa ka o imetswe,

pelo ya ka e thethefetse,

e thethefetse ka sefubeng sa ka.

₅Ke hopola ditshiu tsa boholoholo,

ke lohotha diketso tsa hao tsohle,

ke nahana mesebetsi,

mesebetsi ya matsoho a hao.

₆Ke phahamisa matsoho a ka,

ke a phahamisetsa ho wena,

moya wa ka o o nyoretswe

jwaloka lefatshe le omeletseng.

₇Morena, ako nkarabe kapele;

moya wa ka o a tepella.

O se ke wa mpatela

sefahleho sa hao,

ke se ke ka tshwana

le ba theohelang lebitleng.

₈Etsa hore ke tsebe mohau wa hao,

ke o tsebe e sa le hoseng,

hobane ke o tshepile;

mpontshe tsela

eo nka tsamayang ka yona,

hobane ke o rapela

ka moya wa ka wohle.

₉Morena, ako nnamolele,

o nnamolele direng tsa ka,

hobane ke tshabetse ho wena.

₁₀Nthute ho phetha thato ya hao,

hobane ke wena Modimo wa ka.

Moya wa hao o motle

o ke o ntsamaise,

o ntsamaise tseleng e bataletseng.

₁₁Morena, o tla nnea bophelo

ka baka la lebitso la hao,

o ntopolle matshwenyehong

ka baka la ho loka ha hao.

₁₂Ka baka la mohau wa hao ho nna,

o tla timetsa dira tsa ka,

o fedise bohle ba ntwantshang,

hobane nna ke mohlanka wa hao.

Ho bokwe Morena, lefika la ka,

yena ya nthutang ho lwana,

yena ya nkwetlisetsang ntwa.

₂Ke setshabelo sa ka

le qhobosheane ya ka,

seqhobo sa ka

le monamoledi wa ka;

ke thebe ya ka,

eo ke itshireletsang ka yona,

ke yena ya beang ditjhaba

katlasa puso ya ka.

₃Morena, ebe motho e ne e le eng,

hoo o ka mo nkelang hloohong?

Ngwana motho e ne e le eng,

hoo o ka mo hopolang?

₄Motho o tshwana le lefeela,

ditshiu tsa hae

di jwaloka moriti o fetang.

₅Morena, phetla mahodimo a hao,

o theohe, o ame dithaba

di tle di foqohe mosi.

₆Betsa mahadima,

dira di tle di qhalane,

o fule ka metsu ya hao,

di tle di phasaphase.

₇Nnanabele o le hodimo,

o mpholose,

o nkinole metsing a lewatle,

le matsohong a baditjhaba;

₈ba buang mashano

ka melomo ya bona,

ba phahamisang matsoho

ho hlapanyetsa bohata.

₉Modimo, ke tla o binela,

ke o binele sefela se setjha,

ke o roke

ka harepa e kgwele di leshome,

₁₀wena ya neang dikgosi tlholo,

wena ya pholosang Davida,

mohlanka wa hao.

₁₁Mpholose saboleng e sehloho,

namolele matsohong a baditjhaba

ba buang mashano

ka melomo ya bona,

ba phahamisang matsoho

ho hlapanyetsa bohata.

₁₂Bara ba rona, botjheng ba bona,

ba ke ba be jwaloka ditlama,

tlama tse holang hantle;

baradi ba rona ba be jwaloka ditshiya,

tshiya tsa dihuku

tse betletsweng ntlo ya bokgosi.

₁₃Mediko ya rona e ke e tlale,

e tsholohe dijo tsa mefutafuta.

Manku a rona a ke a ate ka dikete,

e be diketekete makgulong a rona;

₁₄makgomo a rona a ke a emare,

a se folotse

kapa a shwelwa ke manamane,

ho se be diboko mabaleng a motse.

₁₅Ho lehlohonolo setjhaba

se tlelwang ke tse jwalo,

ho lehlohonolo setjhaba

seo Morena e leng Modimo wa sona.

Ke tla o tumisa,

wena Modimo wa ka

o leng Kgosi ya ka,

ke boke lebitso la hao

kamehla le mehla.

₂Ke tla o boka

ka letsatsi le leng le le leng,

ke rorise lebitso la hao

kamehla le mehla.

₃Morena o moholo,

o lokelwa ke thoriso e kgolo,

boholo ba hae ha bo fihlelwe.

₄Moloko ho isa molokong o mong

o tlotlisa mesebetsi ya hao,

o bonahatsa ketso

tsa bonatla ba hao.

₅Batho ba tla bolela

kganya ya tlotla ya hao,

nna ke nahane dimakatso tsa hao.

₆Ba tla bolela

matla a ketso tsa hao tse tshabehang,

nna ke phete tsa boholo ba hao.

