Bible Reading Plan – Day 120

Ho lehlohonolo

ya tshabang Morena,

ya thabelang melao ya hae haholo.

₂Ditloholo tsa hae

di tla ba matla lefatsheng,

moloko wa ba pelo di ntle

o tla hlohonolofala.

₃Menono le maruo di ka tlung ya hae,

ho loka ha hae

ho hlola kamehla yohle.

₄Ho ba pelo di ntle

o ka lesedi le tjhabang lefifing;

o mosa, o na le kutlwelobohloko,

hape o lokile.

₅Ho lehlohonolo motho ya mosa,

motho ya adimanang,

ya sebetsang ditaba tsa hae ka toka.

₆A ke ke a sisinngwa le ka mohla,

ya lokileng o tla nne a hopolwe,

a hopolwe kamehla yohle.

₇A ke ke a tshoswa

ke ho utlwa taba tse bohloko,

pelo ya hae e matlafetse,

o tshepile Morena;

₈pelo ya hae e tiile, ha a tshabe letho,

o tella ba mo lwantshang.

₉O fana ka matsoho a mabedi,

o fana ho mafutsana,

ho loka ha hae

ho hlola kamehla yohle,

o tsoha molota, o a tlotleha.

₁₀Ya kgopo ha a bona hoo,

o a tlallana,

o tsikitlanya meno, o a monyela;

takatso ya ya kgopo e tla fela.

Lona bahlanka ba Morena,

mo roriseng,

le rorise lebitso la Morena.

₂Ho bokwe lebitso la Morena,

ho tloha jwale le kamehla yohle.

₃Ho tloha botjhabela

ho isa bophirimela,

ho roriswe lebitso la Morena.

₄Morena o phahametse tjhaba tsohle,

tlotla ya hae

e okametse mahodimo.

₅Ke mang ya kang Morena,

Morena Modimo wa rona,

ya dutseng teroneng,

teroneng e hodimodimo,

₆empa a ikokobeletsa ho tadima

mahodimo le lefatshe?

₇O tsosa mofutsana leroleng,

a phahamise mohloki thotobolong;

₈a mo dudise le mahosana,

le mahosana a setjhaba sa habo.

₉O fa nyopa lelapa,

a e etse mma bana ya thabileng.

Haleluja!

₁Mohla Iseraele a tswang Egepeta,

ba ntlo ya Jakobo ba tloha,

ba tloha setjhabeng sesele,

₂Juda ya eba sehalalelo sa Morena,

Iseraele ya eba mmuso wa hae.

₃Lewatle ha le ba bona la baleha,

Jorodane ya tjhetjha kasanthao.

₄Dithaba tsa thala jwaloka dipheleu,

maralla jwaloka dikonyana.

₅Wena lewatle, o balehelang?

Le wena Jorodane,

o tjhetjhelang kasanthao?

₆Lona dithaba,

keng ha le thala jwaloka dipheleu,

le lona maralla, jwaloka dikonyana?

₇Wena lefatshe, thothomela,

thothomela pela fahleho sa Morena,

pela sefahleho

sa Modimo wa Jakobo;

₈yena ya fetolang lefika

letsha la metsi,

lejwe la moralla a le fetole sediba.

₁O se ke wa re nea tlotla, Morena,

o se ke wa e nea rona,

o mpe o e nee lebitso la hao,

ka baka la mohau wa hao

le botshepehi ba hao.

₂Keng ha baditjhaba ba ka re:

“O kae Modimo wa bona?”

₃Modimo wa rona o mahodimong,

o etsa tsohle tse mo kgahlang.

₄Medimo ya bona

ke ya silefera le ya kgauta,

ke mosebetsi wa matsoho a batho.

₅E na le melomo, empa ha e bue;

e na le mahlo, empa ha e bone.

₆E na le ditsebe, empa ha e utlwe;

e na le dinko, empa ha e fofonele.

₇E na le matsoho, empa ha e tshware;

e na le maoto, empa ha e tsamaye;

ha ho modumo

o tswang qoqothong tsa yona.

₈Ba e etsang

ba ke ba tshwane le yona,

ba be jwalo bohle ba e tshepang.

₉Lona ba ntlo ya Iseraele,

tshepang Morena:

Ke yena thuso le thebe ya lona.

₁₀Lona ba ntlo ya Arone,

tshepang Morena:

Ke yena thuso le thebe ya lona.

₁₁Lona ba tshabang Morena,

tshepang Morena:

Ke yena thuso le thebe ya lona.

₁₂Morena o ntsa re hopotse,

o tla re hlohonolofatsa;

a hlohonolofatse

ba ntlo ya Iseraele,

a hlohonolofatse

ba ntlo ya Arone,

₁₃a hlohonolofatse bohle,

bohle ba tshabang Morena,

ba banyenyane mmoho le ba baholo.

₁₄Morena a ke a le ngatafatse,

lona le bana ba lona.

