Bible Reading Plan – Day 122

Ke ipiletsa ho Morena,

ha ke le matshwenyehong,

mme o a nkaraba.

₂Morena, ako nnamolele

molomong wa ya leshano,

le lelemeng la ya thetsang.

₃Wena ya leleme le thetsang,

o tla newa eng, o ekeletswe eng?

₄O tla newa metsu ya mohale,

metsu e ntjhotjho,

e tswang mashaleng a hlenneng,

mashala a sehalahala.

₅Ho madimabe nna

ka ho jaka Mesheke,

ka ho aha hara ditente tsa Kedare.

₆Ke nako e telele haholo

ke ahile hara ba hloileng kgotso.

₇Nna ke motho wa kgotso,

empa ha ke bua ka kgotso,

bona ba batla ntwa.

Mahlo a ka a tadima dithabeng;

ekaba thuso ya ka e tla tswa kae?

₂Thuso ya ka e tswa ho Morena,

ya entseng mahodimo le lefatshe.

₃A ke ke a tlohela leoto la hao,

a le tlohella ho thella,

molebedi wa hao a ke ke a otsela.

₄Ruri molebedi wa Iseraele

ha a otsele, ha a kgalehe.

₅Morena ke molebedi wa hao,

Morena ke moriti wa hao

ka letsohong la hao le letona.

₆Tsatsi le ke ke

la o ntsha kotsi motsheare,

leha e le kgwedi bosiu.

₇Morena o tla o sireletsa,

a o sireletse bobeng bohle,

a baballe bophelo ba hao.

₈Morena o tla o lebela

ha o eya le ha o kgutla,

ho tloha jwale le kamehla yohle.

Ke ile ka thaba ha ho thwe ho nna:

“A re yeng ka Tlung ya Morena.”

₂Jwale maoto a rona a eme dikgorong,

dikgorong tsa hao, Jerusalema.

₃Jerusalema e hahilwe e le motse,

tsohle tsa wona di teteane hamonate.

₄Ke moo ho nyolohelang meloko,

meloko yohle ya Morena,

ka taelo e neilweng Iseraele,

hore e yo boka lebitso la Morena.

₅Ke moo ditulo tsa kahlolo

di leng teng,

ditulo tsa ntlo ya Davida.

₆Rapellang Jerusalema e be le kgotso:

“Ba o ratang ba ke ba atlehe.

₇Kgotso e ke e be

kahara marako a hao,

le katleho

ka matlung a hao a bokgosi.”

₈Ka baka la baheso

le metswalle ya ka, ke tla re:

“Kgotso e ke e be le wena.”

₉Ka baka la Ntlo ya Morena,

Morena Modimo wa rona,

ke tla o kopela tse molemo.

Mahlo a ka a tadima ho wena,

wena ya dutseng teroneng,

lehodimong;

₂a jwaloka mahlo a bahlanka,

a tadimileng letsoho

la monga bona.

Jwalokaha mahlo a lekgabunyane

a tadimile letsoho

la mofumahadi wa lona,

le mahlo a rona a tadima

Morena Modimo wa rona jwalo,

ho fihlela a ka re hauhela.

₃Re hauhele Morena, re hauhele,

hobane re nyedisitswe,

ra nyediswa ho feta tekanyo.

₄Re sonngwe ho feta tekanyo,

ra songwa ke ba iketlang,

re nyedisitswe ke ba ikgantshang.

Hoja Morena a se ke a ba le rona,

Iseraele a ke a rialo,

₂hoja Morena a se ke a ba le rona,

ha batho ba ne ba re tsohela matla,

₃ba ka be ba re kwentse

re ntse re phela,

ha kgalefo ya bona

e ne e re tloketse;

₄dikgohola di ka be di re hohotse,

diphororo di ka be di re pupeditse;

₅metsi a befileng

a ka be a re pupeditse.

₆Ho bokwe Morena

ya sa kang a lesa hore ba re je.

₇Re phonyohile jwaloka nonyana

lerabeng la batshwasi;

leraba la kgaoha,

mme ra phonyoha.

₈Thuso ya rona e tswa ho Morena,

ya entseng mahodimo le lefatshe.

