Bible Reading Plan – Day 105

Thoholetsang Morena,

lona bara ba Modimo;

thoholetsang tlotla

le matla a Morena.

₂Thoholetsang tlotla

e lokelang lebitso la Morena;

kgumamelang Morena le kgabile,

le kgabile ka tse halalelang.

₃Lentswe la Morena

le utlwahala hodima metsi,

Modimo ya tlotlehang

o a thwathwaretsa,

Morena o hodima metsi a mawatle.

₄Lentswe la Morena le matla,

lentswe la Morena le a tshabeha.

₅Lentswe la Morena

le roba difate tsa dikedare,

Morena o roba dikedare,

kedare tsa Lebanone.

₆Lebanone o e thadisa

jwaloka namane,

le Sirione

jwaloka pohwana ya nare.

₇Lentswe la Morena

le tlola malakabe;

₈lentswe la Morena

le tetemisa lehwatata,

Morena o tetemisa

lehwatata la Kadeshe.

₉Lentswe la Morena

le ekethehisa difate,

le fohle meru,

mme ka tempeleng ya hae

bohle ba re: “O a tlotleha!”

₁₀Morena o ne a rena

hodima morallo wa metsi,

Morena ke kgosi e renang

kamehla le mehla.

₁₁Morena a ke a matlafatse

setjhaba sa hae,

Morena a ke a se hlohonolofatse

ka kgotso.

₂Ke a o tumisa, Morena,

hobane o mpholositse;

ha o a ka wa tlohela dira tsa ka

ho ithabisa ka nna.

₃Morena Modimo wa ka, ka ipiletsa,

ka ipiletsa ho wena,

mme wa mphodisa.

₄Morena, o nnyolotse

Nqalong ya Bafu,

wa nkgutlisa

ho ba neng ba theohela lebitleng.

₅Rokang Morena,

lona batshepuwa bohle ba hae,

le boke lebitso la hae le halalelang.

₆Kgalefo ya hae

ke ya motsotswana feela,

lerato la hae

ke la bophelo bohle ba motho.

Leha nka robala ka meokgo,

ha bo esa e se e le nyakallo.

₇Ha ke ne ke sa iketlile, ka na ka re:

“Nke ke ka sisinngwa le ka mohla!”

₈Morena, ka mohau wa hao

o ntshireleditse qhobosheaneng;

yare ha o mpatela fahleho sa hao,

ka tshoha haholo.

₉Ka ipiletsa ho wena Morena,

ka etsa thapedi ho Morena, ka re:

₁₀“O ka ruang ka madi a ka,

le ka ho theohela ha ka lebitleng?

Na bafu ba ka o boka,

kapa ba bolela botshepehi ba hao?

₁₁Ako nkutlwe, Morena,

mme o nkgauhele;

Morena, ako be mothusi wa ka!”

₁₂Bofifi ba ka o bo fetotse mohobelo;

o ntlhobodisitse thapo,

wa nkapesa seaparo sa thabo,

₁₃e le hore moya wa ka

o tle o o roke o sa kgaotse;

Morena Modimo wa ka,

ke tla o boka kamehla le mehla.

₂Ke tshabela ho wena Morena;

ke se ke ka hlajwa ke dihlong

le ka mohla.

Ako nnamolele

ka baka la ho loka ha hao.

₃Ntshekehele tsebe,

o potlakele ho ntopolla.

O be lefika

leo ke tshabelang ho lona,

qhobosheane e mpholosang.

₄Wena o lefika la ka

le qhobosheane ya ka;

ntsamaise, o ntataise

ka baka la lebitso la hao.

₅Mphemise leraba

leo ke le tjhehetsweng,

hobane ke wena setshabelo sa ka.

₆Ke bea moya wa ka

matsohong a hao;

o ntopolotse Morena,

Modimo ya tshepahalang.

₇O hloile ba sebeletsang

medimo ya bohata,

athe nna ke tshepile Morena.

₈Ke tla nyakalla,

ke thabele mohau wa hao,

hobane o bone ho hlopheha ha ka,

wa lemoha matshwenyeho a ka;

₉ha o a ka wa nneella dira tsa ka,

empa o ntsamaisa ka bolokolohi.

₁₀Nkgauhele Morena,

hobane ke matshwenyehong;

mahlo a ka a motela ke maswabi,

esita le moya wa ka, le mmele wa ka.

₁₁Bophelo ba ka bo fedile,

bo fedile ke mahlomola,

dilemo tsa ka di ile ke ho fehelwa;

matla a ka a fediswa ke ho hlopheha,

le masapo a ka a kgathetse.

