Bible Reading Plan – Day 117

₁Morena ke kgosi;

lefatshe le ke le nyakalle,

dihlekehleke tse ngata

di ke di thabe.

₂Maru a matshomatsho

a mo teetse hare,

ho loka le toka ke motheo,

ke motheo wa terone ya hae.

₃Mollo o mo eteletseng pele

o tjhesa dira tse mo potapotileng.

₄Mahadima a hae a bonesa lefatshe;

lefatshe le a bona,

mme le a thothomela.

₅Dithaba di qhibidiha jwaloka tshotso,

jwaloka tshotso kapele ho Morena,

e, kapele ho Morena wa lefatshe lohle.

₆Mahodimo a bolela ho loka ha hae,

ditjhaba tsohle di bona tlotla ya hae.

₇Bohle ba sebeletsang ditshwantsho

ba ke ba hlajwe ke dihlong,

bao ba ithorisang ka mafeela;

medimo yohle e ke e itihele

e itihele maotong a hae.

₈Sione e utlwile, mme e a thaba,

metse ya Juda e a nyakalla,

ka baka la dikahlolo tsa hao,

wena Morena.

₉Wena Morena ya hodimodimo,

ya phahametseng lefatshe lohle,

o feta medimo yohle hole.

₁₀Lona ba ratang Morena,

hloyang bokgopo,

o baballa bophelo

ba batshepuwa ba hae,

o ba namolela

matsohong a ba kgopo.

₁₁Lesedi le tjhabela ya lokileng,

thabo ke ya ba pelo di ntle.

₁₂Lona ba lokileng thabelang Morena,

le boke lebitso la hae le halalelang.

Binelang Morena sefela se setjha,

hobane o entse dimakatso,

o hlotse ka letsoho la hae le letona,

letsoho la hae le halalelang.

₂Morena o bonahaditse

ho pholosa ha hae,

a bontsha ditjhaba ho loka ha hae.

₃O hopotse mohau wa hae

le botshepehi ba hae

ho ba ntlo ya Iseraele.

Dipheletso tsohle tsa lefatshe

di bone ho pholosa

ha Modimo wa rona.

₄Lona ba lefatshe lohle

etsetsang Morena mehoo ya thabo,

le tsanyaole, le mo roke ka thabo.

₅Rokang Morena ka harepa,

ka harepa le ka pina e monate,

₆ka diterompeta

le ka modumo wa lenaka;

etsetsang kgosi, Morena, mehoo

le mo etsetse mehoo ya thabo.

₇Lewatle le ke le hwase

le tsohle tse ka ho lona,

lefatshe le bohle ba ahileng ho lona.

₈Dinoka di ke di ope diatla,

dithaba kaofela di etse ditlatse

₉kapele ho Morena,

hobane o tlilo ahlola lefatshe.

O tla ahlola lefatshe ka toka,

le ditjhaba ka ho loka.

₁Morena ke kgosi,

ditjhaba di a thothomela;

o dutse hodima dikerubime,

lefatshe le a reketla.

₂Morena o moholo, Sione,

o okametse ditjhaba tsohle.

₃Ho bokwe lebitso la hao le leholo,

le a tshabeha, le a halalela.

₄O kgosi e matla, e ratang toka;

ke wena ya theileng ho loka,

wa tlisetsa leloko la Jakobo

toka le ho loka.

₅Phafang Morena, Modimo wa rona,

le itihele bonamelong

ba maoto a hae:

O a halalela.

₆Moshe le Arone e ne e le

ba bang ba baprista ba hae,

Samuele e le e mong

wa ba rapelang lebitso la hae.

Ba ipiletsa ho Morena,

mme a ba araba,

₇a bua le bona a le hara leru;

ba boloka ditemoso tsa hae,

le ditaelo tseo a ba fileng tsona.

₈Morena Modimo wa rona,

o nnile wa ba araba,

wa ba Modimo ya ba tshwarelang,

ya mpang a ba otla

ka baka la bokgopo ba bona.

₉Phafang Morena Modimo wa rona,

le mo kgumamele thabeng,

thabeng ya hae e halalelang;

hobane Morena Modimo wa rona,

o a halalela.

Lona ba lefatshe lohle

etsetsang Morena mehoo ya thabo,

₂sebeletsang Morena ka thabo,

tloong kapele ho yena ka ditlatse.