₁₅Morena a ke a le hlohonolofatse,

yena ya entseng mahodimo,

a etsa le lefatshe.

₁₆Mahodimo ke mahodimo a Morena,

lefatshe lona

o le neile bana ba batho.

₁₇Hase bafu ba ka rorisang Morena,

leha e le ba theohetseng lebitleng.

₁₈Empa ke rona ba phelang

ba ka bokang Morena,

ho tloha jwale le kamehla yohle.

Haleluja!

₁Ke rata Morena,

hobane o utlwile thapedi ya ka,

₂a ntshekehela tsebe,

mohla ke neng ke ipiletsa ho yena.

₃Marapo a lefu a ne a ntlamile,

maraba a Nqalo ya Bafu

a ntshwasitse,

ka ba matswalong le maswabing.

₄Yaba ke rapela lebitso la Morena,

ka rapela, ka re: “Oho, Morena,

ako pholose bophelo ba ka.”

₅Morena o mosa, o lokile,

Modimo wa rona

o na le kutlwelobohloko.

₆Morena o baballa ba hlokang mano,

a na a mpholosa ha ke ne ke fokola.

₇Moya wa ka,

ako boele o kgatholohe,

hoba Morena

o o etseditse tse molemo.

₈O mpholositse lefung,

a ntlhakola meokgo,

a mphemisa ho kgoptjwa;

₉ke tla tsamaya

pontsheng ya Morena,

lefatsheng la ba phelang.

₁₀Ke ne ke ntse ke tshepile, ha ke re:

“Ke tshwenyehile haholo.”

₁₁Pherekanong ya ka ka ba ka re:

“Ha ho motho ya tshepahalang!”

₁₂Ke tla buseletsa Morena kang,

bakeng sa melemo yohle

eo a nketseditseng yona?

₁₃Ke tla nyehela ka mohope,

hobane ke pholositswe,

mme ke rapele lebitso la Morena.

₁₄Ke tla phetha dikano tsa ka,

ke di phethe ho Morena,

pontsheng ya setjhaba sohle sa hae.

₁₅Lefu la batshepuwa ba hae

ke ntho ya bohlokwa

mahlong a Morena.

₁₆Ruri, Morena,

ke mohlanka wa hao,

mora wa lekgabunyane la hao;

o tlamolotse ditlamo tsa ka.

₁₇Ke tla o nyehella

ka sehlabelo sa teboho,

mme ke rapele lebitso la Morena.

₁₈Ke tla phetha dikano tsa ka,

ke di phethe ho Morena,

pontsheng ya setjhaba sohle sa hae,

₁₉mabaleng a ntlo ya Morena,

bohareng ba hao,

wena Jerusalema.

Haleluja!

₁Rorisang Morena,

lona ditjhaba tsohle,

mo tlotliseng,

lona merabe yohle;

₂hoba mohau wa hae

ho rona o moholo,

botshepehi ba Morena

bo hlola kamehla yohle.

Haleluja!

₁Bokang Morena, hobane o molemo;

mohau wa hae

ke wa kamehla yohle.

₂Iseraele a ke a re:

“Mohau wa hae

ke wa kamehla yohle.”

₃Ba ntlo ya Arone ba ke ba re:

“Mohau wa hae

ke wa kamehla yohle.”

₄Ba tshabang Morena ba ke ba re:

“Mohau wa hae

ke wa kamehla yohle.”

₅Ha ke ne ke patisitswe,

ka ipiletsa ho Morena;

Morena a nkarabela, a ntokolla.

₆Morena o na le nna,

ha ke tshabe letho;

motho a ka nketsang?

₇Morena o na le nna,

ke mothusi wa ka,

ke tella ba ntlhoileng.

₈Ho molemo ho tshabela ho Morena,

ho ena le ho tshepa motho.

₉Ho molemo ho tshabela ho Morena,

ho ena le ho tshepa mahosana.

₁₀Baditjhaba

ba ne ba ntikanetse kaofela,

empa ka ba tamukanya

ka lebitso la Morena.

₁₁Ba ntikanela,

ba ntikanela kamahohle,

empa ka ba tamukanya

ka lebitso la Morena.

₁₂Ba mpokanela jwaloka dinotshi,

ba ka malakabe

hara dihlahla tsa meutlwa,

empa ka ba tamukanya

ka lebitso la Morena.

₁₃Ka sutumetswa haholo

hoo ke batlileng ke ewa,

empa Morena a nthusa.

₁₄Morena ke matla a ka

le thoko ya ka,

ke yena mopholosi wa ka.

₁₅Metlotlwaneng ya ba lokileng,

ho utlwahala ditlatse tsa tlholo,

ho thwe:

“Letsoho le letona la Morena

le sebeditse tse matla,

₁₆letsoho le letona la Morena

le a tlotleha,

letsoho le letona la Morena

le sebeditse tse matla.”

₁₇Ha nka ke ka shwa,

empa ke tla phela,

ke bolele mesebetsi ya Morena.