₁₂Nna ke sekgobo

ho dira tsa ka tsohle,

haholoholo

ho bao ke ahisaneng le bona,

ke koko ho metswalle ya ka,

ba mponang ditseleng ba a mpaleha.

₁₃Ha ke sa hopolwa;

jwalokaha eka ke mofu,

ke tshwana le ntho e lahlilweng.

₁₄Ke utlwa ditshebo tsa ba bangata,

ke tshoswa ka nqa tsohle;

batho ba nkunuta ba le mmoho,

ba rera ho fedisa bophelo ba ka.

₁₅Empa nna ke tshepile wena Morena,

ke re: “O Modimo wa ka!”

₁₆Ditshiu tsa ka di matsohong a hao;

nnamolele diatleng tsa dira tsa ka,

o nnamolele le ho bahlorisi ba ka.

₁₇Ako bontshe mohlanka wa hao,

o mmontshe sefahleho,

sefahleho se kganyang kgotso,

o mpholose ka mohau wa hao.

₁₈Morena, ha ke ipiletsa ho wena

ke se ke ka hlajwa ke dihlong,

empa dihlong

di ke di hlabe ba kgopo,

ba kgutsiswe

ka ho theolelwa Nqalong ya Bafu.

₁₉Ba buang leshano

ba fetohe dimumu,

baikakasi bana

ba buang hampe ka ya lokileng,

ba ikgohomosetsang yena,

ba mo nyedise.

₂₀Morena, molemo wa hao

o mokaakang!

O o boloketse ba o tshabang;

pontsheng ya bana ba batho

o o etsetsa ba tshabelang ho wena.

₂₁O ba pata ho wena ka sebele,

hole le merero e mebe ya batho;

o ba sireletsa motlotlwaneng wa hao,

hole le maleme a jalang diqabang.

₂₂Ho bokwe Morena

ya mpontshitseng mohau,

ya mpontshitseng mohau o hlollang,

ha ke ne ke dikilwe, ke futuhetswe.

₂₃Matswalong a ka, ka re:

“O ntahletse

hole le sefahleho sa hao.”

Empa wa utlwa thapedi ya ka,

ha ke ne ke o llela.

₂₄Ratang Morena,

lona batshepuwa bohle ba hae;

Morena o baballa ba tshepahalang;

baikgohomosi bona

o ba nea se ba lokelang.

₂₅Ebang sebete, le tiye dipelo,

lona bohle ba tshepileng Morena.

Ho lehlohonolo

ya tshwaretsweng tlolo ya hae,

eo sebe sa hae se hlakotsweng.

₂Ho lehlohonolo motho

eo Morena a sa mmalleng molato,

eo moya wa hae o se nang thetso.

₃Ha ke ne ke sa kgutsitse,

ke ne ke opelwa ke masapo

ke ho dumaela letsatsi lohle.

₄Motsheare le bosiu

letsoho la hao le ne le nkimela,

moko wa ka o ne o omella

jwalokaha eka o tjheswa ke lebatama,

lebatama la lehlabula.

₅Ka ba ka ipolela sebe sa ka ho wena,

ka se ke ka pata molato wa ka;

ka re: “Ke tla ipolela

ditlolo tsa ka ho Morena;”

wena wa ntshwarela molato

wa sebe sa ka.

₆Ka baka leo, bohle ba tshepahalang

ba tla o rapela ka nako ya tsietsi.

Leha merallo ya metsi

e ka aparela hohle,

e ke ke ya fihla ho bona.

₇O setshabelo sa ka,

o tla mphemisa matshwenyeho;

o nteela hare, o a ntopolla.

₈Ke tla o ruta, ke o bontshe tsela;

ke tla o eletsa, ke o bee leihlo.

₉O se ke wa tshwana le pere

kapa mmeile,

tsona di hlokang kelello,

di thapiswang ka tomo le marapo;

ho seng jwalo o ke ke wa di laola.

₁₀Mahlomola a ya kgopo a mangata,

athe ya tshepileng Morena

o teetswe hare ke mohau wa hae.

₁₁Thabelang Morena, le nyakalle,

le nyakalle lona ba lokileng;

le etse ditlatse, lona ba pelo di ntle.

₁Etsetsang Morena ditlatse,

lona ba lokileng,

ho mo rorisa ho tshwanela

ba pelo di ntle.

₂Bokang Morena ka harepa,

mo rokeng ka seletsa

se kgwele di leshome.

₃Mmineleng sefela se setjha,

letsang ka bokgabane,

le etse mehoo ya thabo.

₄Efela lentswe la Morena le lokile,

mesebetsi yohle ya hae

ke ya nnete.

₅O rata ho loka le toka;

lefatshe lohle

le tletse mohau wa Morena.