₃Tsebang hore Morena ke Modimo,

o re bopile, mme re ba hae;

re setjhaba sa hae,

mohlape wa makgulo a hae.

₄Kenang dikgorong tsa hae

le ntse le mmoka,

le mabaleng a hae

le ntse le mo rorisa;

mo leboheng,

le boke lebitso la hae.

₅Morena o molemo,

mohau wa hae

ke wa kamehla yohle,

botshepehi ba hae

ke bo isang melokong yohle.

Ke tla o binela tsa mohau

le tsa toka,

ke o roke, wena Morena.

₂Ke tla tsamaya ka hloko

tseleng e lokileng;

ekaba o tla tla neng ho nna?

Ka tlung ya ka ke tla phela

ka pelo e hlwekileng,

₃nke ke ka dumella mahlo a ka

ho sheba letho le kgopo.

Ke hloile diketso tsa ba kgelohileng,

di ke ke tsa nkgomarela.

₄Nke ke ka ba le bokgopo,

ka le bona ka pelong ya ka,

ha ke rate ho tseba letho le lebe.

₅Ya etseletsang wa habo sephiring

ke tla mo timetsa,

nke ke ka mamella moikgantshi

le moikgohomosi.

₆Mahlo a ka a shebile ba tshepahalang,

ba tshepahalang, ba lefatshe lena,

ba tle ba ahisane le nna;

ya tsamayang ka tsela e lokileng

ke yena ya tla ntshebeletsa.

₇Ya sebetsang bolotsana

a ke ke a phela tlung ya ka;

ya bolelang leshano

a ke ke a ema kapele ho nna.

₈Hoseng ho hong le ho hong

ke tla timetsa bohle ba kgopo,

ba kgopo ba lefatshe lena,

ke fedise bohle ba etsang tse mpe,

ba di etsang motseng wa Morena.

₂Morena, ako utlwe thapelo ya ka;

sello sa ka se ke se fihle ho wena.

₃Ha ke le matshwenyehong

o se ke wa mpatela fahleho sa hao;

ako ntshekehele tsebe,

ha ke ipiletsa ho wena,

o ke o nkarabe kapele.

₄Ditshiu tsa ka di fela jwaloka mosi,

masapo a ka a tjha sa patsi mollong.

₅Ke otlilwe,

pelo ya ka e ka jwang bo omeletseng,

ke se ke lebala le ho ja.

₆Ka baka la ho fehelwa haholo,

nama ya ka e maname,

e maname masapong a ka.

₇Ke tshwana le letata la lehwatata,

ke tshwana le sephooko sa dithako.

₈Ke a hlobaela, mme ke a fehelwa,

ke ka nonyana e dutseng e inotshi,

e dutseng hodima sehlohlolo.

₉Dira tsa ka di ntlaka kamehla,

ba nkgalefetseng

ba nyefola lebitso la ka.

₁₀Ke ja molora jwaloka bohobe,

seno sa ka se tswakana le meokgo,

₁₁ka baka la bohale

le kgalefo ya hao;

hobane o ile wa mphamola,

wa nto ntabanya!

₁₂Ditshiu tsa ka

di tshwana le meriti e theang,

ke omella jwaloka jwang.

₁₃Empa wena Morena,

o rena kamehla yohle,

o tla hopolwa ke meloko yohle.

₁₄Ako tsohe, o utlwele Sione bohloko;

ke nako jwale ya ho e hauhela,

motsotso o fihlile.

₁₅Bahlanka ba hao

ba kgahlwa ke majwe a yona,

ba qenehela le lerole la yona.

₁₆Baditjhaba ba tla hlompha,

ba hlomphe lebitso la Morena,

le dikgosi tsohle tsa lefatshe

di tla hlompha tlotla ya hao.

₁₇Ha Morena a tsosa marako a Sione,

o tla bonahatsa tlotla ya hae,

a e bonahatse ho yona.

₁₈O tla mamela thapelo

ya ba itlhophereng;

thapelo eo ya bona

a ke ke a e kgesa.

₁₉Tsena di ke di ngollwe moloko,

moloko o tlang,

hore tjhaba se tla tswalwa

se tle se rorise Morena.

₂₀Morena o shebile fatshe

a le sehalalelong sa hae se hodimo;

o tadimile lefatshe a le mahodimong.

₂₁hore a utlwe mefehelo,

mefehelo ya batshwaruwa,

a lokolle ba ahloletsweng lefu.

