Bible Reading Plan – Day 103

Ke a o rata Morena,

wena matla a ka.

₃Morena ke lehaha la ka,

ke qhobosheane ya ka,

ke monamoledi wa ka.

Modimo wa ka ke lefika la ka,

leo ke tshabelang ho lona;

Morena ke thebe ya ka,

ke lenaka la ka le ntwanelang,

ke seqhobo sa ka.

₄Ke ipileditse ho Morena

ya lokelang ho roriswa,

mme ka pholoswa direng tsa ka.

₅Maqhubu a lefu a ne a ntikile,

phororo tsa timelo di ne di nkukile.

₆Maraba a lefu a ne a mpotapotile,

difi tsa lefu di ne di ntjhehile.

₇Makaqabetsing a ka

ka ipiletsa ho Morena,

ka llela Modimo wa ka

hore a nthuse;

a utlwa lentswe la ka

a le ka tempeleng ya hae,

sello sa ka sa fihla tsebeng tsa hae.

₈Lefatshe la reketla, la thothomela,

metheo ya dithaba ya tsukutleha,

ya reketla, hobane a halefile.

₉Mosi wa foqoha ka nkong tsa hae,

mollo o timetsang

wa betseha ka hanong la hae,

mashala a hlenneng

a tswa ka ho lona.

₁₀A phetla mahodimo,

a theohela fatshe,

leru le letsho le le maotong a hae;

₁₁a fofa a palame kerubime,

a hoballa a le mapheong a moya.

₁₂Lefifi a le etsa lesira la hae,

maru a matsho a dusang pula,

wona a a etsa tente ya hae;

₁₃maru a apolwa ke kganya

e mo etellang pele,

ha na sefako sa mashala a tukang.

₁₄Morena a thwathwaretsa,

a thwatharetsa a le mahodimong,

Ya Hodimodimo

a utlwahatsa lentswe la hae;

₁₅a fula ka metsu ya hae,

dira tsa qhalana,

a betsa mahadima,

mme tsa phasaphasa.

₁₆Madiba a mawatle

a bonahala tlasetlase,

metheo ya lefatshe ya phetleha,

ha ho omana wena Morena,

ha ho foka moya

o tswang ka nkong tsa hao.

₁₇Morena a nnanabela a le hodimo,

a nnanabela a ntshwara,

a nkinola metsing a lewatle;

₁₈a nnamolela sereng sa ka se matla,

ho ba ntlhoileng,

ba neng ba mphekisa.

₁₉Ba mphutuhela mohla tlokotsi ya ka,

empa Morena a nthusetsa;

₂₀a ntokolla, a mpholosa,

a mpholosa hobane a nthata.

₂₁Morena o mputsitse

ho ya ka ho loka ha ka,

o mpuseleditse

ho ya ka ho hloka molato ha ka.

₂₂Ke tiiseditse tseleng ya Morena,

ha ke a etsa bokgopo,

ka arohana le Modimo wa ka.

₂₃Ke fadimehetse

kahlolo tsa hae tsohle,

ha ke a qhelela taelo tsa hae kathoko.

₂₄Mahlong a hae ha ke na kodi,

ke ipolokile ke se na molato.

₂₅Morena o mputsitse

ho ya ka ho loka ha ka,

hobane o a bona hore ke hlwekile.

₂₆Ho ya tshepahalang, o a tshepahala;

ho ya se nang kodi, o hloka kodi.

₂₇Ho ya hlwekileng, o hlwekile;

empa ho molotsana, o masene.

₂₈Ke wena ya pholosang

setjhaba se hlophehileng,

empa o kokobetsa baikgohomosi.

₂₉Morena, ke wena lebone la ka,

Modimo wa ka o bonesa lefifi la ka.

₃₀Ka thuso ya hao

nka thula dira tsa ka,

ka thuso ya Modimo wa ka

nka tlola lerako.

₃₁Tsela tsa Modimo di phethehile,

tshepiso tsa Morena ke tsa nnete;

yena ke thebe

ya bohle ba tshabelang ho yena.

