Bible Reading Plan – Day 119

₁Bokang Morena, hobane o molemo;

mohau wa hae

ke wa kamehla yohle.

₂Ba ke ba rialo

bao Morena a ba lopolotseng,

a ba namolela

matsohong a mohatelli;

₃a ba phutha, a ba ntsha dinaheng

tsa botjhabela le bophirimela,

tsa borwa le leboya.

₄Ba ne ba phaila lefeelleng,

ba phaila lehwatateng,

ba sa fumane tsela e yang motseng

oo ba ka ahang ho wona,

₅ba lapile, ba nyorilwe,

ba le lekgatheng la ho idibana.

₆Matshwenyehong a bona

ba ipiletsa ho Morena,

mme a ba lopolla tsietsing ya bona.

₇A ba tsamaisa tseleng e otlolohileng,

a ba isa motseng

oo ba ka ahang ho wona.

₈Ba ke ba boke Morena

ka baka la mohau wa hae,

le dimakatso tsa hae

ho bana ba batho.

₉O ile a tima lenyora

la ba nyorilweng,

a kgorisa ba lapileng

ka tse molemo.

₁₀Ba bang ba ne ba phela

lefifing le letsholetsho,

ba tlamilwe ke ditlhopheho

le ke wona mahlaahlela,

₁₁hoba ba fetohetse taelo tsa Modimo,

ba kgesitse keletso

ya Ya Hodimodimo.

₁₂A ba kokobetsa

ka mesebetsi e boima,

ba kgothometseha,

ho se ya ka ba thusang.

₁₃Matshwenyehong a bona

ba lla ho Morena,

mme a ba pholosa tsietsing ya bona.

₁₄A ba ntsha lefifing, le bodutung,

a kgaola ditlamo tsa bona.

₁₅Ba ke ba boke Morena

ka baka la mohau wa hae,

le dimakatso tsa hae

ho bana ba batho.

₁₆O ile a pshatla mamati a koporo,

a robaka mekwallo ya tshepe.

₁₇Ba bang ba thotofatswa

ke metsamao ya bona e kgopo,

ba hlokofatswa

ka baka la melato ya bona,

₁₈ba tenwa ke dijo tsohle;

ba ne ba se ba le dintshing tsa lefu.

₁₉Matshwenyehong a bona

ba lla ho Morena,

mme a ba pholosa tsietsing ya bona.

₂₀A laela, mme ba fola,

a ba phemisa lebitla.

₂₁Ba ke ba boke Morena

ka baka la mohau wa hae,

le dimakatso tsa hae

ho bana ba batho.

₂₂Ba nyehele ka mahlabelo a teboho,

ba tumise mesebetsi ya hae,

ba e tumise ka mehoo ya thabo.

₂₃Ba bang ba tsamaya

lewatleng ka dikepe,

ba hweba ka ho haola mawatle.

₂₄Le bona ba bone

mesebetsi ya Morena,

le dimakatso tsa hae madibeng.

₂₅A laela, ha tsoha sefefo,

sa phahamisa maqhubu a lewatle;

₂₆ba betsetswa hodimodimo,

ba theolelwa tlasetlase,

ba nyekelwa ke dipelo.

₂₇Ba tshwarwa ke modikwadikwane,

ba thekesela jwaloka matahwa,

ba timellwa ke bohlale bohle.

₂₈Matshwenyehong a bona

ba lla ho Morena,

mme a ba ntsha tsietsing ya bona.

₂₉A kgutsisa sefefo,

mme maqhubu a kgaotsa ho befa.

₃₀Ba thaba hobane ho kgutsitse;

a ba sesisetsa koung

eo ba neng ba leba ho yona.

₃₁Ba ke ba boke Morena

ka baka la mohau wa hae,

le dimakatso tsa hae

ho bana ba batho.

₃₂Ba mo tlotlise

phuthehong ya setjhaba,

ba mo rorise

mokgatlong wa ba baholo.

₃₃O ne a fetole dinoka lehwatata,

le didiba

a di fetola baka tse omeletseng.

₃₄Mobu o nonneng

a o fetola lenyekethe,

ka baka la bokgopo

ba baahi ba teng.

₃₅Lehwatata a le fetola letsha la metsi,

naha e tshehla a e fetola didiba.

₃₆Ba lapileng a ba ahisa ho yona,

ba thea motse oo

ba ka ahang ho wona.

₃₇Ba jala masimong,

ba lema morara,

kotulo ya eba kgolo.

₃₈A ba hlohonolofatsa,

ba ngatafala haholo,

a ba atisetsa leruo la diphoofolo.