₂₂Jwale lebitso la Morena

le tla bolelwa Sione,

dithoko tsa hae Jerusalema,

₂₃ha ditjhaba tsohle

di phuthehile mmoho,

di ena le mebuso ya tsona,

ho sebeletsa Morena.

₂₄O mphokodisitse ke sa le motjha,

a kgutsufatsa ditshiu tsa ka.

₂₅Ka ba ka re: “Modimo wa ka,

o se ke wa ntlosa lefatsheng

ke sa le mahareng a bophelo ba ka.

Wena dilemo tsa hao

di akaretsa meloko yohle.

₂₆O ne o thee lefatshe kgalekgale,

mahodimo ke mosebetsi

wa diatla tsa hao.

₂₇Tsena di tla timela,

empa wena o tla sala;

tsohle di tla tsofala jwaloka seaparo,

o tla di lahla jwaloka seaparo,

mme di tla nyamela.

₂₈Empa wena haesale e le wena,

dilemo tsa hao di ke ke tsa fela.

₂₉Bana ba bahlanka ba hao

ba tla ba le leaho le tiileng,

mme ditloholo tsa bona

di tla nne di be teng pela hao.”

Boka Morena, wena moya wa ka;

botho bohle ba ka

bo boke bitso la hae le halalelang.

₂Boka Morena, wena moya wa ka;

o se ke wa lebala

melemo yohle ya hae.

₃Ke yena ya o tshwarelang

melato ya hao kaofela,

ke yena ya o fodisang

mahlokong a hao kaofela.

₄Ke yena ya o lopollang lebitleng,

ke yena ya o qhakang ka mohau,

ya o qhakang le ka lerato.

₅Ke yena ya o fepang tse molemo

bophelong bohle ba hao,

hore o boele o ntjhafale,

o ntjhafale jwaloka ntsu.

₆Morena o sebetsa ka ho loka,

o ahlolela bohle ba hateletsweng.

₇O ne a tsebise Moshe ditsela tsa hae,

a bontsha bana ba Iseraele

diketso tsa hae tse kgolo.

₈Morena o na le kutlwelobohloko,

Morena o mosa;

o dieha ho halefa, o tletse mohau.

₉Ha a re tsekise hoyahoile;

ha a re jare ka pelo kamehla yohle.

₁₀Ha a re otle

ho ya ka dibe tsa rona,

ha a re putse

ho ya ka melato ya rona.

₁₁Jwalokaha mahodimo

a phahametse lefatshe,

le mohau wa Modimo o moholo,

o moholo hakaalo ho ba mo tshabang.

₁₂Jwalokaha botjhabela

bo le hole le bophirimela,

le ditlolo tsa rona o a di suthisa,

o di suthisetsa hole le yena hakaalo.

₁₃Jwalokaha ntata bana

a ba utlwela bohloko,

ka mokgwa o jwalo le Morena

o utlwela ba mo tshabang bohloko.

₁₄Ke hobane yena o tseba

seo re bopilweng ka sona,

ha a lebale hore re lerole feela.

₁₅Ditshiu tsa motho

di tshwana le tsa jwang;

o tlokoma jwaloka palesa ya naha;

₁₆ha moya o foka hodima yona

e a fela,

ebe ditulo tsa yona

di sala di le feela.

₁₇Empa mohau wa Morena,

ho ba mo tshabang,

ke wa kamehla yohle,

e se nang qaleho le qetello;

le ho loka ha hae ho fihla

le ditlohotloholwaneng tsa bona,

₁₈ho ba bolokang selekane sa hae,

ba hopolang

ho phethahatsa ditaelo tsa hae.

₁₉Morena o beile terone ya hae,

o e beile mahodimong,

tsohle di tlasa puso ya hae.

₂₀Bokang Morena,

lona mangeloi a hae,

lona bahale

ba phethang taelo tsa hae,

ba mamelang seo a se bolelang.

₂₁Bokang Morena,

lona mabotho a hae wohle,

lona basebeletsi ba hae

ba phethang thato ya hae.

₂₂Bokang Morena,

lona mesebetsi ya hae yohle,

hohle moo a busang teng.

Boka Morena, wena moya wa ka.

Morena Modimo wa ka,

o moholo hakaakang!

O apere tlotla le botlotlehi,

₂o ipopile ka lesedi

jwalokaha eka ke kobo.