₇Ba tla etsa kgopotso

ya molemo wa hao o moholo,

ba etsetse ho loka ha hao ditlatse.

₈Morena o mosa,

o na le kutlwelobohloko,

o dieha ho halefa,

o tletse mohau.

₉Morena o molemo ho bohle,

lerato la hae

le aparela mesebetsi yohle ya hae.

₁₀Morena, mesebetsi yohle ya hao

e a o leboha,

le batshepuwa ba hao ba a o boka;

₁₁ba bolela tlotla ya mmuso wa hao,

ba bua ka diketso tsa bonatla ba hao.

₁₂Ba tsebisa batho bohle

diketso tsa bonatla ba hao,

le tlotla e kganyang

ya mmuso wa hao.

₁₃Mmuso wa hao

ke mmuso wa kamehla yohle,

le puso ya hao

ke ya meloko yohle.

Morena o tshepahala

dipolelong tsohle tsa hae,

o mohau mesebetsing yohle ya hae.

₁₄Morena o tshehetsa bohle ba wang,

o phahamisa bohle

ba kgokgopaneng.

₁₅Mahlo a bohle a lebeletse wena,

hore o ba fepe ka nako e lokelang.

₁₆Ha o fuparolla seatla,

o kgorisa tsohle tse phelang

ka tseo di di lakatsang.

₁₇Morena o lokile

ho tsohle tseo a di etsang,

mesebetsing yohle ya hae

o mohau.

₁₈Morena o haufi

le bohle ba mo rapelang,

ba mo rapelang kannete.

₁₉O phetha ditakatso

tsa ba mo tshabang,

o utlwa sello sa bona,

mme o a ba pholosa.

₂₀Morena o baballa bohle

ba mo ratang,

empa bohle ba kgopo o a ba timetsa.

₂₁Molomo wa ka

o ke o rorise Morena;

batho bohle ba boke

lebitso la hae le halalelang,

ba le boke kamehla le mehla.

₁Haleluja!

Boka Morena, wena moya wa ka!

₂Ke tla rorisa Morena

ha ke ntse ke phela;

ke tla roka Modimo wa ka

bophelong ba ka bohle.

₃Le se ke la tshepa mahosana,

leha e le motho ya se nang matla,

matla a ho pholosa.

₄Hoba a neele moya,

motho o kgutlela mobung;

ka lona tsatsi leo

merero ya hae e a fela.

₅Ho lehlohonolo

eo Modimo wa Jakobo

e leng thuso ya hae;

eo Morena Modimo wa hae,

e leng tshepo ya hae.

₆Ke yena

ya entseng mahodimo le lefatshe,

lewatle le tsohle tse ho lona.

O tshepahala kamehla,

₇o ahlolela ba hateletsweng,

o fepa ba lapileng;

Morena o lokolla batlamuwa,

₈Morena o tutubolla mahlo a difofu.

Morena o phahamisa

ba kgokgopaneng;

Morena o rata ba lokileng.

₉Morena o sireletsa bajaki,

o thusa kgutsana le mohlolohadi,

athe merero ya ba kgopo

o a e nyopisa.

₁₀Morena o busa kamehla yohle;

Modimo wa hao, Sione,

ke wa meloko yohle.

Haleluja!

₁Haleluja!

Ke hantle

ho boka Morena,

ho monate

ho roka Modimo wa rona,

o lokelwa ke thoriso.

₂Morena o tsosa

marako a Jerusalema,

o phutha Baiseraele

ba neng ba lelekilwe.

₃O fodisa ba pelo di hlabehileng,

o tlamella maqeba a bona.

₄O tseba palo ya dinaledi,

kaofela ha tsona

o di bitsa ka mabitso.

₅Morena wa rona o moholo,

o matla haholo,

kelello ya hae e ke ke ya lekanngwa.

₆Morena o phahamisa ba eisehang,

ba kgopo o ba dihela fatshe.

₇Binelang Morena sefela sa teboho,

le roke Modimo wa rona ka harepa.

₈Ke yena ya kwahelang mahodimo,

ya a kwahelang ka maru,

ya nesetsang lefatshe pula,

ya medisang jwang dithabeng.

₉O fepa diphoofolo ka dijo tsa tsona,

le madinyane a makgwaba

ka tseo a di llelang.

₁₀Morena ha a thabele matla a dipere,

ha a kgahlwe ke lebelo la motho;

₁₁o kgahlwa ke ba mo tshabang,

le ba tshepileng mohau wa hae.

₁₂Tlotlisa Morena, wena Jerusalema,

wena Sione, rorisa Modimo wa hao.

₁₃O tiisitse mekwallo,

mekwallo ya dikgoro tsa hao,

a hlohonolofatsa bana ba hao

ba phelang ho wena.

