NGOKUKAMATHEWU 28

₁Kepha ekupheleni kwesabatha ngovivi lolokuqala lweviki kwafika uMariya Magdalena nomunye uMariya, beza ukuyobona iliba.

₂Bheka, kwaba-khona ukuzamazama komhlaba okukhulu, ngokuba ingelosi yeNkosi yehla ezulwini, yeza yagingqa itshe, yahlala phezu kwalo.

₃Ukubonakala kwayo kwakunjengonyazi, nesambatho sayo sasimhlophe njengongqoqwane.

₄Kepha abalindi bathuthumela ngokuyesaba, baba-njengabafileyo.

₅Kodwa ingelosi yaphendula, yathi kwabesifazane: Ningesabi nina; ngokuba ngiyazi ukuthi nifuna uJesu obebethelwe esiphambanweni;

₆kakho lapha, ngokuba uvukile njengokusho kwakhe; zanini nibone indawo lapho ebelele khona.

₇Hambani masinyane, nitshele abafundi bakhe ukuthi uvukile kwabafileyo; bhekani, uyanandulela ukuya eGalile, nizakumbona khona. Bhekani, nginitshelile.

₈Base beshesha bamuka ethuneni benokwesaba nokuthokoza okukhulu, bagijima baya ukubikela abafundi bakhe.

₉Bheka, uJesu wabahlangabeza, wathi: Sanibona. Besondela babamba izinyawo zakhe, bakhuleka kuye.

₁₀Khona uJesu wathi kubo: Ningesabi; hambani, nibikele abafowethu ukuba bahambe baye eGalile; bayakungibona khona.

₁₁Besahamba, bheka, abanye kubalindi bafika emzini, babikela abapristi abakhulu konke okwenzekileyo.

₁₂Sebebuthene namalunga benza icebo, banika amabutho imali eningi,

₁₃bathi: Shonini ukuthi abafundi bakhe beza ebusuku, bameba silele.

₁₄Uma kuzwakala lokho kumbusi, siyakuncengana naye thina, nina ningakhathazeki.

₁₅Ayeseyithatha imali, enza njengokufundiswa kwawo. Lelizwi landa phakathi kwabaJuda kuze kube-namuhla.

₁₆Kepha abafundi abayishumi nanye baya eGalile kuleyontaba uJesu ayebayalele yona;

₁₇sebembona bakhuleka kuye, kepha abanye bangabaza.

₁₈UJesu wasondela, wakhuluma kubo, wathi: Ngiphiwe amandla onke ezulwini nasemhlabeni;

₁₉ngalokho hambani nenze izizwe zonke abafundi, nibabhapathize egameni likaYise neleNdodana nelikaMoya oNgcwele,

₂₀nibafundise ukugcina konke enginiyalé ngakho; bhekani, mina nginani izinsuku zonke kuze kube-sekupheleni kwezwe.