UZAKARIYA 9

₃ITire lazakhela inqaba,

lanqwabela isiliva njengothuli,

negolide elicwengekileyo njengodaka lwasezitaladini.

₄Bheka, iNkosi iyakulaphuca,

iphonse imfuyo yalo elwandle,

lona lidliwe ngumlilo.

₅IAshikeloni liyakukubona, lesabe,

neGaza futhi, beselithuthumela kakhulu,

kanye ne-Ekroni, ngokuba ukwethemba kwalo kuyakujabha;

inkosi iyakubhubha eGaza,

neAshikeloni aliyikuhlalwa.

₆EAshidodi kuyakuhlala umntwana wesihlahla;

ngiyakunquma ukuziphakamisa kwamaFilisti.

₇Ngiyakukhipha igazi labo emlonyeni wabo,

nezinengiso zabo phakathi kwamazinyo abo,

nabo uqobo babe-yinsali kuNkulunkulu wethu,

babe-ngababusi kwaJuda

nase-Ekroni njengamaJebusi.

₈Ngiyakumisa ngibe-yinqaba yendlu yami,

ukuze kungabikho odlulayo nobuyayo;

akusayikudlula-mcindezeli kubo,

ngokuba sengibonile ngawami amehlo.

₉Thokoza kakhulu, ndodakazi yaseSiyoni;

jabula nokujabula, ndodakazi yaseJerusalema;

bheka, iNkosi yakho iza kuwe,

ilungile, inensindiso,

ithobekile, ikhwele imbongolo,

ithole, inkonyane yembongolokazi.

₁₀Ngiyakunquma inqola kwaEfrayimi

nehashi eJerusalema,

nomnsalo wokulwa uyakunqunywa;

iyakukhuluma ukuthula kwabezizwe,

nokubusa kwayo kuyakusukela elwandle kuze kufike elwandle,

kusukela eMfuleni* kuze kufike emajukujukwini omhlaba.

₁₁Nawe, ngenxa yegazi lesivumelwano sakho,

ngikhiphile iziboshwa zakho emgodini okungekho kuwo amanzi.

₁₂Buyelani enqabeni, ziboshwa esezinethemba;

namuhla ngiyanitshela ukuthi ngiyakubuyisela kini okuphindwé kabili.

₁₃Ngokuba ngizigobela uJuda njengomnsalo,

ngibeka uEfrayimi kuwo,

ngivusela amadodana akho, Siyoni,

kumadodana akho, Javani,

ngikwenze inkemba yeqhawe.

₁₄UJehova abesebonakala phezu kwabo,

umcibisholo wakhe uphume njengonyazi;

iNkosi uJehova iyakubetha icilongo,

ihambe ngezivunguvungu zaseningizimu.

₁₅UJehova-Sebawoti uyakubavikela,

badle, banyathele phansi amatshe endwayimana;

bayakuphuza igazi labo njengewayini,

bagcwale njengemikhele,

njengamagumbi ealtare.

₁₆UJehova uNkulunkulu wabo uyakubasindisa ngalolosuku

njengomhlambi wabantu bakhe,

ngokuba bangamatshe omqhele

abengezela phezu kwezwe lakhe.

₁₇Yeka ubuhle balo!

Yeka ukubukeka kwalo!

Amabele abo ayakuhlumisa izinsizwa zalo,

newayini elisha izintombi zalo.