O adile mahodimo

jwaloka lesela la tente,

₃o hahile ntlo ya bokgosi ba hao

kahodimo ho maru.

Maru o a entse kariki ya hao,

o fofa ka mapheo a moya.

₄Meya o e entse baromuwa ba hao,

mollo wa lehadima

mosebeletsi wa hao.

₅O tiisitse lefatshe

hodima metheo ya lona,

le ke ke la sisinyeha ho isa kgale.

₆O le apesitse ka lewatle

jwalokaha eka ke ka kobo,

metsi a ne a kwahetse dithaba.

₇Yare ha o kgaruma, metsi a baleha;

ha letolo la hao le thwathwaretsa,

a tutumolotseha;

₈a theohela dikgohlong,

dithaba tsa hlaha,

a ya moo o a lokiseditseng teng.

₉Wa a sehela moedi

oo a ke keng a o tlola,

hore a se hlole

a kwahela lefatshe hape.

₁₀Wa phallisetsa didiba dinokaneng

tse tswedipanang hara dithaba;

₁₁metsi a tsona a nowa

ke phoofolo tsa naha,

tonki tsa naha

di itlosa lenyora teng.

₁₂Nonyana tse fofang

di hahetse pela tsona,

di letsa melodi

di le makaleng a difate.

₁₃O nesetsa dithaba pula

o le tlung ya bokgosi ba hao,

lefatshe le kgotshe ditholwana,

tholwana tsa mesebetsi ya hao.

₁₄O medisetsa diphoofolo jwang,

o di medisetsa le dimela

hore di sebediswe ke motho,

a tle a fumane dijo tsa hae mobung,

₁₅le veine,

ho thabisa pelo ya motho;

le ole,

fahleho sa hae se be moropotsana,

le dijo,

ho matlafatsa mmele wa hae.

₁₆Difate tsa Morena

di nwesetswa ke pula,

dikedare tsa Lebanone

tse lemilweng ke yena.

₁₇Dinonyana di etsa dihlaha ho tsona,

mekotatsie e phela hodima difate.

₁₈Thabeng tse telele

ho phela podi tsa naha,

diqhobo ke setshabelo sa dipela.

₁₉O entse kgwedi

ho tshwaya dinako tsa selemo,

letsatsi le tseba nako ya lona

nako ya ho dikela.

₂₀O tlisa lefifi, ebe e ba bosiu,

dibatana tsa meru ebe di a solla;

₂₁ditawana di purumele

diphofu tsa tsona,

di batle dijo tsa tsona ho Modimo.

₂₂Ha tsatsi le tjhaba di a oroha,

ebe di botha dilaong tsa tsona.

₂₃Motho yena

o ikela mosebetsing wa hae,

a yo sebetsa ho fihlela mantsiboya.

₂₄Morena, mesebetsi ya hao

e mengata hakaakang!

Tsohle o di entse ka bohlale,

lefatshe le tletse dibopuwa tsa hao!

₂₅Ke leo lewatle, le leholo, le batsi;

ka ho lona ho nyeunya dibopuwa,

dibopuwa tse se nang palo,

dibopuwa tse kgolo le tse nyenyane.

₂₆Teng dikepe di sesa kahohle,

le leruarua leo o le bopetseng

ho bapalla ka ho lona.

₂₇Tsohle di lebeletse wena,

hore o di fe dijo ka nako e lokelang.

₂₈Ha o di fa dijo, di a di bokella;

ha o fuparolla seatla,

di kgora tse molemo.

₂₉Ha o ipata sefahleho, di a tshoha;

ha o di amoha moya wa hao,

di a shwa,

di boele di kgutlele leroleng.

₃₀Ha o romela moya wa hao,

di a hloleha,

mme o ntjhafatse tshobotsi ya lefatshe.

₃₁Tlotla ya Morena e nne e be teng,

e be teng kamehla yohle,

Morena a ke a thabele

mesebetsi ya hae;

₃₂yena eo ereng ha a tadima lefatshe,

lefatshe le thothomele,

ha a ama dithaba di foqohe mosi.

₃₃Ke tla binela Morena

ha ke ntse ke phela,

ke roke Modimo

bophelong ba ka bohle.

₃₄Menahano ya ka e ke e mo kgahle;

nna ke thabela Morena.

₃₅Baetsadibe ba ke ba fele lefatsheng,

ba kgopo ba se hlole ba eba teng.

Boka Morena, wena moya wa ka.

Haleluja!