₁₄O entse hore kgotso e be teng

meeding ya hao,

a o kgorisa ka koro e atlehileng.

₁₅Ke yena ya ntshang taelo ya hae

e yang lefatsheng,

molaetsa wa hae o a potlaka.

₁₆O kgethehisa lehlwa le kang boya,

o etsa hore serame se lale,

se ke molora.

₁₇O hasanya sefako sa hae

se kang makumane;

ke mang ya ka phelang

hara mohatsela wa hae?

₁₈Hang ha a ntsha taelo,

di se di qhibidiha.

O fokisa moya,

metsi a boele a phalle.

₁₉O tsebisa ba leloko la Jakobo,

o ba tsebisa lentswe la hae,

le thato le kahlolo tsa hae ho Iseraele.

₂₀Ha ho setjhaba

seo a kileng a se etsetsa jwalo,

ha ho setjhaba

seo a kileng a se tsebisa

kahlolo tsa hae.

Haleluja!

₁Haleluja!

Rorisang Morena,

lona ba mahodimong,

mo roriseng,

lona ba hodimodimo.

₂Mo roriseng,

lona mangeloi a hae kaofela,

mo roriseng,

lona mabotho a hae wohle.

₃Mo roriseng,

lona letsatsi le kgwedi,

mo roriseng,

lona dinaledi tsohle tse phatsimang.

₄Mo roriseng,

lona mahodimo a hodimodimo,

le lona metsi

a kahodimo ho mahodimo.

₅Tsohle di ke di rorise

lebitso la Morena,

hobane o ile a laela,

mme tsa hloleha.

₆O entse hore di be teng

kamehla le mehla,

a di beela taelo

eo di ke keng tsa e tlola.

₇Rorisang Morena,

lona ba lefatsheng,

lona dikganyapa tsa mawatle

le tsa madiba wohle;

₈lona mollo le sefako,

lehlwa le mohodi,

moya wa sefefo

o phethang taelo ya hae;

₉lona dithaba le maralla wohle,

difate tsa ditholwana

le tsa dikedare tsohle;

₁₀lona diphoofolo tsa naha

le tsa hae tsohle,

dihahabi le dinonyana tse fofang;

₁₁lona dikgosi tsa lefatshe

le lona merabe yohle,

mahosana le baahlodi bohle

ba lefatshe;

₁₂lona bahlankana le lona barwetsana,

maqheku le lona ba batjha.

₁₃Tsohle di rorise

lebitso la Morena;

ke lona feela

le lokelang ho tlotliswa,

botlotlehi ba hae bo phahame,

bo phahametse lefatshe,

bo phahametse le mahodimo.

₁₄O tsositse setjhaba sa hae molota,

ke seo batshepuwa ba hae

ba ithorisang ka sona,

bana ba Iseraele,

setjhaba se leng haufi le yena.

Haleluja!

₁Haleluja!

Binelang Morena sefela se setjha,

le mo rorise

phuthehong ya batshepuwa ba hae.

₂Iseraele a ke a thabe,

a thabele Mmopi wa hae,

bana ba Sione

ba nyakallele Kgosi ya bona.

₃Ba ke ba rorise lebitso la hae,

ba le rorise ka mehobelo,

ba mo roke ka moropa le ka harepa.

₄Morena o kgahlwa ke setjhaba sa hae,

o tlotlisa bahlophehi

ka ho ba pholosa.

₅Batshepuwa ba hae ba thabe,

ba be motlotlo,

ba mo etsetse ditlatse

leha ba robetse.

₆Ba tumise Modimo

ka melomo ya bona,

ba ntse ba tshwere sabole,

sabole e sehang kamahohle;

₇ba tle ba iphetetse ho baditjhaba,

ba dihele kotlo hodima merabe;

₈ba tlame kgosi tsa yona

ka mahlaahlela,

le bahlomphehi ba yona

ka diketane;

₉ba ba dihele kahlolo

e seng e ngotswe.

Ke bona he,

boitumelo ba batshepuwa ba hae.

Haleluja!

₁Haleluja!

Rorisang Morena

a le sehalalelong sa hae,

mo roriseng

a le sebakeng sa hae se matla,

baka sa hae sa lehodimo.

₂Mo roriseng

ka baka la diketso tsa bonatla ba hae,

mo roriseng

ka baka la boholo ba hae,

boholo ba hae bo fetisisang.

₃Mo roriseng

ka modumo wa lenaka,

mo roriseng

ka thomo le ka harepa.

₄Mo roriseng

ka moropa le ka mohobelo,

mo roriseng

ka seletsa se dikgwele, le ka makodilo;

₅mo roriseng

ka mangenengene a ketemanang,

mo roriseng

ka mangenengene a llang haholo.

₆Tsohle tse phelang

di ke di rorise Morena.

Haleluja!