₃₂Modimo ke mang,

haese Morena?

Lefika ke mang,

haese Modimo wa rona?

₃₃Ke yena Modimo ya mmatlafatsang,

ya ntsamaisang tseleng e ntle;

₃₄ya potlakisang maoto a ka

jwaloka a dikgama,

ya mpeang hodima dihlaba;

₃₅yena ya nthutang ho lwana,

yena ya nthutang

ho hula seqha sa lethose.

₃₆O nnea thebe ya hao e pholosang,

letsoho la hao le letona

le a ntshehetsa,

paballo ya hao e a nkgodisa.

₃₇O ntlhekela tsela e batsi,

maoto a ka ha a thelle.

₃₈Ke lelekisa dira tsa ka,

ke be ke di tshware;

ha ke kgutle ke eso di timetse.

₃₉Ke a di hlathaka, di sitwa ho tsoha,

di wela tlasa maoto a ka.

₄₀O mmatlafaletsa ntwa,

ba ntwantshang o ba bea tlasa ka.

₄₁O etsa hore dira tsa ka

di ntshupe ka direthe,

ba ntlhoileng ke a ba timetsa.

₄₂Ba llela thuso, ba hloka mopholosi;

ba llela Morena, ha a ba arabe.

₄₃Ke ba thumisa jwaloka lerole,

lerole le fefolwang ke moya,

ke ba hatakela

jwaloka seretse se tseleng.

₄₄O nnamolela

meferefereng ya setjhaba,

o nketsa mmusi wa ditjhaba;

ditjhaba di a ntshebeletsa,

ditjhaba tseo ke neng ke sa di tsebe.

₄₅Hang ha di nkutlwa

di a mmamela;

di ipea tlasa puso ya ka

ha di mpona.

₄₆Ditjhaba di kgathala matla,

di tswa di thothomela

qhobosheaneng tsa tsona.

₄₇Modimo o a phela!

Ho bokwe Lefika la ka!

Modimo, mopholosi wa ka,

a ke a thoholetswe!

₄₈Modimo ya ntshitsang

ka diphetetso,

ya beang ditjhaba tlasa ka.

₄₉O nnamolela direng tsa ka,

o mphahamisetsa kahodimo,

kahodimo ho ba ntwantshang,

o nnamolela diatleng tsa ya sehloho.

₅₀Ka baka leo,

ke tla o boka hara ditjhaba,

ke roke lebitso la hao Morena,

₅₁wena ya neang kgosi ya hao,

ya e neang tlholo e kgolo,

ya bontshang mohau

ho motlotsuwa wa hao,

ho Davida le ditloholo tsa hae

kamehla le mehla.

₂Mahodimo a phatlalatsa

tlotla ya Morena,

sebaka sa lehodimo se a bolela,

se bolela mosebetsi wa diatla tsa hae;

₃letsatsi ka leng le phetela le leng,

bosiu ka bong bo tsebisa bo bong,

₄ho se puo, ho se polelo,

ho se mantswe a utlwahalang.

₅Empa modumo wa tsona

o anetse lefatshe lohle,

polelo tsa tsona di finyeletse,

di finyeletse pheletsong tsa lefatshe.

Mahodimong, Modimo

o hlometse letsatsi tente,

₆mme lona le ka monyadi

a etswa leqatheng,

jwaloka mohale,

le thabela ho qeta tsela ya lona.

₇le tjhaba ntlheng e nngwe

ya mahodimo,

le potoloha ho fella ntlheng e nngwe;

ha ho letho

le ka balehang mofuthu wa lona.

₈Molao wa Morena o phethehile,

ke mmusapelo;

temoso tsa Morena di a tshepahala,

di hlalefisa sethoto.

₉Melao ya Morena e lokile,

e hlatswa pelo;

taelo ya Morena e hlakile,

e edisa mahlo.