₃₉Empa jwale ba qepha,

ba kokobetswa,

ka baka la ho imelwa

ke ditsietsi le mahlomola.

₄₀A theolela nyediso ho mahosana,

a a sollisa lehwatateng

moo ho seng tsela.

₄₁Empa a ntsha mafutsana

bohlophehing ba wona,

a atisa malapa a wona

jwaloka mohlape.

₄₂Ba pelo di ntle ba bona hoo,

mme ba thaba,

empa ba kgopo bona

ba thijwa melomo.

₄₃Mang le mang ya bohlale

a ke a ele tsena hloko,

a ke a utlwisise ketso tsa mohau,

mohau wa Morena.

₂Pelo ya ka e matlafetse, Modimo;

ke tla bina, ke o roke.

₃Tsoha moya wa ka,

tsohang, lona thomo le harepa;

ke tla tsoha mafube a eso hlahe.

₄Morena, ke tla o boka hara ditjhaba,

ke o roke hara merabe;

₅hobane mohau wa hao o moholo,

o fihla mahodimong,

le botshepehi ba hao

bo fihla marung.

₆Modimo, ako bontshe

hore o okametse mahodimo,

tlotla ya hao

e phahamele lefatshe lohle.

₇Re pholose

ka letsoho la hao le letona,

o re utlwe,

baratuwa ba hao ba tle ba lopollwe.

₈Modimo o buile

a le sehalalelong sa hae, a re:

“Ke nyakaletse, ke tla arola Shekeme,

ke sehe kgohlo ya Sukote dikoto.

₉Gileade ke ya ka,

le Manase ke ya ka;

Efraime ke katiba ya ka ya tshepe,

Juda yena ke lere la ka la puso.

₁₀Moabe ke lefiso

leo ke itlhatswetsang ho lona,

Edomo ke tla e hatakela ka seeta;

Filesitiya teng ke tla etsa ditlatse,

ke etse ditlatse tsa tlholo.”

₁₁Ke mang ya tla nkisa

motseng wa diqhobosheane?

Ke mang ya tla mphihlisa Edomo,

₁₂ha e le moo wena Modimo,

o re lahlile,

o se o sa tswe le mabotho a rona?

₁₃Ako re thuse direng tsa rona;

hobane thuso ya motho ke lefeela.

₁₄Ka thuso ya Modimo

re tla lwana senna,

ke yena ya tla hatakela

dira tsa rona.

Modimo, wena eo ke o rorisang,

o se ke wa kgutsa,

₂hobane ba kgopo le ba leshano

ba ahlamisitse melomo

ho ntwantsha.

Ba bua le nna

ka maleme a thetsang,

₃ba nteela hare ka dipuo tsa lehloyo,

ba mphutuhela ntle ho lebaka.

₄Ba mpuseletsa lerato la ka,

ba mpuseletsa lona ka ho nqosa,

leha ke ntse ke ba rapella.

₅Ba mputsa ka bobe bakeng sa botle,

le lehloyo bakeng sa lerato.

₆Ako bee ya kgopo

ho ahlola motho eo,

moqosi wa hae a nne a eme

ka hlakoreng la hae le letona.

₇Ha a ahlolwa

a ke a fumanwe a le molato,

thapedi ya hae e nkuwe e le sebe.

₈Ditshiu tsa hae di ke di kgutsufale,

e mong a ke a nke

mosebetsi wa hae.

₉Bana ba hae e ke be dikgutsana,

le mosadi wa hae e be mohlolohadi.

₁₀Bana ba hae ba lelere,

e be mekopakopa,

ba lelekwe thakong tsa habo bona.

₁₁Moadimani a ke a mo amohe

sohle seo a nang le sona;

batho basele ba ikgapele

tholwana tsa mofufutso wa hae.

₁₂Ho se be motho ya mo hauhelang,

kapa ya thusang dikgutsana tsa hae.

₁₃Ditloholo tsa hae di ke di timetswe,

mabitso a tsona a hlakolwe

melokong e hlahlamang.

₁₄Molato wa bo-ntatae

o nne o hopolwe ke Morena,

sebe sa mmae

se se ke sa hlakolwa;

₁₅Morena a nne a di hopole kamehla,

a ba hlakole lefatsheng,

hore ba se hlole ba hopolwa.

₁₆Motho eo ha a a ka a hopola,

a hopola ho ba mohau,

empa a hlorisa mohlophehi,

a hlorisa le mofutsana,

a tle a bolaye ya tepeletseng pelo.

₁₇A rata ho rohakana:

Thohako e ke be hodima hae!

