UNUMERI 27

₁Kwase kusondela amadodakazi kaSelofehadi kaHeferi kaGileyadi kaMakiri kaManase, awemindeni kaManase indodana kaJosefa; lawa angamagama amadodakazi akhe: oMahela, noNowa, noHogila, noMilka, noTirisa.

₂Ema phambi kukaMose naphambi kukaEleyazare umpristi, naphambi kwezikhulu, naphambi kwayo yonke inhlangano ngasemnyango wetende lokuhlangana, athi:

₃Ubaba wafela ehlane; wayengekho phakathi kweviyo labahlanganyela uJehova kulo iviyo likaKora; kepha wafa ngesakhe isono engenamadodana.

₄Igama likababa liyakusulelwani emndenini wakhe, lokhu engenandodana na? Siphe ifa phakathi kwabafowabo bakababa.

₅UMose wayiletha indaba yawo phambi kukaJehova.

₆UJehova wakhuluma kuMose, wathi:

₇Amadodakazi kaSelofehadi akhulumé kahle; uyakuwanika nokuwanika izwe eliyifa phakathi kwabafowabo bakayise ngokulidlulisela kuwo ifa likayise.

₈Wokhuluma kubantwana bakwaIsrayeli ngokuthi: Uma umuntu efa engenandodana, wolidlulisela ifa lakhe kuyo indodakazi yakhe.

₉Uma engenandodakazi, niyakunika abafowabo ifa lakhe.

₁₀Uma engenabafowabo, niyakunika abafowabo bakayise ifa lakhe.

₁₁Uma uyise engenabafowabo, niyakunika isihlobo sakhe esiseduze naye emndenini wabo ifa lakhe, alidle. Lokhu kuyakuba-yisimiso sesahlulelo kubantwana bakwaIsrayeli, njengalokho uJehova emyalile uMose.

₁₂UJehova wathi kuMose: Khuphukela entabeni yaseAbarimi, ubheke izwe engibanikile lona abantwana bakwaIsrayeli.

₁₃Lapho ulibonile, nawe uyakubuthelwa kubantu bakini, njengalokho wabuthwa uAroni,

₁₄ngokuba ehlane laseSini ekulweni kwenhlangano nahlubuka ezwini lami lokungingcwelisa ngasemanzini phambi kwamehlo abo. Lawa angamanzi aseMeriba laseKadeshi ehlane laseSini.

₁₅UMose wayesekhuluma kuJehova, wathi:

₁₆UJehova uNkulunkulu wemimoya yenyama yonke makamise umuntu phezu kwenhlangano,

₁₇ongaphuma phambi kwabo, angene phambi kwabo, abakhiphe, abangenise, ukuze inhlangano kaJehova ingabi-njengezimvu ezingenamalusi.

₁₈UJehova wathi kuMose: Zithabathele uJoshuwa indodana kaNuni, umuntu onomoya, ubeke isandla sakho phezu kwakhe,

₁₉ummise ngaphambi kukaEleyazare umpristi naphambi kwayo yonke inhlangano, umnike isikhundla emehlweni abo.

₂₀Uyakubeka udumo lwakho phezu kwakhe ukuba yonke inhlangano yabantwana bakwaIsrayeli ilalele.

₂₁Uyakuma phambi kukaEleyazare umpristi oyakumbuzela ngokunquma kweUrimi* phambi kukaJehova; ngezwi lakhe bayakuphuma nangezwi lakhe bayakungena, yena nabo bonke abantwana bakwaIsrayeli kanye naye, yebo, yonke inhlangano.

₂₂UMose wenza-ke njengalokho uJehova emyalile; wamthatha uJoshuwa, wambeka phambi kukaEleyazare umpristi naphambi kwenhlangano yonke,

₂₃wabeka izandla zakhe phezu kwakhe, wamnika isikhundla, njengalokho uJehova ekhulumile ngesandla sikaMose.