Ba tshepileng Morena

ba jwaloka thaba ya Sione,

e ke keng ya sisinngwa,

e tiileng kamehla.

₂Jwalokaha dithaba

di teetse Jerusalema hare,

le setjhaba sa hae,

Morena o se teetse hare jwalo,

ho tloha jwale le kamehla yohle.

₃Efela lere la ba kgopo

le ke ke la busa

lefatshe le abetsweng ba lokileng,

esere ba lokileng ba kenya

matsoho a bona bokgopong.

₄Morena, ako etse tse molemo,

o di etsetse ba lokileng,

le ba pelo di ntle.

₅Empa ba kgelohetseng ditseleng,

ditseleng tse matswedintsweke,

Morena a ke a ba leleke,

a ba leleke le ba kgopo.

Kgotso e ke e be teng Iseraele.

Ha Morena

a kgutlisa batho ba Sione,

a ba kgutlisa bothopuweng,

e ne e ka re a lora.

₂Yaba re keketeha ke ditsheho,

maleme a rona a etsa ditlatse.

Jwale hara ditjhaba ha thwe:

“Morena o ba etseditse tse kgolo.”

₃E, Morena o re etseditse tse kgolo,

ruri re thabile.

₄Morena, ako kgutlise ba habo rona,

ba habo rona ba bothopuweng,

ba kgutle sa melatswana e phallang,

e phallelang Lehwatateng la Borwa.

₅Ba ileng ba jala ka dikgapha,

ba tla kotula ka ditlatse.

₆Ya tsamayang a lla,

a nkile peo e tla jalwa,

o tla kgutla ka ditlatse,

a nkile mangata a hae.

Haeba e se Morena

ya hahang ntlo,

ba e hahang ba sebeletsa lelea.

Haeba e se Morena

ya lebelang motse,

ya o lebelang o fadimehela lefeela.

₂Ke lefeela ha le tsoha kameso,

kapa le dieha ho robala,

le itjella bohobe

boo le bo fumanang ka thata,

athe yena o fa baratuwa ba hae

ba ntse ba ithobaletse.

₃Ruri bana ke lefa

le tswang ho Morena,

tholwana ya popelo ke moputso.

₄Jwaloka metsu

e letsohong la mohale,

bana ba botjha ba motho,

le bona ba jwalo.

₅Ho lehlohonolo monna

ya tlatsitseng kgohlopo ya hae,

a e tlatsa ka yona.

A ke ke a hlajwa ke dihlong,

ha a ngangisana le dira tsa hae,

a ngangisana le tsona

kgorong ya motse.

Ho lehlohonolo bohle,

bohle ba tshabang Morena,

ba tsamayang ditseleng tsa hae.

₂O tla ja tholwana tsa mosebetsi,

tsa mosebetsi wa matsoho a hao,

o tla ba lehlononolo,

o be le katleho.

₃Mosadi wa hao

o tla ba jwaloka morara,

morara o behang ka tlung ya hao;

bana ba hao

ba be jwaloka mahlomela,

mahlomela a mohlwaare

ho potapota tafole ya hao.

₄E, motho ya tshabang Morena

o hlohonolofala jwalo.

₅Morena a ke a o hlohonolofatse,

a o hlohonolofatse a le Sione,

o tle o bohe katleho ya Jerusalema

ka ditshiu tsohle tsa bophelo ba hao.

₆O ke o bone bana ba bana ba hao.

Kgotso e ke e be teng Iseraele.

Haesale ba ntshwenya haholo

ho tloha botjheng ba ka,

Iseraele a ke a rialo,

₂haesale ba ntshwenya haholo

ho tloha botjheng ba ka,

empa ha ba a ka ba ntlhola.

₃Balemi ba lemile

mokokotlong wa ka,

ba entse diforo tse telele.

₄Empa Morena o lokile,

o kgaotse dikgwele tsa ba kgopo.

₅Bohle ba hloileng Sione

ba ke ba hlajwe ke dihlong,

ba tjhetjhiswe kasanthao.

₆Ba be jwaloka jwang

bo marulelong a matlo,

bo ponang pele bo ka fotholwa,

₇boo ho seng ya bo helang,

ya ka tlatsang seatla sa hae ka bona,

kapa ya tlamang mangata

a a nka ka matsoho a hae.

