Bible Reading Plan – Day 101

₁Ho lehlohonolo motho

ya sa lateleng dikeletso

tsa ba kgopo,

ya sa tsamayeng

tseleng ya baetsadibe,

ya sa duleng mokgatlong wa basomi;

₂a mpa a thabela Molao wa Morena,

Molao oo a o nahana

motsheare le bosiu.

₃Eo o jwaloka sefate se hlomilweng

pela metsi a nwesetsang,

se behang ditholwana

ka nako ya tsona,

seo mahlaku a sona a sa poneng.

Yena o atleha ho tsohle

tseo a di etsang.

₄Ba kgopo bona ha ba jwalo;

empa ba jwaloka mmoko

o fefolwang ke moya.

₅Kahoo ba kgopo ba ke ke

ba phema kahlolo,

baetsadibe ba ke ke

ba balellwa le ba lokileng;

₆hobane Morena o tseba tsela

ya ba lokileng,

athe tsela ya ba kgopo

e isa timelong.

₁Moferefere ke wa eng hara ditjhaba?

Matjhaba a rerelang

ntho tsa mafeela?

₂Dikgosi tsa lefatshe

di eme ka maoto;

babusi, ba le mmoho,

ba rera Morena

le Motlotsuwa wa hae, ba re:

₃“A re itokolleng ditlamong tsa bona,

re lahleng joko ya bona.”

₄Ya dutseng teroneng, lehodimong,

o a ba tsheha,

Morena o a ba soma.

₅Jwale o bua le bona ka kgalefo,

ka bohale ba hae o a ba tshosa, o re:

₆“Thabeng ya ka e halalelang,

thabeng ya Sione,

nna ke beile kgosi ya ka.”

₇Yona e re: “A nke ke phatlalatse

taelo ya Morena.

“O itse ho nna: ‘O mora wa ka;

kajeno ke o tswetse.

₈Nkope, ke tla o nea ditjhaba

e be lefa la hao,

le lefatshe ka bophara ba lona

e be leruo la hao.

₉O tla di busa ka lere la tshepe,

o di pshatle

jwaloka nkgo ya letsopa.’ ”

₁₀Jwale he, halefang, lona dikgosi;

eletsehang, lona babusi ba lefatshe.

₁₁Sebeletsang Morena ka tshabo,

le itihele maotong a hae

ka thothomelo.

₁₂Ho seng jwalo o tla halefa,

mme le timelle tseleng ya lona,

hobane kgalefo ya hae

e phakisa ho tuka.

Ho lehlohonolo bohle

ba tshabelang ho yena.

₂Morena, dira tsa ka

di ngata hakaakang!

Ba bangata ba ntsohelang matla,

₃ba bangata ba buang ka nna, ba re:

“Modimo ha a na ho mo pholosa.”

₄Empa wena Morena,

o thebe e ntshireletsang,

o mpha seriti, o ntsosa molota.

₅Ha ke ipiletsa ho Morena,

o nkaraba a le thabeng ya hae

e halalelang.

₆Ke ye ke ithoballe, ke kgalehe,

ke be ke itsohele,

hobane Morena o na le nna.

₇Ha ke tshabe diketekete tsa batho

tse ntikileng kamahohle.

₈Thusa, Morena!

O mpholose, Modimo wa ka,

wena ya jabelang

dira tsa ka tsohle marameng,

ya pshatlang mehlaare ya ba kgopo.

₉Pholoho e tswa ho Morena.

Tlhohonolofatso ya hao

e ke e be hodima setjhaba sa hao.

₂Oho, Modimo,

mosireletsi wa ditokelo tsa ka,

ako nkarabe ha ke ipiletsa ho wena.

O ntokolotse matshwenyehong a ka;

nkgauhele, o mamele thapelo ya ka.

₃Lona batho ting!

le tla ntlontlolla ho fihlela neng,

le rate mafeela,

le mathele mashano?

₄Tsebang hore Morena

o etsetsa motshepuwa wa hae

tse hlollang,

Morena o a mmamela

ha ke ipiletsa ho yena.

₅Tshabang Modimo,

le se hlole le etsa sebe;

tholang, mme le thuise tsena

ka dipelong,

le di thuise ha le le diphateng.

₆Nyehelang ka mahlabelo

ka mokgwa o lokelang,

le nyehele ka wona,

le tshepe Morena.

₇Ba bangata ba re:

“Re tla fumantshwa lehlohonolo

ke mang?”

Oho, Morena,

re phuthollele sefahleho sa hao.

₈O thabisitse pelo ya ka

ho feta mohla batho

ba atetsweng ke koro le veine.

₉Ke tla ithoballa ka kgotso,

ke kgalehe hanghang,

hobane Morena ke wena feela,

ke wena feela

ya ntshireletsang kahohle.

₂Oho, Morena,

ako sekehele mantswe a ka tsebe,

o mamele mefehelo ya ka.

₃Wena kgosi ya ka le Modimo wa ka,

ako utlwe ha ke llela thuso.

Ke rapela wena Morena,

₄hoseng o utlwa sello sa ka;

hoseng ke lokisa sehlabelo,

mme ke lebella karabelo ya hao.

₅O Modimo ya sa thabeleng bokgopo;

motho e mobe

o ke ke wa mo amohela.

₆Baikgohomosi ba ke ke ba ema

pela sefahleho sa hao;

o hloile bohle

ba etsang tse sa lokang.

₇O timetsa ba leshano;

Morena o nyonya babolai

le bathetsi.

₈Empa nna nka kena tlung ya hao,

ka baka la boholo ba mohau wa hao.

Ke tla o kgumamela ka tshabo,

ka Tempeleng ya hao e halalelang.