₁₀Ho tshaba Morena

ke ntho e molemo,

e ke keng ya fetoha ho isa kgale;

dikahlolo tsa Morena ke tsa nnete,

kaofela ha tsona di lokile.

₁₁Di kgahleha ho feta kgauta,

ho feta le kgauta

e hlwekisitsweng haholo;

di monate ho feta mahe a dinotshi,

mahe a rothang kgekgeng ya tsona.

₁₂Di ruta mohlanka wa hao,

ya di bolokang

o fumana moputso o moholo.

₁₃Empa ke mang

ya ka elellwang diphoso tsa hae?

Ako ntokolle

ho tseo ke sa di tsebeng.

₁₄Phemisa mohlanka wa hao,

o mo phemise boikgantsho,

o se ke wa dumella hore bo mpuse.

Kahoo ke tla hloka kodi,

ke hloke molato wa sebe se seholo.

₁₅Ako kgahlwe ke mantswe

a tswang molomong wa ka,

le ke menahano e ka pelong ya ka,

wena Morena, lefika la ka,

le molopolli wa ka.

₂Morena a ke a o arabe

tsatsing la matshwenyeho,

lebitso la Modimo wa Jakobo

le o sireletse.

₃A ke a o thuse a le Sehalalelong,

a o tshehetse a le Sione.

₄A ke a hopole

dinyehelo tsohle tsa hao,

a thabele ditjheso tsa hao.

₅A ke a o fe

se ratwang ke pelo ya hao,

a phethahatse merero yohle ya hao.

₆Re ke re etsetse

tlholo ya hao ditlatse,

re phahamise mekgele

ka lebitso la Modimo,

bitso la Modimo wa rona.

Morena a ke a phethahatse

dikopo tsohle tsa hao.

₇Jwale ke a tseba

hore Morena o nea tlholo,

o e nea Motlotsuwa wa hae,

o mo arabela a le sehalalelong,

a le sehalalelong sa hae

sa lehodimo.

O mo arabela ka ketso

tse pholosang,

ketso tsa letsoho la hae le letona.

₈Ba bang ba tshepile kariki tsa ntwa,

ba bang ba tshepile dipere,

empa rona re tshepile

lebitso la Morena,

lebitso la Morena Modimo wa rona.

₉Bona ba tla kgothometseha, ba we,

empa rona re tla ema re tiile.

₁₀Morena, ako nee kgosi tlholo;

re arabele ha re ipiletsa ho wena.

₂Kgosi e thabela

matla a hao Morena,

e nyakallela

thuso ya hao hakaakang!

₃O e neile se ratwang

ke pelo ya yona,

ha o a ka wa e hanela kopo

e tswang molomong wa yona.

₄O kgahlanyeditse kgosi

ka mahlohonolo,

wa e rwesa mofapahlooho

wa kgauta e hlwekisitsweng.

₅E kopile bophelo ho wena,

mme o e file bona,

wa e ekeletsa ditshiu,

kamehla le mehla.

₆Tlotla ya yona e kgolo

ka thuso ya hao,

o e apesitse kganya le hlompho.

₇O e neile mahlohonolo ho isa kgale,

wa e thabisa haholo

ka boteng ba hao.

₈Kgosi e tshepile Morena,

ka baka la mohau

wa Ya Hodimodimo,

e ke ke ya sisinngwa.

₉Letsoho la hao, kgosi,

le tla fihlela dira tsohle tsa hao,

letsoho la hao le letona

le tla fihlela bohle,

bohle ba o hloileng;

₁₀hang ha o hlaha, o tla ba fedisa;

o ba fedise

eka ba ka seboping sa mollo.

Morena o tla ba metsa ha a halefile,

mollo o ba tjhese.

₁₁O tla hlakola

bana ba bona lefatsheng,

le ditloholo tsa bona

hara bana ba batho.

₁₂Ha ba rera ho o etsetsa bobe,

ha ba loha mano,

ba ke ke ba atleha;

₁₃o tla etsa hore ba o supe ka direthe,

o hule seqha sa hao ho ba fula.