₆Mahodimo a entswe

ka lentswe la Morena,

le mabotho wohle a wona

ka polelo ya molomo wa hae.

₇Morena a bokella metsi a lewatle

jwalokaha eka o a tshetse lekukeng,

a boloka madiba madumeleng a hae.

₈Lefatshe lohle

le ke le tshabe Morena,

baahi bohle ba lona ba mo hlomphe.

₉O ne a bue, mme tsa eba teng;

a laela, mme tsa hlaha.

₁₀Morena o nyopisa merero ya ditjhaba,

o folodisa mehopolo ya merabe.

₁₁Merero ya Morena e tiile kamehla,

mehopolo ya pelo ya hae

ke ya kamehla.

₁₂Ho lehlohonolo setjhaba

seo Morena e leng Modimo wa sona,

morabe oo a ikgethetseng wona,

a ikgethela wona ho ba leruo la hae.

₁₃Morena o tadima a le mahodimong,

a bone bana bohle ba batho;

₁₄a le leahong la hae

o sheba baahi bohle ba lefatshe.

₁₅Ke yena ya bopileng pelo tsa bona,

ya tsebang mesebetsi

yohle ya bona.

₁₆Kgosi ha e ke a fenye,

ha e ke e fenye

ka baka la dimphihadi tsa yona,

mohale ha a ke a hlole,

ha a ke a hlole

ka baka la bonatlahadi ba hae.

₁₇Ke lefeela ho tshepa ho pholoswa

ke pere ya ntwa,

e ke ke ya pholosa motho

ka matlahadi a yona.

₁₈Morena o beile leihlo la hae

ho ba mo tshabang,

bona ba tshepileng mohau wa hae,

₁₉e le hore a tle a ba lopolle lefung,

le ho ba phedisa nakong ya tlala.

₂₀Meya ya rona e lebeletse Morena,

e leng yena thuso le thebe ya rona.

₂₁Pelo tsa rona di a mo thabela,

re tshepile lebitso la hae le halalelang.

₂₂Morena, mohau wa hao

o ke o be le rona,

hobane re tshepile wena.

₂Ke tla boka Morena ka nako tsohle,

ke nne ke mo rorise kamehla.

₃Ke ithorisa ka Morena,

ba eisehang ba ke ba utlwe,

mme ba thabe.

₄A re tlotliseng Morena re le mmoho,

a re phafeng lebitso la hae,

re le phafe hammoho.

₅Ke ile ka batla Morena,

mme a nkaraba,

a ntopolla matswalong wohle a ka.

₆Ba tadimang ho yena

ba kganya kgotso,

mahlong a bona dihlong ha di yo.

₇Motho wa batho

ha a ipiletsa ho Morena,

Morena o a mo utlwa,

o mo pholosa

matshwenyehong wohle a hae.

₈Lengeloi la Morena

le sireletsa kamahohle

ba mo tshabang,

mme le a ba namolela.

₉Latswang, le utlwe

molemo wa Morena!

Ho lehlohonolo motho

ya tshabelang ho yena.

₁₀Tshabang Morena,

lona bahalaledi ba hae,

hobane ba mo tshabang

ha ba hloke letho.

₁₁Leha barui ba ka futsaneha, ba lapa,

ba batlang Morena ba ke ke ba hloka,

ba ke ke ba hloka letho le molemo.

₁₂Tloong, bana ba ka, le mmamele,

ke tla le ruta ho tshaba Morena.

₁₃Ke mang wa lona

ya lakatsang ho phela,

ya ratang ho bona matsatsi a thabo?

₁₄Tshwara leleme la hao

le se bue tse mpe,

le molomo wa hao

o se bue leshano.

₁₅Furalla bobe, o etse botle;

batla kgotso, o e pheelle.

₁₆Morena o beile leihlo la hae

ho ba lokileng,

o sekehetse sello sa bona tsebe.

₁₇Sefahleho sa Morena se sosobane,

se sosobanetse ba etsang bobe,

hore a ba hlakole lefatsheng,

ba se hlole ba hopolwa.

₁₈Ha ba lokileng ba lla,

Morena o a ba utlwa;

o ba lopolla

matshwenyehong wohle a bona.

₁₉Morena o haufi

le ba feletsweng ke tshepo,

o pholosa ba meya e tetebetseng.

₂₀Mahlomola a ya lokileng a mangata,

empa Morena o mo lopolla

ho wona wohle.

₂₁O baballa masapo wohle a hae,

ha ho le le leng la wona

le tla robeha.

₂₂Bobe bo tla timetsa ya kgopo,

ba hloileng ya lokileng

ba tla ahlolwa.