Ha a ka a thabela tlhohonolofatso:

E ke be hole le yena!

₁₈A apara thohako jwaloka kobo:

E ke e monyele mmeleng wa hae,

e monyele jwaloka metsi,

le masapong a hae jwaloka ole.

₁₉E ke be jwaloka seaparo

seo a ipopileng ka sona,

e be jwaloka leqhama

leo a itlamileng ka lona kamehla.

₂₀Morena a ke a putse

baqosi ba ka jwalo,

batho bana ba mpuang hampe.

₂₁Empa wena Morena, Morena ka,

ako nthusetse

ka baka la lebitso la hao,

o nnamolele

ka baka la mohau wa hao o molemo.

₂₂Ke mohlophehi, ke mofutsana,

pelo ya ka e thulame

ka sefubeng sa ka.

₂₃Ke ikela jwaloka meriti e theang,

ke fefolwa jwaloka tsie.

₂₄Mangwele a ka a tsherema,

a tsherema ke ho itima dijo,

mmele wa ka o otile

ke ho hloka mafura.

₂₅Ke fetohile sekgobo

ho baqosi ba ka,

ha ba mpona

ba ntshisinyetsa dihlooho.

₂₆Ako nthuse,

Morena, Modimo wa ka,

o mpholose ka mohau wa hao,

₂₇ba tle ba tsebe

hore hona ho entswe ke wena,

ke mosebetsi wa matsoho a hao,

matsoho a hao wena Morena.

₂₈Bona ba a rohakana,

empa wena o a hlohonolofatsa;

ba ntsohelang matla

ba ke ba hlajwe ke dihlong,

mohlanka wa hao

yena a ke a thabe.

₂₉Baqosi ba ka ba aparelwe ke dihlong,

tlontlollo e be jwaloka seaparo

seo ba ipopileng ka sona.

₃₀Ke tla boka Morena

ka lentswe le phefa,

ke mo rorise ke le hara matshwele;

₃₁hobane o eme ka hlakoreng le letona

hlakoreng le letona la mofutsana,

hore a tle a mo pholose

ho ba mo ahlolang.

Morena o itse ho Morena wa ka:

“Dula ka letsohong la ka le letona,

ho fihlela ke bea dira tsa hao

katlasa maoto a hao.”

₂Morena o tla namisa mmuso wa hao,

a o namise ho tloha Sione;

a re: “Busa hara dira tsa hao.”

₃Setjhaba sa hao se tla ithaopa,

mohla o futuhelang dira tsa hao.

Jwaloka phoka e lalang kameso,

bahlankana ba tla tla ho wena

maralleng a halalelang.

₄Morena o hlapantse,

ha a ka ke a kweneha;

o itse: “O moprista kamehla yohle,

jwaloka Meleki-Sedeke.”

₅Morena o ka lehlakoreng la hao,

hlakoreng le letona,

o tla thuakanya dikgosi

mohla letsatsi la kgalefo ya hae.

₆O tla ahlola ditjhaba, ho tlale ditopo;

o tla thuakanya hlooho tsa sera

ka bophara ba lefatshe.

₇Ha kgosi e le tseleng,

e tla nwa nokaneng,

e be moo e tsohang molota.

₁Haleluja!

Ke tla boka Morena

ka pelo ya ka yohle,

ke le phuthehong ya ba lokileng.

₂Mesebetsi ya Morena e meholo,

e fuputswa ke bohle ba e thabelang.

₃Mosebetsi wa hae

o bonahatsa tlotla le botlotlehi,

ho loka ha hae

ho teng kamehla yohle.

₄O entse hore dimakatso tsa hae

di se ke tsa lebalwa;

Morena o mosa,

o na le kutlwelobohloko.

₅O fepa ba mo tshabang;

o hopola selekane sa hae kamehla.

₆O bontshitse setjhaba sa hae,

a se bontsha matla

a mesebetsi ya hae,

ka ho se nea lefa la baditjhaba.

₇Mesebetsi ya diatla tsa hae

e a tshepahala,

mesebetsi ya hae e lokile,

ditaelo tsohle tsa hae ke tsa nnete;

₈di etseditswe mehla yohle,

di hlophilwe ka botshepehi

le ka ho loka.

₉O lopolotse setjhaba sa hae,

a laela hore selekane sa hae

e be sa kamehla yohle;

lebitso la hae le a halalela,

mme le a tshabeha.

₁₀Qaleho ya bohlale

ke ho tshaba Morena,

bohle ba sedi ba phela jwalo.

O lokelwa ke thoriso kamehla.