₈Ba fetang ka tsela

ba ke ke ba re ho bona:

“Tlhohonolofatso ya Morena

e ke e be le lona,

re le hlohonolofatsa

ka lebitso la Morena.”

Ke ipiletsa ho wena Morena,

ke le tlasetlase.

₂Morena, ako utlwe lentswe la ka!

Tsebe tsa hao di ke di mamele

ha ke etsa thapedi ya ka.

₃Morena, ha o tshwaya diphoso,

o tshwaya phoso tsa rona,

ke mang, Morena, ya ka phelang?

₄Empa wena o a re tshwarela,

e le hore re tle re o hlomphe.

₅Ke tshepile Morena,

moya wa ka

o tshepile lentswe la hae.

₆Moya wa ka o lebeletse Morena,

ho feta balebedi

ba lebeletseng meso,

e, ho feta balebedi

ba lebeletseng meso.

₇Iseraele a ke a lebelle Morena,

hobane Morena o mohau,

o na le topollo e kgolo.

₈Ke yena ya tla lopolla Iseraele

bokgopong bohle ba hae.

Morena, pelo ya ka ha e ikakase,

mahlo a ka ha a ikgohomose;

ha ke tsotelle dintho tse mphetang,

leha e le tse makatsang,

tse mphahametseng.

₂Empa ke bobisitse moya wa ka,

ka o kgutsisa,

sa ngwana ya kgwesitsweng,

ya sikilweng ke mmae;

e, moya wa ka o jwaloka ngwana,

jwaloka ngwana ya kgwesitsweng.

₃Iseraele a ke a tshepe Morena,

ho tloha jwale le kamehla yohle.

Morena, ako hopole Davida,

le ho hlopheha hohle ha hae,

₂kamoo a neng a hlapanye,

a hlapanyetsa Morena kateng,

a ikana ho Ya Matla,

Modimo wa Jakobo,

₃a re:

“Nke ke ka kena ka tlung ya ka,

kapa ka paqama diphateng tsa ka;

₄mahlo a ka

a ke ke a fumana boroko,

le dintshi tsa ka

di ke ke tsa tutubala,

₅ho fihlela

ke fumanela Morena sebaka,

ke fumanela Ya Matla Leaho,

Ya Matla, Modimo wa Jakobo.”

₆Areka re e utlwetse Eferata,

ra e fumana masimong a Jaare.

₇A re keneng ka Leahong la hae,

re itihele kapele ho yena.

₈Tloo, Morena,

o ye sebakeng sa hao sa phomolo,

wena le areka

e bontshang matla a hao.

₉Baprista ba hao ba apeswe ho loka,

batshepuwa ba hao ba etse ditlatse.

₁₀Ka baka la mohlanka wa hao Davida,

o se ke wa furalla

Motlotsuwa wa hao.

₁₁Morena o ile a hlapanyetsa Davida,

a ke ke a kwenehela tshepiso,

tshepiso ena ya nnete,

a re: “E mong

wa bana ba theka la hao,

ke tla mmea teroneng ya hao.

₁₂Ha bara ba hao

ba ka boloka selekane sa ka,

ba latela ditemoso

tseo ke ba neileng tsona,

le bara ba bona ba tla dula teroneng,

teroneng ya hao kamehla.”

₁₃Morena o ikgethetse Sione,

o ratile hore e be leaho la hae;

₁₄a re: “Sena ke sebaka sa ka

sa phomolo sa kamehla,

ke tla aha mona

hobane ke ratile jwalo.

₁₅Ke tla hlohonolofatsa Sione ka nala,

mafutsana a yona ke a fepe,

ke a fepe, a kgore.

₁₆Baprista ba yona

ke tla ba apesa pholoho,

batshepuwa ba yona

ba etse ditlatse.

₁₇“Teng ke tla bea setloholo sa Davida,

ke se bee hore e be kgosi e matla,

ke lokisetse

Motlotsuwa wa ka lebone.

₁₈Dira tsa hae ke tla di apesa dihlong;

athe yena hloohong ya hae

ho tla kganya mofapahlooho wa hae.”