₁₈Morena o nkgalemetse,

empa ha a a ka a nneela lefu.

₁₉Mpuleleng menyako ya Tempele,

ke tle ke kene ka yona,

ke boke Morena.

₂₀Ona ke wona monyako,

monyako wa ntlo ya Morena,

ba lokileng ba tla kena ka wona.

₂₁Ke a o boka

hobane o ile wa nkaraba,

o bile mopholosi wa ka.

₂₂Lejwe le lahlilweng ke dihahi

le fetohile lejwe la mantlha;

₂₃ke Morena ya entseng hona,

mme mahlong a rona ke mohlolo.

₂₄Lena ke lona letsatsi

le entsweng ke Morena;

a re nyakalleng,

re thabeng ke hona.

₂₅Oho, Morena, ako re pholose!

Oho, Morena, ako re atlehise!

₂₆Ho bokwe ya tlang

ka bitso la Morena:

Re le hlohonolofatsa

re le ka tlung ya Morena.

₂₇Morena ke Modimo;

o a re bonesetsa.

Tshwarang mahlaku, le koloke,

le be le yo fihla

manakaneng a aletare.

₂₈O Modimo wa ka, ke a o boka;

o Modimo wa ka, ke a o tlotlisa.

₂₉Bokang Morena, hobane o molemo;

mohau wa hae

ke wa kamehla yohle.

₁Ho lehlohonolo

ba metsamao e se nang kodi,

ba tsamayang ka Molao wa Morena.

₂Ho lehlohonolo

ba latelang ditemoso tsa hae,

ba mmatlang

ka pelo tsohle tsa bona;

₃ba sa etseng tse sa lokang,

ba mpang ba tsamaya

ditseleng tsa hae.

₄O re neile ditaelo tsa hao,

hore re di boloke ka ho tlala.

₅Eka nka tiya metsamaong ya ka,

ka phetha thato ya hao.

₆Nke ke ka hlajwa ke dihlong,

ha ke hlokomela melao yohle ya hao.

₇Ke tla o boka ka pelo e hlwekileng,

ha ke se ke ithutile

dikahlolo tsa hao tse lokileng.

₈Ke tla phetha thato ya hao,

o se ke wa ntahlela ruri.

₉Mohlankana a ka hlwekisa

metsamao ya hae jwang?

Ka ho hahela lentswe la hao lesaka.

₁₀Ke o batla ka pelo ya ka yohle;

se ntumelle ho kgeloha,

ho kgeloha melao ya hao.

₁₁Ke bolokile tshepiso ya hao,

ka e boloka ka pelong ya ka,

hore ke se ke ka o sitelwa.

₁₂Ho bokwe wena Morena;

ako nthute thato ya hao.

₁₃Ka molomo wa ka

ke bolela dikahlolo tsohle

tse tswang molomong wa hao.

₁₄Ke thabela

ho latela ditemoso tsa hao,

ho feta maruo wohle.

₁₅Ke tla nahana ditaelo tsa hao,

ke imamelle ditsela tsa hao.

₁₆Ke thabela

ho phetha thato ya hao,

nke ke ka lebala lentswe la hao.

₁₇Etsetsa mohlanka wa hao tse molemo,

ke tle ke phele,

ke mamele lentswe la hao ka hloko.

₁₈Ntutubolle mahlo,

ke bone dimakatso tsa Molao wa hao.

₁₉Ke mofeti mona lefatsheng;

o se ke wa mpatela melao ya hao.

₂₀Moya wa ka o ngongorehela

dikahlolo tsa hao ka nako tsohle.

₂₁O kgalemela baikgohomosi,

baikgohomosi ba rohakehileng,

ba kgelohang melao ya hao.

₂₂Ako tlose sekgobo le nyediso ho nna,

hobane ke latela ditemoso tsa hao.

₂₃Leha mahosana a kopane,

a kopanetse ho nthera,

nna, mohlanka wa hao,

ke nahana thato ya hao.

₂₄E, ditemoso tsa hao di a nthabisa,

ke baeletsi ba ka.

₂₅Ke rapaletse leroleng;

ako nnee bophelo

ho ya ka lentswe la hao.

₂₆Ke o boleletse metsamao ya ka,

wa nkaraba;

ako nthute thato ya hao.

₂₇Nthute, ke utlwisise

tsela ya ditaelo tsa hao,

ke tle ke nahane

dimakatso tsa hao.

₂₈Moya wa ka o lliswa ke maswabi;

ako mmatlafatse

ho ya ka lentswe la hao.

₂₉Nqobise tsela ya leshano,

o nkgauhele

ka ho nthuta Molao wa hao.

₃₀Ke ikgethetse tsela ya nnete,

dikahlolo tsa hao ke di hlokometse.

₃₁Ke kgomaretse ditemoso tsa hao;

oho, Morena,

ke se ke ka hlajwa ke dihlong.

₃₂Ke tla matha

tseleng ya melao ya hao,

hobane wena o ntokolotse.