₉Morena, ako ntataise

ka ho loka ha hao,

ka baka la dira tsa ka tse ntaletseng.

Batalatsa tsela ya hao kapele ho nna.

₁₀Melomong ya dira tsa ka

ha ho nnete e tswang,

dipelong tsa tsona di rera ho timetsa,

mmetso ya tsona

ke lebitla le ahlameng,

maleme a tsona a monate.

₁₁Modimo, di ahlolele

molato wa tsona,

di we ka baka la merero ya tsona.

Di leleke

ka baka la ditlolo tsa tsona tse ngata,

hobane di o teletse.

₁₂Empa bohle ba tshabelang ho wena

ba ke ba thabe,

bao o ba sireletsang

ba se kgaotse ho etsa ditlatse,

bohle ba ratang lebitso la hao

ba o nyakallele.

₁₃Ke wena Morena,

ya hlohonolofatsang ya lokileng,

o mo sireletsa ka mohau wa hao

jwalokaha eka ke thebe.

₂Oho, Morena,

o se ke wa nkotla o nkgalefetse,

o se ke wa nkgalemela o le bohale.

₃Nkgauhele Morena,

hobane ke feletswe ke matla;

mphodise Morena,

hobane ke opelwa ke masapo,

₄mme ke sarelwa haholo.

Empa wena Morena,

o tla dieha ho fihlela neng?

₅Kgutla Morena, o nnamolele,

o mpholose

ka baka la mohau wa hao.

₆Bafu ba ke ke ba o hopola;

ke mang ya ka o tlotlisang

Nqalong ya Bafu?

₇Ke kgathetse ke ho nna ke fehelwa;

ka masiu wohle ke kolobisa diphate,

ke kolobise diphate tsa ka ka meokgo,

ke tshela mosamo wa ka

ka dikgapha.

₈Mahlo a ka a motela ke maswabi,

a fifala ka baka la batubi ba ka.

₉Tlohang ho nna,

lona bohle ba kgopo,

hobane Morena o utlwile sello sa ka.

₁₀Morena o utlwile kopo ya ka,

Morena o amohetse thapelo ya ka.

₁₁Dira tsa ka tsohle

di tla hlajwa ke dihlong,

di tshohe haholo;

di tla tjhetjha,

di hlajwe ke dihlong hanghang.

₂Morena Modimo wa ka,

ke tshabela ho wena,

ke tshabela ho wena, ako mpholose,

o nnamolele

ho bohle ba ntlhorisang;

₃esere ba mphamola jwaloka tau,

ba ntsekolla ho se ya nnamolelang.

₄Morena Modimo wa ka,

haeba ke entse tsena:

ha ke sebeditse bokgopo

ka diatla tsa ka,

₅ha ke entse mothusi wa ka hampe,

ha ke senyeditse sera sa ka

ho se lebaka,

₆dira di ke di ntelekise, di ntshware,

di ke di nkgatakelle fatshe,

di mpolaye, di nkepele leroleng.

₇Thusa, Morena, o ntse o halefile!

O tsohele dira tsa ka tse bohale,

o di tsohele matla;

tsoha Modimo wa ka,

wena ya dihang kahlolo.

₈Phutheho ya ditjhaba

e ke e o bokanele;

wena o dule hodimodimo,

o e okamele.

₉Morena o ahlola ditjhaba.

Nkahlolele, Morena,

ho ya ka ho loka ha ka,

le ho ya ka ho hloka kodi ha ka.

₁₀Bobe ba ba kgopo bo ke bo fele,

mme o tiise ba lokileng,

wena ya hlahlobang moya le pelo,

wena Modimo ya lokileng.

₁₁Thebe ya ka ke Modimo,

ya pholosang ba pelo di ntle.

₁₂Modimo ke moahlodi ya lokileng,

ya ahlolang kamehla yohle.

₁₃Ha motho a sa bake,

Modimo o tla leotsa sabole ya hae,

a hule seqha sa hae, a se tjhehe;

₁₄a lokise dibetsa tse bolayang,

metsu ya hae

a e etse ditsenene tse malakabe.

₁₅Bonang, e mobe

o emola tse manyala,

o emara bokgopo,

mme o tswala thetso.

₁₆O tjhekile lemena, a le tebisa,

a wela hona lemeneng

leo a le tjhekileng.

₁₇O jelwe ke bokgopo ba hae,

sehloho sa hae se mo wetse hodimo.

₁₈Ke boka Morena

ka baka la toka ya hae,

ke roka lebitso la Morena

Ya Hodimodimo.

₂Morena, monga rona,

lebitso la hao le tlotleha hakaakang,

le tlotleha lefatsheng lohle!

Kganya ya hao,

e kahodimo ho mahodimo,

₃e bolelwa ka melomo ya bana

le ya masea.

O hahile qhobosheane

ho thibela dira tsa hao,

wa e haha

ho sitisa sera le moiphetetsi.

₄Ha ke boha mahodimo a hao,

mosebetsi wa diatla tsa hao,

ke boha kgwedi le dinaledi

tseo o di beileng madulong a tsona,

₅ebe motho e ne e le eng,

hoo o ka mo hopolang?

Ngwana motho e ne e le eng,

hoo o ka mo hlokomelang?

₆O mo entse

ya katlasana ho mangeloi,

wa mo rwesa mofapahlooho,

mofapahlooho wa tlotla,

wa mo rwesa mofapahlooho,

mofapahlooho wa hlompho.

₇O mo neile puso

hodima mesebetsi ya diatla tsa hao,

wa bea tsohle katlasa maoto a hae:

₈manku le makgomo wohle,

le tsona diphoofolo tsa naha;

₉nonyana tse sepakapakeng,

le ditlhapi ka lewatleng,

le tsohle tse tsamayang ka lewatleng.